Uyetsemba Yini Kutsi Jehova Uhlale Enta Lokulungile?

1-2. (a) Yini lamuhla leyenta kube matima ngalabanyenti kwetsemba labo labasemagunyeni? (b) Sitawucoca ngani kulesihloko?

LAMUHLA bantfu labanyenti bakutfola kumatima kwetsemba labo labasemagunyeni. Babonile kutsi bohulumende labanyenti nemitsetfo leminyenti kuvame kuvikela labanjingile nalabadvumile kodvwa kungabasiti kangako labaphuyile. LiBhayibheli licinisile nalitsi: “Umuntfu ubuse lomunye umuntfu wase uyamlimata.” (Shu. 8:9) Ngetulu kwaloko, labanye baholi benkholo benta tintfo letimbi. Loko kwente kutsi labanye bantfu bangasametsembi Nkulunkulu. Ngako nasidadisha liBhayibheli nemuntfu, kufanele simsite etsembe Jehova nalabo labammelelako emhlabeni.

² Akusibo lesidadisha nabo liBhayibheli kuphela lokufanele bafundze kwetsemba Jehova nenhlangano yakhe. Ngisho nobe sekuphele iminyaka leminyenti sikhonta Jehova, natsi kufanele sihlale setsemba kutsi wenta tintfo ngendlela lelungile. Kodvwa ngaletinye tikhatsi kwenteka intfo letsite lengasivivinya kutsi simetsemba kangakanani Jehova. Kulesihloko, sitawucoca ngetimo letintsatfu lasingavivinyeka khona kutsi simetsemba kanganani Jehova: (1) Nasifundza letinye tindzaba letiseBhayibhelini, (2) nasitfola sicondziso lesivela enhlanganweni yaJehova, (3) nalapho sibhekana netinkinga esikhatsini lesitako.

TSEMBA JEHOVA NJENGOBE UFUNDZA LIBHAYIBHELI

3. Letinye tindzaba letiseBhayibhelini tingasivivinya njani kutsi siyametsemba yini Jehova?

³ Njengobe sifundza liVi laNkulunkulu, kungenta sibe nemibuto ngaloko Jehova lakwenta kulabanye bantfu nangetincumo latenta. Sibonelo nje, kuNumeri sifundza kutsi Jehova watsi kufanele abulawe lomunye umIsrayeli lobekatfota ngeliSabatha. Ngemuva kweminyaka leminyenti, ku-2 Samuweli sifundza kutsi Jehova wacolela iNkhosi Davide nanobe beyiphingile futsi ibulele. (Num. 15:32, 35; 2 Sam. 12:9, 13) Ngako singatibuta: ‘Yini leyenta Jehova wamcolela Davide nanobe bekaphingile futsi abulele kodvwa watsi ayibulawe lendvodza lebeyente sono lesibonakala sisincane?’ Kuze siphendvule lombuto, asicoce ngetintfo letintsatfu lokufanele sitikhumbule nasifundza liBhayibheli.

4. Umbhalo waGenesisi 18:20, 21 newaDutheronomi 10:17 usenta njani siyetsembe indlela Jehova lenta ngayo tincumo?

⁴ LiBhayibheli alihlali liyisho yonkhe imininingwane yendzaba. Sibonelo nje, siyati kutsi Davide waphendvuka mbamba. (Hla. 51:2-4) Kodvwa beyingumuntfu lonjani lendvodza leyephula umtsetfo weliSabatha? Beyitisola yini ngaloko beyikwentile? Beyike yangayilaleli yini imitsetfo yaJehova esikhatsini lesendlulile? Beyike yangasemukeli yini secwayiso nobe yangasinaki? LiBhayibheli alisho. Kodvwa naku lesiciniseka ngako: Jehova ‘angeke ente tintfo letingakalungi.’ (Dut. 32:4) Nakenta tincumo, usuke anawo onkhe emaciniso endzaba. Akalingisi bantfu labehlulela ngaloko labakuvile, labakhetsako nobe labehlulela kabi ngenca yaletinye tintfo. (Fundza Genesisi 18:20, 21; Dutheronomi 10:17.) Nasichubeka sifundza ngaJehova nangetimiso takhe, sitawetsemba kakhulu kutsi uhlale ehlulela kahle. Ngisho nobe indzaba leseBhayibhelini isenta sibe nemibuto lesingakhoni kuyiphendvula ngaleso sikhatsi, siyaciniseka kutsi Nkulunkulu wetfu “uhlale enta lokulungile.”—Hla. 145:17.

5. Kuba nesono kusenta njani sehlulele kabi? (Buka nelibhokisi lelitsi “Kuba Nesono Kusenta Singaticondzi Kahle Letinye Tintfo.”)

⁵ Angeke sihlale sehlulela kahle ngenca yekutsi sinesono. Nkulunkulu wasidala ngemfanekiso wakhe, ngako siyafisa kubona bantfu baphatfwa kahle. (Gen. 1:26) Nanobe kunjalo, ngenca yekutsi sinesono, singahle singehluleli kahle ngisho nobe sicabanga kutsi siwati onkhe emaciniso endzaba. Sibonelo nje, khumbula indlela Jona latfukutsela ngayo ngesincumo saJehova sekubakhombisa umusa bantfu baseNineve. (Jona 3:10–4:1) Kodvwa cabanga ngemphumela lowaba khona. Bantfu baseNineve labangetulu kwa-120 000 labaphendvuka basindza! Siyabona kutsi nguJona lowenta liphutsa, hhayi Jehova.

6. Yini leyenta kungadzingeki kutsi Jehova asichazele sizatfu lesimente watsatsa sincumo lesitsite?

⁶ Jehova akudzingeki asichazele kutsi yini lementa atsatse tincumo letitsite. Kuliciniso kutsi esikhatsini lesendlulile Jehova bekativumela tikhonti takhe kutsi tivete imibono yato ngetincumo bekatentile nobe ngaleto bekasetawutenta. (Gen. 18:25; Jona 4:2, 3) Ngaletinye tikhatsi bekachaza sizatfu lesimente watsatsa lesincumo. (Jona 4:10, 11) Nobe kunjalo, Jehova akaphoceleleki kutsi asho lokumente watsatsa sincumo lesitsite. Njengobe anguMdali wetfu, kute sidzingo sekutsi acele imvume kitsi yekwenta sincumo.—Isa. 40:13, 14; 55:9.

TSEMBA JEHOVA NAWUTFOLA SICONDZISO

7. Nguyiphi inkinga lokungenteka sibhekane nayo, futsi yini lengenta sibe nalenkinga?

⁷ Siyaciniseka kutsi Jehova uhlale enta lokulungile. Nobe kunjalo, singakutfola kumatima kwetsemba labo labammelele emhlabeni. Singahle sitibute kutsi labo labaholako enhlanganweni yaJehova benta loko lokushiwo nguJehova yini nobe benta labakufunako. Kungenteka bebacabanga kanjalo labanye lebebaphila ngetikhatsi tekubhalwa kweliBhayibheli. Cabanga ngaletibonelo lesikhulume ngato esigabeni 3. Sihlobo salendvodza lengazange ilalele umtsetfo weliSabatha kungenteka satibuta kutsi Mosi ubute mbamba yini kuJehova ngaphambi kwekutsi atsi ayibulawe. Kungenteka umngani wa-Uriya umHethi wacabanga kutsi Davide usebentise sikhundla sakhe sekuba yinkhosi kuze angajeziswa nanobe bekufanele ajeziswe. Liciniso likutsi angeke sitsi siyametsemba Jehova nasingabetsembi labo labammelele emhlabeni, njengobe yena abetsemba.

8. Ngukuphi kufana lokukhona emkhatsini waloko lokushiwo Imisebenti 16:4, 5 nendlela libandla lelisebenta ngayo lamuhla?

⁸ Lamuhla, Jehova uhola incenye yenhlangano yakhe lesemhlabeni asebentisa ‘sisebenti lesetsembekile nalesihlakaniphile.’ (Mat. 24:45) Njengesigungu lesibusako sangesikhatsi semaKhristu ekucala, lesisebenti sihola bantfu baNkulunkulu emhlabeni wonkhe futsi siniketa labadzala bemabandla ticondziso. (Fundza Imisebenti 16:4, 5.) Labadzala babese bayasisebentisa lesicondziso emabandleni. Sikhombisa kutsi siyayetsemba indlela Jehova lenta ngayo tintfo ngekutsi silalele sicondziso lesisitfola enhlanganweni nakulabadzala belibandla.

9. Kunini lapho kungaba matima khona kusekela sincumo salabadzala belibandla, futsi yini lengenta kube matima?

⁹ Ngaletinye tikhatsi, singakutfola kumatima kusekela tincumo letentiwe ngulabadzala belibandla. Nasi sibonelo, eminyakeni yakamuva emabandla lamanyenti netigodzi kuhlelwe kabusha. Kuletinye timo, labadzala bacele bamemeteli kutsi baye kulelinye libandla kuze kutsi titulo letinyenti tibe nebantfu emihlanganweni yelibandla. Nasicelwa kutsi siye kulelinye libandla, kungenteka sikutfole kumatima kushiya bangani nemindeni yetfu. Labadzala belibandla batfola sicondziso lesivela kuJehova yini sekutsi ummemeteli lotsite aye kuliphi libandla? Cha. Ngenca yaloko, kungaba matima kutsi silandzele lesicondziso. Kodvwa Jehova uyabetsemba labadzala belibandla lababeke kutsi bente letincumo, natsi kufanele sibetsembe.b

10. Ngekuvumelana nembhalo waKumaHebheru 13:17, ngusiphi sizatfu lesenta sibambisane nalabadzala belibandla?

¹⁰ Yini lesenta sibambisane nalabadzala belibandla futsi sisekele tincumo labatentile ngisho nobe sifisa shengatsi ngabe bancume ngalenye indlela? Kungobe loko kwenta kutsi bantfu baNkulunkulu babe nebunye. (Ef. 4:2, 3) Konkhe kuhamba kahle ebandleni nangabe bonkhe basekela tincumo letentiwe sigungu salabadzala. (Fundza KumaHebheru 13:17.) Lokubaluleke nakakhulu kutsi sikhombisa kutsi siyametsemba Jehova nangabe sibambisana nalabo lababeke kutsi basinakekele.—Imis. 20:28.

11. Yini lengasisita kutsi sibetsembe kakhulu labadzala belibandla nabasinika sicondziso?

¹¹ Lokungasisita kutsi sibetsembe labadzala nabasinika sicondziso kukhumbula kutsi bayathantaza, bacele umoya longcwele nabacoca ngetindzaba letitsintsa libandla. Baphindze bacoce ngetimiso letiseBhayibhelini letihambisana naloko labakhuluma ngako futsi babuka neticondziso letivela enhlanganweni yaJehova. Sifiso sabo lesikhulu kujabulisa Jehova nekubanakekela kahle bantfu bakhe. Lamadvodza letsembekile ayati kutsi atawulandzisa kuNkulunkulu ngendlela lawenta ngayo umsebenti lanikwe wona. (1 Phet. 5:2, 3) Cabanga nganaku: Kulelive lelehlukaniswe buve, yinkholo netepolitiki, bantfu baJehova bamkhonta ngebunye. Loku kwenteka ngobe Jehova uyayibusisa inhlangano yakhe!

12. Ngutiphi tintfo labadzala belibandla lokufanele bacabange ngato nabafuna kubona kutsi umuntfu uphendvukile yini?

¹² Jehova unikete labadzala belibandla umsebenti lobaluleke kakhulu wekucinisekisa kutsi libandla lihlala lihlantekile. Nangabe umKhristu enta sono lesikhulu, Jehova ulindzele labadzala kutsi bancume kutsi loyo muntfu uyachubeka yini ayincenye yelibandla. Emkhatsini walokunye, kufanele batfole kutsi lomuntfu utisola mbamba yini ngaloko lakwentile. Nakatsi uphendvukile, sewukwenyanya mbamba yini loko lakwentile? Utimisele yini kungasiphindzi lesono? Nangabe kutihlanganisa nebantfu lababi ngiko lokumente wenta lesono, utimisele yini kwehlukana nabo? Labadzala belibandla bayathantaza, bacabange ngalokwentekile, bacabange nangaloko lokushiwo liBhayibheli futsi babuke simo sengcondvo salona lowente sono. Babese bayancuma kutsi lona lowente sono uyachubeka yini ayincenye yelibandla. Kuletinye timo, kungadzingeka ayekeliswe kuba nguFakazi.—1 Khor. 5:11-13.

13. Yini lesingahle sikhatsateke ngayo nangabe umngani nobe sihlobo setfu siyekelisiwe kuba nguFakazi?

¹³ Ngusiphi simo lesingasivivinya kutsi siyabetsemba yini labadzala belibandla? Nangabe lona loyekelisiwe kuba nguFakazi angasuye umngani wetfu nobe sihlobo setfu, kungaba melula kwemukela sincumo salabadzala. Kodvwa kutsiwani nangabe lona loyekelisiwe kuba nguFakazi angumngani wetfu? Kungenteka sikhatsateke ngekutsi labadzala abakawabuki onkhe emaciniso endzaba, nobe sitibute kutsi bamehlulele ngendlela Jehova bekatamehlulela ngayo yini. Yini lengasisita kutsi sisemukele sincumo sabo?

14. Yini lengasisita nangabe labadzala bancuma kutsi umngani nobe sihlobo setfu siyekeliswe kuba nguFakazi?

¹⁴ Kufanele sikhumbule kutsi kuyekelisa umuntfu kuba nguFakazi kulilungiselelo laJehova futsi kusita libandla kanye nalona lowente sono. Nangabe soni lesingaphendvuki besingavunyelwa kutsi sichubeke siyincenye yelibandla, besingenta nalabanye kutsi bente sono. (Gal. 5:9) Ngetulu kwaloko, kungenteka angaboni kutsi wente sono lesikhulu, futsi angatimiseli kushintja indlela lacabanga ngayo nalenta ngayo kuze aphindze emukelwe nguJehova. (Shu. 8:11) Kufanele siciniseke kutsi labadzala belibandla bawutsatsa njengalobalulekile umsebenti wabo wekuncuma kutsi umuntfu kufanele ayekeliswe yini kuba nguFakazi nobe cha. Njengebehluleli baka-Israyeli, nabo bayati kutsi ‘abakabekwa ngumuntfu kutsi babe behluleli kodvwa babekwe nguJehova.’—2 Khr. 19:6, 7.

KWETSEMBA JEHOVA NYALO KUTASISITA ESIKHATSINI LESITAKO

15. Kubaluleke ngani kutsi simetsembe kakhulu nyalo Jehova?

¹⁵ Njengobe kuphela kwalelive kusondzela, kufanele siyetsembe kakhulu indlela Jehova lenta ngayo tintfo. Ngasiphi sizatfu? Ngesikhatsi sekuhlupheka lokukhulu, kungenteka sitawutfola ticondziso lokutawuba matima kuticondza nobe kutilalela. Jehova angeke akhulume natsi ngalokucondzile. Kungenteka asinikete ticondziso ngalabo labammelele. Leso kutawube kungasiso sikhatsi sekungabata lesicondziso nobe sekutsi sitibute kutsi, ‘Sivela kuJehova yini nobe bazalwane labaholako benta labakufunako?’ Utawumetsemba yini Jehova nenhlangano yakhe ngaleso sikhatsi? Imphendvulo ungayitfola kuloko lokwentako nyalo nawutfola sicondziso lesivela enhlanganweni yaJehova. Nangabe usetsemba sicondziso lositfolako lamuhla futsi usilalele, manyenti ematfuba ekutsi wente lokufanako nangekuhlupheka lokukhulu.—Luk. 16:10.

16. Yini lengasivivinya esikhatsini lesitako kutsi siyametsemba yini Jehova?

¹⁶ Kufanele sicabange nangendlela Jehova latawehlulela ngayo nakuphela lelive. Kwanyalo siyetsemba kutsi linyenti lalabo labangamkhonti Jehova litawukhetsa kumkhonta, lokufaka ekhatsi tihlobo tetfu. Kodvwa nge-Amagedoni, Jehova asebentisa Jesu utawenta sincumo sekugcina sekutsi kutawentekani kubo. (Mat. 25:31-33; 2 Thes. 1:7-9) Akusitsi lesitawuncuma kutsi bayawutfola yini umusa waJehova nobe cha. (Mat. 25:34, 41, 46) Sitayetsemba yini indlela Jehova latawehlulela ngayo, nobe loko kutawenta kutsi siyekele kumkhonta? Kusebaleni kutsi kufanele simetsembe kakhulu nyalo Jehova kuze sitametsemba nasesikhatsini lesitako.

17. Ngumiphi imiphumela lesitayitfola ngenca yekwehlulela kwaJehova ekupheleni kwalelive lelibi?

¹⁷ Cabanga nje kutsi sitawujabula kanganani emhlabeni lomusha waNkulunkulu nasesibona imiphumela yekwehlulela kwaJehova. Itawube seyingekho inkholo yemanga, tekutsengiselana nabohulumende lebebacindzetela labanye bantfu futsi babenta bahlupheka kuyo yonkhe leminyaka. Kugula, kuguga nekushona kwebantfu lesibatsandzako angeke kuphindze kusihluphe. Sathane nemadimoni batawuboshwa iminyaka leyinkhulungwane. Imiphumela yekuvukela kwabo itawube ingasekho. (Semb. 20:2, 3) Sitawujabula kakhulu ngekutsi besiyetsemba indlela Jehova lenta ngayo tintfo!

18. Ngutiphi tifundvo lesingatitfola kuloko lokwentiwa ngema-Israyeli njengobe kubhalwe kuNumeri 11:4-6 na-21:5?

¹⁸ Kusenekwenteka yini kutsi eveni lelisha laNkulunkulu kube netinkinga letitasivivinya kutsi siyayetsemba yini indlela Jehova lenta ngayo tintfo? Cabanga ngalokwenteka ngemuva nje kwekutsi ema-Israyeli aphume eGibhithe. Lamanye acala kukhonona ngobe besekakhumbule kudla bekakudla eGibhithe, futsi ayibukela phasi imana lebekayinikwa nguJehova. (Fundza Numeri 11:4-6; 21:5.) Kungenteka yini natsi sitive ngendlela lefanako ngemuva kwekuhlupheka lokukhulu? Asati kutsi utawuba nganani umsebenti wekulungisa umhlaba ngemuva kwe-Amagedoni futsi siwente ube lipharadisi. Kungenteka umsebenti utawuba mnyenti kakhulu futsi kuphila kutawucale kube matima. Sitawukhonona yini ngaloko Jehova latasinika kona ngaleso sikhatsi? Naku lesiciniseka ngako: Nangabe sibonga nyalo ngaloko Jehova lasipha kona, manyenti ematfuba ekutsi sitawubonga ngalatasipha kona nangaleso sikhatsi.

19. Ngumaphi emaphuzu labalulekile kulesihloko?

¹⁹ Kufanele siciniseke kutsi indlela Jehova lenta ngayo tintfo ihlale ilungile. Kufanele sibetsembe nalabo Jehova lababeke kutsi bente imisebenti yakhe. Ungacali uwakhohlwe emavi Jehova lawasho ngemphrofethi Isaya nakatsi: “Nitawuba nemandla nangabe ningeke nesabe futsi nitawetsembela kimi.”—Isa. 30:15.