Sita Lofundza Nabo LiBhayibheli Kutsi Bacale Kukhonta Jehova

1-2. (a) Yini leyenta labanye bafundzi bangabate kucala kukhonta Nkulunkulu? (b) Sitawucoca ngani kulesihloko?

TIKHONA yini tintfo lebetikwenta ungabate kuba nguFakazi waJehova? Mhlawumbe bewesaba kutsi batakujikela labo losebenta nabo, bangani bakho nobe emalunga emndeni wakho. Nobe kungenteka bewuva ngatsi awuyuze ukhone kuphila ngetimiso taNkulunkulu. Nangabe kunjalo, ungakhona kuvelana nalabo lofundza nabo liBhayibheli labangabatako kucala kukhonta Nkulunkulu.

² Jesu wabona kutsi kwesaba lokunjalo kungenta umuntfu angamkhonti Nkulunkulu. (Mat. 13:20-22) Kodvwa wachubeka etama kubasita labo lebebangabata kumlandzela. Wakhombisa bafundzi bakhe kutsi bangabasita njani bantfu labanjalo kuze (1) babone tintfo letibavimba kutsi batfutfuke, (2) bakhulise indlela labamtsandza ngayo Jehova, (3) bashintje umbono wabo ngetintfo lokufanele tite kucala ekuphileni kwabo, futsi (4) babafundzise loko labangakwenta nabaphikiswa ngulabanye. Singasisebentisa njani seluleko Jesu lasitjela bafundzi bakhe nasisebentisa incwadzi letsi Jabulela Kuphila Kuze Kube Phakadze! kuze sisite umfundzi acale kukhonta Nkulunkulu?

SITA LOFUNDZA NAYE ABONE TINTFO LETIMVIMBELA KUTSI ATFUTFUKE

3. Yini lokungenteka yavimba Nikhodemu kutsi abe ngumfundzi waJesu?

³ Nikhodemu, lebekangamholi wemaJuda lowatiwako bekunalokutsite lebekumvimba kutsi abe ngumfundzi waJesu. Ngemuva nje kwetinyanga letingaba sitfupha Jesu acale umsebenti wakhe wekushumayela, Nikhodemu wabona kutsi Jesu bekatfunywe nguNkulunkulu. (Joh. 3:1, 2) Nobe kunjalo, Nikhodemu wakhetsa kuhlangana naJesu ngasense ngenca yekutsi ‘bekesaba emaJuda.’ (Joh. 7:13; 12:42) Mhlawumbe bekacabanga kutsi utawulahlekelwa ngulokunyenti nakangaba ngumfundzi waJesu.a

4. Jesu wamsita njani Nikhodemu kutsi akucondze loko Nkulunkulu bekakulindzele kuye?

⁴ Nikhodemu bekawati uMtsetfo, kodvwa bekadzinga lusito kuze akucondze loko Jehova bekakulindzele kuye. Wamsita njani Jesu? Watinika sikhatsi wacoca naye, loko wakwenta ngisho nasebusuku. Ngetulu kwaloko, Jesu wamtjela ngalokucacile loko bekufanele akwente kuze abe ngumfundzi: bekufanele aphendvuke etonweni takhe, abhajatiswe ngemanti futsi akhombise kutsi uyakholwa eNdvodzaneni yaNkulunkulu.​—Joh. 3:5, 14-21.

5. Ungamsita njani umfundzi kutsi abone tintfo letimvimbela kutsi atfutfuke?

⁵ Ngisho nobe umfundzi sekayicondza kahle imiBhalo, kungenteka adzinge lusito kuze abone tintfo letimvimbela kutsi atfutfuke. Umsebenti wekutiphilisa nobe kuphikiswa ngemalunga emndeni kungamenta angakhoni kutibekela umgomo wekukhonta Nkulunkulu. Ngako msondzelele. Ungammema ekhaya lakho kutsi nitodla ndzawonye. Esimeni lesinjalo, mhlawumbe angakutjela tinkinga labhekene nato. Mkhutsate umfundzi kutsi ente nobe nguluphi lushintjo loludzingekile hhayi ngobe afuna kujabulisa wena, kodvwa kuze akhombise kutsi uyamtsandza Jehova.

6. Ungamsita njani umfundzi kutsi abe nesibindzi sekwenta loko lakufundzako? (1 KubaseKhorinte 16:13)

⁶ Nangabe umfundzi aciniseka kutsi Jehova utamsita aphile ngetimiso teliBhayibheli, utawuba nesibindzi sekukwenta loko lakufundzako. (Fundza 1 KubaseKhorinte 16:13.) Indzima yakho ingafananiswa neyathishela wesikolwa. Nawukhumbula emuva usafundza, bewutsandza thishela lonjani? Mhlawumbe bekunguthishela lonesineke lebekakusita kutsi utetsembe. Ngendlela lefanako, thishela lokahle weliBhayibheli akafundzisi nje kuphela loko Nkulunkulu lafuna sikwente, kodvwa uphindze acinisekise umfundzi kutsi Jehova utamsita ente lushintjo loludzingekile ekuphileni kwakhe. Ungakwenta njani loko?

SITA LOFUNDZA NAYE KUTSI AMTSANDZE KAKHULU JEHOVA

7. Jesu wabasita njani labo bebamlalele kutsi bamtsandze kakhulu Jehova?

⁷ Jesu bekati kutsi kutsandza Nkulunkulu bekutawenta bafundzi bakhe kutsi bakusebentise loko labakufundzako. Bekavame kufundzisa tintfo letitawusita bafundzi kutsi bamtsandze kakhulu Babe wabo wasezulwini. Sibonelo nje, wafananisa Jehova nababe lopha bantfwana bakhe tintfo letinhle. (Mat. 7:9-11) Labanye kulabo bebalalele Jesu kungenteka bebangati kutsi kunjani kuba nababe lonelutsandvo. Cabanga nje kutsi bativa njani ngesikhatsi Jesu asho umfanekiso wababe lonelutsandvo lowemukela indvodzana yakhe lengalaleli lebeseyibuye ekhaya. Babona kutsi Jehova uyabatsandza bantfwana bakhe labasemhlabeni.​—Luk. 15:20-24.

8. Ungamsita njani umfundzi kutsi amtsandze kakhulu Jehova?

⁸ Nawe ungamsita umfundzi kutsi amtsandze kakhulu Jehova ngekutsi ugcizelele buntfu baNkulunkulu nawumfundzisa. Sonkhe sikhatsi nanifundza, msite abone kuhlobana lokukhona emkhatsini waloko lakufundzako nelutsandvo lwaJehova. Nanicoca ngenhlawulo, gcizelela kutsi imtsintsa njani. (Rom. 5:8; 1 Joh. 4:10) Nangabe umfundzi acondza kutsi Jehova umtsandza kanganani, loko kungamsita kutsi naye amtsandze kakhulu.​—Gal. 2:20.

9. Yini leyasita Michael kutsi ashintje indlela bekaphila ngayo?

⁹ Cabanga ngalokwenteka kuMichael, wase-Indonesia. Wakhulela ecinisweni, kodvwa akazange abhajatiswe. Nakaneminyaka lengu-18, waya ngesheya kwetilwandle kuze ayowenta umsebenti wekushayela emaloli. Ngekuhamba kwesikhatsi washada, kodvwa washiya umndeni wakhe ngemuva kuze achubeke nemsebenti wakhe ngesheya kwetilwandle. Kuleso sikhatsi, umkakhe nendvodzakati yakhe bacala kudadisha liBhayibheli futsi batfutfuka. Ngemuva kwekushona kwamakwakhe, Michael wancuma kubuyela ekhaya kuze ayonakekela babe wakhe futsi wavuma kutsi lotsite adadishe naye liBhayibheli. Ngesikhatsi bafundza incenye letsi “Chubeka Ufunisisa” kusifundvo 27 sencwadzi letsi Jabulela Kuphila Kuze Kube Phakadze!, Michael watsintseka kakhulu. Njengobe acabangisisa ngendlela Jehova lokungenteka wativa ngayo nakabona iNdvodzana yakhe iselusizini, Michael wakhala. Yabese iba ligugu kakhulu kuye inhlawulo futsi loko kwamenta kutsi ashintje indlela bekaphila ngayo wabese uyabhajatiswa.

SITA UMFUNDZI ASHINTJE UMBONO LANAWO NGETINTFO LOKUFANELE TITE KUCALA

10. Jesu wabasita njani bafundzi kutsi bashintje umbono bebanawo ngetintfo lokufanele tite kucala? (Lukha 5:5-11) (Buka nesitfombe.)

¹⁰ Bafundzi basheshe babona kutsi Jesu unguMesiya lowetsenjisiwe, kodvwa bebadzinga lusito kuze bente umsebenti wekushumayela ute kucala kubo. BoPhetro na-Andreya bese banesikhatsi babafundzi baJesu ngesikhatsi abacela kutsi bamlendzele ngaso sonkhe sikhatsi. (Mat. 4:18, 19) Bebanebhizinisi yekudweba lephumelelako, futsi kungenteka bebasebenta naJakobe naJohane. (Mak. 1:16-20) Ngesikhatsi boPhetro na-Andreya “bashiya emanethi abo,” kungenteka bahlela kutsi batayinakekela njani imindeni yabo njengobe balandzela Jesu. Yini leyabenta kutsi bente lolushintjo? Indzaba lekuLukha itsi Jesu wenta simangaliso lesabenta betsemba kakhulu kutsi Jehova utawubanakekela.​—Fundza Lukha 5:5-11.

11. Singakusebentisa njani loko lokwenteke ekuphileni kwetfu kuze sicinise kukholwa kwemfundzi?

¹¹ Angeke sikhone kwenta timangaliso njengaJesu, kodvwa singamcocela umfundzi kutsi Jehova ubasite njani labo labamenta ete kucala ekuphileni kwabo. Sibonelo nje, uyakhumbula yini kutsi Jehova wakusita njani ngesikhatsi ucala kuya emihlanganweni? Mhlawumbe kwadzingeka uye kumcashi wakho futsi umchazele kutsi angeke usakhona kusebenta ema-awa lengetiwe nakusikhatsi sekuya emihlanganweni. Njengobe umcocela ngaloko lokwenteke kuwe, chaza kutsi kukholwa kwakho kwacina njani nawubona Jehova asekela sincumo sakho sekumenta ete kucala ekuphileni kwakho.

12. (a) Kubaluleke ngani kutsi simeme bamemeteli labehlukahlukene kulesifundvo? (b) Ungawasebentisa njani ema-video kuze umfundzise kahle umfundzi? Niketa sibonelo.

¹² Kutamsita kakhulu umfundzi kuva nangendlela lamanye emaKhristu lawushintje ngayo umbono wawo ngetintfo lokufanele tite kucala. Ngako mema bamemeteli labehlukahlukene kulesifundvo. Bacele bachaze kutsi balitfole njani liciniso nekutsi yini labayentile kuze bente umsebenti waJehova ute kucala ekuphileni kwabo. Ngetulu kwaloko, tinikete sikhatsi nemfundzi kuze nibukele ema-video lasencenyeni letsi “Chubeka Ufunisisa” nobe encenyeni letsi “Lokunye Longakuhlola” encwadzini letsi Jabulela Kuphila Kuze Kube Phakadze! Ase sibekise, nanifundza sifundvo 37, ungaveta timiso letikule-video letsi Jehova Utasipha Loko Lesikudzingako.

FUNDZISA UMFUNDZI LOKO LANGAKWENTA NAKAPHIKISWA NGULABANYE

13. Jesu wabasita njani bafundzi bakhe kuze balungele kuphikiswa?

¹³ Jesu wabatjela kanyenti bafundzi bakhe kutsi bebatawuphikiswa ngulabanye, lokufaka ekhatsi tihlobo tabo. (Mat. 5:11; 10:22, 36) Njengobe besekatawucedza umsebenti wakhe wekushumayela, wecwayisa bafundzi bakhe kutsi bekungenteka babulawe. (Mat. 24:9; Joh. 15:20; 16:2) Wabakhutsata kutsi bacaphe nabenta umsebenti wekushumayela. Wabeluleka kutsi bangaphikisani nalabo lababaphikisako futsi bahlakaniphe kuze bakhone kuchubeka nemsebenti wekushumayela.

14. Singamsita njani umfundzi kutsi alungele kuphikiswa? (2 KuThimothi 3:12)

¹⁴ Singamsita umfundzi alungele kuphikiswa ngekutsi simchazele loko langalindzela kukuva kulasebenta nabo, kubangani bakhe nasetihlotjeni takhe. (Fundza 2 KuThimothi 3:12.) Labanye lasebenta nabo bangahle bahlekise ngalendlela yakhe lensha yekuphila. Labanye, lokufaka ekhatsi tihlobo takhe, bangahle bangavumelani netinkholelo takhe letisekelwe eBhayibhelini. Nangabe sibasita ngekushesha lesifundza nabo kutsi balungele kuphikiswa, batawukhona kumelana nako nakufika.

15. Yini lengasita umfundzi kutsi abeketelele kuphikiswa ngemalunga emndeni?

¹⁵ Endzabeni yekuphikiswa ngemalunga emndeni, khutsata umfundzi kutsi acabange ngekutsi yini lokungenteka yenta tihlobo takhe titfukutsele. Kungenteka ticabanga kutsi udukisiwe, nobe mhlawumbe nje atibatsandzi BoFakazi BaJehova. Ngisho netihlobo taJesu atizange tikutsandze loko bekakwenta. (Mak. 3:21; Joh. 7:5) Fundzisa umfundzi kutsi abeketele futsi akhulume nalabanye ngekuhlakanipha, lokufaka ekhatsi emalunga emndeni.

16. Singamsita njani umfundzi kutsi acocele labanye ngetinkholelo takhe ngendlela lehlakaniphile?

¹⁶ Ngisho nalapho tihlobo tikhombisa kutsi tiyafuna kwati lokunyenti ngeliBhayibheli, umfundzi utawube wenta ngekuhlakanipha nangabe angatitjeli konkhe sikhatsi sinye. Ngale kwaloko tingeva ngatsi kunyenti kakhulu letitjelwa kona, lokungenta kutsi tingafuni kucoca naye esikhatsini lesitako. Ngako mkhutsate kutsi acoce nato kafishane kuze nasesikhatsini lesitako tifune kucoca naye. (Khol. 4:6) Mhlawumbe angatitjela kutsi tingene ku jw.org. Loko kutawenta kutsi tifundze lokunyenti ngaBoFakazi BaJehova ngendlela letifuna ngayo.

17. Ungamsita njani umfundzi kutsi akhone kuphendvula labanye labakhuluma lokungasiko ngaBoFakazi BaJehova? (Buka nesitfombe.)

¹⁷ Ungasebentisa luchungechunge lwetihloko letiku jw.org letitsi “Imibuto Bantfu Labavamise Kuyibuta Mayelana NaBoFakazi BaJehova” kuze usite umfundzi alungiselele timphendvulo letimelula temibuto lengahle ibutwe tihlobo nobe lasebenta nabo. (2 Thim. 2:24, 25) Nakuphela sifundvo ngasinye, buketani incenye letsi “Labanye Bantfu Batsi” encwadzini letsi Jabulela Kuphila Kuze Kube Phakadze! Khutsata umfundzi kutsi aphrakthize kuphendvula ngemavi akhe. Ungesabi kumtjela kutsi angatfutfukisa kuphi endleleni langabaphedvula ngayo labanye. Lokuphrakthiza kungamsita kutsi akhone kumelela kukholwa kwakhe ngesibindzi.

18. Ungamkhutsata njani umfundzi kutsi abe ngummemeteli longakabhajatiswa? (Matewu 10:27)

¹⁸ Jesu wakhutsata bafundzi bakhe kutsi batjele labanye tindzaba letimnandzi. (Fundza Matewu 10:27.) Nakacala ngekushesha umfundzi kutjela labanye loko lakukholelwako, utawusheshe acale kufundza kwetsembela kuJehova. Ungamsita njani umfundzi kutsi atibekele lomgomo? Nangabe kumenyetelwa kutsi kutawuba nemkhankaso wekushumayela ebandleni, mkhutsate kutsi acabange ngekutsi yini langayenta kuze akufanele kuba ngummemeteli. Mchazele kutsi yini leyente labanye bakutfola kumelula kucala kushumayela ngetikhatsi temikhankaso. Lomunye umgomo langatibekela wona kubeka tinkhulumo emihlangweni lesekhatsi neliviki. Njengobe etama kufinyelela lomgomo, utawufundza kubatjela ngesibindzi labanye loko lakukholelwako.

KHOMBISA KUTSI UYAMETSEMBA UMFUNDZI

19. Jesu wakhombisa njani kutsi uyabetsemba bafundzi bakhe, futsi singamlingisa njani?

¹⁹ Ngaphambi kwekutsi Jesu enyukele ezulwini, watjela bafundzi bakhe kutsi bebatawuphindze babe ndzawonye. Bebangacondzi kutsi ukhuluma ngekutsi batakuya ezulwini. Nobe kunjalo, wanaka kutsi bebetsembekile hhayi kungabata kwabo. (Joh. 14:1-5, 8) Bekati kutsi bebadzinga sikhatsi kuze bacondze letinye tintfo, njengelitsemba lekuya ezulwini. (Joh. 16:12) Natsi singakhombisa kutsi siyametsemba umfundzi kutsi uyafuna kujabulisa Jehova.

20. Lomunye dzadze waseMalawi wakhombisa njani kutsi uyametsemba umfundzi?

²⁰ Sihlale simetsemba umfundzi kutsi uyafuna kwenta lokukahle. Sibonelo nje, cabanga ngadzadze waseMalawi lokutsiwa nguChifundo. Wacala kudadisha liBhayibheli nalomunye sisi longumKatolika lokutsiwa ngu-Alinafe basebentisa incwadzi letsi Jabulela Kuphila Kuze Kube Phakadze! Nabacedza kucoca ngesifundvo 14, Chifundo wabuta lomfundzi kutsi ucabangani ngekusebentisa titfombe ekukhonteni Nkulunkulu. Alinafe wakwata futsi waphendvula watsi: “Umuntfu uyatikhetsela!” Chifundo watibuta kutsi bekasetawuvuma yini kutsi bachubeke bafundze. Kodvwa ngesineke wachubeka afundza na-Alinafe, etsemba kutsi ngalelinye lilanga utalitfola leliphuzu. Ngemuva kwetinyanga letimbalwa, Chifundo wambuta umbuto lokusifundvo 34 lotsi: “Kuze kube ngunyalo kutadisha kwakho liBhayibheli nekufundza ngaNkulunkulu weliciniso, Jehova, kukusite njani?” Chifundo usitjela indlela Alinafe laphendvula ngayo, utsi: “Washo emaphuzu lamanyenti lamahle, lokufaka ekhatsi kutsi boFakazi abatenti tintfo letingavunyelwa liBhayibheli.” Ngekushesha ngemuva kwaloko, Alinafe wayekela kusebentisa titfombe futsi wabhajatiswa.

21. Yini lesingayenta kuze sente umfundzi abe nesifiso lesikhulu sekucala kukhonta Nkulunkulu?

²¹ Ngisho nobe kunguJehova “lokhulisako,” kunendzima lokufanele siyidlale kuze sisite umfundzi atfutfuke. (1 Khor. 3:7) Senta lokungetulu nje kwekumfundzisa kutsi yini Nkulunkulu lafuna kutsi ayente. Simsita kutsi amtsandze kakhulu Jehova. Siphindze simkhutsate kutsi akhombise kutsi uyamtsandza ngekutsi ashintje umbono lanawo ngetintfo lokufanele tite kucala ekuphileni kwakhe. Siphindze simfundzise indlela yekwetsembela kuJehova nakaphikiswa ngulabanye. Nangabe sikhombisa kutsi siyametsemba, loko kutamenta aciniseke kakhulu kutsi naye angakhona kuphila ngetimiso taJehova futsi acale kumkhonta.