Yini Leyenta Bantfu Bazondane Kangaka?​—Litsini LiBhayibheli?

Etindzabeni kugcwele imibiko lemayelana netintfo letishiwo naletentiwa bantfu ngenca yenzondo nelubandlululo.

• “Setinyenti kakhulu tintfo letimbi letishiwoko kutekuchumana ngenca yemphi lesemkhatsini welive laka-Israyeli neGaza kanye nebantfu labakhutsata inzondo nebudlova.”​—I-The New York Times, yaNovember 15, 2023.

• “Kusukela mhlaka 7 October, tivele tandza kakhulu tintfo letimbi letishiwoko naletentiwako ngenca yelubandlululo.”​—Dennis Francis, mengameli weGeneral Assembly yaMhlabuhlangene, ngaNovember 3, 2023.

Tintfo letimbi letishiwoko ngenca yenzondo, budlova, kanye netimphi akucali lamuhla. Ecinisweni, liBhayibheli likhuluma ngebantfu basendvulo lebebadubula “ngemavi lalimatako kube shengatsi ayimicibisholo” kanye nalabo lebebakhutsata budlova kanye netimphi. (Tihlabelelo 64:3; 120:7; 140:1) Nobe kunjalo, liBhayibheli liveta kutsi inzondo lekhona lamuhla iluphawu lwalokutsite lokubalulekile.

Inzondo​—Iluphawu lwekutsi siphila kusiphi sikhatsi

LiBhayibheli liveta tizatfu letimbili letibangela yonkhe lenzondo lekhona lamuhla.

1. 1. Laphrofetha kutsi bekutawuba nesikhatsi lapho ‘bantfu labanyenti bebatawuphelelwa khona lutsandvo.’ (Matewu 24:12) Kunekutsi batsandzane, bantfu labanyenti bebatatiphatsa ngendlela leyenta labanye babe nenzondo.​—2 KuThimothi 3:1-5.

2. 2. Inzondo legcwele emhlabeni lamuhla ibangelwa nguSathane Develi. LiBhayibheli litsi, “lonkhe live lisemandleni alomubi.”​—1 Johane 5:19; Sembulo 12:9, 12.

LiBhayibheli liveta kutsi Nkulunkulu utawucedza tonkhe tintfo letibangela inzondo. Ngetulu kwaloko, utawucedza konkhe kuhlupheka lokubangelwe yinzondo. LiBhayibheli letsembisa kutsi:

• Nkulunkulu “uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona. Tintfo letindzala setendlulile.”​—Sembulo 21:4.