Yini Vele Lencuma Kutsi Utawuba Nelikusasa Lelinjani?
Bantfu labanyenti bakholelwa kutsi kunemandla langabonakali lalawula likusasa labo. Bakholelwa kutsi kwenta tintfo letitsite kutawubenta babe nenhlanhla nobe babe nelikusasa lelihle.
TINTFO LETIKHOLELWA BANTFU LABANYENTI
KUFUNDZA TINKHANYETI: Labanye bantfu bakholelwa kutsi indlela tinkhanyeti lebetime ngayo nabatalwa ngiyo lesho kutsi batawuba nelikusasa lelinjani. Bafundza tinkhanyeti tenyanga labatalwa ngayo kuze bati ngelikusasa labo futsi bente njengobe tisho.
I-FENG SHUI: Labanye bakholelwa kutsi nabakha tindlu tabo ngendlela letsite, loko kutawubaletsela imphumelelo. Lo Wing,a lohlala eHong Kong, utsi, “Sati se-feng shui sangitjela kutsi kubeka i-crystal lekhetsekile endzaweni letsite esitolo sami, bekutangenta ngitfole imali lenyenti.”
KUKHONTA EMADLOTI: Labanye bakholelwa kutsi kufanele bakhonte emadloti nobe letinye tithico kuze tibavikele futsi tibabusise. Van, lohlala eVietnam, utsi, “Bengikholelwa kutsi kuhlabela emadloti bekutangenta ngibe nemphilo lenhle nyalo, nelikusasa lelijabulisako ngikanye nebantfwana bami.”
KUTALWA KABUSHA: Bantfu labanyenti bakholelwa kutsi kuphila kungumjikeleto, umuntfu uyafa aphindze atalwe kabusha. Bakholelwa kutsi tintfo letinhle nobe letimbi letibehlelako nyalo, tingumphumela wemphilo lebebayiphila ngaphambili.
Nobe kunjalo, labanyenti batsi tinkholelo letinjalo titinganekwane. Nanobe bantfu labanyenti batsi abatikholelwa letintfo, kodvwa basachubeka nekufundza tinkhanyeti, kubhula kanye nekuphengula. Beva ungatsi letinye taletintfo tingabasita bati ngelikusasa labo.
IBE YINI IMIPHUMELA?
Labo labetsemba letintfo, bayitfolile yini imphilo lenhle nelikusasa lelijabulisako?
Cabanga ngalokwenteka kuHào, lohlala eVietnam. Bekasebentisa kufundvwa kwetinkanyeti, i-feng shui nekukhonta emadloti kuze kumcondzise. Waphumelela yini? Hào utsi, “Ngalahlekelwa yimali lenyenti, ngangena etikweletini, kwaba nekungevani emndenini wami futsi ngacindzeteleka kakhulu.”
Qiuming, waseTaiwan, naye bekakholelwa ekufundvweni kwetinkhanyeti, ekutalweni kabusha, ku-feng shui, ekukhonteni emadloti nekutsi kuphila kwemuntfu kuhlelwa kusengaphambili kutsi kutawuba njani. Ngemuva kwekuhlolisisa letinkholelo, Qiuming utsi: “Ngabona kutsi letimfundziso nemasiko kuyaphikisana futsi kuyadidana. Ngatfola kutsi lebekubiketelwa kufundvwa kwetinkhanyeti bekuvame kungabi liciniso. Nakutiwa endzabeni yekutalwa kabusha, ngatfola kutsi nangabe ungayikhumbuli imphilo yakho yangaphambili, ungakhona njani kuyishinja lelandzelako?”
“Ngabona kutsi letimfundziso nemasiko kuyaphikisana futsi kuyadidana.”—QIUMING, E-TAIWAN
Njengobe Hào, Qiuming, kanye nalabanye labanyenti babonile, likusasa letfu aliyi ngekutsi kuphila kwetfu kuhlelwe kusengaphambili, ngekufundvwa kwetinkhanyeti, ngekuhlabela emadloti nobe ngekutalwa kabusha. Loko kusho kutsi angeke yini sikhone kushintja likusasa letfu?
Labanye beva ungatsi indlela lengabenta baciniseke ngekuba nelikusasa lelihle kutsi bafundze kakhulu futsi babe nemcebo lomnyenti. Ube yini umphumela kulabanye labakhetse loku?
a Kulesihloko nakuletilandzelako, lamanye emagama ebantfu ashintjiwe.
b Lomusho utfolakala eBhayibhelini KubaseGalathiya 6:7. Umcondvo walomusho uphindze utfolakale nasetishweni letivamile letinjengekutsi Angeke uhlanyele umbila bese uvune emabhontjisi.