Umshado—Sibopho Lesihlala Njalo

Imishado yemaKhristu lephumelelako iletsa ludvumo kuJehova iphindze iletsele indvodza nemfati injabulo. (Mak 10:9) Kuze emaKhristu akhone kubeketelela tinkinga futsi ajabule emshadweni, kufanele asebentise timiso letiseBhayibhelini nawakhetsa umuntfu latawushada naye.

Kukuhlakanipha kutsi ungatsandzani nalotsite kuze kube ngulapho sewendlulile “esikhatsini sekuvutselwa yinkhanuko yebusha,” lokusikhatsi lapho khona imiva lenemandla yekuya ecansini ingakwenta kutsi ungenti sincumo lesikahle. (1Kt 7:36) Kukuhlakanipha kutsi usebentise sikhatsi sakho usengakashadi kuze ucinise buhlobo bakho naNkulunkulu uphindze utfutfukise buntfu bakho bebuKhristu. Nawenta njalo utawukhona kwenta umshado wakho kutsi uphumelele.

Ngaphambi kwekutsi uvume kushada nalotsite, tinike sikhatsi sekwati “loko lokusenhlitiyweni” yakhe. (1Ph 3:4) Nawucala kungabata, khulumisana nalomuntfu lotawushada naye. Njengalobunye buhlobo bantfu lababa nabo nalabanye, emshadweni kufanele unake kakhulu loko lotamnika kona lona loshade naye hhayi loko lotakutfola kuye. (Flp 2:3, 4) Nangabe usebentisa timiso teliBhayibheli ngaphambi kwekutsi ushade, kutawuba melula kutsi uchubeke utisebentisa ngisho nalapho soshadile kuze ujabule emshadweni wakho.

BUKELANI I-VIDEO LETSI KULUNGISELELA UMSHADO​—INCENYE 3: “BALA TINDLEKO,” BESE NIPHENDVULA LEMIBUTO LELANDZELAKO:

• Batfutfuka njani buhlobo balodzadze naShane?

• Yini lodzadze layinaka njengobe lobudlelwane babo bebuchubeka?

• Bamsita njani batali bakhe, futsi ngusiphi sincumo lesihlakaniphile labese uyasitsatsa?