Nine Bazalwane Lenisebasha, Lingisani Makho NaThimothi

1-2. Ngutiphi tintfo lebetingavimba Makho naThimothi kutsi basite labanye ngalokugcwele?

NINE bazalwane lenisebasha, niyafuna yini kwenta lokunyenti emsebentini waJehova futsi nibe lusito kakhulu kulabo labasemabandleni lenikuwo? Siyati kutsi niyafuna. Sijabula kakhulu kubona bazalwane labanyenti labasebasha labafuna kusita labanye! (Hla. 110:3) Nobe kunjalo, kungenteka nibhekane netinkinga. Uyangabata yini kwenta lokunyenti emsebentini waJehova ngenca yekutsi uyesaba? Uyesaba yini kwemukela tabelo ngenca yekutsi awutetsembi? Nangabe kunjalo, awusiwekucala kutiva ngalendlela.

² Makho naThimothi bebativa ngendlela lefanako. Kodvwa abazange bavumele kwesaba nobe kuba bete lwati ngemsebenti kubavimbe kutsi basite labanye. Kungenteka Makho bekahlala namakwakhe ekhaya lelime kahle ngesikhatsi acelwa ngumphostoli Pawula naBhanabasi kutsi ahambe nabo eluhambweni lwabo lwekucala lwetitfunywa telivangeli. (Imis. 12:12, 13, 25) Makho washiya indzawo lebekayetayele kuze ente lokunyenti emsebentini waJehova. Wacale waya e-Antiyokhi. Ngemuva kwaloko wahamba naPawula naBhanabasi baya kuletinye tindzawo letikhashane. (Imis. 13:1-5) Ngendlela lefanako, kungenteka Thimothi bekahlala nebatali bakhe ngesikhatsi acelwa nguPawula kutsi ashumayele naye. Njengobe bekasemncane futsi ete lwati ngalomsebenti, bekangakuvumela loko kumvimbe kutsi ente lomsebenti. (Catsanisa na-1 KubaseKhorinte 16:10, 11 kanye na-1 KuThimothi 4:12.) Nobe kunjalo, wavuma nakacelwa nguPawula, futsi loko kwenta watfola tibusiso letinyenti.​—Imis. 16:3-5.

3. (a) Pawula bekabatsandza kanganani boMakho naThimothi? (2 KuThimothi 4:6, 9, 11) (Buka netitfombe.) (b) Ngumiphi imibuto lesitawucoca ngayo kulesihloko?

³ Makho naThimothi batfola lwati lolunyenti kulomsebenti futsi bafundza kwenta imisebenti lebalulekile basebasha. Pawula bekawatsandza kakhulu lamajaha kangangekutsi ngekuhamba kwesikhatsi bekafuna kuba nawo ngesikhatsi abona kutsi sewutawufa. (Fundza 2 KuThimothi 4:6, 9, 11.) Ngubuphi buntfu lobenta Pawula wamtsandza Makho naThimothi? Bazalwane labasebasha bangabalingisa njani? Singabasita njani seluleko saPawula?

LINGISA MAKHO—SEBENTA KAMATIMA

4-5. Makho wakhombisa njani kutsi bekafuna kusita labanye?

⁴ Ngekusho kwalenye incwadzi, kuba sisebenti nobe kusita labanye, kusho kusebenta kamatima kuze ubasite ngisho nobe kungasimelula kwenta njalo. Makho wasibekela sibonelo lesihle kuloku. Ngesikhatsi Pawula ala kuhamba naye eluhambweni lwakhe lwesibili asitfunywa selivangeli, kungenteka Makho weva buhlungu futsi wadvumateka. (Imis. 15:37, 38) Kodvwa loko akuzange kumcedze emandla ekusita bazalwane bakhe nabodzadze.

⁵ Makho wavuma kuyoshumayela nemzala wakhe Bhanabasi kulenye indzawo. Ngemuva kweminyaka lengaba ngu-11, Makho bekasemkhatsini walabo labasita Pawula ngesikhatsi aboshwe kwekucala eRoma. (Flm. 23, 24) Ecinisweni, Pawula wabonga kakhulu ngelusito lalutfola kuMakho kangangekutsi watsi ‘uyindvudvuto lenkhulu’ kuye.​—Khol. 4:10, 11.

6. Kwamsita njani Makho kucitsa sikhatsi nemaKhristu lavutsiwe? (Buka umbhalo longentasi.)

⁶ Kwamsita Makho kucitsa sikhatsi nemaKhristu lavutsiwe. Ngemuva kwekucitsa sikhatsi naPawula eRoma, waya kumphostoli Phetro eBhabhulona. Baba nebudlelwane lobuhle kangangekutsi Phetro watsi: ‘Makho indvodzana yami.’ (1 Phet. 5:13) Njengobe basebenta ndzawonye, kungenteka Phetro wacocela lomngani wakhe losemusha tintfo letinyenti letijabulisako letimayelana nekuphila kwaJesu kanye nemsebenti wakhe futsi ngekuhamba kwesikhatsi Makho watibhala eVangelini lakhe.a

7. Lomunye umzalwane lokutsiwa nguSeung-Woo wasilingisa njani sibonelo saMakho? (Buka nesitfombe.)

⁷ Makho wachubeka amatasa emsebentini waJehova futsi wachubeka asondzelene nebazalwane labavutsiwe. Ungamlingisa njani Makho? Nangabe solo unganikwa umsebenti lebewufise kuwutfola ebandleni, beketela futsi uchubeke ufuna letinye tindlela longamsebentela ngato Jehova nalongalisita ngayo libandla. Cabanga ngaloko lokwenteka kuSeung-Woo, nyalo longulomdzala welibandla. Ngesikhatsi asemusha, bekavame kuticatsanisa nalabanye bazalwane labasebasha. Labanye babo bebatfola imisebenti letsite ebandleni kucala kunaye. Seung-Woo weva shengatsi akanakwa futsi ekugcineni wakhuluma nebazalwane labavutsiwe ngalendzaba. Lomunye lomdzala welibandla watsi kungaba njani ente konkhe langakhona kukwenta kuze asite labanye ngisho nobe loko lokuhle lakwentako kunganakwa. Leseluleko senta Seung-Woo kutsi asite lasebakhulile kanye nalabo labadzinga kwekuhamba nabaya emihlanganweni yelibandla. Nakabuka emuva, utsi: “Ngabese ngiyacondza kutsi kusho kutsini kusita labanye ngalokugcwele. Ngatfola injabulo ngenca yekusita labanye.”

LINGISA THIMOTHI—KHOMBISA KUTSI UYABAKHATSALELA LABANYE

8. Yini leyenta Pawula wakhetsa kuhamba naThimothi? (KubaseFiliphi 2:19-22)

⁸ Pawula bekadzinga kuhamba nebantfu labanesibindzi nakabuyela kulamadolobha lebekake waphatfwa kabi kuwo. Wacale wahamba naSilasi lebesekuphele iminyaka leminyenti akhonta Jehova. (Imis. 15:22, 40) Ngekuhamba kwesikhatsi wakhetsa naThimothi kutsi ahambe naye. Yini leyamenta wafuna kuhamba naThimothi? Lidvumela lakhe lelihle. (Imis. 16:1, 2) Ngetulu kwaloko bekabakhatsalela mbamba bantfu.​—Fundza KubaseFiliphi 2:19-22.

9. Thimothi wakhombisa njani kutsi bekabakhatsalela mbamba bazalwane bakhe nabodzadze?

⁹ Nakacala nje kushumayela naPawula, Thimothi wakhombisa kutsi bekabakhatsalela kakhulu labanye kunekutinaka yena. Kungako ngalesikhatsi Pawula ahamba eBheriya, bekati kutsi Thimothi bekatawusala abanakekela kahle bazalwane nabodzadze lebebasandza kucala kukhonta Jehova. (Imis. 17:13, 14) Siyaciniseka kutsi Thimothi wafundza lokunyenti kuSilasi kuleso sikhatsi njengobe naye bekasele eBheriya. Kodvwa ngekuhamba kwesikhatsi, Pawula watfumela Thimothi eThesalonika kutsi ayocinisa emaKhristu. (1 Thes. 3:2) Eminyakeni lengaba ngu-15 leyalandzela, Thimothi wafundza ‘kukhala nalabakhalako,’ futsi wakhombisa kutsi ubavela bonkhe labo lebebacindzetelekile. (Rom. 12:15; 2 Thim. 1:4) Bazalwane labasebasha bangamlingisa njani Thimothi?

10. Lomunye umzalwane lokutsiwa nguWoo Jae wakufundza njani kubakhatsalela kakhulu labanye?

¹⁰ Lomunye umzalwane lokutsiwa nguWoo Jae wafundza kukhombisa kutsi ubakhatsalela kakhulu labanye. Ngesikhatsi asemusha, Woo Jae bekakutfola kumatima kucoca nebazalwane nabodzadze lasebakhulile. Ngako eHholweni leMbuso bekavele ababingelele bese uyahamba. Lomunye lomdzala welibandla wakhutsata Woo Jae kutsi acale incociswane ngekutsi abatjela loko lakutsandzako ngabo. Lomzalwane wamkhutsata nekutsi acabange ngaloko lolomunye umuntfu langatsandza kucoca ngako. Woo Jae wasisebentisa leseluleko nakacoca nalabanye. Lamuhla, Woo Jae ungulomdzala welibandla futsi utsi: “Nyalo sengikutfola kumelula kucoca nebantfu bebudzala lobehlukahlukene. Ngiyajabula ngekutsi sengikucondza kancono loko lokukhatsata bantfu. Loko kwente ngakhona kuba lusito lolukhulu kubazalwane bami nabodzadze.”

11. Bazalwane labasebasha bangakufundza njani kuba nendzaba nalabanye ebandleni? (Buka nesitfombe.)

¹¹ Nine bazalwane labasebasha, nani ningakhombisa kutsi ninendzaba nalabanye. Nanisemihlanganweni, banini nendzaba nebazalwane nabodzadze bebudzala lobehlukahlukene futsi labakhule ngetindlela letingafani. Babute kutsi banjani, futsi ubalalelisise. Loko kungakusita ubone kutsi ungabasita njani. Mhlawumbe utawutfola kutsi kunalabashadene lasebakhulile labadzinga lusito lwekusebentisa i-JW Library^®. Nobe kungenteka utfole kutsi kute labahlele kuhamba naye nabayoshumayela. Ungabasita yini ngetintfo tabo tebuchwephesha nobe uhlele kushumayela nabo? Nangabe kunguwe lotsatsa sinyatselo kucala sekusita, utawube ubabekela sibonelo lesihle labanye ebandleni.

SINGAKUSITA SELULEKO SAPAWULA

12. Bazalwane labasebasha bangasisebentisa njani seluleko saPawula lebekasibhalele Thimothi?

¹² Pawula wanika Thimothi seluleko lebesitamsita aphumelele ekuphileni nasemsebentini wekushumayela. (1 Thim. 1:18; 2 Thim. 4:5) Nine bazalwane labasebasha, singanisita nani leseluleko saPawula. Kanjani? Fundza tincwadzi letimbili taPawula lebekatibhalele Thimothi kube ngatsi betibhalelwe wena, futsi ubuke kutsi ngusiphi seluleko longasisebentisa ekuphileni kwakho. Ase sicoce ngetibonelo letimbalwa.

13. Yini letakusita kutsi usondzelane naJehova?

¹³ “Ticeceshe unemgomo wekwetsembeka kuNkulunkulu.” (1 Thim. 4:7b) Kusho kutsini kwetsembeka kuNkulunkulu? Kusho kusondzelana naJehova ube unesifiso sekwenta loko lokumjabulisako. Ngenca yekutsi asitalwa setsembekile, kudzingeka sikufundze. Kanjani? Ligama lesiGriki lelihunyushwe ngekutsi “ticeceshe” belisetjentiswa kuze kuchazwe umdlali loticecesha kamatima kuze alungele umncintiswano. Lomdlali bekudzingeka ente tintfo letitamsita kutsi aphumelele. Natsi kudzingeka sente tintfo letitasisita kutsi sisondzelane naJehova.

14. Kufanele ube yini umgomo wetfu nasifundza liBhayibheli? Fanekisa.

¹⁴ Njengobe utifundzisa kufundza liBhayibheli onkhe malanga, hlale uwukhumbula umgomo wakho wekusondzelana naJehova. Sibonelo nje, yini loyifundzako ngaJehova nawufundza indzaba yaJesu nelijaha lebelinjingile? (Mak. 10:17-22) Lelijaha belikholwa kutsi Jesu unguMesiya, kepha belite kukholwa lokwenele kuze libe ngumlandzeli wakhe. Nobe kunjalo, Jesu ‘walitsandza.’ Ayikutsintsi yini inhlitiyo indlela Jesu lakhuluma ngayo nalelijaha? Kusebaleni kutsi Jesu bekafuna lente sincumo lesibalulekile. Ngetulu kwaloko, bekaveta indlela Jehova bekalitsandza ngayo lelijaha. (Joh. 14:9) Njengobe ucabanga ngalendzaba nangetimo takho, tibute: ‘Yini lokufanele ngiyente kuze ngisondzele kakhulu kuJehova futsi ngisite labanye kakhudlwana?’

15. Kubaluleke ngani kutsi umzalwane losemusha asinake sibonelo lasibekela labanye? Fanekisa. (1 KuThimothi 4:12, 13)

¹⁵ “Bani sibonelo kulabetsembekile.” (Fundza 1 KuThimothi 4:12, 13.) Pawula akagcinanga nje ngekukhutsata Thimothi kutsi abe nelikhono lekufundza nelekufundzisa, kodvwa wamkhutsata nekutsi akhombise lutsandvo, kukholwa futsi abe msulwa. Ngasiphi sizatfu? Ngenca yekutsi loko umuntfu lakwentako kubaluleke kakhulu kunaloko lakushoko. Ase sitsi unikwa sabelo sekubeka inkhulumo lemayelana nekufaka umdlandla emsebentini wekushumayela. Utawuba nesibindzi sekukhuluma ngalendzaba nangabe wenta konkhe lokusemandleni akho emsebentini wekushumayela. Sibonelo sakho sitakwenta kube nesisindvo loko lokushoko.​—1 Thim. 3:13.

16. (a) Ngutiphi tintfo letisihlanu umKhristu losemusha langaba sibonelo kuto? (b) Umzalwane losemusha angaba njani sibonelo ‘ekukhulumeni’?

¹⁶ Njengobe kuvetiwe ku-1 KuThimothi 4:12, Pawula washo tintfo letisihlanu umzalwane losemusha langaba sibonelo kuto. Kungaba kuhle kutsi utinikete sikhatsi sekudadisha ngato. Sibonelo nje, ase sitsi ufuna kuba sibonelo lesihle ‘ekukhulumeni.’ Cabanga ngetindlela longalusebentisa ngato lulwimi lwakho kuze ukhutsate labanye. Nangabe usahlala nebatali bakho, ungetama yini kubabonga kakhudlwana ngaloko labakwentela kona? Ngemuva kwemihlangano, ungamtjela yini lotsite lebekanenkhulumo kutsi yini loyitsandzile ngenkhulumo yakhe? Ngetulu kwaloko, ungetama nekuphendvula usebentisa emavi akho nawusemihlanganweni. Nawetama kuba sibonelo lesihle ekukhulumeni, utawube uyakhombisa kutsi uyatfutfuka.​—1 Thim. 4:15.

17. Yini letawusita umzalwane losemusha kutsi afinyelele imigomo yakhe ekukhonteni Nkulunkulu? (2 KuThimothi 2:22)

¹⁷ “Tibalekele tifiso tebusha, kodvwa ulwele kuba nekulunga.” (Fundza 2 KuThimothi 2:22.) Pawula wakhutsata Thimothi kutsi atibalekele tifiso letingamphazamisa kutsi atibekele imigomo ekukhonteni Nkulunkulu naletingalimata buhlobo bakhe naJehova. Kungenteka ubone nekutsi nanobe letinye tintfo lotentako tingasitimbi kodvwa tikwenta usale nesikhatsi lesincane sekwenta tintfo letiphatselene nekukhonta Nkulunkulu. Sibonelo nje, cabanga ngekutsi singanani sikhatsi losicitsa udlala imidlalo letsite, wehla wenyuka ku-Internet, nobe udlala imidlalo ye-video. Ungasisebentisa yini lesinye saleso sikhatsi wenta imisebenti lephatselene nekukhonta Nkulunkulu? Mhlawumbe ungasita ekugcineni liHholwa leMbuso lisesimeni lesikahle nobe usekele luhlelo lwekushumayela ngencola. Nangabe wenta imisebenti lenjengalena, manyenti ematfuba ekutsi wakhe bangani labasha labatakusita kutsi utibekele imigomo ekukhonteni Nkulunkulu futsi uyifinyelele.

KUSITA LABANYE KULETSA TIBUSISO

18. Yini leyenta sitsi Makho naThimothi baphila imphilo lejabulisako naleyenetisako?

¹⁸ Makho naThimothi batidzela kuze basite labanye kakhudlwana, futsi baphila imphilo lejabulisako naleyenetisako. (Imis. 20:35) Kuze Makho asite bazalwane bakhe nabodzadze, waya etindzaweni letinyenti letikhashane. Waphindze wabhala tintfo letimangalisako letimayelana nekuphila kwaJesu nemsebenti wakhe. Thimothi wasita Pawula ekusunguleni emabandla nasekukhutsateni bazalwane nabodzadze. Kusebaleni kutsi Jehova wakujabulela kutidzela kwaMakho naThimothi.

19. Kubaluleke ngani kutsi bazalwane labasebasha basinakisise seluleko saPawula lebesiya kuThimothi, futsi utawuba yini umphumela?

¹⁹ Indlela Pawula bekamtsandza ngayo Thimothi ibonakala kahle etincwadzini latibhalela lomngani wakhe losemusha. Letincwadzi letiphefumulelwe tiphindze tikhombise kutsi Jehova unitsandza kakhulu nine bazalwane lenisebasha, futsi ufuna niphumelele. Ngako sisebentiseni leseluleko saPawula, futsi nilwele kuba nesifiso sekusita labanye kakhudlwana. Nanenta njalo, nitakujabulela kuphila kwanyalo, futsi ‘nitawubambisisa kuphila lokungukonakona’ lokutako.​—1 Thim. 6:18, 19.