Yenta Imetamo Kute Utfutfukise Kuthula Kubantfu BaNkulunkulu

1, 2. Asho kutsini emavi latsi ‘senabelo setinyawo’ emiBhalweni yesiHebheru?

JEHOVA NKULUNKULU watsi: “Lizulu lisihlalo sami sebukhosi, umhlaba usenabelo setinyawo tami.” (Isaya 66:1) Nkulunkulu abekhuluma ‘ngesenabelo setinyawo takhe’ nakatsi: “Ngiyakuyikhatimulisa indzawo yetinyawo tami.” (Isaya 60:13) Usikhatimulisa njani senabelo setinyawo takhe, nobe asente sibe sihle? Futsi loko kusho kutsini ngalabo labaphila emhlabeni, losenabelo setinyawo takhe?

² EmiBhalweni yesiHebheru emavi latsi ‘senabelo setinyawo’ aphindze asetjentiswe nakuchazwa lithempeli laka-Israyeli wasendvulo. (1 Tikhronike 28:2; Tihlabelelo 132:7) Lelithempeli belilihle kakhulu kuJehova ngobe laliyindzawo leyinhloko yekukhonta kweliciniso. Lalisetjentiselwa nekukhatimulisa Jehova emhlabeni.

3. Yini lengumgogodla wekukhonta kweliciniso lamuhla, futsi yacala nini kuba khona?

³ Yini lengumgogodla wekukhonta kweliciniso lamuhla? Akusiso sakhiwo lesifanana nelithempeli. Kodvwa lithempeli laNkulunkulu lelimkhatimulisa kwendlula nobe ngusiphi sakhiwo lesingase sibe khona. Liyini lelithempeli laNkulunkulu? Lililungiselelo lakhe lelenta bantfu kutsi babe bangani bakhe futsi bamkhonte. Lelilungiselelo likhona ngesizatfu senhlawulo yaJesu. Lacala nga-29 C.E. ngesikhatsi Jesu abhajatiswa futsi agcotjwa njengemPhristi Lophakeme welithempeli laNkulunkulu.​—Hebheru 9:11, 12.

4, 5. (a) Ngekusho kweTihlabelelo 99, yini tikhonti taJehova teliciniso letifuna kuyenta? (b) Ngumuphi umbuto lokufanele sitibute wona?

⁴ Sijabula kakhulu ngelilungiselelo laNkulunkulu lekukhonta kweliciniso. Sikhombisa kubonga kwetfu ngekutsi sitjele labanye ngelibito laJehova nangesipho sakhe lesihle senhlawulo. Sijabula kakhulu nangekutsi kunemaKhristu eliciniso langetulu kwetigidzi letisiphohlongo ladvumisa Jehova onkhe emalanga. Njengobe bantfu labanyenti labasenkholweni yemanga bacabanga kutsi batawudvumisa Nkulunkulu ezulwini ngemuva kwekufa kwabo, bantfu baJehova bayayati indlela lokubaluleke ngayo kumdvumisa nyalo khona lapha emhlabeni.

⁵ Nasidvumisa Jehova, sisuke silingisa sibonelo setinceku taNkulunkulu letetsembekile letichazwa kuTihlabelelo 99:1-3, 5. (Fundza.) Emadvodza letsembekile lafaka ekhatsi Mosi, Aroni kanye naSamuweli alisekela ngalokugcwele lilungiselelo laNkulunkulu lekukhonta kweliciniso esikhatsini lesendlulile. (Tihlabelelo 99:6, 7) Ngaphambi kwekutsi labagcotjiwe labasesemhlabeni bakhonte njengebaphristi naJesu ezulwini, ngekwetsembeka bakhonta Jehova eluhlangotsini lolusemhlabeni lwalelithempeli laNkulunkulu lamuhla. Tigidzi ‘taletinye timvu’ tibasekela ngekwetsembeka. (Johane 10:16) Omabili lamacembu akhonta Jehova ngebunye. Nanobe kunjalo, kufanele sitibute: ‘Ngilisekela ngalokugcwele yini lilungiselelo laJehova lekukhonta kweliciniso?’

KUBONA LABO LABAKHONTA ETHEMPELINI LANKULUNKULU

6, 7. Nguyiphi inkinga leyacala ebandleni lebuKhristu langelikhulu lekucala, futsi yini leyenteka ngemnyaka wanga-1919?

⁶ Ingakapheli iminyaka lengu-100 kusungulwe libandla lebuKhristu, kwacala kuhlubuka njengobe kwakubiketelwe. (Imisebenti 20:28-30; 2 Thesalonika 2:3, 4) Ngemuva kwaleso sikhatsi, kwaba matima kakhulu kubona tikhonti taNkulunkulu teliciniso. Kwaphela emakhulu eminyaka ngaphambi kwekutsi Jehova asebentise Jesu kute avete kutsi bobani lebebamkhonta ethempeli laKhe.

⁷ Nga-1919, labo labebemukelwe nguNkulunkulu kutsi bakhonte ethempelini lakhe babonakala ngalokucacile. Bebente lushintjo kute Jehova akwemukele kukhonta kwabo. (Isaya 4:2, 3; Malakhi 3:1-4) Ngako kwagcwaliseka umbono umphostoli Pawula lawubona eminyakeni lengemakhulu leyendlulile.

8, 9. Liyini ‘lipharadisi’ lelabonwa nguPawula embonweni?

⁸ Umbono waPawula uchazwe ku2 Khorinte 12:1-4. (Fundza.) Kulombono, Jehova wakhombisa Pawula lokutsite lobekutawenteka esikhatsini lesitako. Liyini ‘lelipharadisi’ lelabonwa nguPawula? Kwekucala, lingamelela liPharadisi mbamba lelitawuba lamhlabeni ngekushesha. (Lukha 23:43) Kwesibili, lingamelela kuthula kubantfu baNkulunkulu emhlabeni lomusha. Kwesitsatfu, lingamelela simo lesihle “lesisepharadisi laNkulunkulu” ezulwini.​—Sembulo 2:7.

⁹ Kodvwa kungani Pawula atsi ‘weva emavi langeke akhulunywe nalokute umuntfu lovumeleke kuwakhuluma’? Kungobe sasisengakefiki sikhatsi sekutsi achaze imininingwane yetintfo letinhle labetibone kulombono. Lamuhla Jehova uyasivumela kutsi sitjele labanye ngetibusiso bantfu bakhe labatijabulelako nyalo!

10. Kungani kuthula kubantfu baNkulunkulu kungafanani nelithempeli laNkulunkulu?

¹⁰ Kuyini kuthula kubantfu baNkulunkulu lesivame kukhuluma ngako? Kusimo lesikhetsekile sekuthula Nkulunkulu lakunika bantfu bakhe. Ngako kuthula kubantfu baNkulunkulu akufanani nelithempeli laNkulunkulu. Lithempeli laNkulunkulu lililungiselelo lakhe lekukhonta kweliciniso. Kuthula kubantfu baNkulunkulu kubaveta ngalokucacile labo labemukelwa nguye futsi labamkhonta ethempelini lakhe.​—Malakhi 3:18.

11. Nguliphi lilungelo lesinalo lamuhla?

¹¹ Kuyajabulisa kwati kutsi kusukela nga-1919, Jehova uvumele bantfu labanesono kutsi bakhutsatane, bacinisane futsi bandzise kuthula kubantfu baNkulunkulu. Uyaliphonsa yini litje esivivaneni kulomsebenti? Uyalijabulela yini lilungelo lekusebenta naJehova kute umkhatimulise emhlabeni?

JEHOVA WENTA KUTSI INHLANGANO YAKHE IBE YINHLE KAKHULU

12. Sati njani kutsi Isaya 60:17 sewugcwalisekile? (Buka sitfombe lesisekucaleni kwalesihloko.)

¹² Umphrofethi Isaya waphrofetha kutsi bekutawenteka tingucuko letinyenti letinhle eluhlangotsini lolusemhlabeni lwenhlangano yaNkulunkulu. (Fundza Isaya 60:17.) EmaKhristu lasemasha ngeminyaka nobe lasandza kuhlanganyela afundzile nobe eva ngematekelo ngaletingucuko. Kodvwa kunebazalwane nabodzadze labanyenti lababe nelilungelo lekutibonela ngewabo letingucuko letimangalisako. Letinceku letetsembekile tiyaciniseka kutsi Nkulunkulu usebentisa iNkhosi yetfu Jesu kute ahole futsi acondzise inhlangano yaKhe! Nasilalela loko labasicocela kona labazalwane lesibatsandzako, kukholwa kwetfu kuJehova kanye nekumetsemba kwetfu kutawucina.

13. Yini lokufanele siyente ngekusho kweTihlabelelo 48:12-14?

¹³ Onkhe emaKhristu eliciniso kufanele atjele bantfu ngenhlangano yaJehova. Kuyamangalisa kutsi nanobe siphila eveni lelibi laSathane, kodvwa sinekuthula kanye nebunye nebazalwane betfu emhlabeni wonkhe. Ngenjabulo kufanele silandzisele “titukulwane letitako” mayelana nenhlangano yaJehova nangekuthula kubantfu baNkulunkulu!​—Fundza Tihlabelelo 48:12-14.

14, 15. Ngutiphi tingucuko letentiwa ngemuva kwa-1970, futsi inhlangano izuze njani kuto?

¹⁴ Bazalwane labanyenti lasebakhulile emabandleni etfu, batibonele ngewabo tingucuko letente luhlangotsi lolusemhlabeni lwenhlangano yaJehova kutsi lube luhle kakhulu. Basakhumbula ngesikhatsi emabandla anenceku yelibandla esikhundleni sekuba nesigungu salabadzala, ngesikhatsi emave asenenceku yeligatja esikhundleni sekuba neKomidi Yeligatja nangesikhatsi kungumengameli we-Watch Tower Society lonika ticondziso esikhundleni sekutsi kube Sigungu Lesibusako saBoFakazi BaJehova. Nanobe bonkhe labazalwane bebanebasiti labetsembekile, munye umuntfu lobekanemtfwalo wekutsatsa tincumo ebandleni, emahhovisini eligatja nasendlunkhulu yemhlaba wonkhe. Ngemuva kwa-1970, kwentiwa lushintjo kute kube tigungu talabadzala letinemtfwalo wekutsatsa tincumo kunekutsi kube ngumuntfu munye.

¹⁵ Kungani letingucuko tiyizuzisile inhlangano? Kungobe betisekelwe ekuyicondzeni kancono imiBhalo. Esikhundleni sekutsi kube ngumuntfu munye lotsatsa tonkhe tincumo, inhlangano iyazuza emakhonweni lamahle abo bonkhe bazalwane labadzala, nobe “tipho letibantfu,” lesitinikwe nguJehova.​—Efesu 4:8; Taga 24:6.

16, 17. Ngutiphi tingucuko takamuva letikujabulisile, futsi ngani?

¹⁶ Cabanga ngetingucuko takamuva letentiwe etincwadzini tetfu. Sijabulela kunika bantfu tincwadzi letilusito naletibakhangako emsebentini wetfu wekushumayela. Cabanga futsi nangendlela lesisebentisa ngayo tintfo takamuva tebucwepheshe kute sishumayele tindzaba letimnandzi. Sibonelo saloku kutsi i-website yetfu letsi jw.org ifinyelela kubantfu labanyenti kute batfole lusito labaludzinga sibili. Kuto tonkhe letingucuko, sibona lutsandvo lolujulile Jehova lanalo ngebantfu.

¹⁷ Siphindze sitijabulele tingucuko letentiwe emihlanganweni yelibandla kute sitewuba nesikhatsi sekukhonta kwemndeni nesekuba nesifundvo lesitichubela sona. Siyatijabulela netingucuko letentiwe eluhlelweni lwetfu lwemihlangano lemincane nalemikhulu. Letingucuko tibonakala tiba tinhle umnyaka ngemnyaka! Sibonga kakhulu nangekuceceshwa lesikutfola etikolweni letinyenti teliBhayibheli. Kuto tonkhe letingucuko, kuyacaca kutsi Jehova ucondzisa inhlangano yakhe nekutsi uyachubeka enta kuthula kubantfu bakhe kube kuhle kakhulu!

INDLELA LESISITA NGAYO KUTE KUTHULA KUBANTFU BANKULUNKULU KUBE KUHLE KAKHULU

18, 19. Singasita njani ekwenteni kuthula kubantfu baNkulunkulu kube kuhle kakhulu?

¹⁸ Jehova usinikete lilungelo lekusita kute sente kuthula kubantfu bakhe kube kuhle kakhulu. Sikwenta njani loko? Ngekutsi sitishumayele ngekutimisela tindzaba letimnandzi teMbuso nangekwenta bafundzi labanyenti. Ngaso sonkhe sikhatsi nasisita umuntfu kutsi abe yinceku yaNkulunkulu, sisuke senta kutsi kwandze kuthula kubantfu baKhe.​—Isaya 26:15; 54:2.

¹⁹ Nasitfutfukisa buntfu betfu bebuKhristu sisuke senta kuthula kubantfu baNkulunkulu kube kuhle. Loku kusita ekwenteni kutsi kuthula kubantfu baNkulunkulu kukhange labanye. Ngetulu kwelwati lwemiBhalo, kutiphatsa kwetfu lokumsulwa nalokunekuthula ngiko lokucale kudvonsele bantfu enhlanganweni kuphindze kubente batsandze Nkulunkulu naJesu.

20. Ngekusho kweTaga 14:35, yini lokufanele sifise kuyenta?

²⁰ Asingabati kutsi Jehova naJesu bajabula kakhulu nababona kuthula lesinako enhlanganweni lamuhla. Injabulo lesinayo nyalo yekwenta kuthula kubantfu baNkulunkulu kube kuhle kakhulu imane nje ingemantjontjo enjabulo lesitawuba nayo nasesenta umhlaba ube lipharadisi. Kufanele sihlale sikhumbula Taga 14:35 letitsi: “Inkhosi itsandza inceku yayo leyenta tintfo ngemphumelelo.” Shengatsi singahlakanipha njengobe sitimisela ekwenteni kuthula kubantfu baNkulunkulu kube kuhle!