Kuba Lihlahlandlela

Sisuke siwasebentisa kahle emandla etfu nangabe sitibekela imigomo yekwentela Jehova lokunyenti. (1Kt 9:26) Imigomo isisita kutsi sisisebentise kahle sikhatsi setfu ngobe sikhatsi salelive sesinciphile. (Efe 5:15, 16) Ekukhonteni kwenu kwemndeni, ningacoca ngemigomo leningatsandza kutibekela yona kulomnyaka lomusha wemsebenti. Kute usitakale, lencwajana yekubhalela inetihloko letinemigomo longacabanga ngayo futsi uyithantazele.—Jak 1:5.

Sibonelo nje, onkhe emalunga emndeni angalisita yini lilunga linye lemndeni kutsi libe lihlahlandlela lelivamile? Nangabe ungaciniseki kutsi utawukhona kugcwalisa umgomo wema-awa, ungakhuluma nalamanye emahlahlandlela lebewanenkinga lefanako. (Tag 15:22) Mhlawumbe ungaphindze ucoce nalelihlahlandlela ekukhonteni kwenu kwemndeni. Ungabese ubhala phansi luhlelo lotalusebentisa. Nangabe wake waba lihlahlandlela esikhatsini lesendlulile, buka kutsi timo takho tiyakuvumela yini nyalo kutsi ube lihlahlandlela.

Lamanye emalunga emndeni wakho angakhona yini kuba ngemahlahlandlela lasitako inyanga yinye nobe ngetulu? Nangabe ute kahle emandla, ungakhona kuba lihlahlandlela lelisitako ngekutsi ucitse sikhatsi lesincane njalo ngelilanga emsebentini wekushumayela. Nangabe ute sikhatsi sekutsi ungaya emsebentini wekushumayela ekhatsi neliviki ngenca yekutsi uyasebenta nobe uyafundza, ungakhetsa inyanga leneliholidi nobe lenetimphelasontfo letisihlanu. Ungabhala sikhatsi lofise kuba ngaso lihlahlandlela lelisitako kukhalenda futsi ubhale neluhlelo lwakho.—Tag 21:5.

BUKELANI I-VIDEO LETSI BANINI NESIBINDZI . . . NINE MAHLAHLANDLELA, BESE NIPHENDVULA LOMBUTO:

• Loko lokwenteka kudzadze Aamand kukufundzisani ngendlela Jehova labanakekela ngayo ngelutsandvo labo labatidzelako kuze babe ngemahlahlandlela?