Indlela Longasita Ngayo Ngemuva Kwesehlakalo

Tehlakalo temvelo setandza kakhulu kulamalanga lesiphila kuwo. Nakugadla sehlakalo, imetamo yekuniketa lusito kufanele ihlelwe kahle kuze itophumelela. Ngaleso sizatfu, Sigungu Lesibusako sihlele kutsi kube neLitiko lekusita nakuvele sehlakalo egatjeni ngalinye.

Nangabe bazalwane labakulelitiko batfola kutsi kube nesehlakalo endzaweni letsite, ngekushesha bachumana nalabadzala bakuleyondzawo kute batfole kutsi nguluphi lusito lelidzingwa bamemeteli. Nangabe umonakalo ube mkhulu futsi bamemeteli bangakhoni kubhekana nalesimo, ligatja libese labela bazalwane labafanelekako kutsi bahole kulomsebenti wekusita. Labazalwane bangacela emavolontiya nobe iminikelo yetintfo letitsite nobe batsenge tintfo letidzingekako.

Tinyenti tinzuzo tekusebentisa lendlela lena. Kwenta kutsi kungabi nemsebenti longadzingeki, kudideka kuphindze kungamoshakali timali netintfo, lokuyintfo lebeyingenteka kube bazalwane benta ngendlela yabo.

Bazalwane lababelwe ligatja bangabuka kutsi ngumalini lodzingekako nekutsi mangakhi emavolontiya ladzingekako kulomsebenti wekusita. Bangakhulumisana netiphatsimandla tendzawo, letingasisita ngekutsi tente lomsebenti wekusita kutsi usheshe. Ngako sicela kutsi ungazami kusita ngekutsi ukoleke timali, utfumele tintfo letidzingekako, nobe uye kulendzawo letsintsekile ngaphandle nawuceliwe kutsi wente njalo.

Nobe kunjalo, sifuna kusita nakuvela sehlakalo. (Heb 13:16) Siyabatsandza bazalwane betfu! Yini lesingayenta? Lokubaluleke kakhulu, singabathantazela labo labatsintfwe ngulesehlakalo nalabo labaniketa lusito. Singaphindze sinikele emsebentini wemhlaba wonkhe. Acondziswa Sigungu Lesibusako, emahhovisi eligatja ngiwo latawati kutsi leminikelo itawusita kuphi. Nangabe sifisa kuyosita matfupha, singakhombisa kutsi siyatfolakala ngekutsi sigcwalise lifomu i-Local Design/​Construction Volunteer Application (DC-50).

BUKELANI I-VIDEO LETSI TIKHUKHULA LETENTA UMONAKALO LOMKHULU E-BRAZIL, BESE NIPHENDVULA LOMBUTO LOLANDZELAKO:

Yini lekujabulisile mayelana nemetamo yekusita yaBoFakazi BaJehova ngemuva kwetikhukhula taseBrazil nga-2020?