‘Bita Labadzala Belibandla’

1. Jehova ukhombise njani kutsi tiligugu kuye timvu takhe?

TIMVU taJehova tiligugu kuye. Watitsenga ngengati yaJesu futsi waniketa labadzala belibandla umsebenti wekunakekela umhlambi wakhe. (Imis. 20:28) Nkulunkulu ufuna timvu takhe tiphatfwe kahle. Labadzala belibandla balandzela sicondziso saJesu ngekutsi bakhutsate bazalwane babo nabodzadze futsi babasite kutsi bahlale banebuhlobo lobuhle naJehova.​—Isa. 32:1, 2.

2. Bobani Jehova lanendzaba kakhulu nabo? (Hezekeli 34:15, 16)

² Jehova utikhatsalela kakhulu tonkhe timvu takhe, kodvwa unendzaba kakhulu naleto letinetinkinga. Kungenteka labanye banetinkinga ngenca yekutsi bente emaphutsa, futsi Jehova usebentisa labadzala belibandla kuze babasite. (Fundza Hezekeli 34:15, 16.) Nobe kunjalo, ufuna silucele lusito nasiludzinga. Ngetulu kwekuthantaza ngalokusuka enhlitiyweni sicele Nkulunkulu kutsi asisite etikhatsini letinjalo, kufanele sicele lusito ‘kubelusi nebafundzisi’ belibandla.​—Ef. 4:11, 12.

3. Sonkhe kungasisita njani kucoca ngemsebenti walabadzala belibandla?

³ Kulesihloko, sitawufundza ngekutsi Nkulunkulu ubasebentisa njani labadzala belibandla kuze basite labo lasebanebuhlobo lobubutsakatsaka naye. Sitawuphendvula nayi imibuto: Kunini lakufanele sicele khona lusito kulabadzala belibandla? Ngusiphi sizatfu sekukwenta loko? Basisita njani? Ngisho nobe sisete tinkinga nyalo, timphendvulo talemibuto titawusenta sibonge kakhulu ngekutsi Nkulunkulu usebentisa labadzala belibandla, futsi ngalelinye lilanga bangasindzisa kuphila kwetfu.

KUFANELE ‘SIBABITE NINI LABADZALA BELIBANDLA’?

4. Yini leyenta sephetse ngekutsi Jakobe 5:14-16, 19, 20 ukhuluma ngemuntfu losekanebuhlobo lobubutsakatsaka naNkulunkulu? (Buka netitfombe.)

⁴ Umfundzi Jakobe wachaza indlela Jehova labasebentisa ngayo labadzala belibandla kuze basisite. Wabhala watsi: “Ukhona yini logulako emkhatsini wenu? Akabite labadzala belibandla.” (Fundza Jakobe 5:14-16, 19, 20.) Lendzaba ikhombisa kutsi Jakobe bekakhuluma ngemuntfu losekanebuhlobo lobubutsakatsaka naJehova. Lona logulako utjelwa kutsi abite labadzala belibandla, hhayi dokotela. Ngetulu kwaloko, Jakobe uyachaza kutsi lomuntfu logulako welapheka ngekutsi kucolelwe tono takhe. Kuletinye timo, indlela lalashwa ngayo umuntfu losekanebuhlobo lobubutsakatsaka naNkulunkulu iyafana nendlela lalashwa ngayo umuntfu lonekugula lokutsite emtimbeni. Nasigula siya kudokotela, sichaze indlela lesitiva ngayo, futsi sente loko lakushoko. Ngendlela lefanako, nasebubutsakatsaka buhlobo betfu naNkulunkulu, kufanele siye kulomdzala welibandla, sichaze simo setfu futsi silandzele seluleko lesisekelwe eBhayibhelini lesisitfolako.

5. Singabona njani nangabe sesicale kuba nebuhlobo lobubutsakatsaka naNkulunkulu?

⁵ Jakobe sehluko 5 usikhutsata kutsi siye kulabadzala belibandla nasiva shengatsi sesicale kuba butsakatsaka ebuhlotjeni betfu naNkulunkulu. Kodvwa kukuhlakanipha lokukhulu kutsi sitfole lusito ngaphambi kwekutsi bulimale kakhulu buhlobo betfu naNkulunkulu! Akukafaneli sitikhohlise. ImiBhalo isecwayisa ngekutsi singatikhohlisa, sititjele kutsi sinebuhlobo lobuhle naJehova kantsi site. (Jak. 1:22) Lamanye emaKhristu aseSadesi alenta lelo phutsa, futsi Jesu wawatjela kutsi besekangasamjabulisi Jehova. (Semb. 3:1, 2) Lenye indlela lesingatihlola ngayo kutsi bunjani buhlobo betfu naJehova kutsi sicatsanise umdlandla lebesinawo ngaphambili ekukhonteni Nkulunkulu nalesinawo nyalo. (Semb. 2:4, 5) Singatibuta: ‘Selehlile yini lizinga lengikujabulela ngayo kufundza liBhayibheli nelekucabangisisa ngaloko lengikufundzako? Sengicale kungayilungiseleli yini leminye imihlangano futsi ngingabi khona kuleminye? Sewehlile yini umdlandla wekwenta umsebenti wekushumayela? Tekutijabulisa nobe kunaka tintfo lenginato sekutsatsa sikhatsi sami lesinyenti yini nemicabango yami?’ Nangabe uphendvula lomunye walemibuto nga-yebo, loko kungaba luphawu lwekutsi sewucala kuba butsakatsaka, futsi nangabe lesimo singalungiswa kungenteka sibe sibi kakhulu. Nangabe singakhoni kutilungisela lesimo nobe sesephule letinye timiso taNkulunkulu, kufanele sicele lusito kulabadzala belibandla.

6. Yini lokufanele bayente labo labente sono lesikhulu?

⁶ Liciniso, labo labente sono lesikhulu, lesingenta kutsi umuntfu asuswe ebandleni, kufanele baye kulomdzala welibandla. (1 Khor. 5:11-13) Nobe ngubani lowente sono lesikhulu udzinga lusito kuze alungise buhlobo bakhe naJehova. Kuze Jehova asicolele asebentisa inhlawulo, kufanele sente “imisebenti lekhombisa kuphendvuka.” (Imis. 26:20) Lemisebenti ifaka ekhatsi kuya kulabadzala belibandla nangabe sente sono lesikhulu.

7. Bobani labanye labadzinga lusito lwalabadzala belibandla?

⁷ Labadzala belibandla abagcini nje ngekusita labo labente sono lesikhulu, kodvwa baphindze basite labo lasebanebuhlobo lobubutsakatsaka naNkulunkulu. (Imis. 20:35) Sibonelo nje, kungenteka ukutfola kumatima kakhulu kulwa netifiso letimbi. Kungenteka loko kube matima kakhulu nangabe ngaphambi kwekutsi ufundze liciniso bewungene shi ekusebentiseni tidzakamiva, ekubukeleni titfombe letikhombisa kungcola nobe ekutiphatseni lokubi. Ungayilwi wedvwa lemphi. Ungakhuluma nalomdzala welibandla lotakulalela njengobe umchazela lesimo sakho, akunikete seluleko lesingakusita, futsi akucinisekise kutsi ungamjabulisa Jehova ngekutsi ungakwenti loku lokubi lokufisako. (Shu. 4:12) Nangabe sewudvumatekile kulemphi loyilwako, labadzala belibandla bangakukhumbuta kutsi kungenteka ubutsatsa njengalobubalulekile buhlobo bakho naJehova futsi awufuni kutetsemba kakhulu.​—1 Khor. 10:12.

8. Kufanele sikhulume nalabadzala belibandla ngawo onkhe yini emaphutsa lesiwentako? Chaza.

⁸ Kute sidzingo sekutsi ukhulume nalabadzala belibandla ngawo onkhe emaphutsa lowentako. Sibonelo nje, ase sitsi ushito intfo lemvisa buhlungu umzalwane nobe dzadze, mhlawumbe uze utfukutsele kakhulu. Kunekutsi uye kulomdzala welibandla, ungasebentisa seluleko saJesu lesimayelana nekwakha kuthula nemzalwane wakho nobe dzadze. (Mat. 5:23, 24) Ungacwaninga ngesihloko lesikhuluma ngemoya lophansi, kubeketela nekutibamba kuze ukhona kubukhombisa kakhulu lobuntfu lobuhle esikhatsini lesitako. Kodvwa nangabe solo ungakhoni kucatulula lenkinga lonayo, ungacela lomdzala welibandla kutsi akusite. Encwadzini layibhalela baseFiliphi, umphostoli Pawula wacela lomunye umzalwane longakashiwo ngeligama kutsi asite Evodiya naSintike kutsi bacatulule kungevani lebebanako, futsi nawe lomdzala welibandla lokulo angakusita ngendlela lefanako.​—Fil. 4:2, 3.

NGUSIPHI SIZATFU LESENTA SIBITE LABADZALA BELIBANDLA?

9. Kubaluleke ngani kutsi singawavumeli emahloni asente singababiti labadzala belibandla? (Taga 28:13)

⁹ Sidzinga kukholwa nesibindzi kuze sicele lusito nangabe sente sono lesikhulu nobe nasiva ngatsi asisakhoni kulwa netifiso letimbi. Akukafaneli sivumele emahloni asente singababiti labadzala belibandla. Ngasiphi sizatfu? Ngenca yekutsi Jehova usinike labadzala belibandla kuze basisite sibe nebuhlobo lobucinile naye. Ngako nasikhuluma nalabadzala belibandla sikhombisa kutsi siyametsemba Jehova futsi siyamlalela. Siyavuma nekutsi siyaludzinga lusito lwakhe nangabe sibona ngatsi sesitakuwa. (Hla. 94:18) Ngetulu kwaloko, nangabe sente sono, sitawutfola umusa waNkulunkulu nangabe sisivuma futsi sisishiye.​—Fundza Taga 28:13.

10. Yini lengenteka nasingetama kufihla tono tetfu?

¹⁰ Nangabe sikhuluma nalomdzala welibandla nasidzinga lusito singatfola tibusiso, kodvwa nangabe sifihla tono tetfu singenta lesimo sibe sibi kakhulu. Ngesikhatsi iNkhosi Davide yetama kufihla tono tayo, buhlobo bayo naNkulunkulu balimala, yacindzeteleka futsi yagula. (Hla. 32:3-5) Njengalapho umuntfu agula nobe alimele, nangabe buhlobo betfu naNkulunkulu bubutsakatsaka, lesimo singaba sibi kakhulu nangabe singasilungisi. Jehova uyakwati loko, kungako asicela kutsi ‘silungise tindzaba emkhatsini wetfu’ naye ngekutsi sikhulume nalabadzala belibandla labasebentisako kuze siphindze sibe bangani bakhe.​—Isa. 1:5, 6, 18.

11. Bebangatsintseka njani labanye kube besingafihla sono lesikhulu?

¹¹ Kube besingafihla sono lesikhulu lesisentile, loko bekungabatsintsa labanye. Singakuphazamisa kugeleta kwemoya waNkulunkulu ebandleni futsi sikubeke engotini kuthula kwebazalwane nabodzadze. (Ef. 4:30) Ngendlela lefanako, nangabe sati kutsi lotsite ebandleni wente sono lesikhulu, kufanele simkhutsate kutsi ayokhuluma nalabadzala belibandla ngalendzaba.a Kufihla sono lesikhulu lesentiwe ngulotsite kungenta kutsi natsi sibe nelicala. (Lev. 5:1) Kutsandza Jehova kufanele kusente kutsi siyibike lendzaba futsi sikhulume liciniso. Nasenta njalo, sitawube senta kutsi libandla lihlale lihlantekile futsi sisite nalologulako kutsi alungise buhlobo bakhe naJehova.

BASISITA NJANI LABADZALA BELIBANDLA?

12. Labadzala belibandla babasita njani labo lasebanebuhlobo lobubutsakatsaka naNkulunkulu?

¹² Labadzala belibandla banikwe umsebenti wekusita labo lasebanebuhlobo lobubutsakatsaka naNkulunkulu. (1 Thes. 5:14) Nangabe wente sono, kungenteka bakubute imibuto kuze bacondze loko lokucabangako nendlela lotiva ngayo. (Taga 20:5) Ungabambisana nabo ngekutsi ukhulume nabo ngalokukhululekile ngisho nobe ukutfola kumatima kwenta njalo ngenca yelisiko lakho, buntfu bakho nobe ngenca yemahloni ngalenkinga lonayo. Ungesabi kutsi emavi akho angabonakala ‘ayinkhulumo lengenangcondvo.’ (Jobe 6:3) Kunekutsi labadzala basheshe bafike esiphetfweni, batawutimisela kukulalelisisa futsi batfole wonkhe umcondvo wendzaba ngaphambi kwekukuniketa seluleko. (Taga 18:13) Bayati kutsi kwelusa umhlambi kudzinga sikhatsi, ngako abakalindzeli kutsi batawucatulula inkinga ngekutsi bacoce kanye kuphela nawe.

13. Labadzala belibandla bangasisita njani ngemithantazo yabo nangeseluleko lesiseBhayibhelini? (Buka netitfombe.)

¹³ Nawubita labadzala belibandla, batawenta konkhe lokusemandleni kuze bangangeti kulobuhlungu lesewuvele ubuva. Kunaloko, batawuthantaza nawe. Kungakujabulisa kutsi umthantazo wabo ungaba ‘nemandla kakhulu.’ Indlela labakusita ngayo iphindze ifake ekhatsi ‘kukugcoba ngemafutsa egameni laJehova.’ (Jak. 5:14-16) ‘Lamafutsa’ asho liciniso leliseVini laNkulunkulu. Ngekulisebentisa ngelikhono liBhayibheli, labadzala belibandla bangakukhutsata futsi bakudvudvute, bakusite ulungise buhlobo bakho naJehova. (Isa. 57:18) Seluleko lesiseBhayibhelini labatakunika sona singakwenta utimisele kakhulu kuchubeka wenta lokulungile. Asebentisa bona, ungeva livi laJehova litsi: ‘Nayi indlela. Hamba ngayo.’​—Isa. 30:21.

14. Ngekusho kwembhalo waKubaseGalathiya 6:1, labadzala belibandla babasita njani labo ‘labatsetse sinyatselo lesingasiso’? (Buka netitfombe.)

¹⁴ Fundza KubaseGalathiya 6:1. UmKhristu ‘lotsatsa sinyatselo lesingasiso’ akahambi ngekuvumelana netimiso taNkulunkulu letilungile. Lesinyatselo lesingasiso singasho kwenta sincumo lesingakahlakaniphi nobe kwenta sono lesikhulu. Ngenca yelutsandvo, labadzala belibandla ‘betama kumsita ngemoya lomuhle umuntfu lonjalo.’ Ligama lesiGriki lelihunyushwe ngekutsi “kumsita” lingaphindze lichaze kubuyisela litsambo lelisuke endzaweni yalo kuze umuntfu angakhubateki. Njengobe dokotela lonelikhono etama kulungisa litsambo lelephukile kepha abe angamvisi kakhulu buhlungu lona lolimele, labadzala belibandla betama kusita lona losekanebuhlobo lobubutsakatsaka naNkulunkulu kepha babe bangamngeteli buhlungu kulobu lasavele anabo. LiBhayibheli liphindze litjele labadzala belibandla kutsi ‘baticaphele.’ Njengobe basisita kutsi silungise tindlela tetfu, bayati kutsi nabo banesono futsi kungenteka batsatse sinyatselo lesingasiso. Ngako batawuciniseka kutsi abatiphakamisi, batibone balunge kakhulu, nobe babacabangele lokubi labanye, kunaloko batawetama kubakhombisa luvelo.​—1 Phet. 3:8.

15. Yini lesingayenta nasinenkinga?

¹⁵ Singabetsemba labadzala belibandla. Baceceshiwe kuze bangatitjeli muntfu tindzaba tetfu letiyimfihlo, seluleko sabo basisekela eBhayibhelini kunasemibonweni yabo futsi bachubeka basisita sikhone kubhekana netinkinga tetfu. (Taga 11:13; Gal. 6:2) Buntfu babo nelwati labanalo akufanani, kodvwa singakhululeka siye kunobe ngumuphi siyomtjela ngenkinga lesinayo. Kuliciniso kutsi angeke sisuke kulomunye lomdzala welibandla siye kulomunye sicela seluleko, sinelitsemba lekutsi munye wabo utasitjela loko lesifuna kukuva. Kube besingenta njalo, besingafana nalabo labafuna ‘kukitatwa tindlebe’ kunekutsi bafundze “imfundziso lephilile” leseVini laNkulunkulu. (2 Thim. 4:3) Nasiya kulomdzala welibandla ngenkinga lesinayo, kungenteka asibute kutsi ukhona yini lomdzala besesimtjelile ngalenkinga nekutsi ngusiphi seluleko lasinike sona. Ngetulu kwaloko, kutfobeka kungamenta kutsi acele seluleko kulomunye lomdzala welibandla.​—Taga 13:10.

UMTFWALO NGAMUNYE WETFU LANAWO

16. Umuntfu ngamunye unamuphi umtfwalo?

¹⁶ Nanobe labadzala belibandla basinakekela njengobe sitimvu taNkulunkulu, abasitjeli loko lokufanele sikwente. Umuntfu ngamunye unemtfwalo wekuphila ngendlela levumelana nekutinikela kuNkulunkulu. Kufanele siphendvule kuNkulunkulu ngenca yaloko lesikushoko nalesikwentako. Ngekusitwa nguye, singakhona kuchubeka sicotfo. (Rom. 14:12) Ngako kunekutsi labadzala basitjele loko lokufanele sikwente, basenta sinake indlela Nkulunkulu lacabanga ngayo njengobe itfolakala eVini lakhe. Ngekusebentisa seluleko sabo lesisekelwe eBhayibhelini, ‘singacecesha tingcondvo’ tetfu kuze sente tincumo letihlakaniphile.​—Heb. 5:14.

17. Yini lokufanele sitimisele kuyenta?

¹⁷ Sibonga kakhulu ngekutsi sitimvu taJehova! Jehova watfumela “umelusi lolungile,” lokunguJesu, kutsi akhiphe inhlawulo ngenca yetfu kuze sibe nelitfuba lekuphila phakadze. (Joh. 10:11) Asebentisa labadzala belibandla, Jehova usifezile setsembiso sakhe lesitsi: “Ngitawubese ngininiketa belusi labenta intsandvo yami, futsi batanenta nibe nelwati nekucondza.” (Jer. 3:15) Nasibutsakatsaka ebuhlotjeni betfu naNkulunkulu, kufanele singesabi kubita labadzala belibandla kuze basisite. Shengatsi singatimisela kubasebentisa ngalokugcwele labadzala belibandla.