Umbono WaBoFakazi BaJehova Ngekubulawa Kwebantfu Labanyenti—Litsini LiBhayibheli?

NgaJanuary 27, 2023, bantfu labanyenti batawube bagubha i-International Holocaust Remembrance Day. Tintfo letimbi naletfusako letenteka eminyakeni lengetulu kwa-75 leyendlulile tingakwenta utibute kutsi yini leyabangela Nkulunkulu wavumela Kubulalwa Kwebantfu Labanyenti (Holocaust).

• Kuze utfole kutsi litsini liBhayibheli ngalendzaba, fundza sihloko lesitsi “Kungani Kwabulawa Bantfu Labanyenti? Nkulunkulu Wakuvumelelani?”

Bantfu labangemaJuda labanyenti baphatfwa ngesihluku ngesikhatsi Kubulawa Bantfu Labanyenti. Tigidzi tebantfu tabulawa ngenhloso futsi ngendlela lehleliwe. Nalamanye emacembu ebantfu ahlushwa futsi abulawa ngaleso sikhatsi. Labanye babo bafaka ekhatsi BoFakazi BaJehova, labahlushwa ngenca yaloko labakukholelwako lokuseBhayibhelini.

• Kuze utfole lokunyenti, fundza sihloko lesitsi “What Happened to Jehovah’s Witnesses During the Time of the Holocaust?,” lesitfolakala ngesiNgisi.

Likusasa “lelihle kanye nelitsemba”

Bantfu labanyenti bayesaba kutsi Kubulawa Kwebantfu Labanyenti kungaphindze kwenteke. Lokuhle kutsi liBhayibheli likhuluma ngesikhatsi lapho khona tintfo letimbi tingeke tisenteka.

• “Jehova utsi: ‘Ngikwati kahle loko lengitanentela kona, ngitanenta nibe nekuthula, ningehlelwa yinhlekelele, kuze nibe nelikusasa lelihle kanye nelitsemba.’”—Jeremiya 29:11.a

Lelikusasa lelihle litawufika ngesikhatsi Jehova Nkulunkulu sekacedze bubi futsi wasusa nemonakalo lobangelwe ngibo. Madvutane:

• Utawucedza bonkhe bantfu lababi labavisa labanye buhlungu.—Taga 2:22.

• Utawususa bonkhe buhlungu kulabo lebebahlushwa.—Sembulo 21:4.

• Utawuvusa bonkhe bantfu labafa, baphindze baphile emhlabeni.—Johane 5:28, 29.

Ungayetsemba indvudvuto nelitsemba lesilitfola eBhayibhelini. Kuze ubone kutsi yini lengakusita, sikumema kutsi udadishe natsi liBhayibheli mahhala.