Sita Bantfu Kutsi Balalele Nkulunkulu
1. Nguyiphi incwajana leyakhululwa emhlanganweni wesigodzi lobewunesihloko lesitsi “UMbuso WaNkulunkulu Awufike!” futsi yini leyenta ibe lithulusi lelilusito?
1 Emhlanganweni wesigodzi lobewunesihloko lesitsi “UMbuso WaNkulunkulu Awufike!” kwakhululwa incwajana letsi Lalela Nkulunkulu Kute Uphile Phakadze. Ngesizatfu sekutsi lencwajana inemagama lambalwa, ingahunyushwa melula nangekushesha. Ngalesikhatsi lencwajana ikhululwa ngesiNgisi, Sigungu Lesibusako savuma kutsi ihunyushelwe etilwimini letingu-431.
2. Bobani labatawuzuza kulencwajana?
2 Bobani labatawuzuza kakhulu kulencwajana? Cabanga nganati timo letilandzelako letivamile emhlabeni wonkhe:
• Ummemeteli lococa nalotsite, kungaba sekumvakasheleni kwekucala nobe nase abuyela kuye, uyabona kutsi lacoca naye akakwati kufundza nobe akafundzi kahle.
• Ummemeteli ushumayela umuntfu lokhuluma lulwimi lolunetincwadzi letimbalwa letihunyushelwe kulo nobe lokute incwadzi lehunyushelwe kulo, nobe mhlawumbe bantfu labanyenti ensimini banconota kulukhuluma lololwimi hhayi kulufundza.
• Ummemeteli usebentisa lulwimi lwetandla nakashumayela umuntfu longeva ensimini yakubo.
• Umtali ufisa kumfundzisa liciniso umntfwanakhe losemncane losengakakwati kufundza.
3. Ihlelwe kanjani incwajana letsi Lalela Nkulunkulu Kute Uphile Phakadze?
3 Indlela Lehlelwe Ngayo: Incwajana letsi Lalela Nkulunkulu Kute Uphile Phakadze, yentelwe kufundzisa bantfu labangafundzi kahle nobe labafundza kufundza. Etulu ngesencele kunesihloko lesingumbuto lesiphendvulwa emakhasini lamabili. Lokunye lokukhona yimifanekiso nemagama lakhuluma ngayo kanye nemibhalo. Entasi, emakhasini lamanyenti kunemaphuzu nemiBhalo leningacoca ngawo, kuye ngelikhono lemfundzi.
4. Singayihambisa njani futsi nini lencwajana?
4 Indlela Yekuyisebentisa: Lencwajana ungayihambisa emtini ngemuti nawubona kutsi kutawusita kwenta njalo ngisho nome ingasiso sipho saleyonyanga. (Fundza libhokisi lelitsi “Indlela Longase Uyihambise Ngayo.”) Ungase uyetfule kumuntfu loke wacoca naye nawubuyela kuye ngekumtjela kutsi kukhona lomphatsele kona, bese uyamniketa. Ningafundza emagama nembhalo lokuhambisana nemfanekiso ngamunye lenicoca ngawo.
5. Singabasita njani lesibafundzelako kutsi batfutfuke?
5 Sita Umfundzi Atfutfuke: Siyetsemba kutsi kucocisana kwenu kutamenta abe nesifiso sekufundza kute atifundzele yena ngaJehova. (Mat. 5:3; Joh. 17:3) Nobe kunjalo, umfundzi utawube angakakulungeli kubhajatiswa nase acedze kufundza lencwajana. Kufanele nifundze incwadzi letsi Lokufundziswa LiBhayibheli nobe lenye incwadzi lefanele letamsita acondze emaciniso lasisekelo eliBhayibheli.
6. Yini lekwenta ubonge ngalelithulusi lelisha lekufundzisa ensimini?
6 Bantfu kufanele bamlalele uMbusi wendzawo yonkhe, nangabe bafuna kuphila phakadze. (Isa. 55:3) Intsandvo yaJehova “kutsi bonkhe bantfu” lokufaka ekhatsi nebantfu labangakwati kufundza, bafundze indlela yekulalela yena. (1 Thim. 2:3, 4) Sibonga kakhulu ngalelithulusi lelisha lesingalisebentisa kute sifundzise bantfu indlela yekulalela Nkulunkulu.
[Box on page 7]
Indlela Yekuyihambisa
Khombisa lococa naye emakhasi 2 na-3, bese utsi: “Ungatsandza yini kuphila emhlabeni lonjena? [Lindzela imphendvulo.] ImiBhalo [nobe lencwadzi lengcwele yetsembisa] kutsi ngekushesha Nkulunkulu utawenta lomhlaba ube muhle, ube nekuthula, bantfu bangasahlupheki futsi bangasaguli. Naka kutsi kufanele senteni kute siphile eveni lelinjena. [Fundza Isaya 55:3, locashuniwe ekhasini 3.] Lombhalo utsi ‘kotani kimi, vanini.’ Simlalela njani Nkulunkulu?” Vula likhasi 4 na-5 bese nicoca ngemphendvulo. Nangabe ete sikhatsi, mshiyele lencwajana uhlele kubuya nitococa naye ngemphendvulo.