Intfo Lengasita Imindeni

1. LiSabatha lamaviki onkhe beliyizuzisa njani imindeni yema-Israyeli?

¹ Kugcinwa kweliSabatha bekuluhlelo lwelutsandvo loluvela kuJehova lebelizuzisa imindeni. Ngalelo langa, ema-Israyeli abephumula emisebentini yawo yamalanga onkhe futsi abeba nesikhatsi sekunaka buhle baJehova kanye nebuhlobo bawo naye. Batali bebangasisebentisa kahle lesikhatsi kute banamatsisele uMtsetfo etinhlitiyweni tebantfwana babo. (Dut. 6:6, 7) LiSabatha belinika bantfu baJehova sikhatsi liviki ngalinye sekutsi banake buhlobo babo naye.

2. LiSabatha lisifundzisani ngaJehova?

² Lamuhla, Jehova akasalindzeli kutsi imindeni igcine liSabatha. Nanobe kunjalo, lowo mtsetfo usifundzisa lokutsite ngaNkulunkulu wetfu. Abesolo anendzaba nenhlalakahle yakamoya yebantfu bakhe. (Isa. 48:17, 18) Lamuhla, kuKhonta Kwemndeni kwakusihlwa kungulenye yetindlela Jehova layisebentisako kute avete kusikhatsalela kwakhe.

3. Iyini injongo yekuKhonta Kwemndeni kwakusihlwa?

³ Iyini Injongo YekuKhonta Kwemndeni Kwakusihlwa? Nga-January 2009, Sifundvo Sencwadzi Selibandla sacala kuchutjwa ngelilanga linye neSikolwa Semsebenti WemaKhristu kanye neMhlangano Wemsebenti. Sizatfu salolushintjo bekukunika imindeni sikhatsi sekutfutfukisa buhlobo bayo naJehova ngekutsi ibeke busuku lobubodvwa evikini kute ibe nekukhonta kwemndeni. Umndeni ngamunye wakhutsatwa kutsi nangabe kungenteka uchube sifundvo semndeni ngelilanga lebelisetjentiselwa sifundvo sencwadzi, kanye nekutsi usebentise lesikhatsi ucoca ngeliBhayibheli ngekungajaki futsi uchube sifundvo lesentelwe kusita umndeni.

4. Kufanele yini kutsi imindeni ichube sifundvo sayo ngeli-awa lelilodvwa nje kuphela? Chaza.

⁴ Kute sibe khona eSifundvweni Sencwadzi Selibandla, besidzinga sikhatsi sekugcoka, sekuhamba kanye nalokunye. Kulabanyenti betfu, kuya kulomhlangano bekudla sikhatsi lesingetulu kweli-awa lebesilicitsa sikuwo. Ngalolushintjo lolwentiwe eluhlelweni lwemihlangano yetfu, sesisebentisa lesikhatsi kute sikhonte Jehova njengemndeni. Ngako-ke, akukafaneli sikhatsi sekuKhonta Kwemndeni sibe li-awa lelilodvwa nje kuphela. Kunaloko, kufanele sicabange ngetidzingo kanye netinkinga temndeni bese sibeka sikhatsi lesenele lesingasisebentisa.

5. Sonkhe lesikhatsi kufanele sicitfwe kucocwa njengemndeni yini? Chaza.

⁵ Sonkhe Lesikhatsi Kufanele Sicitfwe Kucocwa Njengemndeni Yini? Ngesikhatsi bantfu labashadile kanye nemindeni lenebantfwana bacoca ngetihloko letisemiBhalweni ndzawonye, bayakhutsatana. (Rom. 1:12) Umndeni uyasondzelana. Ngako-ke, kucoca ndzawonye ngemiBhalo kufanele kube yincenye lebalulekile yekuKhonta Kwemndeni kwakusihlwa. Nanobe kunjalo, lilunga ngalinye lemndeni lingacitsa lesinye salesikhatsi litichubela sifundvo. Nasi sibonelo: Ngemuva kwekucoca, umndeni ungachubeka uhleti ndzawonye bese lilunga ngalinye lemndeni litifundzela lona lodvwa, mhlawumbe licedzele kulungiselela imihlangano nobe lifundze bomagazini. Leminye imindeni ikhetsa kuvala ithelevishini busuku bonkhe ngalelolanga.

6. Nguyiphi indlela lengasetjentiswa nakucocwa?

⁶ Nguyiphi Indlela Lengasetjentiswa Nakucocwa? Indlela lesetjentiswako akudzingeki ihlale imibuto netimphendvulo. Kute lamanye emalunga emndeni ente lesikhatsi siphile futsi sijabulise, aba neluhlelo lolufanana nelwemihlangano yetfu yelibandla. Ahlukanisa loko lokutawucocwa ngako kube tincenye letimbalwa bese akuchuba ngetindlela letehlukehlukene. Nasi sibonelo: Angafundza liBhayibheli ndzawonye, alungiselele incenye letsite yemihlangano, bese alungiselela tinshumayelo langatisebentisa ensimini. Likhasi 6 linaletinye tibonelo.

7. Batali kufanele bachube lesifundvo esimeni lesinjani?

⁷ Batali Kufanele Bachube Lesifundvo Esimeni Lesinjani? Umndeni wakho utawufundza kahle nangabe kunesimo selutsandvo kanye nesekukhululeka. Ngaletinye tikhatsi ningafundza nihleti ngephandle nangabe simo selitulu sivuma. Tiveni nikhululekile kutsatsa likhefu nangabe kudzingekile. Leminye imindeni ihlela kutsi kudliwe kudla lokulula ngemuva kwesifundvo. Njengobe batali kufanele bakubalekele kutsetsisa nobe kuniketa seluleko ngesikhatsi sekuKhonta Kwemndeni, kodvwa kungase kudzingeke basebentise lesinye salesikhatsi kute bavete inkinga labayibonako. Nanobe kunjalo, kungaba ncono kutsi bakhetse lesinye sikhatsi lesifanele sekucoca nemntfwana ngansense mayelana nendzaba lemtsintsako kute babalekele kumenta abe nemahloni embikwalabanye. KuKhonta Kwemndeni kwakusihlwa akukafaneli kube dvuma nobe kushube, kodvwa kufanele kummelele kahle Nkulunkulu lojabulako lesimkhontako.—1 Thim. 1:11.

8, 9. Ngukuphi kulungiselela lokudzingeka kwentiwe tinhloko temndeni?

⁸ Inhloko Yemndeni Ingalungiselela Njani? Umndeni utawuzuza kakhulu nangabe inhloko yawo ikulungiselela kahle kusenesikhatsi loko lokutawucocwa ngako ekuKhonteni Kwemndeni kwakusihlwa kanye nendlela lekahle yekukwetfula. (Taga 21:5) Indvodza yenta kahle ngekukhuluma nemfati wayo mayelana naloku. (Taga 15:22) Kungaba kuhle kutsi ngaletinye tikhatsi inhloko yemndeni ibute bantfwana bayo kutsi bona bafuna kucocwe ngani. Nayenta njalo, itawutfola kutsi yini lebalulekile kubantfwana bayo kanye netinkinga tabo.

⁹ Emavikini lamanyenti inhloko yemndeni angeke kudzingeke kutsi isebentise sikhatsi lesinyenti ilungiselela. Ngesizatfu saloko, umndeni ungakujabulela kuba neluhlelo lolufananako liviki ngalinye, futsi angeke kudzingeke kutsi inhloko yemndeni ihlale iba neluhlelo lolwehlukile njalo. Ingakutfola kuzuzisa kulungiselela nakuphela sifundvo ngasinye ngobe isuke isatikhumbula kahle tidzingo takamoya temndeni wayo. Letinye tinhloko temndeni tilubhala phansi kafishane luhlelo lwesifundvo bese tilunameka lapho umndeni ungalubona khona melula, njengasesicandzisini. Loku kwenta umndeni ujabule, ubuke embili kuleso sifundvo futsi ukwati kulungiselela nangabe kudzingeka.

10. Labo labahlala bodvwa bangasisebentisa njani sikhatsi sekuKhonta Kwemndeni kwakusihlwa?

¹⁰ Kutsiwani Nangabe Kunguwe Wedvwa LongumKhristu Ekhaya Nobe Uhlala Wedvwa? Labo labahlala bodvwa bangasebentisa sikhatsi sekuKhonta Kwemndeni kwakusihlwa kute batichubele sifundvo. Luhlelo loluhle lwekutichubela sifundvo kufanele lufake ekhatsi kufundza liBhayibheli, kulungiselela imihlangano, kanye nekufundza Sicongosekulindza ne-“Phaphama!” Labanye bamemeteli basebentisa lesikhatsi kute bacwaninge. Ngaletinye tikhatsi, bangase bacele lomunye ummemeteli nobe umndeni kutsi uhlanganyele nabo ekucoceni ngemiBhalo ngendlela lekhutsatako.

11, 12. Ngutiphi letinye tinzuzo letitfolakala ngekuba nekuKhonta Kwemndeni kwakusihlwa njalo?

¹¹ Ngutiphi Tinzuzo Letitfolakala Ngekuba NekuKhonta Kwemndeni Kwakusihlwa Njalo? Labo labahlanganyela ekukhonteni kweliciniso ngenhlitiyo yonkhe basondzelana naJehova. Ngetulu kwaloko, imindeni lekhonta ndzawonye ikhulisa bunye bayo. Naku lokwabhalwa ngulabanye labashadile mayelana netibusiso labaye batijabulela: “Njengobe sibantfu labashadile labangemahlahlandlela futsi labete bantfwana, sibuka embili ekuKhonteni kwetfu Kwemndeni kwakusihlwa. Sitiva sisondzela kulomunye nalomunye kanye nakuBabe wetfu wasezulwini. Nasivuka ngelilanga lesilibekele kufundza sisobabili, sibutana sitsi: ‘Combela kutsi entsambama sitawukwentani? Sitawuba nekuKhonta Kwemndeni kwakusihlwa!’”

¹² Loluhlelo lwekuba nebusuku bekukhonta kwemndeni luyayisita nemindeni lehlala imatasatasa. Lomunye make lokhulisa emadvodzana akhe lamabili ayedvwana futsi lolihlahlandlela, wabhala: “Ekucaleni, sifundvo setfu semndeni besiphatamiseka. Besingasichubi njalo ngobe bengihlala ngidziniwe. Bengingati kutsi singasenta nini. Ngako-ke, nginibhalela kute nginibonge kakhulu ngaloluhlelo lwekuKhonta Kwemndeni kwakusihlwa. Siye sachubeka siba nesifundvo semndeni ngaso sonkhe sikhatsi futsi siyatibona netinzuzo taso.”

13. Yini letsintsa indlela umndeni wakho lotawuzuza ngayo kuloluhlelo?

¹³ NjengeliSabatha, kuKhonta Kwemndeni kwakusihlwa kusipho lesivela kuBabe wetfu wasezulwini lesingasita imindeni. (Jak. 1:17) Indlela imindeni yema-Israyeli lebeyilisebentisa ngayo liSabatha beyitsintsa indlela labeyizuza ngayo ngekwakamoya. Ngendlela lefananako, indlela natsi lesibusebentisa ngayo busuku bekukhonta kwemndeni itsintsa indlela imindeni yetfu letawuzuza ngayo. (2 Khor. 9:6; Gal. 6:7, 8; Khol. 3:23, 24) Ngekulusebentisa kahle loluhlelo, umndeni wakho ungavumelana nemavi emhlabeli, latsi: “Kodvwa mine kungilungele kusondzela kuNkulunkulu, Simakadze, iNkhosi, ngimente waba siphephelo sami.”—Hla. 73:28.

[Emavi lahambisana nesitfombe ekhasini 5]

KuKhonta Kwemndeni kwakusihlwa akukafaneli kube dvuma nobe kushube, kodvwa kufanele kummelele kahle Nkulunkulu lojabulako lesimkhontako

[Emavi lahambisana nesitfombe ekhasini 6]

SIBEKE KAHLE

Tintfo Leningatenta NgekuKhonta Kwemndeni Kwakusihlwa

LiBhayibheli:

• Fundzani ndzawonye incenye yekufundvwa kweliBhayibheli kwamaviki onkhe. Lokunye kulandzisa lokuseBhayibhelini kubhalwe ngendlela yekutsi lomunye angafundza emavi alolandzisako, bese labanye bafundza emavi ebadlali labehlukehlukene labakulendzaba.

• Banini nemdlalo lomayelana nalencenye yekufundvwa kweliBhayibheli.

• Yabelani lilunga ngalinye lemndeni kutsi lifundze letehluko teliBhayibheli kusenesikhatsi, bese libhala umbuto lowodvwa nobe lemibili lemayelana nalamavesi. Ngemuva kwaloko, cwaningani lemibuto ndzawonye.

• Liviki ngalinye yentani likhadi leliveta livesi leliBhayibheli, bese netama kukhumbula nekuchaza lelo vesi. Yentani emakhadi lamanyenti, futsi niwabukete maviki onkhe kute nibone kutsi mingakhi imibhalo leniyikhumbulako.

• Lalelani ema-CD ekufundvwa kweliBhayibheli, bese nihambisana nawo emaBhayibhelini enu.

Imihlangano:

• Lungiselelani imihlangano ndzawonye.

• Prakthizani tingoma teMbuso letitawuhlatjelwa evikini lelilandzelako.

• Nangabe lomunye wenu anenkhulumo eSikolweni Semsebenti WemaKhristu nobe umboniso eMhlanganweni Wemsebenti, cocani ngendlela yekuwetfula, nobe uprakthizwe embikwabo bonkhe ekhaya.

Tidzingo Temndeni:

• Cocani ngekwatiswa lokusencwadzini letsi “INtsha Iyabuza” nobe letsi “Funda KuMfundisi Omkhulu.”

• Banini nesikhatsi sekuprakthiza indlela yekuhlangabetana nesimo lesingase sivele esikolweni.

• Banini nesikhatsi sekuphraktiza lapho batali kanye nebantfwana bashintja tindzima tabo. Bantfwana bangacwaninga indzaba letsite bese bacocisana nebatali babo ngayo.

Umsebenti Wekushumayela:

• Banini nesikhatsi sekulungiselela tinshumayelo lenitawutisebentisa ngemphelasontfo.

• Cocani ngemigomo lefinyelelekako umndeni longatibekela yona kute wandzise loko lokwentako emsebentini wekushumayela ngesikhatsi seSikhumbuto nobe ngemaholidi.

• Niketa lilunga ngalinye lemndeni imizuzu lembalwa kute licwaninge indlela yekuphendvula imibuto letsite lengavela ensimini, bese niprakthiza indlela leningayiphendvula ngayo.

Letinye Tintfo Leningatenta:

• Fundzani ndzawonye sihloko lesivela kubomagazini bakamuva.

• Lilunga ngalinye lemndeni alifundze kusenesikhatsi sihloko lesivela kubomagazini bakamuva lelisitsandzako, bese licoca ngaso.

• Ngaletinye tikhatsi, memani ummemeteli nobe bantfu labashadile kutsi babe nani ngebusuku bekuKhonta Kwemndeni, bese nibacela kutsi balandzise lokuhlangenwe nako kwabo.

• Bukelani lenye yema-video enhlangano bese nicoca ngayo.

• Cocani ndzawonye ngesihloko lesitsi “INtsha Iyabuza” nobe lesitsi “Ukubukeza Komkhaya,” letivela ku-“Phaphama!”

• Cocani ndzawonye ngesihloko lesitsi “Fundzisa Bantfwana Bakho” nobe lesitsi “Tindlela Tekwenta Umndeni Ujabule,” letivela ku-Sicongosekulindza.

• Fundzani futsi nicoce ngencenye letsite encwadzini yemnyaka yakamuva nobe encwadzini letsite lekhululwe emhlanganweni wesigodzi lenibuya kuwo.

• Nanibuya emhlanganweni wesigodzi nobe wesifundza, buketani emaphuzu leniwatfolile.

• Bukisisani indalo yaJehova, bese nicoca ngaloko lesifundzisa kona ngaye.

• Yakhani lokutsite ndzawonye, njengentfo lefanana naleseBhayibhelini, libalave, nobe lishadi.