“Akukhanye Kukhanya Kwenu”
1. Sinelilungelo lekuhlanganyela ini nalabanye?
1 Kusukela selitawuphuma lilanga lize lishone, buhle bekukhanya budvumisa Nkulunkulu Jehova. Nome kunjalo, Khristu wamema balandzeli bakhe kutsi babe nalolunye luhlobo lwekukhanya—‘kukhanya kwekuphila.’ (Joh 8:12) Kuba nekukhanya lokuchubekako kwakamoya kulilungelo lelihambisana nemitfwalo lebalulekile. Jesu wakhipha sicondziso lesitsi: “Akukhanye kukhanya kwenu embikwebantfu,” ngaleyondlela bantfu bazuze. (Mat. 5:16) Njengobe bantfu bacwile ebumnyameni ngakamoya, lokukhanya kufanele bakutfole futsi sidzingo saloko sikhulu. Singamlingisa njani Khristu ngekutsi kukhanya kwetfu kukhanye?
2. Wakuveta njani Jesu kubaluleka kwekuhlanganyela nalabanye kukhanya kwakamoya?
2 Ngekushumayela: Jesu wasebentisa sikhatsi sakhe, emandla kanye nemnotfo wakhe kute ente kukhanya kweliciniso kwatiwe bantfu emakhaya, etindzaweni tawonkhe wonkhe, eticongweni tetintsaba nakuto tonkhe tindzawo lapho bebangatfolakala khona bantfu. Bekabati kahle buhle lobungapheli bekuniketa kukhanya lokuliciniso kwakamoya. (Joh 12:46) Kute afinyelele bantfu labanyenti, Jesu wacecesha bafundzi bakhe kute babe ‘kukhanya kwelive.’ (Mat. 5:14) Labafundzi benta kukhanya kwabo kwakhanyela labanye ngekwentela bomakhelwane babo tintfo letinhle kanye nekuhlanganyela nabo emaciniso eBhayibheli.
3. Singakukhombisa njani kubonga lokucotfo ngekukhanya kweliciniso?
3 Bantfu baJehova bawutsatsa njengalobalulekile umsebenti ‘wekuhamba njengebantfwana bekukhanya,’ futsi bashumayela nobe ngabe ngukuphi lapho kunebantfu khona. (Ef. 5:8) Kumane nje ufundze liBhayibheli nobe tincwadzi tebuKhristu ubonwa ngulabanye bantfu ngesikhatsi selikhefu lasemsebentini nobe lasesikolweni, kungaholela ekucoceni nabo ngemiBhalo. Lendlela yaphumela ekusiteni dzadze losemusha ngeminyaka kutsi acale sifundvo seliBhayibheli aphindze ahambisele bantfu labangu-12 lafundza nabo tincwadzi.
4. Kungani ‘kwenta kukhanya kwetfu kukhanye’ kufaka ekhatsi nekutiphatsa kwetfu lokusibonelo?
4 Ngemisebenti Lemihle: Kuvumela kukhanya kwetfu kukhanye kufaka ekhatsi kutiphatsa kwetfu kwamalanga onkhe. (Ef. 5:9) Emsebentini, esikolweni kanye nasetindzaweni lokutfolakala kuto bantfu, kutiphatsa kwemaKhristu kuyagcama kuphindze kuvete ematfuba ekufakaza ngemaciniso eBhayibheli. (1 Phet. 2:12) Nasi sibonelo: Kutiphatsa kahle kwemfanyana loneminyaka lesihlanu, kwenta thishela wakhe wacela batali bakhe. Lothishela watsi kubo: “Ngicala ngca kubona umntfwana lokutsatsa njengalokubaluleke kangaka kutiphatsa kahle.” Kuliciniso kutsi umsebenti wetfu wekushumayela kanye nekutiphatsa kwetfu lokuhle kukhanga bantfu ‘ekukhanyeni kwekuphila’ bese badvumisa Nkulunkulu.