Kutfutfukisa Emakhono Etfu Emsebentini Wekushumayela—Kushumayela Etindzaweni Temabhizinisi

Kubaluleke Ngani?: Ngesizatfu sekutsi bantfu labanyenti bacitsa sikhatsi lesinyenti basemsebentini, indlela lencono yekutsi batfole umlayeto ngeMbuso kutsi sibashumayele etindzaweni labasebenta kuto. Kushumayela endzaweni yemabhizinisi kungajabulisa futsi kube nemphumela lomuhle, ngobe bantfu labasebentako batfolakala khona futsi bavame kwemukelana kahle njengobe bafuna emakhasimende. Kute baphumelele, bamemeteli kufanele bacabangele futsi basebentise kucondza, bagcoke futsi batilungise kahle. (2 Khor. 6:3) Ngako-ke, umbonisi wemsebenti kufanele anakisise kutsi isetjentwa kangakhi lendzawo nekutsi isetjentwa bobani.

Indlela Yekukwenta:

Lungiselela inshumayelo lemfishane. Nangabe sicitsa sikhatsi lesidze nesisebenti, esikhatsini lesitako singahle singayitfoli imvume yekucoca naso.
Fika ngesikhatsi labangasimatasa ngaso, njengalapho basandza kuvula.
Yetama kucale ukhulume nalophetse. Bani nemusa nebungani. Ungase utsi: “Sivakashela bantfu sikhashanyana nje etindzaweni labasebenta kuto ngobe akusimelula kubatfola emakhaya.” Inshumayelo yakho ayibe yimfishane, bese umnika lipheshana, bomagazini nobe lenye yetincwadzi tetfu. Kute bangacabangi kutsi siyatsengisa, kuhle kutsi singawukhulumeli umnikelo ngaphandle nangabe babuta kutsi umsebenti wetfu usekelwa njani ngetimali.
Nangabe lona lophetse akhulumiseka, cela imvume yekukhuluma naletinye tisebenti. Kuletinye tindzawo temabhizinisi, ungacela kushiya letinye tetincwadzi tetfu etindzaweni tabo tekudlela nobe tekuphumula.
Sebentisa kucondza, ucabangele futsi utivumelanise nesimo. Nasi sibonelo: Nangabe sisebenti sisakhuluma nelikhasimende nobe sisematasa, mani site sicedze bese uyasondzela kute ukhulume naso.

Yetama Loku Kulenyanga:

EKukhonteni Kwemndeni kwakusihlwa lokulandzelako, phrakthizani inshumayelo lemfishane leningayisebentisa nangabe nishumayela endzaweni yemabhizinisi.