Fundza Kucabanga NjengaJehova NaJesu

1-2. Kusho kutsini kutsandza Jehova, futsi Jesu wakhombisa njani kutsi uyamtsandza?

“KUFANELE utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangawo onkhe emandla akho, nangayo yonkhe ingcondvo yakho.” (Luk. 10:27) Jesu wakwenta kwacaca kutsi lona ngumtsetfo lobaluleke kakhulu eMtsetfweni waMosi. Naka kutsi kufanele sitsandze Jehova ngenhlitiyo yetfu, lokufaka ekhatsi loko lesikufisako nendlela lesitiva ngayo. Siphindze simtsandze ngemphefumulo wetfu wonkhe nangemandla etfu. Nanobe kunjalo, siphindze sitsandze Jehova ngengcondvo yetfu, lokufaka ekhatsi indlela lesicabanga ngayo. Kuliciniso kutsi angeke sikhone kuyicondza ngalokuphelele indlela Jehova lacabanga ngayo. Kodvwa singayicondza kancono indlela Nkulunkulu lacabanga ngayo ngekutsi sifundze “imicabango yaKhristu” ngobe Jesu wayiveta kahle kakhulu indlela Babe wakhe bekacabanga ngayo.​—1 Khor. 2:16.

² Jesu bekatsandza Jehova ngengcondvo yakhe yonkhe. Bekati kutsi yini Nkulunkulu bekafuna ayente futsi bekatimisele kukwenta loko ngisho nobe bekungadzingeka ahlupheke kuze akhone kwenta lokulungile. Ngenca yekutsi Jesu bekanake kakhulu kwenta intsandvo yaBabe wakhe, akazange avume kutsi kube khona lokumphazamisako kuze ente loko.

3. Yini umphostoli Phetro layifundza kuJesu, futsi wakhutsata emaKhristu kutsi enteni? (1 Phetro 4:1)

³ Phetro kanye nalabanye baphostoli baba nelitfuba lelihle lekucitsa sikhatsi naJesu nelekufundza endleleni lebekacabanga ngayo. Ngesikhatsi Phetro abhala incwadzi yakhe yekucala lephefumulelwe, wakhutsata emaKhristu kutsi acabange njengaKhristu. (Fundza 1 Phetro 4:1.) Ngesikhatsi Phetro abhala atsi: “Hlomani,” wasebentisa ligama lelichaza emasotja lahlome ngetikhali lalungele imphi. Ngako nangabe emaKhristu alingisa indlela Jesu bekacabanga ngayo, atawuhloma ngesikhali lesinemandla njengobe alwa netifiso letimbi kanye nalelive lelibi lelibuswa nguSathane.​—2 Khor. 10:3-5; Ef. 6:12.

4. Lesihloko singasisita njani kutsi sente loko lokwashiwo nguPhetro?

⁴ Kulesihloko, sitawucoca ngendlela Jesu lebekacabanga ngayo futsi sibone kutsi singayilingisa njani. Sitawutfola kutsi (1) singayilingisa njani indlela Jehova lacabanga ngayo, lokutasisita kutsi sicabange ngekuvumelana, (2) sitfobeke, futsi (3) sibe nengcondvo lebhadlile ngekutsi setsembele kuJehova ngekuthantaza.

CABANGA NJENGAJEHOVA

5. Ngalelinye lilanga Phetro wehluleka njani kucabanga njengaJehova?

⁵ Cabanga ngalesikhatsi Phetro ehluleka kucabanga njengaJehova. Jesu watjela baphostoli bakhe kutsi bekufanele aye eJerusalema, anikelwe kubaholi benkholo, aphatfwe kabi futsi abulawe. (Mat. 16:21) Kungenteka Phetro wakutfola kumatima kwemukela kutsi Jehova bekangavumela Jesu lebekalitsemba lema-Israyeli futsi anguMesiya kutsi abulawe. (Mat. 16:16) Ngako Phetro wabitela Jesu eceleni watsi: “Nkhosi, bani nemusa kuwe; loku ngeke kwenteke kuwe.” (Mat. 16:22, umbhalo longentasi) Jesu naPhetro abazange bavumelane kulendzaba ngobe Phetro bekangacabangi ngendlela Jehova bekacabanga ngayo.

6. Jesu wakhombisa njani kutsi bekacabanga njengaJehova?

⁶ Indlela Jesu bekacabanga ngayo beyifana ncamashi nendlela Babe wakhe wasezulwini bekacabanga ngayo. Jesu watjela Phetro watsi: “Suka Sathane! Usikhubekiso kimi, ngobe awucabangisi kwaNkulunkulu kodvwa ucabangisa kwebantfu.” (Mat. 16:23) Kungenteka Phetro bekanetizatfu letinhle tekusho loko, kodvwa Jesu akazange asitsatse leseluleko sakhe. Kunesifundvo lesisitfolako kulendzaba. Jesu bekati kutsi kuze ente intsandvo yaJehova, bekufanele aphatfwe kabi futsi afe. Ngaleso sikhatsi, Phetro wafundza sifundvo lesibalulekile sekutsi kufanele acabange njengaNkulunkulu.

7. Ngekuhamba kwesikhatsi, Phetro wakhombisa njani kutsi besekafuna kucabanga ngendlela Jehova lacabanga ngayo? (Buka sitfombe lesisekhasini lekucala.)

⁷ Ngekuhamba kwesikhatsi, Phetro wakhombisa kutsi besekafuna kucabanga ngendlela Jehova lacabanga ngayo. Besesifikile sikhatsi sekutsi labo labangasiwo emaJuda babe yincenye yebantfu baNkulunkulu. Phetro waniketwa umsebenti wekushumayela Khoneliyuse lebekangasuye umJuda, lebekatawuba semkhatsini walelicembu lekucala lalabantfu baNkulunkulu. EmaJuda bekangatihlanganisi nebantfu betive, ngako akumangalisi kutsi Phetro bekudzingeka ashintje indlela lacabanga ngayo kuze akhone kwenta lomsebenti bekanikwe wona. Ngesikhatsi sekayicondza intsandvo yaNkulunkulu kulendzaba, wayishintja indlela lebekacabanga ngayo. Ngenca yaloko, ngesikhatsi atfunywa, waya lapho atfunywe khona ‘wangangabati.’ (Imis. 10:28, 29) Washumayela Khoneliyuse kanye nemndeni wakhe, futsi babhajatiswa.​—Imis. 10:21-23, 34, 35, 44-48.

8. Singakhombisa njani kutsi indlela lesicabanga ngayo ivumelana nendlela Jehova lacabanga ngayo? (1 Phetro 3:8)

⁸ Ngemuva kweminyaka, Phetro wakhutsata emaKhristu labekanye nawo kutsi ‘acabange ngekuvumelana.’ (Fundza 1 Phetro 3:8.) Njengobe sibantfu baJehova singacabanga ngekuvumelana ngekutsi sicabange ngendlela Jehova lacabanga ngayo njengobe ivetiwe eVini lakhe. Sibonelo nje, Jesu wakhutsata balandzeli bakhe kutsi babeke kucala uMbuso waNkulunkulu ekuphileni kwabo. (Mat. 6:33) Analoko engcondvweni, ummemeteli ebandleni angahle ancume kungenela umsebenti wasikhatsi sonkhe. Kunekutsi sitsi kungaba njani aticabangele, kufanele sikhulume kahle ngalomgomo wakhe futsi simsekele.

TFOBEKA

9-10. Jesu wakukhombisa njani kutfobeka lokumangalisako?

⁹ Ngebusuku lobungaphambi kwekutsi Jesu abulawe, wafundzisa Phetro kanye nalabanye baphostoli sifundvo lesibalulekile lesimayelana nekutfobeka. Ngaphambi kwaloko, Jesu bekatfume boPhetro naJohane kutsi bayolungisa tintfo lebetitawudzingeka kuze balungele kuba nesidlo sekugcina naye asengakabulawa. Kungenteka letintfo lebekufanele batilungise betifaka ekhatsi indishi nemathawula lebekutawusetjentiswa ngulabo labamenywe kulesidlo kuze bagezwe tinyawo ngaphambi kwekutsi badle. Kodvwa ngubani lebekatawenta lomsebenti lebewubukelwa phansi kangaka?

¹⁰ Jesu wakhombisa kutfobeka lokumangalisako ngaphandle kwekucabanga kabili. Baphostoli bakhe bamangala kakhulu nabambona enta intfo lebeyivame kwentiwa sisebenti. Wakhumula ingubo yakhe yangetulu, wabopha lithawula elukhalo, wafaka emanti endishini futsi wacala kugeza tinyawo tabo. (Joh. 13:4, 5) Kungenteka kwamtsatsa sikhatsi kugeza tinyawo tabo bonkhe labaphostoli labangu-12, lokufaka ekhatsi taJudasi lebekatamtsengisa. Nanobe kunjalo, ngekutfobeka, Jesu wawenta lomsebenti. Ngemuva kwaloko, ngesineke, wachaza watsi: “Niyakucondza yini loku lengikwente kini? Nine ningibita ngekutsi: ‘Mfundzisi,’ nangekutsi: ‘Nkhosi,’ futsi nisuke nicinisile ngobe nginguloko. Ngako-ke nangabe mine nanobe ngiyiNkhosi neMfundzisi, nginigeze tinyawo, nani kufanele nigezane tinyawo.”​—Joh. 13:12-14.

11. Phetro wakhombisa njani kutsi bekakufundzile kutfobeka? (1 Phetro 5:5) (Buka nesitfombe.)

¹¹ Phetro wafundza endleleni Jesu bekatfobeke ngayo. Ngemuva kwekutsi Jesu abuyele ezulwini, Phetro wenta simangaliso ngekutsi elaphe indvodza leyatalwa ingakhoni kuhamba. (Imis. 1:8, 9; 3:2, 6-8) Lesimangaliso sadvonsa bantfu labanyenti lebebafuna kutibonela. (Imis. 3:11) Phetro bekatatishaya sifuba yini ngaloko bekakwentile, ikakhulukati ngobe wakhulela endzaweni lapho kubaluleka nesikhundla kuyintfo lehanjiswa embili? Cha, ngekutfobeka Phetro wenta kutsi kudvunyiswe labo labafanele, lokunguJehova naJesu, watsi: “Ngelibito [laJesu], nangekukholwa kwetfu kulo, lomuntfu lenimbonako nalenimatiko sewunikwe emandla.” (Imis. 3:12-16) Emavi Phetro lawasebentisa encwadzini layibhalela emaKhristu lamayelana nesidzingo sekufundza kutfobeka kungenteka asikhumbute ngalesikhatsi Jesu abopha lithawula elukhalo lwakhe futsi wageza tinyawo tebaphostoli.​—Fundza 1 Phetro 5:5.

12. NjengaPhetro, singachubeka njani sifundza kutfobeka?

¹² Singasilingisa sibonelo saPhetro sekufundza kutfobeka. Khumbula kutsi kutfobeka mbamba kusho lokungetulu nje kwekukhuluma emagama lakahle. Ligama lelasetjentiswa nguPhetro lifaka ekhatsi loko lesikucabangako ngatsi nangalabanye. Sentela labanye tintfo ngobe siyamtsandza Jehova futsi siyabatsandza bantfu, hhayi ngobe sifuna kudvunyiswa. Nangabe sentela Jehova kanye nebazalwane betfu nobe ngabe yini lesikhona kuyenta ngisho nobe labanye bangakuboni loko lesikwentako, sikhombisa kutsi sitfobekile.​—Mat. 6:1-4.

BANI “NENGCONDVO LEBHADLILE”

13. Chaza kutsi kusho kutsini kuba “nengcondvo lebhadlile.”

¹³ Kusho kutsini kuba “nengcondvo lebhadlile”? (1 Phet. 4:7) UmKhristu lonengcondvo lebhadlile wenta konkhe langakwenta kuze ente tincumo letikahle letikhombisa kutsi ucabanga njengaJehova. Uyati kutsi kute intfo lebaluleke kakhulu kwendlula buhlobo bakhe naJehova. Akatiboni abaluleke kakhulu, futsi uyati kutsi akati konkhe. Ukhombisa kutsi wetsembele kuJehova ngekutsi ahlale athantaza kuye, acele kutsi amcondzise.a

14. Ngalelinye lilanga Phetro wehluleka njani kwetsembela kuJehova?

¹⁴ Ngebusuku lobungaphambi kwekufa kwaJesu, wecwayisa bafundzi bakhe watsi: “Kulobusuku balamuhla, nonkhe nitangishiya.” Ngesibindzi Phetro waphendvula: “Ngisho nobe bonkhe laba labanye bangakushiya, mine angeke ngize ngikushiye!” Ngalobo busuku Jesu weluleka labanye bafundzi bakhe watsi: “Hlalani nilindzile futsi nichubeke nithantaza.” (Mat. 26:31, 33, 41) Kube Phetro wasilalela leseluleko, kungenteka bekatawuba naso sibindzi sekuvuma kutsi ungumfundzi waJesu. Kunaloko, Phetro wayiphika iNkhosi yakhe, lokwenta kutsi atisole kakhulu.​—Mat. 26:69-75.

15. Yini leyasita Jesu kutsi ahlale anengcondvo lebhadlile ngebusuku bakhe bekugcina?

¹⁵ Jesu wetsembela ngalokuphelele kuJehova. Ngisho nobe bekete sono, kepha bekahlala athantaza. Loko kwamniketa sibindzi sekutsi ente intsandvo yaJehova. (Mat. 26:39, 42, 44; Joh. 18:4, 5) Kungenteka kwamtsintsa kuphila kwakhe konkhe Phetro kubona Jesu athantaza tikhatsi letinyenti.

16. Phetro wakhombisa njani kutsi besekanengcondvo lebhadlile? (1 Phetro 4:7)

¹⁶ Ngekuhamba kwesikhatsi, Phetro wafundza kwetsembela kakhulu kuJehova ngekuthantaza. Jesu lebesekavusiwe wacinisekisa Phetro nalalabanye baphostoli kutsi batawutfola umoya longcwele kuze bakhone kwenta umsebenti wekushumayela. Nanobe kunjalo, wabacela kutsi balindze eJerusalema kuze kube ngulapho batfola umoya longcwele. (Luk. 24:49; Imis. 1:4, 5) Yini Phetro layenta njengobe bakasalindzile? Phetro kanye nemaKhristu lebekanawo “bebaphikelela ngebunye emthantazweni.” (Imis. 1:13, 14) Ngekuhamba kwesikhatsi, encwadzini yakhe yekucala, Phetro wakhutsata emaKhristu labekanye nawo kutsi abe nengcondvo lebhadlile futsi etsembele kuJehova ngekuthantaza. (Fundza 1 Phetro 4:7.) Phetro wafundza kwetsembela kuJehova futsi waba yinsika yelibandla.​—Gal. 2:9.

17. Yini lokufanele sichubeke siyenta ngisho nobe sinemakhono latsite ngekwemvelo? (Buka nesitfombe.)

¹⁷ Kuze sibe nengcondvo lebhadlile, kufanele sihlale sithantaza kuJehova. Ngisho nobe sinemakhono latsite ngekwemvelo, kufanele sihlale sithantaza kuJehova. Ngako kufanele sihlale sithantaza sicele asicondzise ikakhulukati nakufanele sente tincumo letibalulekile, setsemba kutsi uyakwati loko lokusilungelako.

18. Singakufundza njani kucabanga njengaJehova?

¹⁸ Sijabula kakhulu ngekutsi Jehova usidale ngendlela yekutsi sikhone kukhombisa buntfu bakhe. (Gen. 1:26) Kuliciniso kutsi angeke sikhone kumlingisa ncamashi Jehova. (Isa. 55:9) Nanobe kunjalo, njengaPhetro, singakhona kufundza kucabanga njengaJehova. Shengatsi singakwenta loko ngekutsi sichubeke sicabanga ngendlela Nkulunkulu lacabanga ngayo, sitfobeke futsi sibe nengcondvo lebhadlile.