Kuko Konkhe Kuphila Kwetfu, Sifundze Tifundvo Letibalulekile KuMfundzisi Wetfu Lomkhulu

SIBONELO SEBATALI BAMI

Ngasekupheleni kwabo-1950, batali bami batfutsa e-Italy baya eKindersley, eSaskatchewan, eCanada. Ngekushesha ngemuva kwaloko, bafundza liciniso, futsi laba yintfo lebaluleke kakhulu ekuphileni kwetfu. Ngiyakhumbula kutsi nangisemncane bengicitsa sikhatsi lesinyenti ngishumayela nemndeni wakitsi, ngako ngihle ngidlala ngitsi “ngaba lihlahlandlela lelisitako” ngineminyaka lengu-8!

Batali bami bebeswele; nobe kunjalo, basibekela sibonelo lesihle sekutidzela ngenca yaJehova. Sibonelo nje, nga-1963 batsengisa tintfo tabo letinyenti kuze batfole imali yekuya emhlanganweni wetive lebewusePasadena, eCalifornia, eMelika. Nga-1972 satfutsela eTrail, eBritish Columbia, eCanada lebeyikhashane ngemakhilomitha langu-1 000, sayosita bantfu labakhuluma siTaliyane. Babe bekenta umsebenti wekuklina. Bekangavumi kukhushulelwa esikhundleni ngobe bekafuna kunaka kakhulu umsebenti lophatselene naNkulunkulu.

Ngibonga kakhulu ngesibonelo batali bami labasibekela bantfwabakitsi labatsatfu kanye nami. Sibonelo sabo sakha sisekelo lesicinile emsebentini lengiwentela Jehova. Bangifundzisa intfo lengiyikhumbula kuphila kwami konkhe: Nangabe ngifuna kucala uMbuso, Jehova utanginakekela.​—Mat. 6:33.

NGICALA KWENTA UMSEBENTI WASIKHATSI SONKHE

Nga-1980, ngashada naDebbie, dzadze lomuhle lebekanemigomo lecacile ekukhonteni Nkulunkulu. Besifuna kungenela umsebenti wasikhatsi sonkhe, ngako Debbie wacala kuba lihlahlandlela ngemuva kwetinyanga letintsatfu sishadile. Ngemuva kwemnyaka sishadile, satfutsela ebandleni lelincane lebelinesidzingo sebamemeteli, futsi nami ngaba lihlahlandlela.

Ngekuhamba kwesikhatsi sadvumateka, futsi besesincume kuhamba. Kodvwa singakahambi sakhuluma nembonisi wesigodzi. Wakhuluma natsi ngelutsandvo kodvwa wangagegi watsi: “Nani niyasifaka sandla kulenkinga. Ninaka kakhulu lokubi kulesimo senu. Kepha nangabe nibuka lokuhle, nitakutfola.” Besisidzinga leseluleko. (Hla. 141:5) Sasisebentisa ngekushesha futsi sabese siyabona kutsi betitinyenti tintfo letinhle. Bantfu labanyenti ebandleni bebafuna kumentela lokunyenti Jehova, lokufaka ekhatsi labasha nalabanye lebebashade nebantfu labangasibo boFakazi. Leso bekusifundvo lesibaluleke kakhulu. Safundza kubuka lokuhle futsi silindzele Jehova kutsi alungise simo lesibonakala simatima. (Mik. 7:7) Saphindze sajabula, futsi tintfo taba ncono.

Bothishela betfu esikolweni setfu sekucala semahlahlandlela bebake babelwa kulamanye emave. Njengobe basikhombisa titfombe futsi basicocela ngetinkinga netibusiso labatitfolile, loko kwasenta saba nesifiso sekuba titfunywa telivangeli. Ngako sancuma kutibekela umgomo wekuba titfunywa telivangeli.

Kuze siwufinyelele lomgomo, nga-1984 satfutsela eQuebec, lakukhulunywa khona siFulentji, lebeyikhashane ngemakhilomitha langetulu kwa-4 000 kusuka eBritish Columbia. Loko bekusho kutsi bekufanele sifundze lisiko lelisha nelulwimi lolusha. Lenye inkinga lebesinayo kutsi besivame kuba bete imali. Sikhona sikhatsi lapho besiphila ngemazambane lebesivunyelwa ngumnikati wensimu kutsi siwabutse. Debbie wagcine sekanelikhono lekupheka emazambane ngetindlela letehlukahlukene! Ngisho sinaletinkinga, satimisela kucinisela sibe sijabulile. Ngetulu kwaloko, sabona kutsi Jehova bekasinakekela.​—Hla. 64:10.

Ngalelinye lilanga satfola lucingo lebesingakalulindzeli. Sacelwa kutsi siyosebenta eBethel leseCanada. Besike safaka sicelo sekuya eSikolweni saseGileyadi, ngako besingaciniseki kahle kutsi sivume yini kuyosebenta eBethel. Kodvwa savuma. Nasifika, sabuta uMzalwane Kenneth Little, lolilunga leKomidi yeliGatja, satsi: “Sekutawentekani ngesicelo setfu saseGileyadi?” Watsi: “Sitawubona khona.”

Ngemuva kweliviki, mine naDebbie samenywa eGileyadi. Ngako bekudzingeka sente sincumo. UMzalwane Little watsi: “Ngisho nobe ningakhetsa ini, ngalelinye lilanga nitawufisa ngatsi ngabe nakhetsa lolokunye. Kute lokuncono kunalokunye; Jehova angabusisa nobe ngukuphi.” Sancuma kuya eGileyadi, futsi kuyo yonkhe leminyaka, sikubonile kuba liciniso kwemavi eMzalwane Little. Sivame kuwasebentisa kulabanye labangati kutsi bakhetse siphi sabelo.

KUBA SITFUNYWA SELIVANGELI

Sajabula kakhulu kuba semkhatsini webafundzi labangu-24 eklasini lesi-83 laseGileyadi, eBrooklyn, eNew York, nga-April 1987. Besifundziswa nguMzalwane Ulysses Glass neMzalwane Jack Redford. Tinyanga letisihlanu tagijima, futsi saphotfula ngaSeptember 6, 1987. Sabelwa eHaiti, sikanye naJohn naMarie Goode.

Betigcine nga-1962 titfunywa telivangeli eHaiti futsi nato beticoshiwe. Ngemuva kwemaviki lamatsatfu siphotfulile, satitfola sisebandleni lelincane lelinebamemeteli labangu-35 ekhatsi etintsabeni taseHaiti. Besibancane, site lwati lolunganani futsi sisodvwa ekhaya letitfunywa telivangeli. Bantfu bebeswele kakhulu futsi linyenti labo belingakwati kufundza. Ngaleto tikhatsi, bantfu bebanebudlova ngenca yetinkinga kutepolitiki, bebafuna kuketula umbuso, kutoyitoywa futsi kunetimvula letinkhulu letihambisana nemoya lenemandla.

Kunyenti lesakufundza kubazalwane betfu nabodzadze baseHaiti lebebacinile futsi bajabulile. Labanyenti babo bebasokola, kodvwa bebamtsandza Jehova nekushumayela. Lomunye dzadze losakhulile bekangakwati kufundza, kodvwa bekati emavesi langaba ngu-150 ngengcondvo. Tintfo lebetenteka onkhe malanga tasicinisekisa kutsi sichubeke sishumayela umlayeto wekutsi uMbuso waNkulunkulu ngiwo kuphela likhambi letinkinga tebantfu. Kusijabulisa kakhulu kubona kutsi labanye lebesidadisha nabo liBhayibheli sebangemahlahlandlela lavamile, lakhetsekile futsi bangulabadzala bemabandla.

NasiseHaiti, ngahlangana nalelinye lijaha lokutsiwa nguTrevor, lebelisitfunywa selivangeli lesingumMormon, futsi besihle sicoca ngeliBhayibheli. Ngemuva kweminyaka, ngatfola incwadzi levela kuye lebengingakayigadzi. Watsi: “Ngiyabhajatiswa emhlanganweni wesigodzi lolandzelako! Ngifuna kubuyela eHaiti ngibe lihlahlandlela lelikhetsekile kulendzawo lebengisitfunywa selivangeli lesinguMormon.” Nguloko kanye lakwenta, futsi kwaphela iminyaka leminyenti alapho nemkakhe.

EYUROPHU​—BESE SIYA E-AFRICA

Sabelwa encenyeni yeYurophu lapho besekushumayeleka khona. Nga-1992 sefika eLjubljana, eSlovenia, dvutane nalapho batali bami bakhulela khona ngaphambi kwekutsi baye e-Italy. Bekusolo kunemphi endzaweni lebekuyiYugoslavia. Ligatja laseVienna, e-Austria, kanye nemahhovisi laseZagreb, eCroatia, naseBelgrade, eSerbia, bekabuke umsebenti lebewentiwa kulesifundza. Nyalo live ngalinye besekudzingeka kutsi libe neBethel.

Kwadzingeka kutsi siphindze sifundze lulwimi lolusha nelisiko lelisha. Bantfu bakulendzawo bebavame kutsi “Jezik je težek,” lokusho kutsi “Lulukhuni lolulwimi.” Vele belulukhuni! Satsintseka kakhulu nasibona kwetsembeka kwebazalwane nabodzadze labalwemukela ngekushesha lushintjo lolwentiwa yinhlangano futsi sayibona nendlela Jehova lababusisa ngayo. Saphindze sabona kutsi Jehova uhlale alungisa tintfo ngelutsandvo nangesikhatsi lesikahle. Iminyaka lesayicitsa eSlovenia yagcizelela tifundvo letinyenti lebesitifundzile, futsi safundza naletinye letinsha.

Beluselunyenti lushintjo lebeluseta. Nga-2000 sabelwa eCôte d’Ivoire, lesenshonalanga ye-Africa. NgaNovember 2002, sabalekiselwa eSierra Leone ngenca yemphi, futsi bekusandza nje kuphela imphi lebeyitsetse iminyaka lengu-11 kulelive. Bekulukhuni kuhamba eCôte d’Ivoire ngekushesha lokukhulu. Kodvwa tifundvo lesatifundza tasisita kutsi sichubeke sijabulile.

Sanaka kakhulu bantfu labanyenti kulendzawo lebebafuna kufundza liciniso kanye nebazalwane nabodzadze labanelutsandvo lebesekuphele iminyaka leminyenti babeketelela imphi. Bebeswele, kodvwa bebapha labanye loko labanako. Lomunye dzadze wapha Debbie timphahla. Ngesikhatsi Debbie angakhululeki kutitsatsa, lodzadze watsi: “Ngesikhatsi semphi, bazalwane nabodzadze bakulamanye emave basisita. Nyalo selitfuba letfu lekutsi sisite.” Satibekela umgomo wekutsi silingise sibonelo sabo.

Ngekuhamba kwesikhatsi sabuyela eCôte d’Ivoire, kodvwa kwaphindze kwesuka imphi ngenca yetepolitiki. NgaNovember 2004, sabalekiswa nge-helicopter, futsi ngamunye wetfu bekaphetse sikhwama lesingemakhilogremu langu-10. Ngalobo busuku salala phansi kusemende enkambu yemasotja, futsi ngelilanga lelilandzelako sayiswa eSwitzerland. Nasifika egatjeni ekhatsi nebusuku, emalunga eKomidi yeliGatja kanye nebazalwane labafundzisa eSikolweni Sekuceceshelwa Imisebenti YebuKhristu kanye nebafati babo basemukela kamnandzi basinika ema-hug lamanyenti, kudla lokushisako nema-chocolate lamanyenti. Satsintseka kakhulu.

Sabelwa kwesikhashana eGhana ngemuva kwaloko sabuyela eCôte d’Ivoire ngesikhatsi simo sesincono. Umusa lesawukhonjiswa bazalwane betfu nabodzadze wasisita ngesikhatsi sibalekiswa nakunemphi futsi sinikwa tabelo tesikhashana. SinaDebbie savumelana kutsi ngisho nobe lutsandvo lwebuzalwane luyintfo levamile enhlanganweni yaJehova, besingayuze silutsatsele phansi. Ecinisweni, ngisho naleto tikhatsi letimatima tasicecesha.

E-MIDDLE EAST

Nga-2006 satfola incwadzi levela endlunkhulu lebeyisitjela kutsi sabelwe e-Middle East. Besesitawuphindze futsi sibe netinkinga letinsha, sifundze letinye tilwimi nemasiko lamasha. Kunyenti besisetakufundza kulendzawo lenetinkinga letinyenti letibangwa tepolitiki nenkholo. Sakutsandza kwehluka kwetilwimi lebetikhona emabandleni futsi sabubona nebunye lebebungumphumela wekulalela ticondziso letivela enhlanganweni. Sabatsandza bazalwane betfu nabodzadze ngenca yekutsi linyenti labo belikubeketelele ngesibindzi kuphikiswa ngemalunga emndeni, labafundza nabo, labasebenta nabo nabomakhelwane.

Nga-2012 saya emhlangaweni wesifundza lokhetsekile lebewuseTel Aviv, ka-Israel. Bekukwekucala kutsi bantfu baJehova kulendzawo bahlangane babe licembu lelikhulu kangaka kusukela ngaliPhentekhoste langa-33 C.E. Asiyuze sisikhohlwe leso sikhatsi!

Kuleyo minyaka, sabelwa kutsi siyovakashela live lapho umsebenti wetfu uvinjelwe khona. Besihamba naletinye tetincwadzi tetfu, sishumayela futsi siya nasemihlangweni yesigodzi lemincane. Yonkhe indzawo bekugcwele emasotja lahlomile netindzawo lakuseshwa khona bantfu, kodvwa besitiva sivikelekile njengobe besihamba sicaphile nebamemeteli labambalwa.

SIBUYELA E-AFRICA

Nga-2013 satfola sabelo lesehlukile sekuyosebenta egatjeni leliseKinshasa, eCongo, lokulive lelikhulu futsi lelihle kodvwa lelihlaselwe kweswela futsi lelivame kuba netimphi. Sacale satsi: “Siyayati i-Africa; sikulungele kuya khona.” Kodvwa bekusekunyenti lebekufanele sikufundze, ikakhulukati nakutiwa endzabeni yekuhamba etindzaweni letite imigwaco nemabhuloho. Tinyenti tintfo letinhle lesatinaka, lokufaka ekhatsi kubeketela kanye nenjabulo bazalwane betfu nabodzadze lebebanayo ngisho nobe beswele, kutsi bebakutsandza kushumayela, kanye nemetamo bebayenta kuze babe khona emihlangaweni yelibandla neyesigodzi. Satibonela ngewetfu indlela umsebenti weMbuso lebewuphumelela ngayo ngenca yekutsi Jehova bekawusekela futsi awubusisa. Sifundze tifundvo letibalulekile kuleminyaka lesiyicitse eCongo sisemsebentini wasikhatsi sonkhe, futsi sitfole labanye bangani lesebafana nemndeni kitsi.

Ngasekupheleni kwa-2017, sabelwa kutsi siye eSouth Africa. Leli ligatja lelikhulu kunawo onkhe lesike sasebenta kuwo, futsi ngisho nemsebenti lesiwentako siyacala kuwenta. Nakhona kunyenti lesikufundzile, kodvwa tifundvo lesatitfola esikhatsini lesendlulile tasisita tasicondzisa. Siyabatsandza bazalwane betfu nabodzadze lesekuphele iminyaka bakhonta Jehova ngekwetsembeka. Kusijabulisa kakhulu nekubona umndeni waseBethel usebenta ngebunye ngisho nobe wakhiwa bantfu labanebuve lobehlukahlukene nemasiko langafani. Kuyabonakala kutsi Jehova ubabusisa ngekuthula bantfu bakhe njengobe bagcoka buntfu lobusha futsi basebentisa timiso teliBhayibheli.

Kuyo yonkhe leminyaka, mine naDebbie sitfole tabelo letisijabulisile, savumelana nemasiko lehlukahlukene futsi safundza tilwimi letinyenti letinsha. Bekungahlali kumelula, kodvwa sichubekile siluva lutsandvo lwaJehova lolucotfo asebentisa inhlangano yakhe nebazalwane nabodzadze. (Hla. 144:2) Siyaciniseka kutsi kuceceshwa lesikutfole emsebentini wasikhatsi sonkhe kusente saba tikhonti taJehova letincono.

Ngibonga kakhulu ngendlela batali bami labangikhulisa ngayo; kusekelwa ngumkami lengimtsandzako Debbie; kanye netibonelo letinhle tebazalwane nabodzadze labasemhlabeni wonkhe. Njengobe sibuke embili, sitimisele kuchubeka sifundza kuMfundzisi wetfu Lomkhulu.