Bazalwane Labasebasha, Ninaso Yini Sifiso Sekusebenta?
1. Umzalwane losemusha kufanele acale nini kusebentisa sicondziso lesitfolakala ku-1 Thimothi 3:1?
1 ‘Nangabe umuntfu anesifiso sekusebenta, ufisa intfo lenhle.’ (1 Thim. 3:1) Lamavi laphefumulelwe akhutsata bazalwane kutsi babe nesifiso sekukufanela kwenta imisebenti yelibandla. Kufanele ube ngumuntfu lomdzala yini kute ube naleso sifiso? Ecinisweni, leso sifiso kufanele ucale kuba naso usemncane. Ngekwenta njalo ungacecesheka ukhombise kutsi sewuvivinyeke kahle kutsi ungaba yinceku lesebentako nasewukhulile. (1 Thim. 3:10) Nangabe ungumzalwane losemusha lobhajatisiwe, ungakhombisa njani kutsi unesifiso sekusebenta?
2. Umoya wekutidzela ungatfutfukiswa njani futsi ungaboniswa ngayiphi indlela?
2 Kutidzela: Khumbula kutsi ufisa kwenta umsebenti lomuhle, hhayi kuba nesicu. Ngako-ke, bani nesifiso sekusita bazalwane nabodzadze. Lenye indlela yekukwenta loko, kuzindla ngesibonelo saJesu. (Mat. 20:28; Joh. 4:6, 7; 13:4, 5) Cela Jehova akusite kutsi ubacabangele labanye bantfu. (1 Khor. 10:24) Ungakhona yini kusita lasebakhulile nalabagulako ebandleni? Ubakhona yini nakujutjwa tjani, kuhlantwa liHholwa leMbuso, nome nakwentiwa leminye imisebenti legcina liHholwa leMbuso lisesimeni lesihle? Ungavolontiya yini kwetfula inkhulumo eSikolweni Semsebenti WemaKhristu nakuvela sidzingo? Utawukhandza kutsi kutidzela kwakho kuze usite labanye kutakuletsela injabulo.—Imis. 20:35.
3. Buhlobo bemuntfu naNkulunkulu bubaluleke kangakanani, futsi bungatfutfukiswa njani?
3 Buhlobo naNkulukulu: Kubaluleke kakhulu ngenceku ebandleni kutsi ibe nebuhlobo lobuhle naNkulunkulu kunekutsi ibe nemathalenta nome emakhono emvelo. Indvodza lenebuhlobo lobuhle naNkulunkulu yetama kuba nembono waJehova newaJesu ngetintfo. (1 Khor. 2:15, 16) Ikhombisa kuba ‘netitselo temoya.’ (Gal. 5:22, 23) Iphindze ibe nangumvangeli loshisekako, lobeka tintfo letimayelana neMbuso kucala ekuphileni kwayo. (Mat. 6:33) Ungaba nebuntfu lobemukelwa nguNkulunkulu ngekuba nemkhuba lomuhle wekuchubeka nesifundvo lotichubela sona. Loku kungafaka ekhatsi kufundza liBhayibheli malanga onkhe, kufundza magazini ngamunye we-Sicongosekulindza newe-“Phaphama!”, kulungiselela imihlangano nekuba khona njalo kuyo. (Hla. 1:1, 2; Heb. 10:24, 25) Ngalesikhatsi akhutsata Thimothi kutsi achubeke atfutfuka, Pawula wambhalela watsi ‘akacaphele kufundzisa kwakhe.’ (1 Thim. 4:15, 16) Ngako-ke timisele etinkhulumeni takho teSikolwa Semsebenti WemaKhristu. Wulungiselele nemsebenti wekushumayela futsi uhlanganyele kuwo njalo. Tibekele imigomo ekukhonteni kwakho Nkulunkulu futsi usebentele kuyifeza, imigomo lenjengekuba lihlahlandlela, kuba sisebenti saseBethel, nome kuya eSikolweni Lesisekelwe EBhayibheli Sebazalwane Labangakashadi. Buhlobo naNkulunkulu butakusita ‘ubalekele tinkhanuko tebusha.’—2 Thim. 2:22.
4. Kubaluleke kangakanani kwetsembeka?
4 Kwetsembeka: Ngelikhulu lekucala bazalwane lababelwa kutsi banike emaKhristu lahluphekako kudla, ‘bebatiwa’ kutsi betsembekile, ngako-ke baphostoli abazange bakhatsateke ngekutsi lomsebenti utawentiwa yini nome cha. Loko kwabavulela litfuba lekutsi bona banake tintfo letibaluleke kakhulu. (Imis. 6:1-4) Ngako-ke, nawuphiwe sabelo ebandleni, sente ngemandla akho onkhe. Lingisa Nowa lowatilandzela ngekucophelela ticondziso lanikwa tona tekwakha umkhumbi. (Gen. 6:22) Kwetsembeka kubalulekile kuJehova futsi kukhombisa kukhula kwemuntfu ebuhlotjeni bakhe naNkulunkulu.—1 Khor. 4:2; fundza libhokisi lelitsi “Tinzuzo Tekuceceshwa.”
5. Kungani kufanele bazalwane labasebasha babe nesifiso sekusebenta?
5 Njengobe kwaphrofethwa, Jehova uyawusheshisa umsebenti wekugcogca. (Isa. 60:22) Umnyaka ngamunye kubhajatiswa bantfu labangaba yincenye yesigidzi. Njengobe babanyenti kangaka bantfu labemukela liciniso, kunesidzingo semadvodza lavutsiwe sekutfwala imisebenti yelibandla. Akukase kube nemsebenti lomnyenti kangaka enhlanganweni yaJehova. (1 Khor. 15:58) Nine bazalwane labasebasha, ninaso yini sifiso sekusebenta? Nangabe kunjalo, loko kusho kutsi nifisa umsebenti lomuhle sibili!
[Emavi lacashuniwe lasekhasini 2]
Njengobe babanyenti kangaka bantfu labemukela liciniso, kunesidzingo semadvodza lavutsiwe sekutsi etfwale imisebenti yelibandla
[Libhokisi ekhasini 3]
Tinzuzo Tekuceceshwa
Bazalwane labasebasha futsi labafanelekako bazuza kakhulu nangabe labadzala babanika imisebenti letsite futsi babacecesha. Ngemuva kwemihlangano, umbonisi wesifundza abehleti endzaweni yesikhulumi akhutsata lomunye ummemeteli. Wabona umfanyana lomncane eme edvute nabo, wabese umbuta kutsi ufuna kukhuluma naye yini. Lomfanyana watsi abenikwe sabelo sekushanele endzaweni yesikhulumi njalo ngemuva kwemhlangano. Batali bakhe besebafuna kuhamba, kepha yena abengafuni kuhamba angakasenti sabelo sakhe. Ajabulile, lombonisi wesifundza wamkhweshela. Naku lakusho: “Labadzala bakulelibandla bahlale bakuphaphamele kucecesha bazalwane labasebasha ngekubaniketa imisebenti yelibandla. Ngaleso sizatfu, besekuyimvamisa ngabo kuncoma umzalwane losemusha kutsi abe yinceku lesebentako nangihambele libandla labo.”