Neliseka Ngemsebenti Wakho
1. Yini lenganciphisa kukhutsala kwetfu ensimini?
1 Umuntfu wadalwa ngendlela yekutsi ‘eneliseke ngemsebenti wakhe.’ (Shu. 2:24) Nobe kunjalo, nangabe singayiboni imiphumela lemihle ensimini, kudvumala kungase kusente singajabuli kuphindze kunciphise kukhutsala kwetfu. Yini lengasisita kutsi sihlale sinesimo sengcondvo lesikahle?
2. Kungani kungakafaneli silindzele lokukhulu emiphumeleni lesiyitfola ensimini?
2 Lindzela Lokuvame Kwenteka: Khumbula kutsi ngisho nome bebambalwa bantfu labamlalela Jesu, umsebenti wakhe waba nemiphumela lemihle. (Joh. 17:4) Emfanekisweni wakhe wemhlanyeli, Jesu watsi tinhlitiyo letinyenti betingeke tiwemukele umlayeto weMbuso lofana nenhlanyelo. (Mat. 13:3-8, 18-22) Nome kunjalo, kusekunyenti lokufezwa kutimisela kwetfu kulomsebenti.
3. ‘Singatitsela njani titselo’ ekushumayeleni ngisho nome bambalwa bantfu labasilalelako?
3 Indlela Yekutsela Titselo Letinyenti: Njengobe Jesu asho emfanekisweni wakhe, bantfu labemukela umlayeto weMbuso ‘batawutsela titselo.’ (Mat. 13:23) Nasewuhlumile kolo waphindze wakhula, awugcini ngekukhipha tinhlanga takolo kodvwa ukhipha nenhlanyelo lensha. Ngaleyo ndlela titselo letitselwa ngemaKhristu laphumelelako, akusibo bafundzi labasha kodvwa kuhlanyela kanyenti ngekushumayela ngeMbuso. Umphumela waloko uba kutsi senta lokuhle lokungasenta seneliseke ngisho nome bantfu basilalela nome bangasilaleli. Sifaka sandla ekungcweliseni libito laJehova. (Isa. 43:10-12; Mat. 6:9) Sijabulela lilungelo lekuba tisebenti letibambisene naNkulunkulu. (1 Khor. 3:9) Lomnikelo “wayo yonkhe imilomo” uyamjabulisa Jehova.—Heb. 13:15, 16.
4. Ngumiphi imiphumela lesingayati lengavetwa ngumsebenti wetfu?
4 Ngetulu kwaloko, kutimisela emsebentini wetfu kungase kube nemiphumela lesingeke siyibone. Kungenteka kutsi labanye bantfu labeva Jesu nakashumayela abazange babe bafundzi bakhe ngaleso sikhatsi kodvwa baze baba ngibo nasekabuyele ezulwini. Ngendlela lefanako, inhlanyelo yeMbuso lesiyihlanyelako ingase ingamili enhlitiyweni yemuntfu kuze kwendlule sikhatsi lesidze. Lowo muntfu angase emukele liciniso singati. Nembala, umsebenti wetfu ufeza lukhulu. Shengatsi singachubeka ‘nekutsela titselo letinyenti’ sikhombise kutsi sibafundzi baJesu.—Joh. 15:8.