Sita Labo Labangaboni Emehlweni Kutsi Bafundze NgaJehova
1. Jesu wakukhombisa njani kuba neluvelo ngebantfu labatimphumphutse?
1 Bekusesele emalanga lambalwa kutsi Jesu afe. Njengobe abesuka edolobheni laseJerikho, emadvodza lamabili latimphumphutse amemeta atsi: “Nkhosi, sihawukele!” Ngisho nobe Jesu abecabanga ngaloluvivinyo lolumatima labetawubhekana nalo, kodvwa wema, wawabita lamadvodza wase uyawaphilisa. (Mat. 20:29-34) Singakulingisa njani kuba neluvelo kwaJesu ngebantfu labatimphumphutse?
2. Singafakaza kanjani kumuntfu longaboni emehlweni lesihlangana naye etindzaweni tawonkhe wonkhe?
2 Bani Lusito: Nangabe uhlangana nemuntfu loyimphumphutse, mhlawumbe endzaweni yawonkhe wonkhe, tetfule bese ucela kumsita. Njengobe bantfu bavame kusitakala ngebantfu labatimphumphutse, angase angakwetsembi. Nanobe kunjalo, kuba nebungani nekumnaka ngalokusuka enhlitiyweni kungase kumente akhululeke. Khumbula nekutsi kunemazinga langafani ekungaboni emehlweni, futsi loko ngiko lokungancuma kutsi udzinga lusito lolungakanani. Nasewumsitile, ungabese uyamtjela kutsi ufundzisa bantfu ngeliBhayibheli. Cela kumfundzela umbhalo, mhlawumbe Tihlabelelo 146:8 nobe Isaya 35:5, 6. Nangabe akhona kufundza iBraille, mbute kutsi angatijabulela yini tincwadzi letibhalwe ngeBraille letingamsita kutsi afundze kabanti ngeliBhayibheli. Ungamsita nekutsi atfole tintfo letitsetjuliwe letiku-jw.org. Nangabe ngcondvomshini wakhe uneluhlelo lolukwati kuwafundza avakale emagama lavela kungcondvomshini, kungenteka kutsi angakujabulela kuba netihloko letitfolakala ku-jw.org kanye netincwadzi letingatsatfwa ngeluhlelo lwe-RTF (Rich Text Format).—Fundza libhokisi lelitsi “Nawusita Umuntfu Longaboni Emehlweni . . .”
3. Singabafuna njani bantfu labangaboni emehlweni ensimini yetfu?
3 Funani Bantfu Labangaboni Emehlweni: Asikavami kutfola bantfu labangaboni emehlweni nasishumayela emtini ngemuti, ngobe labanyenti babo abakhululeki kukhuluma nebantfu labangabati labafika emakhaya abo. Ngako-ke, kudzinga umetamo lomkhulu ‘kufuna’ labo bantfu kuze sibashumayele. (Mat. 10:11) Ukhona yini losebenta naye nobe lofundza naye longaboni emehlweni? Khuluma naye. Nangabe ensimini yenu, kunesikolwa sebantfu labangaboni emehlweni, ungatimikisa tincwadzi tetfu letibhalwe ngeBraille kuze tifakwe emtatjeni wetincwadzi taleso sikolwa. Ukhona yini umuntfu lomatiko lonelilunga lemndeni lelingaboni emehlweni? Tikhona yini tinhlangano letisita bantfu labatimphumphutse ensimini yenu nobe letike tasita etindzaweni lapho labo bantfu bahlala khona? Chazela lilunga lemndeni, nobe umuntfu lowemukela tivakashi nobe loyo longumcondzisi kutsi BoFakazi BaJehova bayakujabulela kusita bantfu labangaboni emehlweni, bese ucela kuletsa tincwadzi letibhalwe ngeBraille nobe tintfo letitsetjuliwe. Mkhombise setsembiso lesiseBhayibhelini sekutsi madvutane Nkulunkulu utabucedza bumphumphutse. Mhlawumbe ungamkhombisa i-video leku-jw.org lenesihloko lesitsi “Ngaphandle Kwalo, Bengizozizwa Ngilahlekile,” lekhuluma ngendvodza leyimphumphutse leyazuza kakhulu ngekutfola liBhayibheli lelibhalwe ngeBraille. Nawuchaza injongo yekuta kwakho, loko kungavula litfuba lekutsi ucoce nebantfu labatimphumphutse.
4. Ngutiphi tifundvo lesititfola endzabeni yaJanet?
4 Lomunye dzadze longaboni emehlweni, ligama lakhe lokutsiwa nguJanet, wavakashela indzawo lebeyihlala bantfu labatimphumphutse. Wafike wacoca nalomunye make. Janet wamtjela kutsi “Jesu waphilisa bantfu labatimphumphutse kuze akhombise loko labetakwentela bonkhe labatimphumphutse.” Bafundza Sembulo 21:3, 4 futsi Janet wachaza kutsi uMbuso waNkulunkulu utasifeza njani lesetsembiso. Lomake wathula kancane, wase utsi: “Angizange sengive umuntfu loyimphumphutse akhuluma ngalendlela. Bantfu labanyenti labangasito timphumphutse bakholelwa kutsi bantfu baba timphumphutse ngobe kusuke kukhona lokutsite labakwentile nobe lokwentiwa bokhokho babo.” Lodzadze watfumelela lomake incwadzi letsi Lokufundziswa LiBhayibheli asebentisa umlayeto wangcondvomshini, futsi nyalo sewumchubela sifundvo seliBhayibheli kabili ngeliviki.
5. Nanobe singeke sikhone kuphilisa bantfu labangaboni emehlweni njengobe kwenta Jesu, ngutiphi tibusiso lesingatitfola nasibanaka?
5 Kuliciniso kutsi ngeke sikhone kuphilisa bantfu labangaboni emehlweni njengobe kwenta Jesu, kodvwa singabasita bonkhe labo nkulunkulu walelive lavale tingcondvo tabo, kuhlanganise nalabo labatimphumphutse mbamba, kutsi bacondze liciniso leliseVini laNkulunkulu. (2 Khor. 4:4) Jesu waphilisa lamadvodza lamabili labesedvute naseJerikho ngobe ‘abewahawukela.’ (Mat. 20:34) Nangabe sibanaka ngendlela lefanako bantfu labangaboni emehlweni, singaba nelilungelo lekusita labanye babo kutsi bafundze ngaJehova, loyo lotawucedza bumphumphutse phakadze.