Tsatsa Sibonelo Sebaphrofethi—Habakhuki
1. Yini leyenta siyicondze kahle indlela lativa ngayo umphrofethi Habakhuki?
1 Njengobe siphila kulelive leligcwele bubi, singahle sitive njengaHabakhuki lowabuta Jehova kutsi: “Wentelani kutsi ngibone bubi lobungaka? Ukubeketelelani kuhlushwa kwalabacindzetelekile?” (Hab. 1:3; 2 Thim. 3:1, 13) Kuzindla ngemlayeto waHabakhuki kanye nesibonelo sakhe sekwetsembeka, kungasicinisa njengobe silindzele lilanga laJehova lekwehlulela.—2 Phet. 3:7.
2. Singakhombisa njani kutsi sinekukholwa?
2 Bani Nekukholwa: Kunekutsi advumateke ngenca yesimo lesibuhlungu labekakuso, Habakhuki wachubeka akhutsele futsi anebuhlobo lobuhle naNkulunkulu. (Hab. 2:1) Jehova watsi kulomphrofethi, umuntfu “lolungile uyawuphila ngekukholwa kwakhe” futsi wamcinisekisa nekutsi lakushito Yena kutakwenteka ngesikhatsi lesifanele. (Hab. 2:2-4) Kusho kutsini loku kumaKhristu laphila kulamalanga ekugcina? Kubaluleke kakhulu kuciniseka kutsi kuphela kutawugcine kufikile kunekunaka kutsi kutawufika nini. Kukholwa kusisita kutsi sihlale silindzile futsi umsebenti wekushumayela ute kucala kitsi.—Heb. 10:38, 39.
3. Yini leyenta kubaluleke kuhlale sijabulile ekukhonteni Jehova?
3 Jabula ngaJehova: Kukholwa kwetfu kutawuvivinywa lapho Gogi wakaMagogi ahlasela bantfu baJehova. (Hez. 38:2, 10-12) Timphi tiletsa bumatima, ngisho nakulabo labaphumelele kuto. Tingabanga indlala, tisente silahlekelwe tintfo lesinato, futsi tehlise nelizinga lekuphila. Sitakwenta njani nakuvela bumatima? Habakhuki bekati kutsi bumatima butawufika, ngako wakhetsa kujabula ngemsebenti labewentela Jehova. (Hab. 3:16-19) ‘Injabulo yetfu levela kuJehova’ itasisita sikhone kubeketelela bumatima lobutako.—Neh. 8:10; Heb. 12:2.
4. Yini lesijabulisako nyalo nalesitayijabulela esikhatsini lesitako?
4 Labo labatawusindza ngelusuku lekwehlulela, batawuchubeka nekufundziswa indlela yekuphila lejabulisa Nkulunkulu. (Hab. 2:14) Nalabavusiwe batawufundziswa ngaJehova. Shengatsi ngisho nanyalo, singasebentisa lonkhe litfuba lesilitfolako kute sikhulume ngaJehova kanye nemisebenti yakhe lemangalisako!—Hla. 34:1; 71:17.