‘Chubekela Ekuvutfweni’

1. Yini Jehova layilindzele kitsi?

LOKUNYE lokubajabulisa kakhulu labo labashadene kutalwa kwemntfwana lophile saka. Nanobe labatali bamtsandza lomntfwana wabo, kodvwa abafisi kutsi ahlale aluswane. Ecinisweni, bangakhatsateka kakhulu nakangahlala angakhuli. Ngendlela lefanako, Jehova uyajabula nasicala kufundza ngaye, kodvwa akafuni kutsi sihlale sitinswane. (1 Khor. 3:1) Kunaloko, usicela kutsi sibe ngemaKhristu ‘lavutsiwe.’​—1 Khor. 14:20.

2. Yini lesitawucoca ngayo kulesihloko?

² Kusho kutsini kuba ngumKhristu lovutsiwe? Yini lokufanele siyente kuze sibe ngemaKhristu lavutsiwe? Kudla lokucinile kusisita njani kutsi sikhule? Kubaluleke ngani kutsi singatetsembi kakhulu? Kulesihloko, sitawuphendvula lemibuto.

KUSHO KUTSINI KUBA NGUMKHRISTU LOVUTSIWE?

3. Kusho kutsini kuba ngumKhristu lovutsiwe?

³ EBhayibhelini, ligama lelihunyushwe ngekutsi ‘kukhula,’ lingaphindze lisho “kuvutfwa,” “kuphelela,” “nekungashodi ngalutfo.”a (1 Khor. 2:6) Njengobe luswane lukhula luze lube ludzala, natsi kufanele sichubeke sikhula ebuhlotjeni betfu naJehova. Nasenta njalo, siba ngemaKhristu lavutsiwe. Kuliciniso kutsi ngisho nobe sesiwufinyelele lomgomo, akukafaneli siyekele kuchubeka sitfutfuka njengemaKhristu. (1 Thim. 4:15) Sonkhe, ngisho nobe sibancane ngeminyaka, singaba ngemaKhristu lavutsiwe. Kodvwa yini lekhombisa kutsi umKhristu sewuvutsiwe?

4. Yini lekhombisa kutsi umuntfu ungumKhristu lovutsiwe?

⁴ UmKhristu lovutsiwe ngumuntfu lokwenta konkhe loko Jehova lacela kutsi akwente. Akayikhetsi imitsetfo yaNkulunkulu, alalele leminye kodvwa leminye angayilaleli. Kuliciniso kutsi utawenta emaphutsa ngenca yekutsi unesono. Nobe kunjalo, indlela laphila ngayo iyakhombisa kutsi ucabanga futsi ente ngendlela levumelana nentsandvo yaNkulunkulu. Ugcoke buntfu lobusha futsi uchubeka etama kwenta konkhe langakwenta kuze acabange njengaNkulunkulu. (Ef. 4:22-24) Uticeceshile kutsi ente tincumo letihlakaniphile letisekelwe emitsetfweni yaJehova nasetimisweni takhe, ngako akadzingi imitsetfo leminyenti letamtjela kutsi yini lokufanele ayente. Nakenta sincumo, wenta konkhe langakwenta kuze ente loko lakuncumile.​—1 Khor. 9:26, 27.

5. Yini lengenteka kumKhristu longakavutfwa? (Kubase-Efesu 4:14, 15)

⁵ Ngakulokunye, umKhristu longakavutfwa angadukiswa kamelula bantfu “labayenganako,” ‘nangemacebo ladukisako’ futsi angetsemba tindzaba letingemanga nalokushiwo tihlubuki.b (Fundza Kubase-Efesu 4:14, 15.) Angaba nemona, atsandze kususa umsindvo, asheshe acansuke, nobe kube melula kutsi ente lokubi nakalingwa.​—1 Khor. 3:3.

6. Singakufananisa nani kukhula kwemKhristu abe ngulovutsiwe? (Buka nesitfombe.)

⁶ Njengobe sivetile, imiBhalo ifananisa kukhula kwemuntfu abe ngumKhristu lovutsiwe nendlela umntfwana lakhula ngayo abe mdzala. Umntfwana ute kucondza, ngako udzinga kuvikelwa futsi anakwe ngumuntfu lomdzala. Sibonelo nje, make nakahamba nendvodzakati yakhe leseyincane uyibamba sandla nabewela umgwaco. Kodvwa njengobe lendvodzakati yakhe ikhula, lomake angahle ayivumele kutsi itewelele yodvwa emgwacweni, nobe kunjalo utayitjela kutsi kufanele ibuke ngesekudla nangesencele ngaphambi kwekutsi yewele umgwaco. Lomntfwana nasekakhulile ubese uyati kutsi kufanele atigweme tingoti. Njengobe bantfwana badzinga umuntfu lomdzala kuze bagweme tingoti, emaKhristu langakavutfwa avame kudzinga lusito lwemaKhristu lavutsiwe kuze agweme tintfo letingalimata buhlobo bawo naJehova futsi ente tincumo letihlakaniphile. Kodvwa nangabe emaKhristu lavutsiwe kufanele ente tincumo, acabanga ngaloko lokushiwo timiso teliBhayibheli kuze atfole indlela Jehova lacabanga ngayo ngaleyondzaba, bese enta loko lokufanele.

7. EmaKhristu lavutsiwe ayaludzinga yini lusito lwalabanye?

⁷ Loku kusho kutsi umKhristu lovutsiwe akwenteki yini aludzinge lusito lwalabanye? Cha. Ngalesinye sikhatsi kuyadzingeka kutsi emaKhristu lavutsiwe acele lusito kulabanye. Kodvwa umuntfu longakavutfwa angalindzela kutsi labanye bamtjele kutsi yini lokufanele ayente nobe kutsi bamtjele ngesincumo lokufanele asitsatse, lokusincumo lokufanele ngabe utentela sona. Kodvwa nanobe umKhristu lovutsiwe alucela lusito kumaKhristu lanekucondza futsi lasekanesikhatsi akhonta Nkulunkulu, uyati kutsi Jehova ulindzele kutsi ‘atetfwalele umtfwalo wakhe.’​—Gal. 6:5.

8. EmaKhristu lavutsiwe awafani ngatiphi tindlela?

⁸ Njengobe bantfu labadzala bangafanani ngendlela lababukeka ngayo, nemaKhristu lavutsiwe anebuntfu lobungafani. Sibonelo nje, lamanye ahlakaniphe kakhulu, lamanye anesibindzi, lamanye ayephana kani lamanye aneluvelo. Ngetulu kwaloko, nangabe emaKhristu lamabili lavutsiwe abhekene nesimo lesifanako, kungenteka ente tincumo letingafani kodvwa letivumelana netimiso teliBhayibheli. Loko kuvame kwenteka nangabe umKhristu kufanele ente sincumo lesitsintsa nembeza. Kukwati loku kwenta kutsi lamaKhristu angehlulelani nangabe tincumo tawo tingafani. Kunaloko, anaka kakhulu kuhlala anebunye.​—Rom. 14:10; 1 Khor. 1:10.

YINI LOKUFANELE SIYENTE KUZE SIBE NGEMAKHRISTU LAVUTSIWE?

9. Kuyatentakalela yini kutsi umuntfu abe ngumKhristu lovutsiwe? Chaza.

⁹ Ngekuhamba kwesikhatsi umntfwana uyakhula, kodvwa akutentakaleli kutsi umuntfu abe ngumKhristu lovutsiwe. Sibonelo nje, bazalwane nabodzadze baseKhorinte batemukela tindzaba letimnandzi, babhajatiswa, batfola umoya longcwele futsi bafundza lokunyenti kuloko umphostoli Pawula labafundzisa kona. (Imis. 18:8-11) Nobe kunjalo, ngemuva kweminyaka babhajatisiwe, labanyenti babo bebasolo bangemaKhristu langakavutfwa. (1 Khor. 3:2) Yini lesingayenta kuze loku kungenteki kitsi?

10. Yini lokufanele siyente kuze sibe ngemaKhristu lavutsiwe? (Juda 20)

¹⁰ Kuze sibe ngemaKhristu lavutsiwe kufanele sicale sibe nesifiso sekuvutfwa. Labo ‘labatsandza kuba bete lwati,’ lokungulabo labatsandza kuba tinswane, angeke babe ngemaKhristu lavutsiwe. (Taga 1:22) Asifuni kuba njengalabo lasebakhulile kodvwa labachubeka betsembela kubatali babo kuze babentele tincumo. Kunaloko, sifuna kwenta loko lokufanele ngabe siyakwenta futsi sente konkhe lokusemandleni kuze buhlobo betfu naJehova buchubeke bukhula. (Fundza Juda 20.) Nangabe usalwela kuba ngumKhristu lovutsiwe, thantaza kuJehova, yena utakunika “sifiso nemandla ekwenta intsandvo yakhe.”​—Fil. 2:13.

11. Nguluphi lusito Jehova lasinike lona kuze sibe ngemaKhristu lavutsiwe? (Kubase-Efesu 4:11-13)

¹¹ Jehova akalindzeli kutsi sikhule sibe ngemaKhristu lavutsiwe kube kute lusito lesilutfolako. Labo lababelusi futsi lababafundzisi ebandleni lebuKhristu bakulungele kusisita kutsi ‘sikhule ngalokwenele’ ekukhonteni Jehova, “sivutfwe ngelizinga leliphelele njengaKhristu.” (Fundza Kubase-Efesu 4:11-13.) Jehova uphindze asiphe umoya wakhe longcwele kuze asisite sibe ‘nemicabango yaKhristu.’ (1 Khor. 2:14-16) Ngetulu kwaloko, Nkulunkulu waphefumulela kutsi kubhalwe emaVangeli lamane kuze asikhombise kutsi Jesu bekacabanga njani, akhuluma njani futsi atenta njani tintfo ngesikhatsi alamhlabeni. Nangabe ulingisa indlela Jesu lebekacabanga ngayo futsi enta ngayo, ungawufinyelela umgomo wakho wekuba ngumKhristu lovutsiwe.

INDLELA KUDLA LOKUCINILE LOKUSISITA NGAYO

12. Iyini ‘imfundziso lesisekelo lemayelana naKhristu’?

¹² Kuze sibe ngemaKhristu lavutsiwe, kufanele sati lokungetulu ‘kwemfundziso lesisekelo lemayelana naKhristu,’ lokusho timfundziso letisisekelo tebuKhristu. Letimfundziso letisisekelo tifaka ekhatsi imfundziso yekuphendvuka, yekukholwa, yekubhajatiswa neyekuvuswa kwebantfu labafile. (Heb. 6:1, 2) Leti nguletinye timfundziso letisisekelo onkhe emaKhristu latikholelwako. Kungako ngesikhatsi umphostoli Phetro ashumayela bantfu ngeliPhentekhoste, wakhuluma ngaletintfo. (Imis. 2:32-35, 38) Kufanele sitemukele letimfundziso letisisekelo kuze sibe balandzeli baKhristu. Sibonelo nje, Pawula wakhombisa kutsi umuntfu angeke atsi umgumKhristu weliciniso nangabe angakholelwa kutsi bantfu labafile batawuvuswa. (1 Khor. 15:12-14) Nobe kunjalo, akukafaneli senetiswe kutsi siyatati letimfundziso letisisekelo.

13. Yini lokufanele siyente kuze kusisite lokudla lokucinile lokukhulunywa ngako embhalweni waKumaHebheru 5:14? (Buka nesitfombe.)

¹³ Ngekungafani netimfundziso letisisekelo, kudla lokucinile akugcini nje ngekufaka ekhatsi imitsetfo yaJehova, kodvwa kuphindze kufake ekhatsi netimiso takhe, letisisita kutsi sicondze indlela lacabanga ngayo. Kuze kusisite lokudla, kufanele sidadishe liVi laNkulunkulu, sicabangisise ngaloko lesikufundza kulo futsi sente konkhe lesingakwenta kuze sikusebentise loko lesikufundzako. Nasenta njalo, sisuke siticecesha kutsi sente tincumo letijabulisa Jehova.c​—Fundza KumaHebheru 5:14.

14. Pawula wawasita njani emaKhristu aseKhorinte kutsi akhule abe ngemaKhristu lavutsiwe?

¹⁴ EmaKhristu langakavutfwa avame kukutfola kumatima kwenta sincumo lesikahle nangabe kudzingeka acabange ngetimiso letiseBhayibhelini futsi atisebentise. Nangabe kute umtsetfo loseBhayibhelini, labanye bangeva shengatsi bangenta nobe ngabe yini labayifunako. Labanye bangahle bafune umtsetfo lawungadzingeki khona. Sibonelo nje, kubonakala ngatsi emaKhristu aseKhorinte abuta Pawula kutsi ukhona yini umtsetfo lebewukhuluma ngekutsi angakudla yini kudla lokunikelelwe tithico. Kunekutsi Pawula awatjele kutsi yini lokufanele ayente, watsi kufanele asebentise bonembeza bawo kanye ‘nelilungelo lawo lekutikhetsela.’ Wakhuluma ngetimiso letisekelwe eBhayibhelini lebetingawasita kutsi ente sincumo lebesitawashiya ananembeza lote licala futsi lebesingeke sibakhube labanye. (1 Khor. 8:4, 7-9) Ngekwenta njalo, Pawula bekasita lamaKhristu aseKhorinte kutsi akhule abe ngemaKhristu lavutsiwe kuze akhone kusebentisa kucondza kunekutsi etsembele kulotsite nobe afune imitsetfo.

15. Pawula wawasita njani emaKhristu langemaHebheru kutsi achubeke atfutfuka ebuhlotjeni bawo naNkulunkulu?

¹⁵ Sifundza lesinye sifundvo lesibalulekile kuloko Pawula lakubhalela emaKhristu langemaHebheru. Lamanye akazange achubeke akhula ebuhlotjeni bawo naNkulunkulu; ecinisweni ‘besekaphindze adzinga lubisi hhayi kudla lokucinile.’ (Heb. 5:12) Akazange afundze futsi emukele tintfo letinsha Jehova lebekawafundzisa tona asebentisa libandla. (Taga 4:18) Sibonelo nje, emaKhristu lamanyenti langemaJuda bekasolo akhutsata labanye kutsi bagcine uMtsetfo waMosi, ngisho nobe besekuphele iminyaka lengaba ngu-30 umhlatjelo waJesu wenta kutsi ungasasebenti. (Rom. 10:4; Thit. 1:10) Kuleminyaka lengu-30, lamaKhristu bekanesikhatsi lesenele sekucondza kutsi bekungasadzingeki alandzele uMtsetfo waMosi! Nobe ngubani lofundze lencwadzi yaPawula lephefumulelwe layibhalela emaHebheru, angasho kutsi inekudla lokucinile. Lencwadzi yawasita lamaKhristu abona kutsi kukhonta Jehova ngalendlela lensha leyaba khona ngaJesu, bekuncono kakhulu. Ngetulu kwaloko kwabaniketa sibindzi sekuchubeka bashumayela ngisho nobe emaJuda bekabaphikisa.​—Heb. 10:19-23.

GWEMA KUTETSEMBA KAKHULU

16. Ngetulu kwekutfutfuka sibe ngemaKhristu lavutsiwe, yini lenye lokufanele siyente?

¹⁶ Kufanele sente konkhe lesingakwenta kuze sibe ngemaKhristu lavutsiwe futsi sichubeke singiwo. Kuze sikhone kukwenta loku, kufanele singatetsembi kakhulu. (1 Khor. 10:12) Kufanele ‘sichubeke sitihlola’ kuze sibone kutsi siyachubeka yini sitfutfuka.​—2 Khor. 13:5.

17. Incwadzi yaPawula lebeyibhelelwe emaKhristu aseKholose ikhombisa njani kutsi kufanele sichubeke singemaKhristu lavutsiwe?

¹⁷ Encwadzini layibhalela baseKholose, Pawula wakhuluma ngekutsi kufanele bachubeke bangemaKhristu lavutsiwe. Ngisho nobe lamaKhristu besekavutsiwe, Pawula wawecwayisa kutsi kufanele ahlale agadzile kuze angayengwa yindlela bantfu balelive labacabanga ngayo. (Khol. 2:6-10) Ephafrasi, lebekabati kahle labo lebebakulelibandla, wachubeka abathantazela ‘kuze beme bacine,’ nobe bavutfwe. (Khol. 4:12) Yini lesiyifundzako? Pawula na-Ephafrasi bebacondza kutsi nangabe sifuna kuchubeka singemaKhristu lavutsiwe kufanele sente lokutsite futsi sisitwe nanguNkulunkulu. Bebafuna lamaKhristu aseKholose achubeke angemaKhristu lavutsiwe nobe akhule ngalokwenele ngisho nobe bekabhekene natiphi tinkinga.

18. Yini lengenteka kumKhristu lovutsiwe? (Buka nesitfombe.)

¹⁸ Pawula wecwayisa emaKhristu langemaHebheru kutsi kungenteka Nkulunkulu angamemukeli umKhristu lovutsiwe kuze kube phakadze. Nangabe angafuni kulalela Jehova angakhweshelana kakhulu naye kangangekutsi angakhoni kuphendvuka futsi acolelwe nguye. Lokuhle kutsi lamaKhristu langemaHebheru akazange afike kulesimo. (Heb. 6:4-9) Kutsiwani ngalabo labaphelelwa ngumdlandla lamuhla ekukhonteni Nkulunkulu nobe labayekeliswako kuba BoFakazi BaJehova kodvwa ngekuhamba kwesikhatsi baphendvuke? Nangabe batitfoba futsi baphendvuka, bakhombisa kutsi abafanani nalabo Pawula lakhuluma ngabo. Kuliciniso kutsi nababuyela kuJehova bayaludzinga lusito lwakhe. (Hez. 34:15, 16) Labadzala belibandla bangahlela kutsi umzalwane nobe dzadze lovutsiwe abasite kuze baphindze babe nebuhlobo lobuhle naJehova.

19. Ngumuphi umgomo lokufanele sitibekele wona?

¹⁹ Nangabe uchubekela ekuvutfweni, ungawufinyelela umgomo wakho! Chubeka udla kudla lokucinile futsi wenta konkhe longakwenta kuze ucabange ngendlela Jehova lacabanga ngayo. Nangabe sewungumKhristu lovutsiwe, yenta konkhe longakwenta kuze uhlale unjalo.