Emasimi Asamhlophe, Asalungele Kuvunwa
1. Ngumuphi umsebenti lobalulekile lowentiwako?
1 Ngemuva kwekushumayela wesifazane waseSamariya, Jesu watjela bafundzi bakhe: “Phakamisani emehlo enu nibone kutsi emasimi asamhlophe, asalungele kuvunwa.” (Joh. 4:35, 36) Kwakwentiwa umsebenti wekuvuna lotsintsa bantfu labawulalelako umlayeto waNkulunkulu, futsi Jesu abebona kutsi lomsebenti bewutawukwentiwa emhlabeni wonkhe. Njengobe Jesu asesikhundleni sakhe ezulwini, usenesandla kulomsebenti. (Mat. 28:19, 20) Ngutiphi tintfo letiveta kutsi lomsebenti uyachubeka wandza njengobe usondzela ekupheleni?
2. Nguyiphi intfutfuko leveta kutsi umsebenti wekuvuna lowentiwa emhlabeni wonkhe uyandza?
2 Sivuno Semhlaba Wonkhe: Emnyakeni wemsebenti wa-2009, bamemeteli bandze ngemaphesenti langu-3.2, emhlabeni wonkhe. Emaveni lapho umsebenti wekushumayela uvinjelwe khona, kwaba nekwandza kwemaphesenti langu-14. Linani letifundvo teliBhayibheli tasekhaya letatibikwa inyanga ngayinye tendlula ku-7 619 000—lokulinani lelikhulu kunelebamemeteli, futsi licishe lengeteke ngencenye yesigidzi enanini letifundvo letabikwa emnyakeni lowendlulile. Njengobe lomsebenti wandza kakhulu emaveni lamanyenti, kuye kwachubeka kufakwa ticelo tekucela titfunywa telivangeli leticeceshwe eGileyadi. Emasimi lakhuluma letinye tilwimi nawo akhicita kakhulu emaveni lamanyenti. Kuyabonakala kutsi kulesikhatsi sekuphela kwekuvuna, Jehova uyawusheshisa lomsebenti. (Isa. 60:22) Wena unembono lomuhle yini ‘ngemasimi’ lasendzaweni yakini?
3. Labanye bangaphetsa ngekutsini mayelana nekuvuna ensimini yakubo?
3 Sivuno Endzaweni Yakini: Labanye bangase batsi: “Insimi yetfu ayitseli kangako.” Kuliciniso kutsi letinye tindzawo tibonakala tingatseli kunaletinye, nobe tingasatseli njengasesikhatsini lesengcile. Labanye boFakazi bangase baphetse ngekutsi bantfu labebatawulalela kulensimi sebavele basitsatsile sinyatselo, futsi bona sebasalelwe kukhwimita labambalwa nje labasele. Kunjalo yini vele?
4. Ngumuphi umbono lokahle lokufanele sibe nawo ngemsebenti wekushumayela, futsi kungani?
4 Kusukela ekucaleni kwako kute kube sekugcineni, kuvuna kungumsebenti lomkhulu. Naka umuva wekuphutfuma lokulamavi aJesu: “Kuvuna kukhulu, kodvwa tisebenti timbalwa. Ngako-ke ncusani eNkhosini yekuvuna kutsi itfumele tisebenti ekuvuneni kwayo!” (Mat. 9:37, 38) Kusetandleni taJehova, iNkhosi yekuvuna kutsi titselo titawuvela nini futsi kuphi. (Joh. 6:44; 1 Khor. 3:6-8) Uyini-ke umsebenti wetfu? LiBhayibheli liyaphendvula: “Ekuseni hlanyela inhlanyelo yakho, ungayekeli kusebenta lize liyewushona.” (Shu. 11:4-6) Nangabe kuvuna kusondzela ekupheleni kwako, akusiso sikhatsi sekutsi siyekele kusebenta!
5. Kungani kufanele sichubeke sishumayela ngenkhutsalo nasensimini lebonakala ingatseli?
5 Chubeka Uvuna: Ngisho nobe insimi yetfu sesiyihlanganise kanyenti kangakanani futsi bantfu babonakala banganaki, sinesizatfu lesihle sekusebenta ngenkhutsalo nangemuva wekuphutfuma. (2 Thim. 4:2) Tiphitsiphitsi letinkhulu tesimo salelive tenta kutsi bantfu bashintje indlela labacabanga ngayo futsi bacabangisise ngelikusasa. Njengobe bantfu labasha bakhula, bangase bafune kutfola kulondzeka kanye nekuthula kwengcondvo. Kuphikelela kwetfu kungase kubatsintse labanye. Bantfu lebebangalaleli esikhatsini lesengcile bangase balalele esikhatsini lesitako. Ngisho nalabo labangawemukeli ngemabomu umlayeto wetfu bayakudzinga kwecwayiswa.—Hez. 2:4, 5; 3:19.
6. Nangabe insimi yetfu imatima, yini lengasisita kutsi silondvolote inkhutsalo?
6 Nangabe insimi yetfu imatima, yini lengasisita kutsi silondvolote inkhutsalo? Ngetulu nje kwekushumayela emtini ngemuti, singashumayela nangaletinye tindlela, njengasetindzaweni temabhizinisi nobe ngelucingo. Singashintjashintja inshumayelo yetfu kute sibe nendlela lensha yekukhuluma. Singashintja luhlelo lwetfu kute sishumayele ntsambama nobe ngaletinye tikhatsi bantfu labatfolakala ngato emakhaya. Mhlawumbe singakhetsa kufundza lolunye lulwimi kute sikwati kufinyelela labanyenti ngetindzaba letinhle. Singase sikwati kwandzisa umsebenti wetfu ngekuba mahlahlandlela lavamile. Singatfutsela kulenye indzawo lenetisebenti tekuvuna letimbalwa. Nangabe sinembono lofanele ngalokuvuna, sitawetama kuhlanganyela ngalokugcwele kulomsebenti lobalulekile.
7. Kufanele sichubeke kute kube ngunini kulomsebenti wekuvuna?
7 Balimi banesikhatsi lesincane sekuvuna, ngako abaphumuli nobe behlise emandla bate bawucedze umsebenti. Umsebenti wetfu wekuvuna udzinga kutsi sibe nemuva wekuphutfuma lofananako. Kufanele sichubeke kute kube ngunini kulomsebenti wekuvuna? Kute kube ‘sekupheleni kwaletikhatsi,’ futsi kute kufike “kuphela.” (Mat. 24:14; 28:20) NjengeSikhonti saJehova lesihamba embili, natsi sifuna kuwucedza umsebenti lesiphatsiswe wona. (Joh. 4:34; 17:4) Ngako-ke, asichubekeni senta umsebenti wetfu ngenkhutsalo, ngenjabulo, kanye nangesimo lesihle kute kufike kuphela. (Mat. 24:13) Kuvuna kusengakapheli!
[Emavi lahambisana nesitfombe ekhasini 2]
Kusukela ekucaleni kwako kute kube sekugcineni, kuvuna kungumsebenti lomkhulu