BoFakazi BaJehova Bayakukhokha Yini Kwelishumi?

Asikukhokhi. BoFakazi BaJehova abakukhokhi kwelishumi; umsebenti wetfu usekelwa ngeminikelo yekutitsandzela. Kuyini kwelishumi, futsi yini leyenta boFakazi BaJehova bangakukhokhi?

Umyalo wekukhokha kwelishumi nome wekunikela kwelishumi etintfweni lonato bewuyincenye yeMtsetfo lowaniketwa sive sasendvulo sema-Israyeli. Nobe kunjalo, liBhayibheli likwenta kucace kutsi loyo Mtsetfo—lofaka ekhatsi ‘umtsetfo wekutsi kutsatfwe kwelishumi’—awusebenti kumaKhristu.—Hebheru 7:5, 18; Kholose 2:13, 14.

Kunekutsi bakhiphe kwelishumi neminikelo lekaliwe, boFakazi BaJehova balingisa emaKhristu ekucala futsi basekela umsebenti wabo ngetindlela letimbili: Ngekushumayela nekufundzisa bantfu mahhala nangekwenta iminikelo yekutitsandzela.

Ngako-ke, boFakazi BaJehova balandzela sicondziso seliBhayibheli kumaKhristu, lesitsi: “Lowo nalowo akatincumele yena enhlitiyweni yakhe kutsi utawunikela kangakanani, bese unikela ngekukhululeka, hhayi ngekusola nangekucindzetelwa. Nkulunkulu utsandza umuntfu lonikela ngenhlitiyo lemhlophe.”—2 Khorinte 9:7.