Kungani Nkulunkulu Angayiphendvuli Leminye Imithantazo?

Babe wetfu losezulwini, Jehova Nkulunkulu, uyafuna futsi uyakujabulela kuva imithantazo yetfu lesuka enhlitiyweni. Kodvwa kunetintfo letingamenta angayiphendvuli imithantazo yetfu. Ngutiphi letintfo futsi yini lekufanele siyikhumbule nasithantaza? Nati teluleko letiseBhayibhelini.

Bantfu esontfweni bathantaza umthantazo lobhalwe encwadzini yemithantazo.

“Nawuthantaza, ungaphindzaphindzi intfo yinye.”—Matewu 6:7.

Jehova akafuni siphindzaphindze imithantazo lesiyibambe ngengcondvo nobe siyifundze phansi encwadzini yemithantazo. Kunaloko, ufuna sikhulume loko lokusuka enhlitiyweni. Cabanga kutsi bewungativa njani nangabe bewunemngani lohlala akhuluma intfo yinye onkhe malanga. Bangani labakahle bakhuluma ngalokusuka enhlitiyweni. Nasithantaza ngemavi etfu, kuBabe wetfu losezulwini sisuke sikhombisa kutsi simtsatsa njengemngani wetfu.

Indvodza ibuke etulu njengobe ihwaya lithikithi lekugembula.

“Nanicela aninikwa ngobe nicela ngenhloso lembi.”—Jakobe 4:3.

Angeke silindzele kutsi Nkulunkulu aphendvule imithantazo yetfu nangabesitawucela tintfo lesati kahle kutsi akafuni sitente nobe sibe nato. Nasi sibonelo, Jehova ngeke aze ayiphendvule imithantazo yemuntfu logembulako locela inhlanhla yekutsi awine imali, ngoba usitjelile kutsi singabi bantfu lababukhali nalabakholelwa enhlanhleni. (Isaya 65:11; Lukha 12:15) Akunangcodvo kulindzela kutsi asiphendvule! Kuze Nkulunkulu aphendvule imithantazo yetfu, kufanele siciniseke kutsi loko lesikucelako kuhambisana naloko lakushoko eBhayibhelini.

Umfundisi wemasotja uthantazela emasotja.

“Nangabe umuntfu angafuni kulalela umtsetfo—ngisho nemthantazo wakhe uyenyanyeka.”—Taga 28:9.

Ngetikhatsi teliBhayibheli, Nkulunkulu bekangayiphendvuli imithantazo yalabo lebebangayilaleli imitsetfo yakhe yekulunga. (Isaya 1:15, 16) Indlela lativa ngayo ayikashintji. (Malakhi 3:6) Nangabe sifuna Nkulunkulu aphendvule imithantazo yetfu, kufanele siphile ngendlela levumelana nemitsetfo yakhe. Kutsiwani nangabe esikhatsini lesendlulile senta tintfo letimbi? Ngabe loko kusho kutsi Jehova angeke yini asayilalela imithantazo yetfu? Cha! Ngelutsandvo, Nkulunkulu utasicolela nangabe siphendvuka futsi senta konkhe lokusemandleni etfu kute simjabulise.—Imisebenti 3:19.