Indlela Yekulawula Kukhatsateka
Kukhatsateka kakhulu kungakugulisa kuphindze kutsintse nendlela lotiva ngayo. Kungabanga tinkinga letingetulu kwalenkinga beyikukhatsata.
Tintfo letingakusita unciphise kukhatsateka
Nciphisa lizinga lolalela ngalo, lobukela ngalo nalofundza ngalo tindzaba letimbi. Awudzingi kwati yonkhe imininingwane ngentfo letsite leyentekile. Nawubukela, ufundza nobe ulalela kakhulu tindzaba letibuhlungu, utawesaba kakhulu futsi uphelelwe nalitsemba.
Simiso SeliBhayibheli: “Umoya lowephukile ucedzana emandla.”—Taga 17:22.
“Kulula kuba ngumlutsa wetindzaba letisematseni naletetfusako futsi kungumkhuba lomubi emphilweni yakho. Kukhatsateka kwami kwancipha nanginciphisa lizinga lengibukela ngalo tindzaba.”—John
Longacabanga ngako: Ngihlale ngifuna kwati tindzaba letisematseni yini?
Namatsela eluhlelweni. Tibekele sikhatsi sekuvuka, sekudla, sekwenta imisebenti yasekhaya kanye nesekulala. Kuba neluhlelo lwekwenta tintfo kutawenta kuphila kwakho kube kahle futsi kunciphise nekukhatsateka.
Simiso SeliBhayibheli: “Tinhloso talabakhutsele tibenta baphumelele.”—Taga 21:5.
“Nakucala i-COVID-19, ngayekela kulandzela luhlelo lebengitentele lona futsi ngagcine sengicitsa sikhatsi lesinyenti kutekutijabulisa. Ngabese ngifuna kusisebentisa kahle sikhatsi sami, ngako ngatentela luhlelo lwetintfo lokufanele ngitente.”—Joseph.
Longacabanga ngako: Unalo yini luhlelo lolukusita utive ufeze lokutsite ekupheleni kwelilanga?
Naka tintfo letinhle ekuphileni kwakho. Kukhatsateka ngekutsi kube mane nobe kucabanga ngetintfo letimbi kungakwenta ukhatsateke nakakhulu. Kunaloko, cabanga ngetintfo letimbili nobe letintsatfu letikwenta ubonge.
Simiso SeliBhayibheli: “Banini ngulababongako.”—KubaseKholose 3:15.
“Kufundza liBhayibheli kungenta ngingondli ingcondvo yami ngetintfo letimbi kodvwa kungisita nginake tintfo letinhle. Loku kungevakala kumelula kakhulu kodvwa kuyasebenta!”—Lisa.
Longacabanga ngako: Ngabe uhlale unaka tintfo letimbi letenteka ekuphileni kwakho kunekunaka tintfo letinhle?
Cabanga ngalabanye. Kunekutsi utehlukanise kulabanye bantfu, lokuyintfo lemelula kakhulu nawukhatsatekile, cabanga kutsi ungabasita njani labanye.
Simiso SeliBhayibheli: “Ningaticabangeli nine kuphela, kodvwa nicabangele nalabanye.”—KubaseFiliphi 2:4.
“Kwentela labanye tintfo kungenta ngijabule. Ngenta tintfo letitawubenta bajabule, ngesikhatsi lesifanako ngibe nginciphisa kukhatsateka kwami. Ecinisweni, sengite sikhatsi sekukhatsateka.”—Maria.
Longacabanga ngako: Kubantfu lobatiko, bakhona yini labadzinga kusitwa ngalokukhetsekile, futsi yini longayenta kuze ubasite?
Hlala unemphilo lenhle. Jima uphindze uphumule ngalokwanele. Dlani kudla lokunemphilo. Kunakekelela imphilo yakho kungakwenta ube nelitsemba futsi kukusite ungasakhatsateki.
Simiso SeliBhayibheli: ‘Kucecesha umtimba kuyazuzisa.’—1 KuThimothi 4:8, umbhalo longentasi.
“Mine nendvodzana yami asikhoni kujima ngephandle ngendlela lesingafisa ngayo, ngako sitentele luhlelo lwekujima ngekhatsi endlini. Loku kusente sajabula kakhudlwana, saba nemusa, saphindze sakwati kubeketelela labanye.”—Catherine.
Longacabanga ngako: Udzinga kudla kudla lokunemphilo nekujima yini kuze ube nemphilo lenhle?
Ngetulu kwekusebentisa letintfo letinganciphisa kukhatsateka, bantfu labanyenti kubasitile kufundza ngetetsembiso letiseBhayibhelini ngelikusasa. Fundza sihloko lesitsi “Yini Letawufezwa NguMbuso WaNkulunkulu?”