‘Kuniketa Bufakazi Lobuphelele’ NgeMbuso WaNkulunkulu
1. Yini lesitawuyifundza eSifundvweni SeliBhayibheli Selibandla kusukela evikini lelicala nga-March 14?
1 Ngeliviki la-March 14, 2011, sitawucala kufundza incwadzi letsi “‘Ukunikeza Ubufakazi Obuphelele’ NgoMbuso KaNkulunkulu” eSifundvweni SeliBhayibheli Selibandla. Idzingidza incwadzi yeMisebenti ngendlela leyenta umfundzi ative akujabulela kufundza letentakalo letizuzisako letibhalwe kuyo. Kunekutsi icoce ngelivesi ngalinye, lencwadzi letsi “Ukunikeza Ubufakazi” iveta tifundvo letitfolakala kuletentakalo letisencwadzini yeMisebenti futsi isisita sibone nendlela lesingatisebentisa ngayo ekuphileni kwetfu.—Rom. 15:4.
2. Chaza indlela lencwadzi letsi “Ukunikeza Ubufakazi” leyentiwe ngayo.
2 Indlela Leyentiwe Ngayo: Setfulo lesisekhasini 2 siyincwadzi lejabulisako levela eSigungwini Lesibusako lekhuluma ngendlela labafuna sizuze ngayo kulencwadzi lesitawuyifundza. Kusukela kusehluko 2, kunemusho loyinhloko lochaza ingcikitsi yesehluko ngasinye, kanye nemBhalo lokhonjiwe loveta incenye yencwadzi yeMisebenti lokutawucocwa ngayo. Tehluko letinyenti talencwadzi tinemabhokisi lanemininingwane lemayelana nemlandvo webantfu, tindzawo, nobe tentakalo. Eceleni kwelikhasi kunesikhala lesikhulu lesingabhala kuso emaphuzu. Kuyo yonkhe lencwadzi kunemifanekiso lemayelana netentakalo letiseBhayibhelini kute isisite sitibone ngeliso lengcondvo, bese kutsi ekhasini lekugcina kuneluhla lwemagama lachaza loko lokuvetwe esitfombeni ngasinye. Ekhatsi kwelikhasi lekucala kanye nalelo lelingemuva kunemabalave latawusisita sibone tindzawo emaKhristu ekucala latihamba njengobe abeshumayela tindzaba letinhle “kuze kube ngusekugcineni kwemhlaba.”—Imis. 1:8.
3. Kuhlolisisa incwadzi yeMisebenti kutawusisita sitfole timphendvulo tamiphi imibuto lebalulekile?
3 Timphendvulo Temibuto Lebalulekile: Kuhlolisisa incwadzi yeMisebenti kutawusisita kutsi sikwati kutfola timphendvulo temibuto lebalulekile lemayelana nemsebenti webuKhristu. Nasi sibonelo: Ngumuphi umsebenti kanye nemlayeto lowenta sibone balandzeli baKhristu beliciniso? Ngubani locondzisa lomsebenti wekushumayela lowentiwa emhlabeni wonkhe, futsi ukwenta njani loko? Kushushiwa kanye nekuphikiswa kutivulela maphi ematfuba tikhonti taNkulunkulu? Nguyiphi indzima lefezwa ngumoya longcwele emsebentini wetfu wekushumayela?
4. Singazuza njani ngalokugcwele ngekuhlolisisa lencwadzi?
4 Kute uzuze ngalokugcwele, kufanele uyifundze kusenesikhatsi lencwadzi, futsi ulungiselele kute uphendvule nakucocwa ngayo ebandleni. Bani khona kuyo yonkhe lemihlangano, futsi uzindle ngekutsi loko lokufundzile ungakusebentisa njani emsebentini wekushumayela. Shengatsi kuhlolisisa kwetfu lencwadzi lejabulisako kungasikhutsata kutsi sinikete bufakazi lobuphelele ngeMbuso waNkulunkulu!—Imis. 28:23.