Ungakwati Yini Kusita Umuntfu Longakholwa Loshade Nemmemeteli?
1. Kungani kungasiwo emaKhristu lasemindenini leyehlukene ngekwenkholo kuphela lanenshisekelo yekusita bantfu labashade nabo kutsi bemukele emaciniso?
1 Bakhona yini bamemeteli ebandleni lakini labashade nebantfu labangakholwa? Nangabe kunjalo, akungabateki kutsi labamemeteli bayafisa kutsi bangani babo bemshado bahlanganyele nabo ekukhonteni kweliciniso. Kodvwa-ke, akusibo bodvwa labanaleso sifiso. NjengaNkulunkulu, lonkhe libandla lifisa kutsi “bonkhe bantfu basindziswe bafinyelele ekulatini liciniso.” (1 Thim. 2:4) Singabasita njani bantfu labangakholwa labashade nebamemeteli labasebandleni lakitsi?
2. Kuba nelwati kutawusenta njani kutsi sikwati kusita umuntfu longakholwa loshade nemmemeteli?
2 Kwekucala, kufanele setame kutsatsa tintfo ngendlela lomuntfu longakholwa latitsatsa ngayo. Bantfu labanyenti labangakholwa bayayitsandza imindeni yabo, futsi betama kuba bangani bemshado kanye nebatali labakahle. Kungenteka kutsi banetinkholelo letehlukile kunaleto lesinato. Mhlawumbe banelwati loluncane ngaboFakazi BaJehova, ngaphandle nje kwaloko labakutjelwa baphikisi. Labanye baphatseka kabi ngekutsi bangani babo bemshado sebasisebentisa ekukhonteni sikhatsi lebebasicitsa nemindeni yabo. Kuba nelwati kutawusisita kutsi simphatse ngemusa nangenhlonipho umuntfu longakholwa futsi singesabi nasinaye.—Taga 16:20-23.
3. Nguyiphi indlela lencono kakhulu yekusita umuntfu longakholwa loshade nemmemeteli?
3 Mkhatsalele: Ekucaleni, indlela lencono kakhulu yekusita umuntfu longakholwa loshade nemmemeteli kutsi emukele emaciniso, kungaba tento tetfu hhayi kucoca naye ngeliBhayibheli. (1 Phet. 3:1, 2) Kubalulekile kumkhombisa kutsi siyamkhatsalela. Bodzadze ebandleni bangakhatsalela umfati longakholwa, bazalwane nabo bangenta lokufananako endvodzeni lengakholwa. Njani?
4. Singaveta njani kutsi siyamkhatsalela umuntfu longakholwa loshade nemKhristu?
4 Nangabe usengakahlangani nalomuntfu longakholwa, mhlawumbe ungenta njalo nasewukhulume nemKhristu lashade naye. Ungaphatseki kabi nangabe loyo muntfu angasabeli kahle ekucaleni. Kuba nebungani kanye nekumkhatsalela kwetfu kungamenta abatsandze boFakazi BaJehova. (Rom. 12:20) Lamanye emaKhristu lavutsiwe aye ameme umuntfu longakholwa kanye nemndeni wakhe kutsi batewudla ndzawonye, kute betayelane naye futsi bacedze nobe ngukuphi kuphikisa lanako. Esikhundleni sekutsi bakhulume ngetintfo takamoya, bakhuluma ngaloko lakutsandzako. Ngekuhamba kwesikhatsi, nangabe lomuntfu asakhululekile, kungase kucocwe ngemiBhalo. Njengobe sekukhona bantfu labatiko ebandleni, kungenteka kutsi asemukele simemo sekuba khona kuleminye yemihlangano yetfu kute abone loko umfati wakhe lakufundzako. Ngisho nobe angakawemukeli emaciniso, angabongwa ngekutsi uyamsekela umngani wakhe wemshado longumKhristu.
5. Labadzala bangamsita njani umuntfu longakholwa?
5 Labadzala belibandla kufanele babasite bantfu labangakholwa labashade nebamemeteli, futsi baphaphamele ematfuba ekufakaza kubo. Umuntfu longakholwa longazange akwemukele kucoca ngeliBhayibheli, angase atilalele tikhutsato temiBhalo nangabe asesibhedlela nobe anetinkinga temphilo. Nangabe umndeni lowehlukene ngekwenkholo usenkingeni lenjengekushonelwa lilunga lemndeni, labadzala bangacela lona longakholwa kutsi abe khona nakudvudvutwa umndeni.
6. Ngutiphi tizatfu letisenta sifune kusita umuntfu longakholwa loshade nemmemeteli?
6 Asewucabange ngenjabulo letawutfolwa ngumKhristu losebandleni lakitsi nangabe umngani wakhe wemshado asahlanganyela naye ekukhonteni kweliciniso! Lesentakalo lesijabulisako singenta Jehova, tingilosi kanye nabo bonkhe labasebandleni kutsi bajabule kakhulu. (Luk. 15:7, 10) Nangabe lomuntfu longakholwa angawemukeli emaciniso, sitawujabula ngobe imetamo lesiyentako ijabulisa Jehova, ‘longatsandzi kutsi kubhubhe ngisho namunye umuntfu, kodvwa lotsandza kutsi bonkhe bantfu baphendvuke etonweni tabo.’—2 Phet. 3:9.
[Emavi lahambisana nesitfombe ekhasini 6]
Ekucaleni, indlela lencono kakhulu yekusita umuntfu longakholwa loshade nemmemeteli kutsi emukele emaciniso, kungaba tento tetfu hhayi kucoca naye ngeliBhayibheli