SIHLOKO LESIFUNDVWAKO 13
Tsandzanani Kakhulu
“Tsandzanani kakhulu ngalokusuka enhlitiyweni.”—1 PHET. 1:22.
INGOMA 109 “Thanda Kakhulu Ngokusuka Enhliziyweni”
LOKUTAWUCOCWA NGAKO KULESIHLOKOa
Ngebusuku bakhe bekugcina ahleti nebaphostoli, Jesu wagcizelela indzaba yelutsandvo (Buka tigaba 1-2)
1. Ngumuphi umyalo locondzile Jesu lawutjela bafundzi bakhe? (Buka sitfombe lesisekhasini lekucala.)
NGEBUSUKU bangaphambi kwekufa kwakhe, Jesu watjela bafundzi bakhe umyalo locondzile. Watsi kubo: “Njengobe nje nami nginitsandzile, nani tsandzanani.” Waphindze watsi: “Nangabe nitsandzana, bonkhe batawukwati kutsi nibafundzi bami.”—Joh. 13:34, 35.
2. Kungani kubalulekile kutsi sitsandzane?
2 Jesu watsi balandzeli bakhe mbamba bebatawubonakala ngalokucacile nangabe batawutsandza labanye ngendlela naye lebekabatsandza ngayo bantfu. Lamavi bekaliciniso ngelikhulu lekucala, futsi nalamuhla aseliciniso. Kubaluleke kakhulu kutsi sitsandzane ngisho nobe sibhekene nebumatima!
3. Yini lesitawucoca ngayo kulesihloko?
3 Kuba nesono kwenta kube lukhuni kutsi sitsandzane ngalokusuka enhlitiyweni. Nobe kunjalo, kufanele setame kulingisa Khristu. Kulesihloko, sitawufundza ngekutsi lutsandvo lungasisita njani kutsi singakhetsi futsi semukele netivakashi. Ngengobe ufundza lesihloko, tibute kutsi, ‘Yini lengingayifundza kubazalwane nabodzadze labachubeke batsandzana ngisho nobe banetinkinga?’
YAKHA KUTHULA
4. Ngekusho kwaMatewu 5:23, 24, kungani kufanele sakhe kuthula nemzalwane lesimphetse kabi?
4 Jesu wasifundzisa kubaluleka kwekwakha kuthula nangabe kukhona lesimphetse kabi ngako umnaketfu. (Fundza Matewu 5:23, 24.) Wagcizelela nekutsi kufanele sibe nebuhlobo lobuhle nalabanye nangabe sifuna kujabulisa Nkulunkulu. Jehova uyajabula nangabe setama kwakha kuthula nebazalwane betfu. Ngeke akwemekele kukhonta kwetfu nangabe sibatfukutselela labanye futsi singafuni kwakha kuthula nabo.—1 Joh. 4:20.
5. Yini leyenta kwaba matima ngalomunye umzalwane kutsi akhe kuthula?
5 Kungaba matima kwakha kuthula. Kungani? Cabanga nganaku lokwenteka kuMark.b Weva buhlungu ngesikhatsi lomunye umzalwane amkhuluma kabi kulabanye ebandleni.Wenta njani Mark? Utsi: “Ngehluleka kutibamba, futsi ngatfukutsela.” Ngekuhamba kwesikhatsi, Mark watisola ngendlela lebekente ngayo, futsi wetama kucolisa kulomzalwane kuze akhe kuthula naye. Kodvwa lomzalwane bekangafuni kwakha kuthula naMark. Ekucaleni, Mark watibuta kutsi ‘kungani etama kuchubeka akha kuthula nalomzalwane abe lomzalwane angafuni?’ Nobe kunjalo, umbonisi wesigodzi wamkhutsata kutsi angapheli emandla. Yini Mark layenta?
6. (a) Mark wenta njani kuze achubeke akha kuthula? (b) Mark wawusebentisa njani umBhalo waKholose 3:13, 14.
6 Ngesikhatsi Mark ahlolisisa imicabango yakhe wabona kutsi bengakatfobeki futsi bekatibona alunge kakhulu kunalabanye. Wabona kutsi bekufanele ashintje indlela lebekenta ngayo tintfo. (Khol. 3:8, 9, 12) Ngekutitfoba, waphindze wabuyela kulomzalwane wacolisa ngendlela lebekente ngayo. Mark waphindze wabhalela lomzalwane tincwadzi, amtjela kutsi uyacolisa nekutsi ufuna baphindze babe bangani. Mark waphindze waniketa lomzalwane tipho lebekacabanga kutsi utatitsandza. Lokubuhlungu kutsi lomzalwane wachubeka amtfukutselele. Nobe kunjalo, Mark wachubeka alalela umyalo waJesu wekutsi sitsandze bazalwane futsi sitsetselelane. (Fundza Kholose 3:13, 14.) Ngisho nobe labanye bangayenti imetamo yekwakha kuthula, lutsandvo lesinalo njengobe singemaKhristu lutasisita kutsi sichubeke sibacolela, futsi sithantazele kutsi siphindze sibe nekuthula nabo.—Mat. 18:21, 22; Gal. 6:9.
Nangabe kukhona lesimphetse kabi, kungase kudzingeke sente tintfo letinyenti kuze sakhe kuthula naye (Buka tigaba 7-8)c
7. (a) Yini Jesu lasikhutsata kutsi siyente? (b) Ngusiphi simo lesimatima lomunye dzadze labhekana naso?
7 Jesu wasikhutsata kutsi siphatse labanye ngendlela natsi lesifuna basiphatse ngayo. Waphindze watsi akukafanele sitsandze kuphela labo labasitsandzako. (Luk. 6:31-33) Kutsiwani nangabe ebandleni kunemuntfu longafuni ngisho nekukubingelela? Lena yintfo lengakavami kwenteka, kodvwa kwenteka kuLara. Utsi: “Lomunye dzadze bekangangikhulumisi, futsi bengingati kutsi leni. Loku bekungikhatsata kangangekutsi bengingasakujabuleli kuya emihlanganweni.” Ekucaleni, Lara bekatitjela kutsi akusuye lobekaneliphutsa, futsi nalabanye ebandleni bebabona kutsi ngulodzadze lonenkinga.
8. Yini leyentiwa nguLara kuze akhe kuthula, futsi yini lesingayifundza esibonelweni sakhe?
8 Lara wenta lokutsite kuze akhe kuthula. Wathantaza kuJehova futsi wancuma kuyokhuluma nalodzadze. Bakhuluma ngalenkinga, bahagana futsi bakha kuthula. Konkhe bekubonakala kuhamba kahle. Lara utsi: “Ngekuhamba kwesikhatsi, lodzadze waphindze wangasangikhulumisi. Ngadvumateka kakhulu.” Ekucaleni, Lara bekacabanga kutsi utawujabula kuphela nangabe lodzadze bekatawushintja indlela lebekenta ngayo. Ngekuhamba kwesikhatsi, Lara wabona kutsi intfo lencono kakhulu lebekangayenta, bekukuchubeka amtsandza lodzadze futsi ‘amtsetselela ngekukhululeka.’ (Ef. 4:32–5:2) Lara wakhumbula kutsi lutsandvo sibili “lute emagcubu. Lucinisela kuto tonkhe tintfo, lukholwa ngito tonkhe tintfo, lwetsemba tonkhe tintfo, lubeketelela tonkhe tintfo.” (1 Khor. 13:5, 7) Lara akazange aphindze akhatsateke ngalenkinga. Ngekuhamba kwesikhatsi, lodzadze waphindze wasondzelana naLara. Nawuchubeka wakha kuthula nebazalwane nabodzadze futsi ubatsandza, ungaciniseka kutsi ‘Nkulunkulu welutsandvo nekuthula utawuba nawe.’—2 Khor. 13:11.
UNGAKHETSI
9. Ngekusho kwemBhalo weMisebenti 10:34, 35, kungani kufanele singakhetsi?
9 Jehova akakhetsi. (Fundza Imisebenti 10:34, 35.) Nangabe singakhetsi, sisuke sikhombisa kutsi sibantfwana bakhe. Siyawulalela umyalo lotsi sitsandze bomakhelwane betfu njengobe sititsandza tsine, futsi sigcina kuthula nebazalwane nabodzadzewetfu.—Rom. 12:9, 10; Jak. 2:8, 9.
10-11. Lomunye dzadze walwisana njani nemiva lengasikahle?
10 Kuba ngumuntfu longakhetsi kungahle kube lukhuni. Cabanga ngalokwenteka kulomunye dzadze lokutsiwa nguRuth. Ngesikhatsi asemusha, bekanenkinga nemuntfu wakulelinye live. Loku kwamtsintsa njani? Ruth utsi: “Bengenyanya yonkhe intfo ngalelive. Bengicabanga kutsi bonkhe bantfu labachamuka kulelive bayafana, lokufaka ekhatsi bazalwane nabodzadze.” Ruth walwisana njani nemiva lengasikahle?
11 Ruth wabona kutsi bekufanele alwisane nendlela lebekacabanga ngayo. Wafundza tindzaba kanye nemibiko eNcwadini Yonyaka ngalelo live. Utsi: “Ngetama kucabanga lokuhle ngebantfu bakulelo live. Ngabona kutsi bazalwane nabodzadze bakulelive bayamtsandza Jehova. Kwangicacela kutsi nabo bangulabanye bebazalwane betfu labasemhlabeni wonkhe.” Ngemuva kwesikhatsi, Ruth wabona kutsi bekufanele abe nelutsandvo. Utsi: “Nakwenteka ngihlangana nebazalwane nabodzadze bakulelo live, bengenta imetamo yekuba nebungani nabo. Bengikhuluma nabo futsi ngitfole litfuba lekubati kancono.” Waba yini umphumela? Ruth utsi: “Ngekuhamba kwesikhatsi, imiva yami lengasikahle yaphela.”
Nangabe ‘sibatsandza bonkhe bazalwane,’ sitawuba bantfu labangakhetsi (Buka tigaba 12-13)d
12. Nguyiphi inkinga Sarah lebekanayo?
12 Labanye bangaba bantfu labakhetsako babe bangaboni. Nasi sibonelo, Sarah bekacabanga kutsi akakhetsi ngobe bekangabehluleli bantfu ngenca yebuve babo, timo tabo temnotfo nobe ngenca yemalungelo labanawo enhlanganweni. Utsi: “Ngabona kutsi ngiyakhetsa.” Kanjani? Sarah bekachamuka emndenini webantfu labafundzile, futsi bekatihlanganisa nebantfu labafundzile. Watjela umngani wakhe watsi: “Ngitihlanganisa nemaKhristu lafundzile. Ngiyabagwema labo labangakafundzi.” Kuyacaca kutsi Sarah bekudzingeka ashintje indlela lebekacabanga ngayo. Kanjani?
13. Yini lesingayifundza endleleni Sarah lashintja ngayo kucabanga kwakhe?
13 Umbonisi wesifundza wasita Sarah kutsi acabangisise ngendlela lebekenta ngayo. Sarah utsi: “Wangincoma ngemsebenti wami wekwetsembeka lengiwentela Jehova, ngetimphendvulo tami letinhle nangelwati lenginalo ngemiBhalo.” Lombonisi wachaza kutsi njengobe lwati lwetfu lukhula, kufanele siphindze sitfutfukise nebuntfu bebuKhristu, njengekutfobeka, kuzitsa kanye nemusa. Sarah wakusebentisa loko lokwashiwo ngulombonisi wesifundza. Utsi: “Ngabona kutsi intfo lebaluleke kakhulu kuba nemusa nelutsandvo.” Umphumela waba kutsi, wase ucala kubuka bazalwane nabodzadze ngendlela lekahle. Ngetama kubona buntfu babo lobuhle lobubenta babe ligugu kuJehova. Kutsiwani ngatsi? Asifuni kutibona sincono kunalabanye ngenca yemfundvo yetfu! Nangabe ‘sibatsandza bonkhe bazalwane’ betfu, sitawuba bantfu labangakhetsi.—1 Phet. 2:17.
YEMUKELA TIVAKASHI
14. Ngekusho kwemBhalo waHebheru 13:16, Jehova utiva njani nasemukela tivakashi?
14 Jehova uyajabula nasemukela tivakashi. (Fundza Hebheru 13:16.) Ukutsatsa njengalenye yetindlela tekumkhonta, ikakhulukati nasisita labahluphekile. (Jak. 1:27; 2:14-17) Ngako, imiBhalo isikhutsata kutsi ‘sikwente umkhuba kwemukela tivakashi.’ (Rom. 12:13) Nangabe semukela tivakashi, sisuke sikhombisa labanye kutsi siyabanakekela, siyabatsandza futsi sifuna kuba bangani babo. Jehova uyajabula nasipha labanye loko lesinako, kungaba kudla, kwekunatsa nobe kucitsa sikhatsi setfu nabo. (1 Phet. 4:8-10) Nobe kunjalo, kunaletinye tintfo letingenta kutsi kube matima kwemukela tivakashi.
“Esikhatsini lesendlulile, bengingakutsandzi kwemukela tivakashi, kodvwa ngashintja futsi ngijabula kakhulu” (Buka sigaba 16)e
15-16. (a) Kungani kungase kube matima ngalabanye kutsi bemukele tivakashi? (b) Yini leyasita Edit kutsi abe nesifiso sekwemukela tivakashi?
15 Kungase kube matima kwemukela tivakashi ngenca yetimo tetfu. Cabanga ngesibonelo semfelokati lokutsiwa ngu-Edit. Ngaphambi kwekutsi abe nguFakazi bekangakutsandzi kuba nalabanye bantfu. Edit bekacabanga kutsi labanye bangabanakekela kancono bantfu kunaye.
16 Ngemuva kwekutsi abe nguFakazi, Edit wayishintja indlela lebekacabanga ngayo. Wenta lokutsite kuze akhone kwemukela tivakashi. Utsi: “Nakwakhiwa liHholwa letfu leMbuso, lomdzala wangitjela ngalabashadene lebebetawuta kutosita kulomsebenti wekwakha, futsi wangibuta kutsi ngingakhona yini kubasita ngendzawo yekuhlala emaviki lamabili. Ngakhumbula indlela Jehova lambusisa ngayo umfelokati waseSarefathi.” (1 Khos. 17:12-16) Edit wavuma kusita laba labashadene ngendzawo yekuhlala. Watitfola yini tibusiso? Utsi: “Emaviki lamabili agucuka aba tinyanga letimbili. Ngaleso sikhatsi, sakha bungani lobucinile.” Edit uphindze watfola sibusiso sekuba nebangani ebandleni. Nyalo, Edit ulihlahlandlela futsi uyajabula kumema labo lashumayela nabo kutsi bete ekhaya lakhe kuze adle nabo. Utsi: “Kupha kungenta ngijabule futsi ngitfola tibusiso letinyenti.”—Heb. 13:1, 2.
17. Yini Luke nemfati wakhe labayibona endleleni lebebamukela ngayo tivakashi?
17 Kungenteka siyatemukela tivakashi, kodvwa kukhona yini lapho singatfutfukisa khona? Nasi sibonelo, Luke kanye nemkakhe bayakutsandza kwemukela tivakashi. Bebavame kumema batali babo, tihlobo, bangani, umbonisi wesigodzi nemkakhe ekhaya labo. Nobe kunjalo, Luke utsi: “Sabona kutsi besimema kuphela bantfu lebesibetayele.” Yini leyentiwa nguLuke nemkakhe kuze batfutfukise indlela labemukela ngayo tivakashi?
18. Yini leyentiwa nguLuke nemkakhe kuze batfutfukise indlela labemukela ngayo tivakashi?
18 Luke nemkakhe bafundza kutsi kusho kutsini kwemukela tivakashi nabacabanga ngemavi aJesu latsi: “Nangabe nitsandza labo labanitsandzako, ninamvuzo muni?” (Mat. 5:45-47) Babona kutsi bekufanele balingise Jehova lonemusa kubo bonkhe bantfu. Ngako, benta sincumo sekumema bazalwane nabodzadze lebebangakase babameme. Luke utsi: “Nyalo siyakujabulela kuba nebazalwane betfu futsi sitiva sisondzelene nabo kanye naJehova.”
19. Sikhombisa njani kutsi sibafundzi baJesu, futsi yini lotimisele kuyenta?
19 Sifundzile kutsi kutsandza labanye ngalokusuka enhlitiyweni kutasisita kutsi sakhe kuthula, singakhetsi futsi semukele netivakashi. Kufanele silwisane nemiva lengasikahle futsi sitsandze bazalwane nabodzadze ngalokusuka enhlitiyweni. Nasenta njalo, sitawujabula, futsi sitawube sikhombisa kutsi sibafundzi baJesu mbamba.—Joh. 13:17, 35.
INGOMA 88 “Ngenze Ngazi Izindlela Zakho”
a Jesu washo kutsi emaKhristu sibili bekatawubonakala ngekutsi atsandzane. Kutsandza bazalwane nabodzadze kutawusenta kutsi sakhe kuthula nabo, singakhetsi futsi semukele netivakashi. Loko ngeke kuhlale kumelula kukwenta. Kulesihloko, sitawufundza ngekutsi singachubeka njani sitsandzana ngalokusuka enhlitiyweni.
b Lamanye emabito lasetjentisiwe kulesihloko ashintjiwe.
c KUCHAZWA KWETITFOMBE: Dzadze wetama kwakha kuthula. Kwekucala, akaphumeleli kodvwa akapheli emandla, uyachubeka etama. Ngenca yekutsi uyamtsandza dzadzewakhe, bagcine bakhe kuthula.
d KUCHAZWA KWETITFOMBE: Umzalwane losakhulile uva shengatsi labanye abamnaki ebandleni.
e KUCHAZWA KWETITFOMBE: Dzadze locale waba nebumatima bekwemukela tivakashi ushintja kucabanga kwakhe, futsi lolushintjo lumente wajabula.