Libandla Lingakhombisa Njani Kutsi Lilingisa Jehova Endleleni Leliphatsa Ngayo Labo Labonile?

1. Yini Jehova layifunela bonkhe bantfu?

JEHOVA wadala bantfu baba nenkhululeko yekutikhetsela. Uhlale uyisebentisa lenkhululeko nawenta tincumo. Sincumo lesibaluleke kakhulu umuntfu langasenta kutinikela kuJehova futsi abe yincenye yetikhonti takhe. Jehova ufuna kutsi bonkhe bantfu bente njalo. Ngasiphi sizatfu? Ngenca yekutsi uyabatsandza bantfu futsi ubafunela lokuhle. Ufuna babe nebuhlobo lobuhle naye futsi baphile phakadze.​—Dut. 30:19, 20; Gal. 6:7, 8.

2. Jehova utiva njani ngalabo labente bubi labangaphendvuki? (1 Johane 2:1)

² Nobe kunjalo, Jehova akaphoceleli muntfu kutsi amkhonte. Uvumela umuntfu ngamunye atincumele loko latawukwenta. Kodvwa kutsiwani nangabe umKhristu ephula umtsetfo waNkulunkulu, ente sono lesikhulu? Nangabe angaphendvuki, kufanele asuswe ebandleni. (1 Khor. 5:13) Nobe kunjalo, Jehova ufuna mbamba kutsi lomuntfu abuyele kuye. Ecinisweni, nguleso sizatfu lesibalulekile lesamenta wasilungisela inhlawulo, kuze acolele toni letiphendvukile. (Fundza 1 Johane 2:1.) Nkulunkulu wetfu lonelutsandvo ubancenga ngemusa labo labente bubi, ubacela kutsi baphendvuke.​—Zak. 1:3; Rom. 2:4; Jak. 4:8.

3. Sitawucoca ngani kulesihloko?

³ Jehova ufuna sibe nembono lofana newakhe ngalokubi nangalabo labenta bubi. Lesihloko sitasisita sibone kutsi singakwenta njani loko. Njengobe ufundza lesihloko, buka kutsi (1) yini leyenteka ebandleni laseKhorinte ngesikhatsi kunalotsite lobekenta bubi lobukhulu, (2) yini umphostoli Pawula latsi ayentiwe ngesikhatsi lona lowente bubi aphendvuka, nekutsi (3) lendzaba leseBhayibhelini iwuveta njani umbono waJehova ngemaKhristu lenta sono lesikhulu.

LOKO LOKWENTEKA EBANDLENI NGESIKHATSI LOTSITE ENTA BUBI LOBUKHULU

4. Ngusiphi simo lesavela ebandleni laseKhorinte? (1 KubaseKhorinte 5:1, 2)

⁴ Fundza 1 KubaseKhorinte 5:1, 2. Ngesikhatsi Pawula aseluhambeni lwakhe lesitsatfu asitfunywa selivangeli, weva tindzaba letetfusako letimayelana nelibandla laseKhorinte lebelisandza kusungulwa. Lomunye umzalwane kulelibandla bekatiphatsa kabi nemfati wababe wakhe. Lokutiphatsa lokunjena bekwetfusa futsi ‘bekungazange sekwentiwe ngisho nabantfu betive’! Lelibandla belingagcini nje ngekukubeketelela lokutiphatsa kwakhe, kodvwa kungenteka beliphindze litigcabhe ngako. Mhlawumbe labanye bebacabanga kutsi bekukhombisa kutsi Nkulunkulu unemusa kangakanani futsi uyacondza kutsi bantfu banesono. Kodvwa Jehova akakwemukeli kutiphatsa lokubi kubantfu bakhe. Lokutiphatsa kabi kwalendvodza lebekuhambisana nekwedzelela bekulilimata lidvumela lelibandla. Kungenteka nekutsi beyiwufaka lomoya nakulamanye emaKhristu lebekatihlanganisa nayo. Ngako yini Pawula latjela lelibandla kutsi liyente?

5. Pawula walitjela kutsi lenteni lelibandla, futsi bekasho kutsini? (1 KubaseKhorinte 5:13) (Buka nesitfombe.)

⁵ Fundza 1 KubaseKhorinte 5:13. Aphefumulelwe, Pawula wabhala incwadzi lebeyitsi lesoni lesingaphendvuki kufanele sisuswe ebandleni. EmaKhristu letsembekile bekufanele asiphatse njani? Pawula wawatjela ‘kutsi ayekele kutihlanganisa’ naso. Bekusho kutsini loko? Pawula wachaza kutsi loku bekufaka ekhatsi kungadli “ngisho nekudla nemuntfu lonjalo.” (1 Khor. 5:11) Kuhlala phansi kuze udle nalotsite kungenta kutsi nicitse sikhatsi lesinyenti ndzawonye. Ngako kusebaleni kutsi Pawula bekatsi emalunga elibandla akukafaneli abe nalendvodza nakanesikhatsi lesimnandzi. Loko bekutalivikela lelibandla kulendvodza. (1 Khor. 5:5-7) Ngetulu kwaloko, kugwema kutihlanganisa nalendvodza bekungayenta ibone kutsi seyikhweshe kangakanani etindleleni taJehova, futsi loko bekungenta kutsi itisole bese iyaphendvuka.

6. Lenta njani lelibandla nalitfola incwadzi yaPawula, futsi yenta njani lendvodza lebeyente bubi?

⁶ Ngemuva kwekutfumela incwadzi yakhe kumaKhristu aseKhorinte, Pawula watibuta kutsi lelibandla belitawenta njani. Ngemuva kwesikhatsi, Thithusi wamletsela tindzaba letimnandzi. Lelibandla lakwenta loko Pawula lakusho kulencwadzi. (2 Khor. 7:6, 7) Lalalela. Ngetulu kwaloko, ngemuva kwetinyanga Pawula atfumele lencwadzi, lona lebekente bubi besekaphendvukile. Besekayishintjile indlela latiphatsa ngayo nalacabanga ngayo, futsi besekacale kulalela timiso taJehova letilungile. (2 Khor. 7:8-11) Nyalo Pawula besekatawutjela lelibandla kutsi lenteni?

INDLELA LIBANDLA BEKUFANELE LISIPHATSE NGAYO LESONI LESIPHENDVUKILE

7. Kwaba namuphi umphumela lomuhle kumsusa ebandleni lomuntfu lebekente bubi? (2 KubaseKhorinte 2:5-8)

⁷ Fundza 2 KubaseKhorinte 2:5-8. Pawula watsi “lesijeziso lasitfole kubantfu labanyenti simenele loyo muntfu.” Ngalamanye emavi, lesijeziso sawenta umsebenti waso. Bewuyini umsebenti waso? Kwenta lomuntfu kutsi aphendvuke.​—Heb. 12:11.

8. Yini Pawula labese utjela lelibandla kutsi liyente?

⁸ Pawula watjela lelibandla watsi: “Kufanele nimtsetselele ngemusa futsi nimdvudvute” lomzalwane lowente liphutsa, futsi “nimcinisekise kutsi niyamtsandza.” Naka kutsi Pawula bekafuna kutsi lelibandla lingagcini nje ngekwemukela lendvodza kutsi iphindze ibe yincenye yelibandla. Bekafuna bayicinisekise lendvodza lephendvukile ngaloko labakushoko nalabakwentako kutsi bayicolele mbamba futsi bayayitsandza. Nabenta njalo, bebatawukwenta kucace kutsi bayayemukela ebandleni.

9. Yini lokungenteka yenta labanye bakutfola kumatima kumcolela lomzalwane lebesekaphendvukile?

⁹ Kungenteka yini kutsi labanye ebandleni bakutfola kumatima kwemukela lomzalwane lebesekaphendvukile kutsi aphindze abe yincenye yelibandla? LiBhayibheli alisho, kodvwa kungenteka. Ngetulu kwako konkhe, loko lendvodza lebeyikwentile bekulibangele tinkinga libandla lilonkhe futsi kungenteka bekuhlaze nalabanye ebandleni. Emalunga elibandla bekasebente kamatima kuze aphile ngekuvumelana nemitsetfo yaJehova. Ngako labanye bebeva shengatsi akusikahle kutsi umuntfu lowente sono lesibi kangaka avunyelwe kutsi aphindze abe yincenye yelibandla. (Catsanisa naLukha 15:28-30.) Kodvwa bekubaluleke ngani kutsi libandla limkhombise lutsandvo sibili lomzalwane lebesekabuyele ebandleni?

10-11. Yini lebeyingenteka kube labadzala belibandla bala kucolela lendvodza lebeyonile futsi seyiphendvukile?

¹⁰ Cabanga nje kutsi ngabe kwentekani kube labadzala belibandla bala kubuyisela lendvodza lephendvukile ebandleni nobe ngemuva kwekutsi seyibuyele, libandla lale kuyikhombisa lutsandvo. Beyingancotjwa “kuva buhlungu lobukhulu.” Beyingeva shengatsi ayiyuze iphindze ibe yincenye yelibandla. Mhlawumbe beyingayekela ngisho nekwetama kulungisa buhlobo bayo naNkulunkulu.

¹¹ Lokubi nakakhulu kutsi nangabe labazalwane nabodzadze kulelibandla bala kucolela lendvodza leyonile lephendvukile, bebatawube babeka buhlobo babo naJehova engotini. Kanjani? Ngenca yekutsi bebatawube bangamlingisi Jehova lobacolelako labo labente bubi labaphendvukako, kodvwa bebatawube balingisa Sathane lonelunya futsi lote umusa. Ecinisweni bebatawube bafana nemathulusi lasetjentiswa nguDeveli kuze ente lendvodza kutsi iyekele kukhonta Jehova.​—2 Khor. 2:10, 11; Ef. 4:27.

12. Libandla belingamlingisa njani Jehova?

¹² Ngako, libandla laseKhorinte belingamlingisa njani Jehova, hhayi Sathane? Ngekutsi lilingise Jehova endleleni leliphatsa ngayo labo labonile futsi labaphendvukile. Naka naku lokwashiwo ngulabanye babhali beliBhayibheli ngaJehova. Davide watsi ‘muhle futsi uhlale akulungele kutsetselela.’ (Hla. 86:5) Mikha wabhala watsi: “Ukhona yini Nkulunkulu lofana nawe, Nkulunkulu locolela tono futsi atsetselele emaphutsa?” (Mik. 7:18) Na-Isaya watsi: “Umuntfu lomubi akashiye indlela yakhe, nalokhohlakele akayekele imicabango yakhe; akabuyele kuJehova lotawuba nemusa kuye, abuyele kuNkulunkulu wetfu ngobe utamtsetselela ngekukhululeka lokukhulu.”​—Isa. 55:7.

13. Bekukuhle ngani kutsi lendvodza lephendvukile ibuyiselwe ebandleni? (Buka libhokisi lelitsi “Lendvodza YaseKhorinte Yabuyiselwa Nini?”)

¹³ Kuze libandla laseKhorinte lilingise Jehova, bekufanele liyemukele lendvodza lephendvukile futsi liyicinisekise ngekutsi liyayitsandza. Ngekulandzela sicondziso saPawula sekwemukela lendvodza lephendvukile, lelibandla lakhombisa kutsi ‘liyalalela kuto tonkhe tintfo.’ (2 Khor. 2:9) Kuliciniso kutsi bekumane nje kuphele tinyanga letimbalwa lendvodza isusiwe ebandleni, kodvwa lesijeziso sayenta kutsi iphendvuke. Ngako bekute sizatfu sekutsi kutsatfwe sikhatsi ngaphambi kwekutsi lendvodza ibuyiselwe ebandleni.

SINGAWULINGISA NJANI UMUSA WAJEHOVA NEKULUNGA KWAKHE?

14-15. Ngutiphi tifundvo lesititfolako kuloko lokwenteka eKhorinte? (2 Phetro 3:9) (Buka nesitfombe.)

¹⁴ Loko lokwenteka ebandleni laseKhorinte kwabhalwa futsi kwagcinwa eBhayibhelini kuze “kufundzise tsine.” (Rom. 15:4) Kulendzaba, sifundza kutsi Jehova akavumi kutsi labo labente bubi lobukhulu futsi bangaphendvuki bavunyelwe kutsi bachubeke bayincenye yelibandla. Ute umbono wekutsi labo labente bubi futsi bangaphendvuki kufanele babonelelwe ngekutsi bavunyelwe kutsi bachubeke batihlanganisa netikhonti takhe letetsembekile. Jehova unemusa kodvwa akayekeleli; timiso takhe talokulungile nalokungakalungi atishintji. (Juda 4) Kwenta njalo bekungeke kukhombise kutsi unemusa ngobe loko bekutalifaka engotini lonkhe libandla.​—Taga 13:20; 1 Khor. 15:33.

¹⁵ Nobe kunjalo, sifundza kutsi Jehova akafisi kutsi kubhubhe ngisho namunye. Ufuna kutsi bonkhe bantfu basindziswe nakungenteka. Ubakhombisa umusa bantfu labashintjako futsi labafuna kulungisa buhlobo babo naye. (Hez. 33:11; fundza 2 Phetro 3:9.) Ngako, ngesikhatsi lendvodza yaseKhorinte iphendvuka futsi iyekela kwenta lokubi, Jehova wasebentisa Pawula kuze achazele lelibandla kutsi lendvodza kufanele icolelwe futsi ibuyiselwe ebandleni.

16. Utiva njani nawucabanga ngaloko lokwenteka kulendvodza yaseKhorinte?

¹⁶ Loko lokwenteka eKhorinte kusente sabona kutsi Jehova unelutsandvo, ulungile futsi wehlulela kahle. (Hla. 33:5) Loko akukwenti yini kutsi ufune kumdvumisa kakhulu Nkulunkulu wetfu? Ngetulu kwaloko, sonkhe siyona futsi siyakudzinga kucolelwa nguye. Ngamunye wetfu unesizatfu sekumbonga Jehova ngenhlawulo leyenta kutsi sicolelwe. Kusidvudvuta kakhulu futsi kuyasicinisekisa kwati kutsi Jehova ubatsandza mbamba bantfu bakhe futsi ubafunela lokuhle.

17. Yini lesitawucoca ngayo etihlokweni letilandzelako?

¹⁷ Yini lokufanele yentiwe lamuhla nangabe lotsite ente sono lesikhulu? Labadzala belibandla bangamlingisa njani Jehova lofuna kusita lowente bubi kutsi aphendvuke? Libandla kufanele lente njani nangabe labadzala belibandla bancuma kususa lotsite ebandleni nobe bancuma kumbuyisela ebandleni? Sitawucoca ngalemibuto etihlokweni letilandzelako.