Tfobeka Uvume Kutsi Kunetintfo Longatati

1. Ngumaphi emakhono Jehova lasiphe wona, futsi ngasiphi sizatfu?

JEHOVA wasidala ngendlela yekutsi sikhone kucabanga, singenise lwati, sikhone kuba nekucondza futsi sikhombise kuhlakanipha. Yini leyamenta wasidala ngalendlela? Kungobe ufuna ‘sibe nelwati ngaNkulunkulu’ futsi ufuna simkhonte sinelikhono lekusebentisa kahle ingcondvo.​—Taga 2:1-5; Rom. 12:1.

2. (a) Yini lokufanele siyicondze ngendlela lesidalwe ngayo? (Jobe 37:23, 24) (Buka nesitfombe.) (b) Kusisita njani kutfobeka sivume kutsi kunetintfo lesingatati?

² Nanobe Jehova asidale saba nelikhono lekufundza tintfo letinyenti, kodvwa kunyenti kakhulu lesingakwati. (Fundza Jobe 37:23, 24.) Cabanga ngesibonelo saJobe. Jehova wambuta imibuto leminyenti leyakhombisa kutsi bekangati kangakanani. Loko kwamtfobisa Jobe futsi kwamsita walungisa indlela bekacabanga ngayo. (Jobe 42:3-6) Natsi kungasisita kutfobeka sivume kutsi asati konkhe. Kutfobeka lokunjalo kutawusenta setsembe kutsi Jehova utasitjela loko lokufanele vele sikwati kuze sente tincumo letihlakaniphile.​—Taga 2:6.

3. Sitawucoca ngani kulesihloko?

³ Kulesihloko, sitawucoca ngaletinye tintfo lesingatati nangetinkinga letingabangelwa nguloko. Sitawuphindze sicoce ngekutsi kukahle ngani kutsi singatati letinye tintfo. Kucoca ngaloku kutasisita setsembe kakhulu kutsi Jehova, ‘Loyo lowati konkhe,’ usitjela loko lokufanele vele sikwati.​—Jobe 37:16.

ASATI KUTSI KUPHELA KUTAWUFIKA NINI

4. Ngekusho kwaMatewu 24:36, yini lesingayati?

⁴ Fundza Matewu 24:36. Asati kutsi kuphela kwalelive kutawufika nini. Ngisho nangesikhatsi Jesu alamhlabeni, bekangalati ‘lilanga neli-awa.’a Ngekuhamba kwesikhatsi watjela baphostoli bakhe kutsi Jehova longuMgcini Sikhatsi Lomkhulu nguye “lonemandla” nobe ligunya lekuncuma kutsi tintfo letitsite titawenteka nini. (Imis. 1:6, 7) Sewuvele usibekile sikhatsi sekuphela kwalelive, kodvwa akusiko kwetfu kwati kutsi letintfo titawenteka nini ngalokucondzile.

5. Singahle sitive njani ngenca yekutsi asati kutsi kuphela kutawufika nini?

⁵ Ngekuvumelana nemavi aJesu, asati kutsi kutawudzingeka silindze sikhatsi lesinganani ngaphambi kwekutsi kufike kuphela. Ngenca yaloko, singahle siphelelwe sineke nobe sidvumateke, ikakhulukati nangabe sekuphele sikhatsi lesidze silindzele lilanga laJehova. Nobe singahle sikutfole kumatima kubeketelela kuhlekwa ngemalunga emindeni yetfu nobe labanye. (2 Phet. 3:3, 4) Mhlawumbe singacabanga kutsi kube silati ngalokucondzile lilanga lokutawufika ngalo kuphela, besitawuba nesineke kakhudlwana futsi besitawukhona kubeketelela kuhlekwa ngaphandle kwenkinga.

6. Kukahle ngani kungati kutsi kuphela kutawufika nini?

⁶ Ecinisweni, kutsi Jehova angasitjeli lilanga lekutsi kuphela kutawufika nini, kusinika litfuba lekutsi sikhombise kutsi simkhonta ngobe siyamtsandza futsi setsembele kuye. Asimkhonti sibe sinelilanga lelitsite engcondvweni lekufika kwekuphela. Kunekutsi sinake kakhulu kutsi litawufika nini ‘lilanga laJehova,’ senta kahle ngekunaka loko lelitakufeza. Nasenta njalo, sitawuchubeka sitinikela kakhulu kuNkulunkulu futsi sente konkhe lokusemandleni etfu kuze simjabulise.​—2 Phet. 3:11, 12.

7. Yini lesiyatiko?

⁷ Senta kahle ngekunaka loko lesikwatiko, kutsi emalanga ekugcina acala nga-1914. EBhayibhelini, Jehova usinikete tiphrofetho letingagcini ngekusikhombisa lowo mnyaka, kodvwa letiphindze tichaze kahle tintfo letentekile kusukela ngalowo mnyaka. Ngenca yaloko, siyaciniseka kutsi “lilanga laJehova lelikhulu selisondzele.” (Zef. 1:14) Siyawati nemsebenti Jehova lafuna siwente, lokukutjela bantfu labanyenti kakhulu ‘tindzaba letimnandzi teMbuso.’ (Mat. 24:14) Lomlayeto ushunyayelwa emaveni langaba ngu-240, ngetilwimi letingetulu kwa-1 000. Akudzingeki sati ‘lilanga neli-awa’ kuze siwente ngekutimisela lomsebenti lobalulekile.

ASIKWATI LOKO JEHOVA LATAWUKWENTA

8. Asho kutsini emavi latsi ‘imisebenti yaNkulunkulu weliciniso’? (Umshumayeli 11:5)

⁸ Asihlali siyati ‘imisebenti yaNkulunkulu weliciniso.’ (Fundza Umshumayeli 11:5.) Loko kusho tintfo Jehova labangela kutsi tenteke nobe lavumela kutsi tenteke kuze kufezeke intsandvo yakhe. Asati ngalokucondzile kutsi yini lengenta Jehova avumele intfo letsite kutsi yenteke nobe kutsi utasisita njani. (Hla. 37:5) Asiyuze sibe nalo lolwati, kufana nendlela umntfwana lakhula ngayo esiswini samake wakhe, lokuyintfo bososayensi labangayicondzi ngalokuphelele kuze kube ngulamuhla.

9. Ngutiphi tinkinga lesingahle sibe nato ngenca yekutsi asati kutsi Jehova utasisita njani?

⁹ Ngenca yekutsi asati kutsi Jehova utasisita njani, loko kungasenta singabate kwenta tincumo letitsite. Singahle singabate kudzela lokutsite kuze sente lokunyenti emsebentini waJehova, njengekwenta kuphila kwetfu kube melula nobe kutfutsela lapho kunesidzingo lesikhulu khona sebamemeteli. Nobe singahle sitibute kutsi Jehova uyasemukela yini nangabe solo singakhoni kufinyelela imigomo yetfu emsebentini wakhe, nangabe solo singayiboni imiphumela lemihle yekutimisela kwetfu emsebentini wekushumayela, nobe nangabe sibhekana netinkinga emsebentini lesiwentela Jehova.

10. Kungati kutsi Jehova utasisita njani kwenta sibe nabuphi buntfu lobubalulekile?

¹⁰ Kungati kutsi Jehova utasisita njani kuyasisita kutsi sibe nebuntfu lobubalulekile, lobufana nekutfobeka. Sibese siyabona kutsi imicabango yaJehova iphakeme kakhulu kuneyetfu netindlela takhe tiphakeme kakhulu kunetetfu. (Isa. 55:8, 9) Siphindze sifundze kumetsemba ngalokuphelele Jehova, futsi sibuke yena kuze siphumelele. Nangabe sitfola imiphumela lemihle emsebentini wekushumayela nobe emsebenti lesiwentela Jehova, lonkhe ludvumo siluniketa yena. (Hla. 127:1; 1 Khor. 3:7) Nangabe tintfo tingahambi ngendlela lebesicabanga ngayo, kufanele sikhumbule kutsi Jehova ubona konkhe. (Isa. 26:12) Sidlala indzima yetfu, futsi sichubeke setsemba kutsi naJehova utawudlala indzima yakhe. Siyaciniseka kutsi utasinika sicondziso lesisidzingako, ngisho nobe angeke ente simangaliso njengobe bekenta esikhatsi lesendlulile.​—Imis. 16:6-10.

11. Yini lesiyatiko lengasisita?

¹¹ Siyati kutsi Jehova uhlale anelutsandvo, alungile futsi ahlakaniphile. Siyati nekutsi kuligugu kakhulu kuye loko lesimentela kona kanye naloko lesikwentela bazalwane betfu nabodzadze. Ngetulu kwaloko, siyati kutsi uhlale ababusisa labo labetsembekile kuye.​—Heb. 11:6.

ASATI KUTSI LIKUSASA LISIPHATSELENI

12. Ngekusho kwaJakobe 4:13, 14, yini lesingayati?

¹² Fundza Jakobe 4:13, 14. Liciniso lesingeke siliphike kutsi asati kutsi kuphila kwetfu kutawube kunjani kusasa. Kulelive, sonkhe sehlelwa “sikhatsi senhlekelele netimo letingakalindzeleki.” (Shu. 9:11) Ngenca yaloko, asati kutsi loko lesikuhlelile kutawuphumelela yini, asati ngisho nekutsi sitawube sisaphila yini kuze sente loko lesikuhlelile.

13. Singahle sitive njani ngenca yekutsi asati kutsi kutawentekani esikhatsini lesitako?

¹³ Kungahle kube matima kutsi sibeketele ngenca yekutsi asati ngalokucondzile kutsi kutawentekani esikhatsini lesitako. Sisho ngani? Singahle sikhatsateke ngekutsi kutawentekani, futsi loko kungasenta singasajabuli. Tinhlekelele letenteka tingakalindzeleki kanye netintfo letenteka singakatigadzi tingasivisa buhlungu kakhulu futsi tisente sikhatsateke. Ngetulu kwaloko, nangabe solo tingenteki tintfo lesitilindzele, singeva buhlungu kakhulu futsi siphelelwe ngemandla.​—Taga 13:12.

14. Yini lokufanele siyente futsi siyati kuze sijabule mbamba? (Buka netitfombe.)

¹⁴ Nasibeketelela tikhatsi letimatima, sisuke sikhombisa kutsi ngisho nobe kwentekani sikhonta Jehova ngoba simtsandza hhayi ngenca yetizatfu tebugovu. EBhayibhelini, kunetindzaba letikhombisa kutsi akukafaneli silindzele Jehova kutsi asivikele kubo bonkhe bumatima, nekutsi akasihleleli kutsi kuphila kwetfu kutawuba njani. Uyati kutsi injabulo yetfu ayiyi ngekutsi siyati kutsi likusasa lisiphatseleni. Kunaloko, injabulo sitayitfola ngekutsi sicele asicondzise futsi simlalele. (Jer. 10:23) Nangabe setsembela kuye nasenta tincumo, kuba ngatsi sitsi: “Nangabe Jehova atsandza, sitawuphila futsi sitawenta lokwa nalokwa.”​—Jak. 4:15.

15. Yini lesiyatiko ngelikusasa?

¹⁵ Nanobe singati kutsi lilanga ngalinye lisiphatseleni, kepha siyati kutsi Jehova usetsembise kuphila lokuphakadze, kungaba sezulwini nobe emhlabeni. Siyati nekutsi akwenteki akhulume emanga futsi kute lokungamvimba kutsi afeze tonkhe tetsembiso takhe. (Thit. 1:2) Nguye yedvwa losho ‘loko lokutawuba siphetfo futsi kusukela kadzeni asho tintfo letisengakenteki.’ Tonkhe tintfo latsi titawenteka ngesikhatsi sekubhalwa kweliBhayibheli tenteka, futsi tonkhe tintfo latsi titawenteka esikhatsini lesitako titawenteka. (Isa. 46:10) Siyaciniseka kutsi kute lokungavimba Jehova kutsi asitsandze. (Rom. 8:35-39) Utasinika kuhlakanipha, asidvudvute futsi asinike emandla ekubeketelela nobe yini lesingabhekana nayo. Singaciniseka kutsi Jehova utasisita futsi asibusise.​—Jer. 17:7, 8.

ANGEKE SIYICONDZE NGALOKUPHELELE INDLELA JEHOVA LASATI KAHLE NGAYO

16. Njengobe kuvetwe kuTihlabelelo 139:1-6, yini Jehova layatiko ngatsi lesingeke siyicondze ngalokuphelele?

¹⁶ Fundza Tihlabelelo 139:1-6. UMdali wetfu wati konkhe ngatsi, uyati kutsi yini lesenta sicabange ngendlela letsite nekutsi yini lesenta sitive ngendlela letsite. Wati loko lesikushoko kanye netintfo letisenhlitiyweni yetfu. Ukwati konkhe lesikwentako, nekutsi yini leyenta sikwente. INkhosi Davide yatsi Jehova usitungeletile futsi akekho khashane kitsi. Kusijabulisa kakhulu kutsi uMbusi Wendalo Yonkhe, longuMdali wemazulu nemhlaba usinake ngalendlela! Davide watsi: “Indlela longati ngayo imangalisa kakhulu kangangekutsi angeke ngize ngiyicondze.”​—Hla. 139:6, umbhalo longentasi.

17. Yini lengenta sikutfole kumatima kwemukela kutsi Jehova usati kahle?

¹⁷ Indlela lesikhule ngayo, emasiko etfu nobe loko besikukholelwa ngaphambili kungahle kwente kube matima kubona Jehova njengaBabe wetfu lositsandzako lonendzaba natsi. Nobe singahle sive shengatsi emaphutsa lesawenta esikhatsini lesendlulile mabi kakhulu kangangekutsi Jehova akayuze afune kusati futsi sive ngatsi ukhashane kakhulu natsi. Ngisho naDavide bekahle ativa ngaleyondlela. (Hla. 38:18, 21) Nobe umuntfu lowetama kamatima kuyekela imikhuba letsite futsi aphile ngekuvumelana netimiso taNkulunkulu letilungile angahle atibute: ‘Nangabe Nkulunkulu angati kahle, yini-ke lementa afune ngiyekele kwenta intfo lokumatima kakhulu kutsi ngiyiyekele?’

18. Kusisita ngani kwemukela kutsi Jehova usati kancono kunendlela lesitati ngayo? (Buka netitfombe.)

¹⁸ Singafundza kwemukela kutsi Jehova usati kancono kwendlula indlela lesitati ngayo, nekutsi ubona lokuhle kitsi lesingakuboni tsine. Nanobe kunjalo, uyasitsandza ngisho nobe abona emaphutsa etfu futsi uyati kutsi yini lesenta sitive ngendlela letsite futsi sente ngendlela letsite. (Rom. 7:15) Nasesicondza kahle kutsi Jehova uyakubona loko lesingakhona kukwenta, singatimisela kakhulu kumkhonta ngekwetsembeka futsi loko sikwente sijabulile.

19. Yini lesiyatiko ngaJehova?

¹⁹ Siyati kutsi Jehova uyasitsandza, futsi asikungabati ngisho nakancane loko. (1 Joh. 4:8) Siyati nekutsi timiso takhe letilungile tikhombisa kutsi uyasitsandza futsi uhlale asifunela lokuhle kakhulu. Siyati nekutsi Jehova ufuna sitfole kuphila lokuphakadze. Usinikete inhlawulo kuze loko kwenteke. Lesipho siyasicinisekisa kutsi singakhona kukhonta Jehova ngendlela layifunako ngisho nobe sinesono. (Rom. 7:24, 25) Ngetulu kwaloko, siyati kutsi “Nkulunkulu mkhulu kakhulu kunetinhlitiyo tetfu, futsi wati tonkhe tintfo.” (1 Joh. 3:19, 20) Jehova ukubona konkhe lokuphatselene natsi, futsi uyaciniseka kutsi singakhona kwenta intsandvo yakhe.

20. Yini letasisita sigweme kukhatsateka ngalokungenasidzingo?

²⁰ Jehova usitjele konkhe lokufanele vele kutsi sikwati. Nangabe ngekutfobeka sitalemukela leliciniso, sitawugwema kukhatsateka ngalokungenasidzingo ngetintfo letingetulu kwemandla etfu futsi sinake kakhulu tintfo letibalulekile. Nasenta njalo sitawube siyakhombisa kutsi simetsemba ngalokuphelele Jehova, ‘Loyo lowati konkhe.’ (Jobe 36:4) Nanobe letinye tintfo singaticondzi ngalokuphelele nyalo, sikubuke ngalabovu kuphila lokuphakadze lapho khona sitawufundza tintfo letinsha kuNkulunkulu wetfu loMkhulu futsi sifundze nangaye.​—Shu. 3:11.