‘Ungesabi’
1. Ngutiphi tinsayeya letifanana netaJeremiya natsi lesingahlangabetana nato?
1 Jeremiya wacale watibona angafaneleki ngalesikhatsi aniketwa sabelo sekuba ngumphrofethi. Kodvwa Jehova wamcinisekisa watsi: ‘Ungesabi,’ futsi wamcinisa ngemusa kute akwati kufeza sabelo sakhe. (Jer. 1:6-10) Esikhatsini setfu, emahloni nobe kungatetsembi kungayitsintsa indlela lesihlanganyela ngayo ensimini. Ngaletinye tikhatsi, kwesaba kutsi bantfu batawusabela njani nobe batawusitsatsa njani, kungasenta sesabe kushumayela. Singakuncoba njani kwesaba lokunjalo, futsi ngutiphi tibusiso lesitawutitfola?
2. Kulungiselela kungasisita njani kutsi sinciphise kwesaba kwetfu ensimini?
2 Lungiselela Kusenesikhatsi: Kulungiselela kahle kungasisita kutsi sinciphise kwesaba kwetfu. Nasi sibonelo: Nasitihlolisisa kusenesikhatsi tintfo letingashiwo bantfu labetama kusivimba kutsi sicoce nabo, sitawukulungela kubaphendvula nasebasiphikisa. (Taga 15:28) Kungani ungaprakthizi ngesikhatsi sekuKhonta Kwemndeni kute ulungiselele tinsayeya longahlangabetana nato esikolweni kanye nasensimini?—1 Phet. 3:15.
3. Kwetsembela kuJehova kusisita njani kutsi sincobe kwesaba?
3 Yetsembela KuJehova: Kwetsembela kuNkulunkulu wetfu kutawusisita kutsi sincobe kwesaba lesinako. Jehova wasicinisekisa ngekutsi utawusisita. (Isa. 41:10-13) Lesi sivikelo lesincono kakhulu kunato tonkhe lebesingaba nato! Ngetulu kwaloko, Jesu wasicinisekisa ngekutsi ngisho nobe kungavela timo lesingakatilindzeli, umoya longcwele waNkulunkulu utawusisita kutsi sishumayele ngendlela lefanele. (Mak. 13:11) Ngako-ke, wucele njalo umoya longcwele waJehova.—Luk. 11:13.
4. Ngutiphi tibusiso lesititfola ngekuchubeka ngekutimisela ensimini nanobe sinebumatima?
4 Tibusiso: Nasichubeka ngekutimisela ensimini nanobe sinebumatima, siyacina kute sikwati kutincoba ngemphumelelo letinye tilingo. Sakha imfanelo yesibindzi, lokuyimfanelo yalabo labagcwaliswe ngemoya longcwele. (Imis. 4:31) Ngetulu kwaloko, nasincoba kwesaba kwetfu ngelusito lwaJehova, sicinisa kukholwa kanye nekwetsembela kwetfu emandleni akhe. (Isa. 33:2) Siphindze sitfole injabulo kanye nekwenetiseka lokubangelwa kwati kutsi sijabulisa Babe wetfu wasezulwini. (1 Phet. 4:13, 14) Ngako-ke, asingesabi kumemetela umlayeto weMbuso ngesibindzi, futsi sihlale siciniseka ngekutsi Jehova utawusisita.