Kufanele Sibeketele Nasishumayela
1. Jehova ukhombise njani kutsi uyababeketelela bantfu?
1 Ngaso sonkhe sikhatsi Nkulunkulu uyababeketelela bantfu. (Eks. 34:6; Hla. 106:41-45; 2 Phet. 3:9) Kubeketela kwakhe ngelutsandvo kubonakala kakhulu nasemsebentini wekushumayela lowentiwa emhlabeni wonkhe. Jehova sewusebente nebantfu iminyaka lecishe ibe ngu-2 000, futsi uyachubeka nekudvonsa bantfu labanetinhlitiyo leticotfo. (Joh. 6:44) Singakulingisa njani kubeketela kwaJehova nasishumayela?
2. Singakhombisa njani kutsi siyabeketela ensimini yetfu?
2 Emsebentini Wemuti Ngemuti: Sisuke silingisa Jehova ngekubeketela nasichubeka sishumayela emasimini lanebantfu labangayikhombisi inshisekelo. (Imis. 5:42) Siyakubeketelela kunganaki kwebantfu, kuhlekwa, nekuphikiswa nasishumayela. (Mak. 13:12, 13) Sikhombisa kubeketela nasiphikelela ngekunisela inhlanyelo yeliciniso ngisho nobe kumatima kutfola labanenshisekelo emakhaya.
3. Kungani kudzingeka kutsi sibeketele nasibuyela kubantfu lesicoce nabo nalapho sichuba tifundvo teliBhayibheli?
3 Nasichuba Tifundvo TeliBhayibheli: Kudzingeka sibeketele kute sikhulise sihlahla. Singasinakekela kodvwa angeke sikhone kusikhulisa masinyane. (Jak. 5:7) Ngalokufananako, kukhula kwakamoya kwenteka kancane kancane, kanye nangetigaba. (Mak. 4:28) Kungaba matima kulesifundza nabo kushiya tinkholelo temanga nobe emasiko langavumelani nemibhalo. Akukafaneli setame kubenta batfutfuke masinyane ngekutsi sibaphocelele kutsi bashintje ngekushesha. Kudzingeka sibeketele kute sivumele sikhatsi lesenele sekutsi umoya waNkulunkulu usebente enhlitiyweni yemfundzi.—1 Khor. 3:6, 7.
4. Kubeketela kungasisita njani kutsi siphumelele nasifakaza etihlotjeni tetfu letingakholwa?
4 Etihlotjeni Tetfu Letingakholwa: Nanobe sinesifiso lesikhulu sekutsi tihlobo tetfu letingakholwa tifundze liciniso, sikhombisa kutsi siyabeketela nasifuna sikhatsi lesikahle sekucoca nato ngalesikukholelwako. Kodvwa-ke kufanele sicaphele kutsi singatigcishi ngelwati lolunyenti. (Shu. 3:1, 7) Loku tisengakalemukeli liciniso, tento tetfu titawusikhulumela, futsi kufanele sihlale sikulungele kukhuluma ngalesikukholelwako ngemoya lomnene nangenhlonipho lejulile. (1 Phet. 3:1, 15, 16) Asingabati kutsi nasiwenta ngekubeketela umsebenti wekushumayela utawuba netitselo letinyenti, uphindze ujabulise Babe wetfu losezulwini.