Jehova Utakusita Ngetikhatsi Letimatima

1-2. Ngutiphi tinkinga tikhonti taJehova latetsembekile lokungenteka tibhekane nato?

TIMO letibuhlungu tingashintja kuphila kwetfu ngekucwabita kweliso. Nasi sibonelo, lomunye umzalwane lowetsembekile lokutsiwa nguLuisa watjelwa kutsi unesifo samdlavuza lesingakavami. Dokotela wamtjela kutsi usalelwe tinyanga letimbalwa aphila. Monika nendvodza yakhe bebamatasatasa benta umsebenti waJehova. Ngalelinye lilanga, Monika watfola kutsi sekuphele iminyaka indvodza yakhe lengulomdzala welibandla iphila imphilo lembacambili. Lomunye dzadze longakashadi lokutsiwa ngu-Olivia kwadzingeka abaleke ekhaya lakhe ngobe bekuta siphepho lesinemandla. Watsi nakabuya watfola kutsi lesiphepho sibhidlite indlu yakhe. Kuphila kwalelesicedza kukhuluma ngabo kwashintja ngalokuphelele ngesikhashana nje. Ukile yini nawe wabhekana nesimo lesifana naleti? Ukile yini wabhekana nesimo lesishintje kuphila kwakho ngekucwabita kweliso?

² Njengobe sitikhonti taJehova letetsembekile, siyabhekana netinkinga futsi sigule njengabo bonkhe bantfu. Kungenteka kudzingeke kutsi sibeketelele kuphikiswa nobe kuphatfwa kabi ngulabo labenyanya bantfu baNkulunkulu. Nanobe Jehova angasivikeli kuletinkinga, wetsembisa kusisita. (Isa. 41:10) Ngekusitwa nguye, singahlala sijabulile, sente tincumo letinhle futsi sihlale setsembekile kuye ngisho nobe sibhekana netimo letimatima kakhulu. Kulesihloko, sitawukhuluma ngetindlela letine Jehova latisebentisako kuze asisite nasibhekene netikhatsi letimatima ekuphileni kwetfu. Sitawuphindze sicoce ngekutsi yini lokufanele siyente kuze sizuze kulolusito lasiniketa lona.

JEHOVA UTAKUVIKELA

3. Nasibhekene nesimo lesisivisa buhlungu kakhulu, yini lesingahle siyitfole kumatima kuyenta?

³ Inkinga. Nasibhekene nesimo lesimatima, singakutfola kumatima kucabanga kahle nekwenta tincumo letikahle. Kwentiwa yini? Kungobe kungenteka siva buhlungu lobukhulu. Kungenteka nekutsi sikhatsateke kakhulu. Singeva shengatsi sihamba lapho kunenkhungu lekhasa phansi khona, asiciniseki kutsi nguyiphi indlela lokufanele sihambe ngayo. Naka nayi indlela labativa ngayo labodzadze lababili lesikhulume ngabo ngesikhatsi banetinkinga. Olivia utsi: “Ngemuva kwekutsi lesiphepho sibhidlite indlu yami, ngativa ngilahliwe futsi ngicindzeteleke kakhulu.” Monika lowadvunyatwa yindvodza yakhe utsi: “Ngadvumateka kakhulu, inhlitiyo yami beyopha. Bekulukhuni ngisho nekwenta imisebenti levamile yamalanga onkhe. Bengingacabangi kutsi loku kungenteka kimi.” Jehova wetsembisa kusisita njani nasicindzeteleke kakhulu?

4. Ngekuvumelana nembhalo waKubaseFiliphi 4:6, 7, yini Jehova lasetsembisa yona?

⁴ Lokwentiwa nguJehova. Wetsembisa kusinika loko liBhayibheli lelikubita ngekutsi “kuthula kwaNkulunkulu.” (Fundza KubaseFiliphi 4:6, 7.) Lokuthula kusho kwehlisa umoya nekutiva uncono ngenca yekutsi unebuhlobo lobuhle naJehova. Lokuthula ‘kukwendlula konkhe kucondza’; futsi kutiva ngalendlela kumnandzi kakhulu! Ukile yini wativa uncono ngemuva kwekuthantaza ngalokujulile kuJehova? Loko-ke “kuthula kwaNkulunkulu.”

5. Kuthula kwaNkulunkulu kutilondvolota njani tingcondvo tetfu netinhlitiyo tetfu?

⁵ Lombhalo uphindze utsi lokuthula kwaNkulunkulu “kutawulondvolota,” nobe kuvikele “tinhlitiyo netingcondvo tenu.” Leligama lelitsi ‘kulondvolota’ belivame kusetjentiswa kuze lichaze emasotja lebekagadza lidolobha futsi alivikele kutsi lingahlaselwa. Bantfu labahlala kulelidolobha leligadziwe bebalala ngekuthula, ngobe bebati kutsi kunemasotja labavikele. Ngendlela lefanako, nangabe kuthula kwaNkulunkulu kulondvolota tinhlitiyo netingcondvo tetfu, siyakhona kwehlisa umoya ngobe siyati kutsi sivikelekile. (Hla. 4:8) Ngisho nobe simo setfu singashintji ngekushesha, njengobe kwenteka kuHana, singachubeka sinekuthula. (1 Sam. 1:16-18) Nasehlise umoya, kuba melula kutsi sicabange kahle futsi sente tincumo letikahle.

6. Yini lesingayenta kuze kusisite kuthula kwaNkulunkulu? (Buka nesitfombe.)

⁶ Lokufanele sikwente. Njengobe bantfu labahlala kulelidolobha bangabita lisotja kuze libavikele, nawe ungacela Jehova kutsi akusite. Njani? Ngekutsi uthantaze uze utfole kuthula kwaNkulunkulu. (Luk. 11:9; 1 Thes. 5:17) Luis, lesike sakhuluma ngaye uchaza loko lokwasita yena na-Ana umkakhe ngesikhatsi batjelwa kutsi usalelwe tinyanga letimbalwa aphila. Utsi: “Ngetikhatsi letinjalo, kuba matima kakhulu kwenta tincumo letimayelana nemphilo naletinye tintfo. Kodvwa umthantazo usisite kakhulu kutsi sibe nekuthula kulesikhatsi lesi.” Luis nemkakhe batsi bebathantaza ngalokujulile futsi ngalokuphindzaphindziwe, bacela Jehova kutsi abanikete kuthula kwangekhatsi kanye nekuhlakanipha kuze bente tincumo letihlakaniphile. Babona kutsi Jehova wabasita. Nangabe nawe ubhekene nesimo lesimatima, chubeka uthantaza futsi Jehova utakunika kuthula lokutawulondvolota ingcondvo yakho nenhlitiyo yakho.​—Rom. 12:12.

JEHOVA UTAKWENTA USIME

7. Kungenteka sitive njani nasibhekene nenkinga lematima?

⁷ Inkinga. Nasibhekene nesikhatsi lesimatima, indlela lesitiva ngayo, lesikucabangako naloko lesikwentako kuyehluka kuloko lesivame kukwenta. Njengemkhumbi loyiswa lena nalena ngemagagasi, natsi kungenteka indlela lesitiva ngayo ishintjashintje ngekushesha. Ana lesike sakhuluma ngaye utsi bekavame kuba nemiva leshintjashintjako ngemuva kwekushona kwaLuis. Watsi: “Ngaletinye tikhatsi bengitiva ngicindzetelekile futsi ngitivele buhlungu. Bengiphindze ngitfukutsele kutsi sewushonile.” Ngetulu kwaloko, Ana bekativa anesitunge futsi angati kutsi atsatse ini ayibhice nani, ikakhulukati nakufanele ente tincumo lebetentiwa nguLuis futsi atenta kahle. Ngaletinye tikhatsi bekeva shengatsi uselwandle lolunesivunguvungu. Jehova usisita njani nasitiva kanjalo?

8. Njengobe kusho Isaya 33:6, yini Jehova lasicinisekisa ngayo?

⁸ Lokwentiwa nguJehova. Isaya 33:6 utsi Jehova utawusenta sivikeleke, lokungaphindze kubekwe ngekutsi utasisimisa. (Fundza Isaya 33:6.) Nangabe umkhumbi utfolwa sivunguvungu, ungahle ucale kuya lena nalena. Kuze loko kungenteki, imikhumbi leminyenti inetintfo letiwusimisako ngalana nangale letiba ngephansi kulomkhumbi. Letintfo tekuwusimisa tenta kutsi lomkhumbi ungayi kakhulu lena nalena, loko kwenta kutsi labawugibele baphephe futsi bakujabulele kuhamba ngawo. Nobe kunjalo, letintfo tekuwusimisa tisebenta kahle nangabe lomkhumbi uhamba. Ngendlela lefanako, Jehova utasisimisa nangabe sichubeka simkhonta ngekwetsembeka nasibhekene netimo letimatima.

9. Emathulusi etfu ekucwaninga angasisita njani kutsi sikhone kulawula indlela lesitiva ngayo? (Buka nesitfombe.)

⁹ Lokufanele sikwente. Nangabe indlela lotiva ngayo ishintjashintja ngekushesha, yenta konkhe longakwenta kuze uchubeke neluhlelo lwakho lwekukhonta Nkulunkulu. Kuliciniso kutsi kungenteka ungakhoni kwenta loko bewukwenta ngaphambili, kodvwa khumbula kutsi Jehova akalindzeli kutsi wente lokungetulu kwalokusemandleni akho. (Catsanisa naLukha 21:1-4.) Ungaphindze utinikete sikhatsi sekudadisha liBhayibheli futsi ucabangisise ngalokufundzile. Ngasiphi sizatfu? Ngobe inhlangano yaJehova isinikete tihloko letinhle kanye nema-video lokungasisita kutsi silawule indlela lesitiva ngayo ngetikhatsi letimatima. Kuze utfole loko lokudzingako, ungasebentisa emathulusi ekucwaninga latfolakala ngelulwimi lwakho, njenge-JW Library, i-Watch Tower Publications Index, kanye neLithulusi Lekucwaninga LaBoFakazi BaJehova. Monika lesike sakhuluma ngaye utsi wasebentisa emathulusi ekucwaninga ngesikhatsi ishintjashintja ngekushesha indlela lativa ngayo. Sibonelo nje, wacwaninga ngeligama lelitsi “intfukutselo.” Ngaletinye tikhatsi bekacwaninga ngeligama lelitsi “kungetsembeki” nobe lelitsi “kwetsembeka.” Bekabese uyafundza aze ative ancono. Utsi: “Nangicala kucwaninga, bengitiva ngikhatsateke kakhulu. Kodvwa njengobe ngichubeka ngifundza, ngeva ngatsi Jehova unginika i-hug lemnandzi. Ngabona kutsi Jehova uyakucondza kushintjashintja kwemiva yami nekutsi bekangisita.” Lusito lolunjalo lungakusita nawe kuze ukhone kulawula indlela lotiva ngayo uze utive unekuthula.​—Hla. 119:143, 144.

JEHOVA UTAKUSEKELA

10. Singativa njani ngemuva kwesimo lesibuhlungu?

¹⁰ Inkinga. Ngemuva kwekutsi kwenteke intfo lesivisa buhlungu kakhulu, ngalamanye emalanga singativa siphelelwa ngemandla nemoya wetfu ushona phansi. Singahle sitive njengengijimi lebeyigijima kakhulu kodvwa nyalo leseyichuta. Kungenteka sikutfole kumatima kwenta imisebenti lebesiyenta ngaphandle kwenkinga, nobe singasakujabuleli kwenta tintfo lebesititsandza. Njenga-Elija, singahle sikutfole kumatima kuvuka, sifune kulala nje kuphela. (1 Khos. 19:5-7) Yini Jehova letsembisa kuyenta nasibutsakatsaka?

11. Nguyiphi lenye indlela Jehova lasisita ngayo? (Tihlabelelo 94:18)

¹¹ Lokwentiwa nguJehova. Wetsembisa kusisekela. (Fundza Tihlabelelo 94:18.) Njengobe ingijimi lelimele idzinga kusekelwa nayihamba, natsi singahle sidzinge lusito kuze sichubeke senta umsebenti waJehova. Etikhatsini letinjalo, Jehova usicinisekisa utsi: “Mine Jehova Nkulunkulu wakho ngibamba sandla sakho sangesekudla, mine ngitsi kuwe: ‘Ungesabi, ngitakusita.’” (Isa. 41:13) INkhosi Davide yalutfola lolusito. Ngesikhatsi ibhekene netinkinga kanye netitsa, yatsi kuJehova: “Sandla sakho sangesekudla siyangisekela.” (Hla. 18:35) Kodvwa Jehova usisekela njani?

12. Jehova angasebentisa bobani kuze basisite nasiphelelwa ngemandla?

¹² Jehova uvame kusisekela ngekutsi akhutsate labanye kutsi basisite. Sibonelo nje, ngalelinye lilanga Davide wativa aphelelwa ngemandla. Umngani wakhe lokunguJonathani wamvakashela kuze amcinise futsi washo emavi lamkhutsata. (1 Sam. 23:16, 17) Jehova wakhetsa Elisha kuze asite Elija. (1 Khos. 19:16, 21; 2 Khos. 2:2) Nalamuhla Jehova angasebentisa emalunga emndeni yetfu, bangani nobe labadzala belibandla kuze basisekele. Kodvwa nasisebuhlungwini singahle singafuni kuba nebantfu, sifune kuba sodvwa. Kuvamile kutiva ngalendlela. Yini lesingayenta kuze sivume kusitwa nguJehova?

13. Yini lokufanele siyente kuze sizuze endleleni Jehova lasisekela ngayo? (Buka nesitfombe.)

¹³ Lokufanele sikwente. Lwisana nesifiso sekutehlukanisa. Nangabe sitehlukanisa, singacala kucabanga ngetinkinga tetfu nje kuphela. Loko kungenta kutsi sente tincumo letingakahlakaniphi. (Taga 18:1) Kuliciniso kutsi sonkhe siyasidzinga sikhatsi sekuba sodvwa, ikakhulukati nasibhekene netinkinga letimatima. Nobe kunjalo, nasitehlukanisa kulabanye sikhatsi lesidze, kungenteka siluvalele ngephandle lusito lwaJehova. Ngako ngisho nobe simo singaba matima kanganani, vumela emalunga emndeni wakho, bangani nalabadzala belibandla kutsi bakusite. Batsatse njengendlela Jehova layisebentisako kuze akusekele.​—Taga 17:17; Isa. 32:1, 2.

JEHOVA UTAKUDVUDVUTA

14. Ngutiphi timo letesabisako lokungenteka sibhekane nato?

¹⁴ Inkinga. Kungenteka kube netikhatsi lasesaba khona. EBhayibhelini, tikhonti taNkulunkulu tikhuluma ngetikhatsi lebeticindzeteleke ngato futsi tesatjiswa titsa tato. Takhuluma nangalokunye lebekuticindzetela. (Hla. 18:4; 55:1, 5) Ngendlela lefanako, kungenteka natsi siyaphikiswa esikolweni, emsebentini nobe siphikiswa ngemalunga emindeni yetfu nobe nguhulumende. Kungenteka siyesaba kutsi sitawufa ngenca yesifo lesinaso. Ngetikhatsi letinjalo, kungenteka sitive singakavikeleki kuhle kwemntfwana. Jehova usisita njani etikhatsini letinjalo?

15. Tisicinisekisa ngani Tihlabelelo 94:19?

¹⁵ Lokwentiwa nguJehova. Uyasidvudvuta futsi asente sijabule. (Fundza Tihlabelelo 94:19.) Lesihlabelelo senta kutsi sibone ngeliso lengcondvo intfombatanyana leyesabako futsi lengakhoni kulala ngenca yekutsi lidvuma kamatima. Singambona ngeliso lengcondvo babe wayo aya kuyo, afike ayitsatse futsi ayigodle ize ilale. Nanobe lichubeka lidvuma, lentfombatanyana itiva iphephile futsi idvudvuteka ngobe isetandleni tababe wayo. Nasibhekene netinkinga letisesabisako, kungenteka sidzinge kutsi Babe wetfu wasezulwini asigodle ngetandla takhe size sitive sincono. Yini lesingayenta kuze Jehova asidvudvute?

16. Yini lesingayenta kuze sizuze endleleni Jehova lasidvudvuta ngayo? (Buka nesitfombe.)

¹⁶ Lokufanele sikwente. Kufanele uhlale ucitsa sikhatsi naJehova ngekutsi uthantaze kuye futsi ufundze liVi lakhe. (Hla. 77:1, 12-14) Nawenta njalo, intfo yekucala lotayicabanga nawucindzetelekile kwetsembela kuBabe wakho wasezulwini. Tjela Jehova loko lokwesabako naloko lokukukhatsatako. Mvumele akhulume nawe ngemiBhalo futsi akudvudvute. (Hla. 119:28) Ungatfola kutsi lamanye emavesi ayakudvudvuta nawesaba. Sibonelo nje, ungakhutsateka nawufundza incwadzi yaJobe, yeTihlabelelo, yeTaga kanye nemavi aJesu lakuMatewu sehluko 6. Njengobe uthantaza kuJehova futsi ufundza liVi lakhe, utayibona indlela lakudvudvuta ngayo.

17. Yini lesingaciniseka ngayo?

¹⁷ Singaciniseka kutsi Jehova utasisekela ngetikhatsi letimatima. Asiyoze sibe sodvwa. (Hla. 23:4; 94:14) Jehova wetsembisa kusilondvolota, asisimise, asisekele futsi asidvudvute. Mayelana naJehova, Isaya 26:3 utsi: “Wena utabavikela labo labetsembela kuwe ngalokuphelele; utabaniketa kuthula lokuchubekako, ngobe betsembele kuwe.” Ngako yetsembela kuJehova futsi wente konkhe longakwenta kuze usitakale kuloko lakusebentisako kuze akusite. Nawenta njalo, utawuphindze ube nemandla ngisho ubhekene netikhatsi letimatima.