Iminyaka Lelikhulu Yekumemetela UMbuso!
1. Eminyakeni lecishe ibe likhulu leyengcile, yini bantfu baJehova labakhutsatwa kutsi bayente?
1 “Bukani, iNkhosi iyabusa! Nine nititfunywa tayo. Ngako-ke memetelani, memetelani, memetelani, iNkhosi nembuso wayo.” Ngalamavi lakhutsatako lashiwo nguMzalwane Rutherford cishe eminyakeni lelikhulu leyengcile, bantfu baJehova bakhutsatwa kutsi basakate umlayeto weMbuso emhlabeni wonkhe jikelele. Nguloko kanye lesikwentile! Njengobe kwenta emaKhristu ekucala, natsi sishumayele tindzaba letimnandzi teMbuso “kuyo yonkhe indalo lengephansi kwelizulu.” (Khol. 1:23) Nasibuka emuva kuleminyaka lelikhulu leyengcile, yini lesiyentile kute simemetele uMbuso waNkulunkulu? Singachubeka njani siwumemetela njengobe sesisondzele eminyakeni lelikhulu loMbuso wacala kubusa?
2. Tincwadzi tetfu tiwusekele njani uMbuso waNkulunkulu?
2 Lesikwentile: Eminyakeni leminyenti leyengcile, tincwadzi tetfu betisolo tisekela uMbuso waNkulunkulu. Kusukela nga-1939, magazini wetfu loyinhloko bewusolo unesihloko lesitsi: Sicongosekulindza Simemetela UMbuso WaJehova. Lomagazini uvame kukhuluma ngeMbuso kanye naloko lotakufeza. Magazini i-“Phaphama!” nawo ugcizelela uMbuso waNkulunkulu njengalokuphela kwelitsemba lebantfu. Kuyabafanela-ke labomagazini lababili kutsi kube ngibo nyalo labahunyushwa ngetilwimi letinyenti futsi basakatwa kakhulu emhlabeni.—Semb. 14:6.
3. Ngutiphi letinye tetindlela lesitisebentisile kute simemetele uMbuso?
3 Bantfu baJehova basebentise tindlela letinyenti tekumemetela uMbuso. Kadzeni besisebentisa timoto letinembhobho, umsakato wemoya kanye nemagilamafoni laphatfwako. Letindlela tasisita ekusakateni tindzaba letimnandzi kubantfu labanyenti ngasikhatsi sinye kantsi bebasembalwa bamemeteli beMbuso. (Hla. 19:4) Kuleminyaka lesandza kwengca, sifake kwatiswa ku-jw.org, ngaleyondlela samemetela uMbuso etigidzini tebantfu, lokufaka ekhatsi labo labahlala emaveni lovinjelwe kuwo umsebenti wetfu.
4. Ngutiphi tindlela letikhetsekile tekushumayela lesitisebentisile?
4 Bantfu baJehova baphindze basebentisa tindlela letikhetsekile tekusakata umlayeto weMbuso. Nasi sibonelo: Emkhatsini wabo-1990, sente umetamo wekukhulisa umsebenti wekushumayela emtini ngemuti, emapaki, etindzaweni tekupaka kanye nasetindzaweni temabhizinisi. Sisandza kuhlela kutsi kube nendlela lekhetsekile yekushumayela etindzaweni letiphitsitelako, emadolobheni lamakhulu emhlabeni wonkhe. Ngetulu kwaloko, emabandla lamanyenti ashumayela etindzaweni tawonkhe wonkhe emasimini awo ngekusebentisa tincodlana nematafula etindzaweni letihamba bantfu labanyenti. Nobe kunjalo, kushumayela emtini ngemuti kuseyindlela leyinhloko yekushumayela ngeMbuso.—Imis. 20:20.
5. Umnyaka lomusha wemsebenti, utabanika liphi litfuba labanyenti betfu?
5 Lesitakwenta: Nakucala umnyaka lomusha wemsebenti ngaSeptember, labanyenti batawucala kuba ngemahlahlandlela lavamile. Ungaba ngilo yini nawe? Nawungeke ukhone, ungete waba yini lihlahlandlela lelisitako ngaletinye tikhatsi? Ngisho ungakhona kuba lihlahlandlela nome ungeke ukhone, Jehova utakubusisa nganome ngukuphi kutidzela lokwentako kute uhlanganyele ngekutimisela ekumemeteleni uMbuso.—Mal. 3:10.
6. Kungani inyanga ya-October 2014 itawuba ngulekhetsekile?
6 Ngenyanga ya-October 2014 kutawuhlangana iminyaka lelikhulu kusukela uMbuso wacala kubusa. Kuyafaneleka-ke kutsi Sicongosekulindza lesihanjiswako ngaleyo nyanga sigcile eMbusweni waNkulunkulu. Shengatsi ungenta umetamo wekuwuhambisela bantfu labanyenti lomagazini. Njengobe sibuke kuloko likusasa lelisiphatsele kona, shengatsi ngamunye wetfu angachubeka ‘nekumemetela tindzaba letimnandzi teMbuso waNkulunkulu’ kubo bonkhe labatawulalela.—Imis. 8:12.