“UNkulunkulu Ukhuluma Nathi NgoJeremiya”
1. Nguyiphi incwadzi leyakhululwa emhlanganweni wesigodzi wa-2010, futsi sitayisebentisa kuphi?
1 Sajabula kakhulu ngesikhatsi sitfola incwadzi lensha lekhuluma ngaJeremiya emhlanganweni wesigodzi wa-2010 lowawunesihloko lesitsi “Hlala Usondzelene NaJehova.” Lencwadzi igcizelela tifundvo lesingatitfola ekuphileni kwetfu kwamalanga onkhe encwadzini yaJeremiya kanye neyeSililo. (Rom. 15:4) Yentelwe kusetjentiswa eSifundvweni SeliBhayibheli Selibandla futsi sitawucala kuyifundza ngeliviki lelicala nga-November 5, 2012.
2. Kungani kungasizuzisa kufundza incwadzi yeliBhayibheli yaJeremiya kanye neyeSililo?
2 Iyazuzisa Lamuhla: Jeremiya longumbhali walencwadzi yeliBhayibheli lephefumulelwe, waphrofetha ngesikhatsi lesimatima kaJuda. Ekucaleni, wativa angafaneleki kwenta lesabelo sakhe. (Jer. 1:6) Washushiswa bantfu labekaphila nabo futsi mhlawumbe tihlobo labetihlala edolobheni lakubo e-Anathothi. (Jer. 11:21, 22) Kuyacondzakala kutsi Jeremiya abetiva advumele ngaletinye tikhatsi. (Jer. 20:14) Njengobe sifeza umsebenti lesiphatsiswe wona ‘wekwenta tive tonkhe tibe bafundzi’ sivame kuhlangabetana netinsayeya siphindze sibe nemiva lefanana neyaJeremiya. (Mat. 28:19) Kufundza loko lakubhala kutasisita kutsi sishumayele ngesibindzi nangekutimisela.
3. Sitatisebentisa njani letinye tici letitfolaka encwadzini letsi “UJeremiya”?
3 Kuhlelwa Kwayo: Imibhalo leyinhloko lekufanele ifundvwe esifundvweni ibhalwe yatjekiswa. Ekwephetseni kwesifundvo seliviki ngalinye, kunembuto munye nome lemibili lebhalwe ngemagama lagcamile legcizelela emaphuzu layinhloko aleso sifundvo. Lemibuto itawusetjentiswa nasekubuketwa. Kulencwadzi, kunemifanekiso lemihle libandla lelitawujabulela kuyikhulumela.
4. Singazuza njani ngekufundza incwadzi letsi “UJeremiya?”
4 Kute uzuze, lungiselela sifundvo ngasinye kusenesikhatsi. Hlola emaphuzu longawasebentisa ekuphileni kwakho nasensimini. Hlanganyela ngekuphendvula. Ngesibusiso saJehova, Jeremiya wasifeza sabelo sakhe ngenjabulo nekwenetiseka. (Jer. 15:16) Shengatsi kufundza kwetfu lencwadzi kungasisita kutsi siwufeze umsebenti wetfu wekushumayela njengaJeremiya.