Uyatinaka Yini Tecwayiso?

1. Yini Jesu latawuyenta ngekushesha?

SIPHILA esikhatsini lapho khona kwenteka lushintjo lolukhulu! Ngekushesha, Jesu utawehlulela wonkhe muntfu lophilako. Ngesikhatsi Jesu achaza sikhatsi lesingaphambi kwekwehlulela, wanika bafundzi bakhe luphawu lolusiphrofetho ‘sekuba khona kwakhe nesekuphela kwetikhatsi.’ (Mat. 24:3) Lesiphrofetho sitfolakala kuMatewu sehluko 24 na-25 nakuMakho sehluko 13 nakuLukha sehluko 21.

2. Yini lesitawucoca ngayo, futsi kutasisita ngani?

² Jesu wasiniketa tecwayiso letilusito asebentisa imifanekiso lemitsatfu. Lokungumfanekiso wetimvu netimbuti, wetintfombi letihlakaniphile naletilibele newemathalenta. Umfanekiso ngamunye utasisita sibone kutsi loko umuntfu lakwentako kutayitsintsa njani indlela latawehlulelwa ngayo. Njengobe sitawube sicoca ngalemifanekiso, sitawubona kutsi ngutiphi tifundvo lesititfolako nekutsi singatisebentisa njani. Sitawucale sicoce ngemfanekiso wetimvu netimbuti.

TIMVU NETIMBUTI

3. Jesu utawubehlulela nini bantfu?

³ Emfanekisweni wetimvu netimbuti, Jesu watsi utawehlulela bantfu kuye ngaloko labakwentako nabeva tindzaba letimnandzi, nangekutsi babasekele yini bomnakabo labagcotjiwe. (Mat. 25:31-46) Loku utakwenta ‘ngekuhlupheka lokukhulu,’ ngaphambi nje kwekutsi kucale i-Amagedoni. (Mat. 24:21) Njengobe umelusi ehlukanisa timvu etimbutini, Jesu utawehlukanisa labo labasekele bomnakabo labagcotjiwe ngekwetsembeka kulabo labangakabasekeli.

4. Ngekusho kwa-Isaya 11:3, 4, yini lesenta siciniseke kutsi Jesu utawehlulela bantfu ngekulunga? (Buka lesisekhasini lekucala.)

⁴ Tiphrofetho teliBhayibheli tiyakhombisa kutsi Jesu, longumehluleli lokhetfwe nguJehova, utawehlulela ngekulunga. (Fundza Isaya 11:3, 4.) Unaka indlela bantfu labenta ngayo, labacabanga ngayo naloko labakushoko, lokufaka ekhatsi nendlela lababaphatsa ngayo banakabo labagcotjiwe. (Mat. 12:36, 37; 25:40) Utawati nekutsi bobani labasekele banakabo labagcotjiwe naloko labakwentile.a Lenye indlela lehamba embili labo labanjengetimvu labasekela ngayo banakaboKhristu kubasita emsebentini wekushumayela. Labo lababasekela ngalendlela batawehlulelwa ngekutsi ‘balungile’ futsi batawuba nelitsemba ‘lekuphila phakadze’ emhlabeni. (Mat. 25:46; Semb. 7:16, 17) Loyo ngumvuzo lomuhle sibili! Ngekuhlala betsembekile ngekuhlupheka lokukhulu nangemuva kwako, batawenta kutsi emagama abo achubeke abhaliwe “encwadzini yekuphila.”​—Semb. 20:15.

5. Ngusiphi sifundvo lesitfolakala emfanekisweni wetimvu kanye netimbuti futsi bobani lokufanele basinake?

⁵ Khombisa kutsi wetsembekile. Ngalokuyinhloko, umfanekiso waJesu wetimvu netimbuti ukhuluma ngalabo labanelitsemba lekuphila emhlabeni. Bakhombisa kutsi banekukholwa ngekusita banakaboKhristu emsebentini wekushumayela, nangekulalela ngekwetsembeka sicondziso selicembu lelincane lebanakaboKhristu leligcotjiwe, lokungulabo labakhetfwe nguJesu. (Mat. 24:45) Kodvwa nalabo labanelitsemba lekuphila ezulwini kufanele basinake secwayiso lesikulomfanekiso. Ngasiphi sizatfu? Ngobe Jesu uyakunaka loko labakwentako, labakucabangako nalabakukhulumako. Nabo kufanele bakhombise kutsi betsembekile. Ecinisweni, Jesu wakhuluma nangaleminye imifanekiso lemibili lenetecwayiso, lecondziswe kubantfu labagcotjiwe. Lemifanekiso iyatfolakala kuMatewu sehluko 25. Nyalo asesicoce ngemfanekiso wetintfombi letihlakaniphile naletilibele.

TINTFOMBI LETIHLAKANIPHILE NALETILIBELE

6. Tintfombi letisihlanu tikhombise njani kutsi tihlakaniphile? (Matewu 25:6-10)

⁶ Emfanekisweni wetintfombi, Jesu wakhuluma ngetintfombi letilishumi letahlangabeta umkhwenyane. (Mat. 25:1-4) Tonkhe betifuna kuba naye edzilini lemshado. Jesu wachaza letisihlanu tato watsi ‘tihlakaniphile’ kantsi leletinye letisihlanu watichaza ngekutsi ‘tilibele.’ Letintfombi letihlakaniphile betilungele futsi tiphapheme. Betikulungele kumela umkhwenyane, kungenandzaba kutsi kungaba sikhatsi lesingakanani, ngisho nobe bekangafika ebusuku kakhulu. Ngako teta netibani kuze tikhanyise ebusuku. Taphatsa ngisho nemafutsa lebetitawasebentisa nakungenteka umkhwenyane ephute. Ngako betilungele kuze tibani tato tihlale tivutsa. (Fundza Matewu 25:6-10.) Ngesikhatsi umkhwenyane efika, letintfombi letihlakaniphile tangena naye edzilini lemshado. Ngendlela lefanako, emaKhristu lagcotjiwe lakhombisa kutsi ahlale aphapheme futsi etsembekile kuze kufike Khristu, atawehlulelwa ngekutsi akulungele kuba nemkhwenyane lokunguJesu embusweni wakhe wasezulwini.b (Semb. 7:1-3) Kodvwa kutsiwani ngaletintfombi letisihlanu letilibele?

7. Yini leyenteka etintfombini letisihlanu letilibele futsi ngasiphi sizatfu?

⁷ Ngalokwehlukile kuletintfombi letihlakaniphile, tintfombi letisihlanu letilibele betingakalungeli ngesikhatsi umkhwenyane afika. Tibane tato besetitawucisha, futsi betingakawaphatsi lamanye emafutsa. Tatsi nativa kutsi umkhwenyane sewutawufika, tahamba tayotsenga emafutsa. Betisengakabuyi ngesikhatsi umkhwenyane afika. Ngaleso sikhatsi, “letintfombi lebesetimlindzele tangena naye edzilini lemshado, ngemuva kwaloko umnyango wavalwa.” (Mat. 25:10) Tatsi letintfombi letilibele natibuya futsi setifuna kungena, umkhwenyane watsi kuto: “Anginati.” (Mat. 25:11, 12) Letintfombi betingakakulungeli kulindzela umkhwenyane ngisho nobe bekangafika ngasiphi sikhatsi. Yini labagcotjiwe labangayifundza kuloku?

8-9. Ngusiphi sifundvo labagcotjiwe labangasifundza emfanekisweni wetintfombi? (Buka nesitfombe.)

⁸ Khombisa kutsi ulungele futsi uphapheme. Jesu bekangasho kutsi kutawuba nemacembu lamabali alabagcotjiwe, lokungulabo labahlala balungele kuze kube sekupheleni kwalelive nalabo labangakakulungeli. Kunaloko bekachaza loko lokutawenteka kulabagcotjiwe nangabe bangakakulungeli kucinisela kuze kube sekupheleni. Nabangakwenti loko, bebangeke bawutfole umvuzo wabo. (Joh. 14:3, 4) Leyo bekuyintfo lebeyitawenteka mbamba! Ngisho nobe litsemba letfu lilekuphila ezulwini nobe emhlabeni, sonkhe kufanele sisinake lesecwayiso lesikulomfanekiso wetintfombi. Ngamunye wetfu, kufanele ahlale alindzile futsi alungele, acinisele kuze kube sekupheleni.​—Mat. 24:13.

⁹ Ngemuva kwekutsi Jesu asho umfanekiso wetintfombi kuze agcizelele kubaluleka kwekuhlala silungele futsi siphapheme, wabese usho umfanekiso wemathalenta. Lomfanekiso uveta kutsi kubalulekile kutsi sikhutsale.

EMATHALENTA

10. Tisebenti letimbili takhombisa njani kutsi tetsembekile? (Matewu 25:19-23)

¹⁰ Emfanekisweni wemathalenta, Jesu wakhuluma ngetisebenti letimbili letetsembekile enkhosini yato nasinye sisebenti lesingaketsembeki. (Mat. 25:14-18) Letisebenti letimbili takhombisa kutsi tetsembekile ngekutsi tisebente kamatima kuze titalise imali yenkhosi yato. Ngaphambi kwekutsi lenkhosi iye eveni lelikhashane, yatinika emathalenta, lokuyimali lenyenti kakhulu. Letisebenti letimbili letetsembekile betikhutsele futsi tayisebentisa kahle lemali. Waba yini umphumela? Ngesikhatsi inkhosi yato ibuya, besetiyitalise ngalokuphindvwe kabili. Inkhosi yato yatincoma, futsi ‘tajabula kanye nayo.’ (Fundza Matewu 25:19-23.) Kwentekani kulesisebenti sesitsatfu? Yini lesayenta ngalemali lesanikwa yinkhosi yaso?

11. Yini leyenteka kulesisebenti lesivilaphako, futsi ngasiphi sizatfu?

¹¹ Sisebenti sesitsatfu sanikwa lithalenta linye kodvwa ‘besivilapha.’ Inkhosi yaso beyilindzele kutsi ilisebentise kahle lelithalenta. Kunekutsi yente njalo, yalimbela phasi. Ngesikhatsi inkhosi yaso ibuya yasiniketa lelithalenta linye. Lesisebenti besingacabangi ngendlela lefanele. Kunekutsi sicolise ngobe sehlulekile kutalisa lelithalenta, sabita lenkhosi ngekutsi ‘yindvodza lenelulaka.’ Lenkhosi ayizange isemukele lesisebenti. Ngetulu kwaloko, samukwa lelithalenta futsi sacoshwa endlini yalenkhosi.​—Mat. 25:24, 26-30.

12. Timelela bobani lamuhla tisebenti letimbili letetsembekile?

¹² Tisebenti letimbili letetsembekile timelela emaKhristu lagcotjiwe. Inkhosi yawo, lokunguJesu, iwamema kutsi ‘ajabule kanye nayo.’ Atfola umvuzo wawo wasezulwini, lokukuvuswa kwekucala. (Mat. 25:21, 23; Semb. 20:5b) Kantsi ngakulokunye, sibonelo lesibi sesisebenti lesivilaphako sisecwayiso kumaKhristu lagcotjiwe. Ngayiphi indlela?

13-14. Ngusiphi sifundvo labagcotjiwe labangasifundza emfanekisweni wemathalenta? (Buka nesitfombe.)

¹³ Khombisa kutsi ukhutsele futsi usebenta ngekutimisela. Njengasemfanekisweni wetintfombi, nakulomfanekiso wemathalenta, Jesu bekangasho kutsi labagcotjiwe batawuvilapha. Kunaloko bekachaza loko lokutawenteka nabaphelelwa ngumdlandla wabo. Bebangeke bachubeke betsembekile ‘njengobe babitiwe futsi bakhetsiwe,’ futsi bebangeke bavunyelwe kutsi bangene eMbusweni welizulu.​—2 Phet. 1:10.

¹⁴ Umfanekiso waJesu wetintfombi nemathalenta, ukwenta kucace kutsi onkhe emaKhristu lagcotjiwe kufanele ahlale alungele, aphapheme akhutsele futsi asebente ngekutimisela. Kodvwa kukhona yini lokunye Jesu lakusho kuze ecwayise labagcotjiwe? Yebo, lesecwayiso singasitfola kuloko Jesu lakusho kuMatewu 24:40, 41.

BOBANI ‘LABATAWUTSATFWA’?

15-16. Emavi lakuMatewu 24:40, 41 akhombisa njani kutsi labagcotjiwe kufanele bahlale balindzile?

¹⁵ Ngaphambi kwekutsi Jesu asho lemifanekiso lemitsatfu, wachaza ngekwehlulelwa kwekugcina kwalabagcotjiwe, lebekutawukhombisa kutsi bobani labemukelwako. Wakhuluma ngemadvodza lamabili lasebenta ensimini, nebafati lababili labasila etjeni. Kulamadvodza lamabili nakulabafati lababili lababonakala benta umsebenti munye, Jesu watsi “munye utawutsatfwa, kodvwa lomunye ashiywe.” (Fundza Matewu 24:40, 41.) Wabese ukhutsata balandzeli bakhe watsi: “Ngako-ke hlalani nilindzile ngobe anilati lilanga iNkhosi yenu letawufika ngalo.” (Mat. 24:42) Jesu washo lokufanako ngemuva kwekukhuluma ngemfanekiso wetintfombi. (Mat. 25:13) Loko lakusho kuyahambisana yini? Kubonakala kanjalo. Ngulabagcotjiwe labatsembekile kuphela ‘labatawutsatfwa,’ bemukelwe nguJesu eMbusweni welizulu.​—Joh. 14:3.

¹⁶ Khombisa kutsi ulindzile. Nobe ngubani logcotjiwe longahlali alindzile angeke ahlanganiswe ‘nalabakhetsiwe.’ (Mat. 24:31) Ecinisweni, bonkhe bantfu baNkulunkulu ngisho nobe banelitsemba lekuphila ezulwini nobe emhlabeni, kufanele batsatse lamavi aJesu njengesecwayiso sekutsi bahlale balindzile futsi bahlale betsembekile.

17. Yini leyenta kungadzingeki sikhatsateke ngekutsi Jehova ukhetsa kubagcoba nini ngemoya wakhe labanye labetsembekile?

¹⁷ Sesimati kahle Jehova, ngako siyayetsemba indlela lehlulela ngayo. Asikhatsateki nangabe akhetsa kugcoba labanye labetsembekile emalangeni etfu.c Sikhumbula loko Jesu lakusho ngetisebenti letacala kusebenta nasekuyawushaya insimbi yesihlanu ntsambama emfanekisweni wakhe wensimu yemagilebisi. (Mat. 20:1-16) Labo lababitwa kutsi bayosebenta ntsambama batfola umholo lolinganako nalabo labacala kusebenta ekuseni. Ngendlela lefanako, ngisho nobe bagcotjwa nini, batawutfola umvuzo wabo nangabe betsembekile.

NAKA TECWAYISO

18-19. Ngutiphi tifundvo netecwayiso lesifundze ngato?

¹⁸ Yini lesesiyifundzile? Kulabo labanelitsemba lekuphila phakadze emhlabeni, umfanekiso wetimvu netimbuti uveta kubaluleka kwekuhlala betsembekile kuJehova nyalo nangekuhlupheka lokukhulu lokutako. Ngaleso sikhatsi, Jesu utawehlulela labetsembekile atsi ‘abatfole kuphila lokuphakadze.’​—Mat. 25:46.

¹⁹ Siphindze safundza ngemifanekiso lemibili leyecwayisa labagcotjiwe. Emfanekisweni waJesu wetintfombi letihlakaniphile naletilibele, letisihlanu takhombisa kutsi tihlakaniphile. Betilungele futsi tiphapheme, tikulungele kulindza umkhwenyane ngisho nobe loko bekungatsatsa sikhatsi lesidze kangakanani. Kodvwa tintfombi letilibele betingakakulungeli. Ngako umkhwenyane wala kutsi tingene edzilini lemshado wakhe. Ngako natsi kufanele sikulungele kulindza ngisho nobe kungatsatsa sikhatsi lesidze kangakanani kutsi Jesu aletse kuphela kwalelive. Ngetulu kwaloko, emfanekisweni waJesu wemathalenta, sicoce ngetisebenti letimbili letetsembekile lebetikhutsele futsi tisebenta ngekutimisela. Tayisebentela kamatima inkhosi yato futsi yatemukela. Nobe kunjalo, ayizange isemukele sisebenti lesivilaphako. Yini lesiyifundzako? Kufanele sihlale simatasa emsebentini waJehova kuze kube sekugcineni. Sibese sifundza ngaloko labagcotjiwe labangakwenta kuze bahlale balindzile, kuze batsatfwe nguJesu bayotfola umvuzo wabo wasezulwini. Bakubuke ngalabovu ‘kuhlanganiswa ndzawonye’ nguJesu ezulwini. Ngemuva kwemphi ye-Amagedoni, batawuba ngumakoti waJesu emshadweni weliWundlu.​—2 Thes. 2:1; Semb. 19:9.

20. Yini Jehova latawuyentela labo labatawulalela tecwayiso takhe?

²⁰ Ngisho nobe sikhatsi sekwehlulelwa sisondzela ngekushesha, akukafaneli sesabe. Nangabe sihlala setsembekile, Babe wetfu wasezulwini lositsandzako utasinika “emandla lamakhulu kakhulu” kuze ‘sikhone kuma embikweNdvodzana yemuntfu.’ (2 Khor. 4:7; Luk. 21:36) Ngisho nobe sinelitsemba lekuphila ezulwini nobe emhlabeni, sitawujabulisa Babe wetfu nangabe silalela letecwayiso letisemfanekisweni waJesu. Ngemusa waJehova lomkhulu kakhulu, emagama etfu ‘atawutfolakala abhaliwe encwadzini’ yekuphila.​—Dan. 12:1; Semb. 3:5.