Indlela Jehova Laphendvula Ngayo Imithantazo Yetfu

1-2. Yini lesingatibuta yona mayelana nemithantazo yetfu?

WAKE watibuta yini kutsi Jehova uyayiphendvula yini imithantazo yakho? Nangabe wake watibuta, awusiwedvwa. Bazalwane nabodzadze labanyenti nabo bakile batibuta, ikakhulukati nababhekene netinkinga. Nangabe sinetinkinga, natsi singahle sikutfole kumatima kubona indlela Jehova laphendvula ngayo imithantazo yetfu.

² Asesicoce ngekutsi yini leyenta siciniseke kutsi Jehova uyayiphendvula imithantazo yebantfu labamkhontako. (1 Joh. 5:15) Sitawuphindze sicoce nganayi imibuto: Yini leyenta sihle siva shengatsi Jehova akayiphendvuli imithantazo yetfu? Jehova uyiphendvula njani imithantazo yetfu lamuhla?

JEHOVA ANGAHLE ANGASIPHENDVULI NGENDLELA LEBESILINDZELE NGAYO

3. Yini leyenta Jehova afune sithantaze kuye?

³ ImiBhalo iyasicinisekisa kutsi Jehova usitsandza kakhulu nekutsi siligugu kuye. (Hag. 2:7; 1 Joh. 4:10) Kungako asicela kutsi sithantaze kuye sicele lusito. (1 Phet. 5:6, 7) Ufuna kusisita sihlale sisondzelene naye futsi ufuna kusisita sikhone kubeketelela tinkinga tetfu.

4. Sati njani kutsi Jehova uyayiphendvula imithantazo yetikhonti takhe? (Buka nesitfombe.)

⁴ EBhayibhelini, sivame kufundza kutsi Jehova wayiphendvula imithantazo yetikhonti takhe. Sikhona yini sibonelo losicabangako? Uyayikhumbula yini iNkhosi Davide? Kuko konkhe kuphila kwayo, beyinetitsa letiyingoti letinyenti futsi beyivame kuthantaza kuJehova kuze ayisite. Ngalelinye lilanga yathantaza yatsi: “Awu Jehova, lalela umthantazo wami; ngilalele nangicela lusito. Ngiphendvule ngobe wena wetsembekile futsi ulungile.” (Hla. 143:1) Jehova wawuphendvula umthantazo waDavide nakacela lusito. (1 Sam. 19:10, 18-20; 2 Sam. 5:17-25) Davide walisho lagcwala umlomo watsi: “Jehova usedvute nabo bonkhe labambitako.” Natsi singaciniseka ngaloku.​—Hla. 145:18.

5. Jehova bekahlale ayiphendvula ngendlela lebebalindzele ngayo yini bantfu bakhe esikhatsini lesendlulile? Niketa sibonelo. (Buka nesitfombe.)

⁵ Jehova angahle angayiphendvuli imithantazo yetfu ngendlela lesilindzele ngayo. Nguloko lokwenteka kumphostoli Pawula. Wacela Nkulunkulu kutsi asuse “linyeva enyameni.” Pawula wathantaza ngalokucondzile tikhatsi letintsatfu ngalenkinga. Jehova wayiphendvula yini leyo mithantazo? Yebo, kodvwa akazange ayiphendvule ngendlela Pawula lebekalindzele ngayo. Kunekutsi asuse lenkinga, Jehova wamniketa emandla lebekawadzinga kuze achubeke amkhonta ngekwetsembeka.​—2 Khor. 12:7-10.

6. Yini lengenta kutsi sihle sibona ngatsi Jehova akayiphendvuli imithantazo yetfu?

⁶ Natsi singahle sitfole imphendvulo leyehlukile kuloko besikulindzele. Singaciniseka kutsi Jehova ukwati kahle loko lokusilungelako. “Angakwati kwenta lokukhulu kakhulu kunato tonkhe tintfo lesiticelako nobe lesiticabangako.” (Ef. 3:20) Ngenca yaloko, angahle asiphendvule ngesikhatsi lesingakasilindzeli nobe ngendlela lesingakayilindzeli.

7. Yini lengenta kudzingeke sishintje loko lesikuthantazelako? Niketa sibonelo.

⁷ Kungahle kudzingeke sikushintje loko lesikuthantazelako nasibona loko lokuyintsandvo yaJehova. Cabanga ngesibonelo saMartin Poetzinger. Ngekushesha ngemuva kwekushada, uMzalwane Poetzinger waboshwa enkambu yemaNazi. Ekucaleni, wacela Jehova kutsi amsite aphume kulenkambu kuze atokhona kunakekela umkakhe futsi achubeke nemsebenti wekushumayela. Kodvwa ngemuva kwemaviki lamabili, kute lakubona lebekukhombisa kutsi Jehova utamsita akhululwe. Ngako wathantaza watsi: “Jehova, ngicela ungisite ungikhombise loko lofuna ngikwente.” Wabese ucabanga ngaloko labanye bazalwane lebebabhekene nako kulenkambu. Linyenti labo belikhatsateke ngebafati babo nangebantfwana babo. UMzalwane Poetzinger wabese uyathantaza utsi: “Jehova, ngiyabonga ngesabelo sami lesisha. Ngisite ngikhone kucinisa bazalwane bami futsi ngibakhutsate.” Kwaphela iminyaka lengu-9 akulenkambu futsi enta loko!

8. Yini lokufanele sihlale siyikhumbula nasithantaza?

⁸ Kufanele sikhumbule kutsi Jehova unenjongo, futsi utayifeza ngesikhatsi sakhe lesifanele. Lenjongo ifaka ekhatsi kucedza tonkhe tinkinga letisihluphako lamuhla, letifaka ekhatsi tehlakalo temvelo, kugula kanye nekufa. Jehova utayifeza lenjongo yakhe asebentisa uMbuso wakhe. (Dan. 2:44; Semb. 21:3, 4) Kodvwa kwanyalo, Jehova uvumele Sathane kutsi abuse lomhlaba.b (Joh. 12:31; Semb. 12:9) Kube Jehova bekangacatulula tinkinga tebantfu nyalo, bekungabonakala ngatsi kubusa kwaSathane kuyaphumelela. Ngako njengobe silindzele kutsi letinye tetsembiso taJehova tifezeke, loko akusho kutsi uyasibukelela nje. Asesicoce ngaletinye tindlela Jehova lasisita ngato.

TINDLELA JEHOVA LAPHENDVULA NGAYO IMITHANTAZO LAMUHLA

9. Jehova angasisita njani nakufanele sente tincumo? Fanekisa.

⁹ Usipha kuhlakanipha. Jehova wetsembisa kusipha kuhlakanipha lesikudzingako kuze sente tincumo letikahle. Siyakudzinga kuhlakanipha lokuvela kuNkulunkulu nasenta tincumo letitasitsintsa kuphila kwetfu konkhe, letifaka ekhatsi kutsi sitawushada yini nobe cha. (Jak. 1:5) Cabanga ngesibonelo salomunye dzadze longakashadi lokutsiwa nguMaria.c Bekalihlahlandlela lelivamile ngesikhatsi ahlangana nalomunye umzalwane. Utsi: “Njengobe bungani betfu bukhula, sacala kukhangeka kulomunye nalomunye. Bengati kutsi kufanele ngente sincumo. Ngathantaza sikhatsi lesidze ngalendzaba. Bengisidzinga sicondziso saJehova kodvwa bengati kutsi Jehova angeke angentele sincumo.” Maria weva shengatsi Jehova uyiphendvulile imithantazo yakhe yekucela kuhlakanipha. Kanjani? Wacwaninga etincwadzini tetfu futsi watfola tihloko letamsita watfola timphendvulo temibuto lebekanayo. Walalela neseluleko lesihlakaniphile samake wakhe. Leseluleko sasita Mariya kutsi ahlole indlela lebekativa ngayo. Ngako ekugcineni, wakhona kwenta sincumo lesihlakaniphile.

10. Ngekusho kwembhalo waKubaseFiliphi 4:13, yini Jehova latawuyenta kuze asite tikhonti takhe? Niketa sibonelo. (Buka nesitfombe.)

¹⁰ Usiniketa emandla ekucinisela. Jehova utasiniketa emandla ekubeketelela tinkinga tetfu, njengobe enta kumphostoli Pawula. (Fundza KubaseFiliphi 4:13.) Cabanga ngendlela Jehova lamsita ngayo lomunye umzalwane lokutsiwa nguBenjamin kutsi abeketele ngesikhatsi abhekene netimo letimatima. Ngesikhatsi asemusha, Benjamin nemndeni wakubo bebahlala etinkambu tebakhoseli e-Africa. Benjamin utsi: “Bengihlala ngithantaza kuJehova, ngimcela kutsi angiphe emandla ekwenta loko lokumjabulisako. Jehova wayiphendvula imithantazo yami ngekutsi anginikete kuthula kwengcondvo, sibindzi sekuchubeka nekushumayela futsi wangipha netincwadzi lebetingisita kutsi ngihlale ngisondzelene naye.” Uchubeka atsi: “Kufundza ngaloko lobekwentekile kubazalwane nabodzadze nendlela Jehova labasite ngayo kutsi bacinisele kungente ngatimisela kakhulu kuhlala ngetsembekile.”

11-12. Jehova angabasebentisa njani bazalwane betfu nabodzadze kuze aphendvule imithantazo yetfu? (Buka nesitfombe.)

¹¹ Usebentisa bazalwane betfu nabodzadze. Ngebusuku lobebungaphambi kwekufa kwakhe, Jesu wathantaza ngalokujulile. Wancenga Jehova kutsi angavumi kutsi labanye bacabange kutsi bekangumuntfu lohlambalatako. Kunekutsi Jehova ente njalo, wasita Jesu ngekutsi atfume lenye yetingilosi takhe kuze imcinise. (Luk. 22:42, 43) Natsi Jehova angasisita ngekutsi asebentise bazalwane betfu nabodzadze kutsi basishayele lucingo nobe basivakashele. Sonkhe singawafuna ematfuba ekusho “emavi lamnandzi” kubazalwane betfu.​—Taga 12:25.

¹² Cabanga ngaloko lokwenteka kulomunye dzadze lokutsiwa nguMiriam. Ngemuva kwemaviki lambalwa indvodza yakhe ishonile, Miriam bekayedvwa ekhaya, aselusizini futsi ativa acindzetelekile. Bekakhala angayekeli futsi bekadzinga lotsite langakhuluma naye. Utsi: “Bengite emandla ekushaya lucingo, ngako ngathantaza kuJehova. Njengobe bengisakhala futsi ngithantaza, kwaba khona longishayelako. Bekungulomunye lomdzala welibandla, lebekangumngani wetfu.” Lolomdzala welibandla kanye nemkakhe bamdvudvuta Miriam. Uyaciniseka kutsi nguJehova lowenta lomzalwane kutsi amshayele.

13. Niketa sibonelo sendlela Jehova langabasentisa ngayo labo labangamkhonti kuze aphendvule imithantazo yetfu.

¹³ Angasebentisa bantfu labangamkhonti. (Taga 21:1) Ngaletinye tikhatsi, Jehova uphendvula imithantazo yebantfu bakhe ngekutsi ente labo labangamkhonti babasite. Sibonelo nje, wenta iNkhosi Athazeksesi kutsi ivumele Nehemiya abuyele eJerusalema ayosita ekwakheni kabusha lelidolobha. (Neh. 2:3-6) Nalamuhla, Jehova angenta labo labangamkhonti kutsi basisite nangabe sidzinga lusito.

14. Loko lokwenteka kuSoo Hing kukukhutsata njani? (Buka nesitfombe.)

¹⁴ Lomunye dzadze lokutsiwa nguSoo Hing wabona kutsi Jehova wamsita asebentisa dokotela wakhe. Indvodzana yakhe inekugula lokunyenti lokuphatselene nengcondvo. Ngesikhatsi itfola ingoti yemoto, Soo Hing nendvodza yakhe bayekela emsebentini kuze bayinakekele. Loko kwenta kutsi babe netinkinga tetimali. Soo Hing utsi weva shengatsi bumatima lebekabhekene nabo bekangasakhoni kububeketelela. Watfulula sifuba sakhe kuJehova, wamcela kutsi amsite. Lodokotela wancuma kufuna indlela yekubasita. Loko kwenta kutsi batfole lusito kuhulumende kanye nendzawo yekuhlala lengakaduli. Ngemuva kwaloko, Soo Hing watsi: “Sasibona sandla saJehova kulendzaba. Jehova uyayiva imithantazo.’”​—Hla. 65:2.

KUBONA NEKWEMUKELA INDLELA JEHOVA LAPHENDVULA NGAYO IMITHANTAZO KUDZINGA KUKHOLWA

15. Yini leyasita lomunye dzadze wabona kutsi Jehova bekayiphendvula imithantazo yakhe?

¹⁵ Akukavami kutsi imithantazo yetfu iphendvulwe ngendlela lemangalisako. Kodvwa timphendvulo lesititfolako tiba nguloko kanye lebesikudzinga kuze sihlale setsembekile kuBabe wetfu wasezulwini. Ngako hlale ubuka kutsi Jehova uyiphendvula njani imithantazo yakho. Lomunye dzadze lokutsiwa nguYoko weva shengatsi Jehova akayiphendvuli imithantazo yakhe, kodvwa wabese ucala kukubhala phasi loko bekakucele kuJehova. Ngemuva kwesikhatsi wabuka lelibhuku lakhe futsi wabona kutsi Jehova bekaphendvule leminyenti yemithantazo yakhe, ngisho naleyo lebesekakhohliwe ngayo. Kudzingeka sihle sima futsi sicabange ngendlela Jehova layiphendvula ngayo imithantazo yetfu.​—Hla. 66:19, 20.

16. Singakukhombisa njani kukholwa nakutiwa endzabeni yemthantazo? (KumaHebheru 11:6)

¹⁶ Asigcini nje kukhombisa kukholwa ngekutsi sithantaze kuJehova kodvwa sikukhombisa nangekutsi semukele nobe nguyiphi indlela imithantazo yetfu lephendvulwa ngayo. (Fundza KumaHebheru 11:6.) Cabanga ngesibonelo saMike kanye nemkakhe Chrissy. Bebanemgomo wekuyosebenta eBethel. Mike utsi: “Kwaphela iminyaka leminyenti sifaka sicelo futsi sithantaza kuJehova tikhatsi letinyenti mayelana nalomgomo, kodvwa asizange sibitwe.” BoMike naChrissy bebaciniseka kutsi Jehova bekati kutsi nguyiphi indlela lekahle yekubasebentisa. Bachubeka benta loko labangakhona kukwenta, baba ngemahlahlandlela lavamile lakunesidzingo lesikhulu khona sebamemeteli futsi bebasita emsebentini wekwakha takhiwo tenhlangano. Lamuhla benta umsebenti wekujikeleta. Mike utsi: “Jehova bekangahlali aphendvula imithantazo yetfu ngendlela lebesilindzele ngayo, kodvwa bekayiphendvula futsi ayiphendvule ngendlela lencono kakhulu kunaleyo besiyicabanga.”

17-18. Ngekuvumelana neTihlabelelo 86:6, 7, yini lesingaciniseka ngayo?

¹⁷ Fundza Tihlabelelo 86:6, 7. Umhlabeleli Davide bekaciniseka kutsi Jehova uyayiva imithantazo yakhe futsi ayiphendvule. Nawe ungaciniseka. Letibonelo lesesicoce ngato kulesihloko tisicinisekisa ngekutsi Jehova angasiniketa kuhlakanipha kanye nemandla lesiwadzingako kute sicinisele. Angasebentisa bazalwane betfu nabodzadze nobe labo labasengakamkhonti kutsi basisite.

¹⁸ Nanobe Jehova angeke ahlale aphendvula imithantazo yetfu ngendlela lesilindzele ngayo, siyati kutsi utayiphendvula. Utasiniketa loko lesikudzingako nangesikhatsi lesikudzinge ngaso. Ngako chubeka uthantaza futsi wetsembe kutsi Jehova utakuva, uciniseke kutsi utakunakekela nyalo, nangekutsi ‘utawunika tonkhe tintfo letiphilako loko letikufisako’ eveni lelisha.​—Hla. 145:16.