Tsatsa Sibonelo Sebaphrofethi—Nahume
1. Yini lesiyifundza encwadzini yaNahume?
1 INineve yasendvulo leseyitindzala ibufakazi bekutsi njengobe Nahume aphrofetha, Jehova uyatiphindziselela etitseni taKhe, futsi ngisho nobe leso sitsa singesabeka kangakanani, ngeke sikhone kumelana naNkulunkulu. (Nah. 1:2, 6) Kusifundza ngekucophelela siphrofetho saNahume kungasiniketa tifundvo lesingatisebentisa emsebentini wetfu wekushumayela.
2. Yini lesingayenta kuze umlayeto lesiwumemetelako ube lusito?
2 Niketa Indvudvuto Nelitsemba: Nawucala kuyifundza, incwadzi yaNahume ingabonakala shengatsi ikhipha simemetelo sesehlulelo nje kuphela eNineve, inhlokodolobha ye-Asiriya yasendvulo. (Nah. 1:1; 3:7) Nobe kunjalo, leso simemetelo saba tindzaba letimnandzi kubantfu baJehova. Nahume, libito lakhe lelisho kutsi “Umdvudvuti,” wacinisekisa emaJuda akubo kutsi sitsa sabo besitawususwa masinyane. Waphindze wawacinisekisa ngekutsi Jehova “usiphephelo ngetikhatsi tekuhlupheka.” (Nah. 1:7) Natsi njengobe sishumayela, sitjela bantfu ngetindzaba letimnandzi futsi sibakhutsata kutsi bafune sivikelo kuJehova.—Nah. 1:15.
3. Singamlingisa njani Nahume ekusebentiseni tibonelo kanye nemifanekiso?
3 Sebentisa Tibonelo Kanye Nemifanekiso: Jehova waphefumulela Nahume kutsi acatsanise kuphela kweNineve naloko kwelidolobha laseGibhithe, iThebesi (No-Amoni), lebelibhujiswe yi-Asiriya. (Nah. 3:8-10) Njengobe sikhuluma ngekuphela kwalelive lelibi, singagcizelela kugcwaliseka kwetiphrofetho teliBhayibheli letikhombisa kutsi Jehova ukufeza konkhe loko lakushito. Nasi sibonelo: Ngesikhatsi baseBhabhulona kanye nemaMede bahlasela lidolobha laseNineve nga-632 B.C.E., timvula letinkhulu tabangela kutsi uMfula iThigrisi ugcwale, waze wadzilita tindvonga talelidolobha lebekungangeneki kuto. INineve yancotjwa ngekushesha, njengobe Jehova abebiketele.—Nah. 1:8; 2:6.
4. Yini lesingayenta kuze loko lesikusho emsebentini wekushumayela kucace futsi kuvakale?
4 Khuluma Ngendlela Lecacile Futsi Levakalako: Nahume abebhala ngendlela lechazako futsi lekwenta kuphile loko lakhuluma ngako. Emaphuzu akhe abecacile. (Nah. 1:14; 3:1) Ngendlela lefanako, natsi sifuna kusebentisa emavi lacondzakala melula. (1 Khor. 14:9) Nawufika kwekucala, chaza ngalokucacile kutsi ute ngani. Njengobe uchubela bantfu sifundvo seliBhayibheli, basite babe nekukholwa kuJehova kanye naseVini lakhe, futsi babone kutsi loko lelikushoko kusebenta njani kubo.—Rom. 10:14.
5. Ngusiphi sicinisekiso lesisitfola esiphrofethweni saNahume?
5 Litsemba Nahume labenalo ekugcwalisekeni kwetetsembiso taJehova libonakala ngalokucacile kulencwadzi yeliBhayibheli lebitwa ngeligama lakhe. Njengobe live laSathane lisondzela ekupheleni, siyadvudvuteka ngekutsi Nkulunkulu utsi ngeke ‘baphindze basivukele.’—Nah. 1:9.