Tsatsa Sibonelo Sebaphrofethi—Joweli
1. Singakulingisa njani kutfobeka kwaJoweli nasishumayela?
1 Abengubani umphrofethi Joweli? Kuphela kwentfo lasitjela yona kutsi ‘abengumsa waPhethuweli.’ (Jow. 1:1) Lomphrofethi lotfobekile wagcizelela umlayeto waJehova, hhayi indzima yakhe yekuba sitfunywa. Ngendlela lefananako, esikhundleni sekutsi sitifunele ludvumo nome kunakwa, sifuna kutsi kunakwe Jehova neliBhayibheli nasisensimini. (1 Khor. 9:16; 2 Khor. 3:5) Ngetulu kwaloko, lomlayeto lesiwumemetelako uyasikhutsata. Ngutiphi tingoni talesiphrofetho saJoweli letingasenta sibe nenshisekelo nelitsemba lamuhla?
2. Kusondzela kwelilanga laJehova kufanele kusikhutsate kutsi senteni?
2 “Lilanga LaSimakadze Lisedvute.” (Jow. 1:15): Ngisho nome sekuphele tinkhulungwane teminyaka lamavi abhalwa, nyalo siphila esikhatsini sekugcwaliseka kwawo kwekugcina. Kuhhohloko kwetimo temhlaba, kuphikiswa kanye nekuphukutwa lesikutfola ensimini yetfu kubufakazi lobunemandla bekutsi emalanga ekugcina alelive lelibi asafikile. (2 Thim. 3:1-5; 2 Phet. 3:3, 4) Nasicabanga ngekutsi sekusondzele kangakanani kuphela, siba netizatfu letinyenti tekwenta umsebenti wekushumayela ute kucala ekuphileni kwetfu.—2 Phet. 3:11, 12.
3. Yini leyenta umsebenti wekushumayela ubaluleke kangaka njengobe kusondzela kuhlupheka lokukhulu?
3 “Simakadze Utawuba Siphephelo Esiveni Sakhe.” (Jow. 3:16): Kutfutfumela lokuchazwa kulelivesi kungasebenta kuphela esehlulelweni lesitawukhishwa nguJehova ngesikhatsi sekuhlupheka lokukhulu. Kuyasidvudvuta kwati kutsi Jehova utawutikhulula tinceku takhe letetsembekile ngaleso sikhatsi. (Semb. 7:9, 14) Njengobe sishumayela futsi sitibonela indlela Jehova lasinakekela aphindze asicinise ngayo, siba nekukholwa nekucinisela lokutasisita kulokuhlupheka lokukhulu lokutako.
4. Yini lengasenta sijabule futsi sibuke likusasa ngekuciniseka?
4 Ngisho nobe labanye batsi umlayeto waJoweli wawuveta inhlekelele, bantfu baNkulunkulu batfola litsemba lelijabulisako lekusindza kuwo. (Jow. 2:32) Ngako-ke, asibuke likusasa ngekuciniseka futsi sitimemetele ngenshisekelo tindzaba letimnandzi teMbuso waNkulunkulu njengobe silalela emavi aJoweli 2:23 latsi: “Jabulani, . . . tfokotani [kuJehova, NW] Nkulunkulu wenu.”