Kwentekani Emshadweni WaBoFakazi BaJehova?

Imishado yaboFakazi BaJehova iba yimicimbi lemincane nalehloniphekile leba nenkhulumo lemfisha yeliBhayibheli. Ngaletinye tikhatsi kuba nembutsano kanye nekudla ngemuva kwalenkhulumo.a Ngemuva nje kwekucalisa umsebenti wakhe wekushumayela, Jesu waya emshadweni lobewusedolobheni laseKhana.​—Johane 2:1-11.

• Kwentekani nakuchutjwa umshado waBoFakazi BaJehova?

• Ichutjelwa kuphi imishado yaBoFakazi BaJehova?

• Bobani labangaya kuwo?

• Ikhona yini indlela lekhetsekile yekugcoka?

• Tiba khona yini tipho?

• Iyentiwa yini i-toast?

• Laba labashadako bayatselwa yini nge-rice nobe ngalokunye lokufana nako?

• Kuba khona yini kudla kanye nekwekunatsa?

• Ubakhona yini umdanso kanye nemculo?

• BoFakazi BaJehova bayawenta yini ema-anniversary?

Kwentekani nakuchutjwa umshado waBoFakazi BaJehova?

Inkhulumo yemshado letsatsa imizuzu lecishe ibe ngu-30 ngiyo lebaluleke kakhulu nakunemshado. Lenkhulumo ibekwa ngumzalwane longuFakazi WaJehova. Lenkhulumo yeliBhayibheli isita laba labalabashadako ngaloko labangakwenta kuze babe nemshado lojabulisako, lonelutsandvo nalongeke uphele.​—Kubase-Efesu 5:33.

Emaveni lamanyenti hulumende unikete bazalwane labaBoFakazi BaJehova ligunya lekushadisa ngalokusemtsetfweni. Nangabe banalo lelogunya, ekwephetseni kwalenkhulumo laba labashadako babese benta tifungo. Bangaphindze bafakane tindandatho. Lomzalwane lobentise tifungo, ubese umemetela kutsi laba labashadako sebayindvodza nemfati.

Kulamanye emave umtsetfo ufuna kutsi labashadako bashadele ehhovisini lahulumende. Loku kwenteka ngaphambi kwenkhulumo yemshado. Nangabe laba labashadako bangakatenti tifungo ehhovisini lahulumende, bangatenta naseyiphelile inkhulumo. Nangabe bese batentile tifungo, bangakhetsa kuphindze batente, kodvwa bavakalise kutsi sebayatiphindza. Lenkhulumo yephetfwa ngemthantazo wekucela Nkulunkulu kutsi abusise laba labasandza kushada.

Ichutjelwa kuphi imishado yaBoFakazi BaJehova?

BoFakazi labanyenti bakhetsa kushadela eHholweni leMbuso nangabe likhona.b Nangabe kutawuba nembutsano ngemuva kwemshado, laba labashadako bangakhetsa kuwentela kulenye indzawo.

Bobani labangaya kuwo?

Nangabe lomshado useHholweni leMbuso, wonkhe muntfu wemukelekile kutsi ete. Nangabe laba labashadako batawuba nembutsano ngemuva kwemshado, batatikhetsela kutsi bamema bobani.

Ikhona yini indlela lekhetsekile yekugcoka?

Nanobe kute indlela lekhetsekile yekugcoka nangabe lomshado useHholweni leMbuso, kodvwa BoFakazi BaJehova betama kusebentisa sicondziso seliBhayibheli sekugcoka ngendlela lehloniphekile nalenesizotsa. Bayakujabulela kutsi nalabanye bagcoke ngendlela lehloniphekile nalenesizotsa. (1 KuThimothi 2:9) Kusebenta simiso lesifanako nakulombutsano lotawuba ngemuva kwemshado, nangabe labalabashadako bakhetse kuba nawo.

Tiba khona yini tipho?

LiBhayibheli lisikhutsata kutsi siphe labanye. (Tihlabelelo 37:21) BoFakazi BaJehova bayakujabulela kupha labanye tipho kanye nekutemukela nabashada. (Lukha 6:38) Nobe kunjalo, BoFakazi abahambi bacela tipho nobe bamemetela emagama alabo lababaphe tipho. (Matewu 6:3, 4; 2 KubaseKhorinte 9:7; 1 Phetro 3:8) Kwenta kanjalo akukho emiBhalweni futsi kungenteka kungabaphatsi kahle labo labakhona.

Iyentiwa yini i-toast?

LiBhayibheli alikwaleli kwenta i-toast nobe kushayisisa tingilazi, kodvwa labanye labashadako bangacela timenywa tabo kutsi tingayenti i-toast kuze tingakhubi labanye.​—KubaseRoma 14:21.

Laba labashadako bayatselwa yini nge-rice nobe ngalokunye lokufana nako?

Cha. Kuletinye tindzawo bantfu batsela laba labashadako nge-rice nobe ngalokunye lokufana nako. Bakholelwa kutsi loku kutawuniketa laba labashadako inhlanhla, injabulo kanye nemphilo lendze. BoFakazi BaJehova bayayibalekela imikhuba lesekelwe enkholweni yemanga lefaka ekhatsi kufisela labanye inhlanhla ngobe ayikasekelwa eBhayibhelini.​—Isaya 65:11.

Kuba khona yini kudla kanye nekwekunatsa?

Kubabete kudla nalokunatfwako nangabe lomshado useHholweni leMbuso. Labanye labashadako bakhetsa kutsi ngemuva kwenkhulumo kube nembutsano lotawuba nekudla kanye nalokunatfwako. (Umshumayeli 9:7) Nangabe laba labashadako bakhetsa kutsi kube netjwala embutsanweni wabo, kufanele bacinisekise kutsi abubi bunyenti futsi kunatsa labo labaneminyaka levunyelwa ngumtsetfo kutsi banatse.​—Lukha 21:34; KubaseRoma 13:1, 13.

Ubakhona yini umdanso kanye nemculo?

Nangabe laba labashadako batawuba nembutsano bangakhetsa kutsi kube nemculo kanye nemdanso. (Umshumayeli 3:4) Labashadako batawukhetsa umculo labawutsandzako nalotsandvwako kuleyo ndzawo, kodvwa batawucinisekisa kutsi awutikhubi timenywa tabo. Umshado loseHholweni leMbuso uba nemculo losekelwe eBhayibhelini.

BoFakazi baJehova bayawenta yini ema-anniversary?

BoFakazi labashadile bayatikhetsela kutsi batoyenta yini i-anniversary nobe cha, ngenca yekutsi liBhayibheli alikulahli futsi alikuvumeli kuyenta. Nangabe bakhetsa kuyenta, bangayenta babodvwana nobe babe nebangani kanye nemndeni.