BANTFU LABASHA BAYABUTA
Yini Lengingayenta Nangabe Labanye Bahleba Ngami?
Yini leyenta kube buhlungu
Lenye inhlebo iyalimata, sibonelo nje, emanga lashiwo ngemabomu kuze nje koniwe lidvumela lakho. Ngisho nobe inhlebo ingesiyimbi kakhulu isengakuvisa buhlungu ikakhulu nayisakatwe ngumuntfu losondzelene naye!—Tihlabelelo 55:12-14
“Ngeva kutsi umngani wami bekakhuluma ngami, atjela bantfu kutsi mine anginendzaba nalabanye bantfu. Ngeva buhlungu kakhulu! Bengingacondzi kutsi yini lebeyimenta akhulume kanjena ngami.”—Ashley.
Liciniso: Kutsi lomuntfu losakata lenhlebo ngumngani wakho nobe cha, akusiko mnandzi kuva kutsi bantfu bakhuluma tintfo letimbi ngawe.
Lokubuhlungu kutsi—angeke ukubalekele
Tinyenti tintfo letingenta bantfu bahlebe, lokufaka ekhatsi nati:
Kutsandza kukhuluma. Bantfu bayakutsandza kucoca. Ngako kungekwemvelo kutsi sicocisane futsi sikhulume nangalabanye. Ecinisweni, liBhayibheli lisikhutsata kutsi ‘sicabangele nalabanye’.—KubaseFiliphi 2:4.
“Kumnandzi kucoca ngebantfu!”—Bianca.
“Ngiyavuma, ngiyatsandza kwati kutsi kwentekani ekuphileni kwalabanye bantfu futsi ngicoce ngako. Angati kutsi leni, kodvwa nje kumnandzi .”—Katie.
Situnge. Ngesikhatsi sekubhalwa kweliBhayibheli, bekunebantfu ‘lebebacitsa sikhatsi sabo lesinyenti bakhuluma futsi balalele tindzaba letinsha.’ (Imisebenti 17:21) Kwenteka lokufanako nalamuhla!
“Ngalesinye sikhatsi nakute intfo lechazanako leyentekako, bantfu babese bacala kwakha tindzaba kuze nje kube khona labakhuluma ngako.”—Joanna.
Kutibukela phansi. Kunetizatfu letinhle liBhayibheli lisecwayisa ngemkhuba wekuticatsanisa nalabanye. (KubaseGalathiya 6:4) Lokubuhlungu kutsi labanye bantfu basakata inhlebo lelimatako ngalabanye kuze nje bative bancono.
“Inhlebo lelimatako isho lokutsite ngaloyo lohlebako. Ngalokuvamile isho kutsi loyo muntfu unemona ngaloyo lahleba ngaye. Basakata imvabetsi kuze bative bancono nobe batibone bancono kunaloyo labakhuluma ngaye.”—Phil.
Liciniso: Utsandza nobe ungatsandzi bantfu batawukhuluma ngalabanye, lokufaka ekhatsi nawe.
Tindzaba letimnandzi kutsi—akukameli kukucedze emandla
Angeke ubavimbe bantfu kutsi bakhulume ngawe, kodvwa ungayikhetsa indlela lowenta ngayo nawuva. Nawuva kutsi kunemvabetsi lesakatiwe ngawe, kubili longakwenta.
LONGAKWENTA. 1: Ungakunaki. Ngalokuvamile, indlela lencono kutsi ukwendlulise, ikakhulukati nangabe lemvabetsi kungesiyo lembi. Sebentisa seluleko lesiseBhayibhelini lesitsi: “Ungasheshi utfukutsele.”—Umshumayeli 7:9.
“Kwasakatwa imvabetsi letsi mine ngitsandzana nalomunye umfana, umuntfu lengingazange sengimbone! Bekungakholakali, kangangekutsi ngavele ngahleka nje.”—Elise.
“Kuba nelidvumela lelihle kungakuvikela nangabe bakuhleba. Ngisho kungaba nemvabetsi lesakatiwe ngawe, nangabe unelidvumela lelihle bambalwa bantfu labangayikholwa. Loko labakwatiko ngawe ngiko lokukuvikelako”—Allison.
Lokungakusita: Bhala phansi (1) loko labakushito ngawe nekutsi (2) kukwente wativa njani. Nase ukwati loko lokusenhlitiyweni yakho kungaba melula kutsi ukwendlulise.—Tihlabelelo 4:4
LONGAKWENTA 2: Khuluma nalomuntfu localise lenhlebo. Ngaletinye tikhatsi, ungatfola kutsi loko labakushito ngawe kubi kangangekutsi kudzingeka ukhulume nalomuntfu localise lenhlebo.
“Nangabe ukhuluma nalabantfu labahleba ngawe, bangafundza kutsi nangabe uhleba ngemuntfu ugcine sekakuvile loko lokushiwoko ngaye. Ngetulu kwaloko, ungalungisa lesimo futsi mhlawumbe kulunge nalenkinga.”—Elise.
Ngaphambi kwekutsi uyokhuluma nalotsite lokuhlebile, cabanga nganati timiso letiseBhayibhelini futsi utibute nalemibuto lehambisana nato.
“Loyo lophendvula indzaba letsite angakaweva emaciniso ayo usilima.” (Taga 18:13) ‘Ngiwati onkhe yini emaciniso ngalendzaba? Kungenteka yini kutsi lona longitjelile akayiva kahle lendzaba?’
‘Shesha kulalela, wephute kukhuluma, wephute nekutfukutsela.’ (Jakobe 1:19) ‘Sikhatsi lesikahle yini lesi kutsi ngingaya kuyokhuluma nalona longihlebile? Ngiyaciniseka yini kutsi ngitayisingatsa kahle lendzaba? Nobe kutawubancono kutsi ngendlulise sikhatsi lesitsite kuze ngehlise umoya?’
“Tonkhe tintfo lenifuna bantfu batente kini, nani tenteni kubo.” (Matewu 7:12) ‘Kube bekungatsiwa ngimi lolohlebile, bengingafuna kukhulunyiswa njani? Bengingatsandza kutsi siyikhulumele kuphi lendzaba? Nguyiphi indlela yekukhuluma lebeyingangitsintsa inhlitiyo?’
Lokungakusita: Ngaphambi kwekutsi uyokhuluma nalona lokuhlebile, bhala phansi loko lofuna kukusho. Hlala liviki linye nobe lamabili bese sewuphindze uyakufundza loko lokubhalile kuze ubone kutsi kute yini lushintjo lofuna kulwenta. Ungaphindze ucoce nemtali nobe umngani lovutsiwe, ucele seluleko ngaloko lofuna kukwenta.
Liciniso: Angeke uze ukulawule loko bantfu labakushoko ngawe njengobe ungeke ukhone kulawula naletinye tintfo letinyenti letentekako ekuphileni. Nobe kunjalo, ungakuvumeli loko kutsi kukulawule!