Libhokisi Lembuto

◼ Ngaphambi kwekutsi ummemeteli longakabhajatiswa avunyelwe kubhajatiswa, kufanele abe asaya emihlanganweni yelibandla nasensimini ngelizinga lelingakanani?

Kubhajatiswa kusincumo lesibaluleke kakhulu umuntfu langasenta. Ngako-ke, ngaphambi kwekutsi umuntfu avunyelwe kubhajatiswa kufanele ngelizinga lelitsite abe asakucondza kahle loko Nkulunkulu lakufunako kuye. Ngetulu kwaloko, kufanele futsi abe asakhombisa kutimisela kwakhe kuphila ngaloko Nkulunkulu lakufunako.

EmaKhristu ayalwa kutsi angakuyekeli kuhlangana ndzawonye. Ngako ummemeteli longakabhajatiswa kufanele ngabe sewuyakhombisa kutimisela kwakhe kuba khona emihlanganweni yelibandla. (Heb. 10:24, 25) Imvamisa, usuke asaphendvula nakuleyo mihlangano. Kufanele ngabe sewubhalisile eSikolweni Semsebenti WemaKhristu, ngisho nome loko kungesiyo imfuneko.

Ngetulu kwaloko, njengobe emaKhristu aniketwe umsebenti wekushumayela tindzaba letimnandzi nekutsi ente bafundzi, ummemeteli longakabhajatiswa kufanele ahlanganyele njalo emsebentini wekushumayela ngaphambi kwekutsi abhajatiswe. (Mat. 24:14; 28:19, 20) Kufanele abe asashumayele tinyanga letingaki? Kufanele aniketwe sikhatsi lesenele sekukhombisa kutsi utimisele kakhulu kuhlanganyela ngenshisekelo emsebentini wekushumayela inyanga ngenyanga. (Hla. 78:37) Nobe kunjalo, kute sidzingo sekutsi kwendlule sikhatsi lesidze kusukela ngalesikhatsi lommemeteli acala kushumayela kuze kube sikhatsi sekutsi afanelwe kubhajatiswa, kungaba nje tinyanga letimbalwa. Mangaki ema-awa lokufanele awabike? Kute umtsetfo lobekiwe kuloku. Labadzala kufanele babuke timo temmemeteli ngamunye bese bakhombisa kucabangela.—Luk. 21:1-4.

Labadzala (nome tinceku letisebentako emabandleni lanalabadzala labambalwa) labacoca nemuntfu lofuna kubhajatiswa kufanele bakhumbule kutsi bantfu abafani futsi kufanele basebentise kuhlakanipha nabetama kutfola kutsi lomuntfu uyakufanela yini kubhajatiswa. Kulindzeleke kutsi abe nesifiso sekuba ngulomunye waboFakazi BaJehova futsi akhombise nekutsi uyalijabulela lelilungelo lanalo lekuba senhlanganweni yaJehova nelekushumayela ensimini. Labadzala bayati kutsi buhlobo bakhe naNkulunkulu busengakabi nemandla kangako futsi usengakabi nelikhono nalokuhlangenwe nako lokufana nekwebavangeli lababhajatisiwe. Nangabe labadzala babona kutsi lomuntfu usengakakulungeli kubhajatiswa, kufanele bamtjele ngemusa bamchazele tizatfu letisemiBhalweni talesincumo sabo bese bayamsita kutsi atfutfukise buhlobo bakhe naNkulunkulu.