Ungasifaka Njani Sandla Ekuciniseni Bunye Betfu Njengobe SingemaKhristu?

1. Kusukela ekucaleni, imisebenti yaNkulunkulu beyibonakala ngani?

JEHOVA naJesu bebasolo banebunye kusukela ekucaleni kwekudala. Jehova wadala Jesu ngaphambi kwekutsi adale tonkhe letinye tintfo. Jesu wabese usebenta naye futsi ‘abeseceleni kwakhe njengengcweti yekwakha.’ (Taga 8:30) Tinceku taJehova nato betibambisana emsebentini lobekufanele tiwente. Nasi sibonelo: Nowa nemndeni wakhe bakha umkhumbi ndzawonye. Ngekuhamba kwesikhatsi, ema-Israyeli akha lithende lekukhontela ndzawonye, alehlukanisa, aphindze alisusa kulenye indzawo aliyisa kulenye. Nakasethempelini, bekahlabela futsi adlala tinsimbi temculo ndzawonye kute advumise Jehova ngemculo lomnandzi. Bantfu baJehova bebakhona kwenta tonkhe letintfo ngenca yekutsi bebabambisana.​—Genesisi 6:14-16, 22; Numeri 4:4-32; 1 Tikhronike 25:1-8.

2. (a) Yini lebeyicapheleka ngelibandla lebuKhristu langelikhulu lekucala? (b) Ngumiphi imibuto lesitawucoca ngayo?

² EmaKhristu angelikhulu lekucala abebambisana. Umphostoli Pawula wachaza kutsi nanobe lamaKhristu abenemakhono nemisebenti lengafani, kodvwa bekanebunye. Onkhe abelandzela Jesu Khristu, uMholi wawo. Pawula wawafanisa nemtimba lonetitfo letinyenti letisebenta ndzawonye. (Fundza 1 Khorinte 12:4-6, 12.) Kodvwa kutsiwani ngatsi lamuhla? Singabambisana njani nalabanye emsebentini wekushumayela, ebandleni kanye nasemndenini?

BAMBISANANI EMSEBENTINI WEKUSHUMAYELA

3. Yini umphostoli Johane layibona embonweni?

³ Ngelikhulu lekucala, umphostoli Johane wabona umbono wetingilosi letisikhombisa lebetishaya emacilongo. Ngesikhatsi ingilosi yesihlanu ishaya licilingo layo, Johane wabona “inkhanyeti leyawela emhlabeni isuka ezulwini.” ‘Lenkhanyenti’ yasebentisa sikhiya kute ivule umgodzi lomnyama longenamkhawulo. Kwacale kwaphuma intfutfu lemnyama tsu kulomgodzi, kwase kuphuma libulo lesikhonyane kulentfutfu. Esikhundleni sekutsi silimate tihlahla nobe titjalo, lesikhonyane sahlasela labo “labete luphawu lwaNkulunkulu emabuntini abo.” (Sembulo 9:1-4) Johane bekati kutsi lelibulo lesikhonyane lingenta umonakalo lomkhulu, njengobe lawenta naseGibhithe ngesikhatsi saMosi. (Eksodusi 10:12-15) Lesikhonyane Johane lasibona simelela emaKhristu lagcotjiwe labekasolo ashumayela umlayeto lonemandla ngalokumelene nenkholo yemanga. Tigidzi tebantfu labakubuke ngalabovu kuphila emhlabeni, nato tihlanganyela nabo ekushumayeleni lomlayeto. Bamunye ekushumayeleni. Lomsebenti usite bantfu labanyenti kutsi bashiye inkholo yemanga futsi bakhululeke ekucondzisweni nguSathane.

4. Ngumuphi umsebenti bantfu baNkulunkulu lokufanele bawente, futsi nguyiphi indlela lokukuphela kwayo labangawenta ngayo?

⁴ Natsi sinemsebenti wekushumayela “tindzaba letimnandzi” kubantfu emhlabeni wonkhe ngaphambi kwekutsi kufike kuphela. Lomsebenti mkhulu kakhulu! (Matewu 24:14; 28:19, 20) Kufanele simeme bonkhe ‘labomile’ kutsi batewunatsa “emanti ekuphila,” lokusho kutsi kufanele sibafundzise liciniso leliBhayibheli bonkhe labo labafuna kulati. (Sembulo 22:17) Kodvwa lomsebenti singawenta kuphela nangabe ‘sihlanganiswe ngekuvumelana’ futsi sibambisene ebandleni.​—Efesu 4:16.

5, 6. Siba munye ngayiphi indlela njengobe sishumayela tindzaba letimnandzi?

⁵ Kuze sitfole bantfu labanyenti, kufanele sihleleke nasisemsebentini wekushumayela. Sicondziso lesisitfola ebandleni siyasisita kutsi sikhone kuwenta lomsebenti. Ngemuva kwemhlangano wangaphambi kwekuya ensimini, siyaphuma siyococela labanye tindzaba letimnandzi teMbuso. Siphindze sibanikete tincwadzi letisekelwe eBhayibhelini. Ecinisweni, sesitinikete tigidzi tebantfu emhlabeni wonkhe. Ngaletinye tikhatsi siyacelwa kutsi sihlanganyele emikhankasweni lekhetsekile yekushumayela. Nawenta lomsebenti, usuke ubambisene netigidzi tebantfu letishumayela lomlayeto lofanako emhlabeni wonkhe. Usuke usebenta nanetingilosi letisita bantfu baNkulunkulu kutsi bashumayele tindzaba letimnandzi.​—Sembulo 14:6.

⁶ Nasifundza “INcwadi Yonyaka,” kuyasijabulisa kufundza ngemiphumela leba khona emsebentini wetfu wekushumayela emhlabeni wonkhe. Cabanga nje nangendlela lesibambisana ngayo emhlabeni wonkhe nasimemela bantfu emihlanganweni yetfu lemikhulu. Kulemihlangano, sonkhe sifundziswa intfo lefanako. Tinkhulumo, emadrama kanye nemiboniso kusikhutsata kutsi simnikete lokuncono Jehova. Siphindze sibambisane nebazalwane nabodzadzewetfu labasemhlabeni wonkhe nasihlangana minyaka yonkhe eSikhumbutweni. (1 Khorinte 11:23-26) Emhlabeni wonkhe sihlangana ngelilanga lelifanako, ngaNisan 14, ngemuva kwekushona kwelilanga, kuze sikhombise kubonga ngaloko Jehova lasentele kona futsi sisuke silalela umyalo waJesu. Nakusesele emaviki lambalwa kube Sikhumbuto, sisebenta ndzawonye kuze simeme bantfu labanyenti kutsi babe khona kulomkhosi lobalulekile.

7. Njengobe sisebenta ndzawonye, yini lesikhona kuyenta?

⁷ Mncane umonakalo longentiwa yintsetse yesikhonyane nayiyinye. Nawe angeke ukhone kushumayela kubo bonkhe bantfu nawuwedvwa. Kodvwa ngenca yekutsi sisebenta ndzawonye, siyakhona kutjela tigidzi tebantfu ngaJehova futsi sitisite timdvumise.

BAMBISANANI EBANDLENI

8, 9. (a) Ngumuphi umfanekiso Pawula lawusebentisa kute afundzise emaKhristu kutsi ahlale anebunye? (b) Singabambisana njani ebandleni?

⁸ Pawula wachazela base-Efesu indlela libandla lelihlelwe ngayo, futsi watsi bonkhe ebandleni kufanele ‘bakhule kuto tonkhe tintfo.’ (Fundza Efesu 4:15, 16.) Wabekisa ngemtimba kuze achaze kutsi umKhristu ngamunye angasita ekwenteni libandla libe nebunye futsi lilandzele Jesu, uMholi welibandla. Watsi tonkhe titfo temtimba tiyabambisana “ngawo onkhe emalunga lenta lokudzingekile.” Ngako ngisho nobe sibancane nobe sibadzala, sinemphilo lenhle nobe sibutsakatsaka, yini ngamunye wetfu lokufanele ayente?

⁹ Jesu ubeke labadzala kutsi bahole ebandleni, futsi ufuna sibahloniphe futsi silalele neticondziso labasinika tona. (Hebheru 13:7, 17) Loku akusiko melula kukwenta ngaso sonkhe sikhatsi. Kodvwa singamcela Jehova kutsi asisite. Umoya wakhe longcwele ungasisita kutsi silalele nobe ngabe ngutiphi ticondziso labadzala labasiniketa tona. Cabanga nangendlela lesingasita ngayo libandla nangabe sitfobekile futsi sibambisana nalabadzala. Libandla letfu litawuba nebunye, futsi sitawutsandzana kakhulu.

10. Tinceku letisebentako tilisita njani libandla kutsi libe nebunye? (Buka sitfombe lesisekucaleni kwalesihloko.)

¹⁰ Tinceku letisebentako nato tiyasita kute tigcine libandla linebunye. Tisebenta ngekutimisela kute tisite labadzala, futsi siyajabula ngemsebenti wato. Nasi sibonelo: Tinceku letisebentako tiyaciniseka kutsi sinetincwadzi letenele lesitatisebentisa ensimini, futsi temukela nalabo labasivakashele emihlanganweni yetfu. Tiphindze tisite ekulungiseni liHholwa leMbuso nekuligcina lihlobile. Nasibambisana nalabazalwane, sisuke sikhombisa kutsi sinebunye futsi sikhonta Jehova ngendlela lehlelekile.​—Catsanisa neMisebenti 6:3-6.

11. Yini bantfu labasha labangayenta kute basite libandla kutsi libe nebunye?

¹¹ Labanye labadzala sebanesikhatsi lesidze basebenta ngekutimisela ebandleni. Kodvwa kungenteka abasakhoni kwenta imisebenti leminyenti ngobe sebakhulile. Bazalwane labasebasha bangasita. Nabaceceshiwe, bangakhona kwenta imisebenti leminyenti ebandleni. Nangabe tinceku letisebentako tisebenta ngekutimisela, tingakhona kuba ngulabadzala belibandla esikhatsini lesitako. (1 Thimothi 3:1, 10) Labanye labadzala belibandla labasebasha batfutfuke kakhulu. Nyalo bababonisi betigodzi, futsi basita bazalwane nabodzadzewetfu emabandleni lamanyenti. Siyajabula nangabe bantfu labasha bakhonta bazalwane nabodzadzewetfu ngekutitsandzela.​—Fundza Tihlabelelo 110:3; Umshumayeli 12:1.

BAMBISANANI EMNDENINI

12, 13. Yini lengasita bonkhe emndenini kutsi babambisane?

¹² Singawasita njani emalunga emndeni yetfu kutsi abambisane? Kukhonta kwemndeni lokwentiwa njalo ngeliviki kungasita. Nangabe batali nebantfwana bacitsa sikhatsi ndzawonye bafundza ngaJehova, batawutsandzana kakhulu. Ngaleso sikhatsi bangaprakthiza loko labatakusho ensimini, futsi loko kutawubasita bonkhe kutsi bakulungele kushumayela. Nangabe beva labanye emndenini bakhuluma ngetimfundziso teliBhayibheli, babona nekutsi wonkhe umndeni uyamtsandza Jehova futsi ufuna kumjabulisa, basondzelana kakhulu.

¹³ Indvodza nemfati bangabambisana njani? (Matewu 19:6) Nangabe bamtsandza Jehova futsi bamkhonta ndzawonye, batawujabula futsi babe nebunye emshadweni. Kufanele bakhombise kutsi bayatsandzana, njengobe kwenta Abrahama naSara, Isaka naRebheka kanye na-Elkhana naHana. (Genesisi 26:8; 1 Samuweli 1:5, 8; 1 Phetro 3:5, 6) Nangabe indvodza nemfati bakwenta loko, batawuba nebunye futsi basondzelane naJehova.​—Fundza Umshumayeli 4:12.

14. Nangabe indvodza yakho nobe umkakho angamkhonti Jehova, yini longayenta kute ugcine umshado wakho ucinile?

¹⁴ LiBhayibheli likusho ngalokucacile kutsi kufanele singashadi nemuntfu longamkhonti Jehova. (2 Khorinte 6:14) Kodvwa kunebazalwane nabodzadze labashade nebantfu labangasibo BoFakazi BaJehova. Labanye bafundze liciniso sebashadile, futsi balingani babo abazange babe BoFakazi. Labanye kungenteka kutsi bashada bamkhonta Jehova, kodvwa ngekuhamba kwesikhatsi munye wabo wayekela kuba nguFakazi. Kuletimo, emaKhristu enta konkhe lokusemandleni awo kute agcine imishado yawo icinile ngekutsi alalele seluleko seliBhayibheli. Loku ngeke kube melula ngaso sonkhe sikhatsi. Nasi sibonelo: Mary nendvodza yakhe, David, bebakhonta Jehova. Ngekuhamba kwesikhatsi, David wase uyayekela kuya emihlanganweni. Kodvwa Mary wetama kuba ngumfati lokahle futsi wakhombisa buntfu bebuKhristu. Waphindze wafundzisa bantfwana bakhe labasitfupha ngaJehova, futsi wachubeka aya esifundvweni nasemihlanganweni lemikhulu. Ngemuva kweminyaka leminyenti, labantfwana sebakhulile futsi sebahambile ekhaya, Mary wachubeka akhonta Jehova ngisho nobe besekumatima kakhulu. Kodvwa David wacala kufundza bomagazini labekabashiyelwa nguMary. Ngekuhamba kwesikhatsi wase ucala kuya kuleminye imihlangano. Umtukulu wakhe loneminyaka lesitfupha budzala bekahlale ambekela indzawo yekuhlala, futsi nangabe angaketi David, lomfanyana bekatsi: “Mkhulu, bengikukhumbulile lamuhla esifundvweni.” David wabuyela kuJehova ngemuva kweminyaka lengu-25, futsi yena nemkakhe bayajabula kutsi nyalo sebakhonta Jehova ndzawonye.

15. Bantfu lasebanesikhatsi lesidze bashadile bangabasita njani labasandza kushada?

¹⁵ Sathane uhlasela imindeni lamuhla. Kungaleso sizatfu indvodza nemfati labakhonta Jehova kufanele babambisane. Ngisho nobe sewunesikhatsi lesidze ushadile, cabanga ngaloko longakusho nobe ukwente kuze ucinise umshado wakho. Nangabe seninesikhatsi lesidze nishadile, ningaba sibonelo lesihle kulabo labasandza kushada. Mhlawumbe ningamema labo labasandza kushada kutsi babekhona ekukhonteni kwenu kwemndeni. Batawubona kutsi nobe seninesikhatsi lesidze kangakanani nishadile, kufanele nitsandzane futsi nibe nebunye.​—Thithusi 2:3-7.

“WOTANI, SENYUKELE ENTSABENI” YAJEHOVA

16, 17. Yini inceku taNkulunkulu letinebunye letibheke phambili kuyo?

¹⁶ Ngalesikhatsi ema-Israyeli aya emibutsanweni lebeyiba seJerusalema, bewabambisana. Bewalungiselela konkhe labetakudzinga endleleni. Bewahamba kanye kanye futsi asitana. Ethempelini, bakadvumisa futsi akhonte Jehova ndzawonye. (Lukha 2:41-44) Lamuhla, njengobe silungela kuphila emhlabeni lomusha kufanele sibe munye futsi sente konkhe lesingakwenta kute sibambisane. Ngutiphi tindlela locabanga kutsi singakwenta ngato loko?

¹⁷ Bantfu kulomhlaba baphikisana ngetintfo letinyenti futsi baze balwe. Kodvwa siyambonga Jehova ngekusisita sibe nekuthula nekutsi sati liciniso. Bantfu bakhe emhlabeni bamkhonta ngendlela lafuna ngayo, futsi kulamalanga ekugcina bamunye kwengca sikhatsi lesendlulile. Kunjengobe Isaya naMikha baphrofetha kutsi senyukela “entsabeni” yaJehova simunye. (Isaya 2:2-4; fundza Mikha 4:2-4.) Sitawujabula kakhulu emhlabeni lomusha ngesikhatsi bonkhe bantfu ‘sebahlanganiswe kanye kanye ngekuvumelana’ futsi bamunye ekukhonteni Jehova.