Kutsandza Jehova Nekumbonga Kutakukhutsata Kutsi Ubhajatiswe

1-2. Njengobe kuvetiwe encwadzini yeMisebenti 8:27-31, 35-38, yini leyakhutsata indvuna yesigodlo lengumTopiya kutsi ibhajatiswe?

UYAFUNA yini kubhajatiswa futsi ube ngumfundzi waKhristu? Lutsandvo kanye nekubonga kukhutsate labanyenti kutsi babhajatiswe. Cabanga ngesibonelo sendvuna lebeyisisebenti sendlovukazi yaseTopiya.

² Lendvuna lengumTopiya yabhajatiswa ngekushesha nje ngemuva kwekufundza loko lobekushiwo yimiBhalo. (Fundza Imisebenti 8:27-31, 35-38.) Yini leyayikhutsata? Kusebaleni kutsi beyilitsatsa njengaleliligugu liVi laNkulunkulu, ngobe beyifundza lamanye emavesi lasencwadzini ya-Isaya njengobe beyihamba ngenkalishi. Ngesikhatsi Filiphu akhuluma nayo, lendvuna yakhombisa kubonga ngaloko Jesu bekayentele kona. Kungani beyiya eJerusalema? Kungobe beseyivele imtsandza Jehova. Sikwati njani loko? Beseyivele ikhonta Jehova eJerusalema. Lendvuna beseyiyishiyile inkholo yayo futsi yaba yincenye yesive lebesitinikele kuNkunkulu weliciniso. Kutsandza Jehova kwayikhutsata kutsi yente sincumo lesibalulekile sekubhajatiswa futsi ibe ngumlandzeli waKhristu.—Mat. 28:19.

3. Yini lengavimbela umuntfu kutsi abhajatiswe? (Buka libhokisi lelitsi “Yini Lesenhlitiyweni Yakho?”)

³ Kutsandza Jehova kungakukhutsata kutsi ubhajatiswe. Kodwa lutsandvo lungaphindze lukuvimbele kutsi ubhajatiswe. Kanjani? Cabanga ngaletinye tibonelo. Ungase utsandze kakhulu umndeni wakini kanye nebangani labangamtsandzi Jehova futsi ungase ukhatsateke ngekutsi batakwenyanya nawubhajatiswa. (Mat. 10:37) Kungenteka utsandza imikhuba Nkulunkulu layenyanyako futsi ukutfola kumatima kuyiyekela. (Hla. 97:10) Kungenteka wakhula ugubha imikhosi yenkholo yemanga, mhlawumbe uyatikhumbula tintfo letijabulisako letihambisana naleyo mikhosi. Ngesizatfu saloko ungakutfola kumatima kuyekela lemikhosi lengamjabulisi Jehova. (1 Khor. 10:20, 21) Kufanele utibute kutsi, “Yini nobe ngubani lengimtsandza kakhulu?”

NGUBANI LOKUFANELE SIMTSANDZE KAKHULU?

4. Ngusiphi sizatfu lesibalulekile sekutsi ubhajatiswe?

⁴ Tinyenti tintfo letinhle longatitsandza nalongabonga ngato. Sibonelo saloko kutsi, kungenteka bewulihlonipha kakhulu liBhayibheli ngaphambi kwekutsi ufundze naBoFakazi BaJehova. Kungenteka bewumtsandza Jesu. Ngesizatfu sekutsi sewuyabati BoFakazi BaJehova, ungase ukutsandze kutihlanganisa nabo. Kodvwa kutsandza letintfo letinhle angeke kukwente utinikele kuJehova futsi ubhajatiswe. Kutsandza Jehova kusizatfu lesibaluleke kakhulu sekutsi ubhajatiswe. Nawutsandza Jehova kwendlula nobe yini, angeke uvumele lutfo kutsi lukuyekelise kumkhonta. Kutsandza Jehova kutakukhutsata kutsi ubhajatiswe futsi kutakusita uhlale wetsembekile kuye ngisho nobe sewubhajatisiwe.

5. Ngumiphi imibuto lesitawucoca ngayo?

⁵ Jesu watsi kufanele sitsandze Jehova ngayo yonkhe inhlitiyo yetfu, umphefumulo wetfu, ingcondvo kanye nemandla etfu. (Mak. 12:30) Ungakufundza njani kutsandza kanye nekuhlonipha Jehova ngalokujulile? Kucabanga ngendlela Jehova lasitsandza ngayo kutawusenta kutsi simtsandze. (1 Joh. 4:19) Ngumiphi imiva lotawuba nayo kanye netintfo lotawutenta nawucala kuba nalolutsandvo lolubalulekile?b

6. Ngekusho kwaRoma 1:20, nguyiphi indlela longamati ngayo Jehova?

⁶ Fundza ngaJehova etintfweni latidalile. (Fundza Roma 1:20; Semb. 4:11) Cabanga ngetihlahla kanye nangetilwane Jehova latidalile nekutsi tikhombisa njani kutsi uhlakaniphile. Fundza lokutsite ngendlela lemangalisako umtimba wakho lodalwe ngayo. (Hla. 139:14) Cabanga ngemandla elilanga nanobe liyincenye yetigidzigidzi tetinkhanyeti.c (Isa. 40:26) Nawucabanga ngendalo yaJehova, utamhlonipha kakhulu. Nanobe kunjalo, kwati kutsi Jehova uhlakaniphile futsi unemandla kutawenta buhlobo bakho naye bucine. Kuze umtsandze mbamba Jehova, kufanele wati lokunyenti ngaye.

7. Kuze umtsandze mbamba Jehova, yini lokudzingeka uyikholelwe?

⁷ Kufanele uciniseke kutsi Jehova ukutsandza mbamba. Kumatima yini kukholelwa kutsi uMdali welizulu nemhlaba uyakubona futsi uyakunakekela? Nangabe kunjalo, khumbula kutsi Jehova ‘akekho khashane kuloyo naloyo kitsi.’ (Imis. 17:26-28) “Uhlolisisa tonkhe tinhlitiyo” futsi uyakwetsembisa kutsi ‘nawumfuna, utamtfola,’ njengobe Davide atjela Solomoni. (1 Khr. 28:9) Ecinisweni, sizatfu lesikwenta utadishe liBhayibheli kutsi Jehova uyasho kutsi, ‘utawuchubeka akunakekela.’ (Jer. 31:3) Utamtsandza kakhulu Jehova nangabe ukwati loko lakwentele kona.

8. Yini longayenta kuze ukhombise kutsi uyamtsandza Jehova?

⁸ Lenye indlela longakhombisa ngayo kutsi uyamtsandza Jehova, kukhuluma naye ngemthantazo. Indlela lomtsandza ngayo itawukhula nangabe umtjela tonkhe tintfo letikukhatsatako futsi umbonga ngako konkhe lakwentela kona. Bungani bakho naJehova butawucina nawubona indlela laphendvula ngayo imithantazo yakho. (Hla. 116:1) Utawuciniseka kutsi ukwati kahle. Kuze buhlobo bakho naJehova bukhule, kufanele uyati indlela lacabanga ngayo futsi ukwati loko lafuna ukwente. Indlela longalutfola ngayo lolwati kutsi utadishe liVi lakhe liBhayibheli.

9. Ungakhombisa njani kutsi liBhayibheli liligugu kuwe?

⁹ Litsatse Njengaleligugu Livi laNkulunkulu liBhayibheli. LiBhayibheli kuphela lelisitjela liciniso ngaJehova kanye nangenjongo yakhe ngawe. Utawube ukhombisa kutsi liBhayibheli liligugu kuwe nangabe ulifundza onkhe malanga, usilungiselela sifundvo lochutjelwa sona futsi ukusebentisa loko lokufundzako. (Hla. 119:97, 99; Joh. 17:17) Unalo yini luhlelo lwekufundza liBhayibheli? Uyanamatsela yini kulo futsi uyaciniseka yini kutsi liBhayibheli ulifundza onkhe malanga?

10. LiBhayibheli lehluke ngani kuletinye tincwadzi?

¹⁰ Lenye intfo leyehlukile ngeliBhayibheli kutsi likhuluma ngetintfo letashiwo bantfu lababona Jesu. Liyincwadzi lenembile lechaza loko Jesu lakwentela kona. Njengobe ufundza ngaloko Jesu lakusho nalakwenta, utawufuna kuba ngumngani wakhe.

11. Yini lengasisita kutsi sitsandze Jehova?

¹¹ Tsandza Jesu, futsi nawenta njalo indlela lotsandza ngayo Jehova itawukhula. Leni? Kungobe Jesu wabukhombisa kahle buntfu baBabe wakhe. (Joh. 14:9) Ngako nawuchubeka ufundza lokwengetiwe ngaJesu, utawumati kahle Jehova futsi umtsandze. Cabanga ngendlela Jesu lakhombisa ngayo luvelo kubantfu lebebabukelwa phansi, kubantfu lebebaphuyile, lebebagula kanye nakubantfu lebebabutsakatsaka. Cabanga nangeseluleko lakunika sona nyalo nekutsi imphilo yakho itfutfuka njani nangabe umlalela.—Mat. 5:1-11; 7:24-27.

12. Njengobe ufundza ngaJesu, yini longase ufise kuyenta?

¹² Indlela lomtsandza ngayo Jesu itawukhula njengobe uzindla ngekutinikela kwakhe kutsi abe yinhlawulo kuze tono tetfu titsetselelwe. (Mat. 20:28) Nangabe sewati kutsi Jesu bekatimisele kukufela, ungase ufise kuphendvuka futsi ucele Jehova akutsetselele. (Imis. 3:19, 20; 1 Joh. 1:9) Njengobe uchubeka umtsandza Jesu naJehova, utawufuna kutihlanganisa nebantfu labativa njengawe.

13. Yini Jehova lakuphe yona?

¹³ Tsandza Labo Labatsandza Jehova. Umndeni wakini longamati Jehova kanye nebantfu labake baba bangani bakho bangase bangacondzi kutsi kungani ufuna kutinikela kuJehova. Bangase bakuphikise. Jehova utakusita ngekutsi akuphe umndeni lomusha, lokubazalwane nabodzadze ebandleni. Nawutihlanganisa nabo, batakutsandza futsi bakunakekele. (Mak. 10:29, 30; Heb. 10:24, 25) Ngekuhamba kwesikhatsi, umndeni wakini ungase uhlanganyele nawe ekukhonteni Jehova futsi uphile ngetimiso takhe.—1 Phet. 2:12.

14. Ngekusho kwa-1 Johane 5:3, yini loyifundzile ngetimiso taJehova?

¹⁴ Tihloniphe timiso taJehova futsi utisebentise. Ngaphambi kwekutsi umati Jehova, kungenteka bewuphila ngendlela lotsandza ngayo, kodvwa nyalo sewuyabona kutsi timiso taJehova tincono kakhulu. (Hla. 1:1-3; fundza 1 Johane 5:3.) Cabanga ngeseluleko seliBhayibheli lesibhalelwe emadvodza, bafati kanye nebantfwana. (Ef. 5:22–6:4) Njengobe usebentisa leseluleko, ikhona yini intfutfuko loyibonako emndenini wakini? Njengobe ulalela ticondziso taJehova endzabeni yekukhetsa bangani ngekuhlakanipha, kuphila kwakho sekuncono yini? Uyajabula yini? (Taga 13:20; 1 Khor. 15:33) Kungenteka imphendvulo yalemibuto ingu-yebo.

15. Yini longayenta nangabe udzinga lusito ekusebentiseni timiso teliBhayibheli?

¹⁵ Ngaletinye tikhatsi, kungenteka kube matima kwati kutsi ungatisebentisa njani timiso teliBhayibheli lotifundzako. Kungako Jehova asebentisa inhlangano yakhe kuze isinikete tincwadzi letichaza loko lokushiwo liBhayibheli futsi letisisita sikhone kwehlukanisa lokuhle nalokubi. (Heb. 5:13, 14) Nawutifundza futsi utitadisha letincwadzi, utawubona kutsi tilusito kanganani futsi kungenteka ufune kusondzela enhlanganweni yaJehova.

16. Jehova ubahlele njani bantfu bakhe?

¹⁶ Tsandza inhlangano yaJehova futsi uyisekele. Jehova uhlele kutsi bantfu bakhe babe semabandleni, futsi iNdvodzana yakhe Jesu, ingumholi wawo onkhe lamabandla. (Ef. 1:22; 5:23) Jesu ubeke licembu lalabagcotjiwe kutsi lihole ekuhleleni umsebenti lafuna kutsi wentiwe lamuhla. Jesu wabita lelicembu ngekutsi ‘sisebenti lesetsembekile nalesihlakaniphile,’ futsi umsebenti walo kukusita kutsi usondzele kuNkulunkulu nekuvikela buhlobo bakho naye. (Mat. 24:45-47) Lenye indlela lesisebenti lesetsembekile lesikusita ngayo, kuciniseka kutsi sikhetsa emadvodza lamadzala lafanelekako kuze akweluse. (Isa. 32:1, 2; Heb. 13:17; 1 Phet. 5:2, 3) Lamadvodza lamadzala enta konkhe lokusemandleni awo kuze akudvudvute futsi akusite usondzelane naJehova. Kodvwa intfo lebaluleke kakhulu langakwentela yona, kukusita kutsi ufundzise labanye ngaJehova.—Ef. 4:11-13.

17. Ngekusho kwaRoma 10:10, 13, 14, kungani sitjela labanye ngaJehova?

¹⁷ Sita labanye kutsi batsandze Jehova. Jesu watjela balandzeli bakhe kutsi bafundzise labanye ngaJehova. (Mat. 28:19, 20) Singakhona kuwulalela lomyalo ngobe siyati kutsi kufanele siwulalele. Njengobe lutsandvo lwakho ngaJehova lukhula, utawutiva ngendlela umphostoli Phetro nemphostoli Johane labativa ngayo, baze batsi: “Ngeke siyekele kukhuluma ngetintfo lesitibonile nalesitivile.” (Imis. 4:20) Sitawujabula kakhulu nasisita umuntfu kutsi atsandze Jehova. Cabanga ngendlela Filiphu lajabula ngayo ngesikhatsi asita indvuna lengumTopiya kutsi ifundze liciniso lelisemiBhalweni futsi ibhajatiswe! Nawulingisa Filiphu futsi ulalela umyalo waJesu wekutsi sishumayele, usuke ukhombisa kutsi ufuna kuba nguFakazi waJehova. (Fundza Roma 10:10, 13, 14.) Nawenta njalo, kungenteka utibute umbuto lofanako nalowabutwa yindvuna lengumTopiya, lotsi: “Yini lengivimba kutsi ngibhajatiswe?”—Imis. 8:36.

18. Yini lesitawucoca ngayo esihlokweni lesilandzelako?

¹⁸ Utawube wenta sincumo lesibaluleke kakhulu ekuphileni kwakho nawukhetsa kubhajatiswa. Ngesizatfu sekutsi lesi sincumo lesibaluleke kakhulu, kudzingeka ucabangisise kutsi sisho kutsini. Yini lokufanele uyati ngekubhajatiswa? Yini lokufanele uyente ngaphambi kwekubhajatiswa nangemuva kwekubhajatiswa? Lemibuto itawuphendvulwa esihlokweni lesilandzelako.