Kuyini Kuhlupheka Lokukhulu?

Lokushiwo liBhayibheli

Kuhlupheka lokukhulu kutawuletsa lusizi lolungazange selube khona emhlabeni. Ngekusho lwesiphrofetho seliBhayibheli, kutawufika “emalangeni ekugcina,” nobe ‘ngesikhatsi sekugcina.’ (2 KuThimothi 3:1; Danyela 12:4, New American Bible) “Kutawuba ngemalanga ekuhlupheka lokukhulu lokungazange sekube khona kusukela ekucaleni kwendalo leyadalwa nguNkulunkulu, kuze kube nguleso sikhatsi, futsi lokungayuphindze kube khona.”​—Makho 13:19; Danyela 12:1; Matewu 24:21, 22.

Tintfo letitawukwenteka ngesikhatsi sekuhlupheka lokukhulu

• Kubhujiswa kwenkholo yemanga. Inkholo yemanga itawubhujiswa ngekushesha lokukhulu. (Sembulo 17:1, 5; 18:9, 10, 21) Imibuso lenemandla lemelelwa nguMhlabuhlangene itakwenta intsandvo yaNkulunkulu ngekutsi ibhubhise inkholo yemanga.​—Sembulo 17:3, 15-18.a

• Kuhlaselwa kwenkholo yeliciniso. Inhlanganisela yetive lebitwa ngekutsi ‘nguGogi waseveni lakaMagogi,’ embonweni waHezekeli itawuzama kucedza inkholo yeliciniso. Nobe kunjalo, Nkulunkulu utativikela tikhonti takhe.​—Hezekeli 38:1, 2, 9-12, 18-23.

• Kwehlulelwa kwebantfu labaphila emhlabeni. Jesu utawehlulela bantfu futsi ‘abehlukanise, njengemelusi ehlukanisa timvu etimbutini.’ (Matewu 25:31-33) Lokwehlulela kutakuya ngekutsi babasekele yini nobe abakabasekeli banakaboJesu, latawubusa kanye nabo ezulwini.​—Matewu 25:34-46.

• Kubutfwa kwalabo labatawubusa naJesu. Labetsembekile, labakhetfwe kutsi babuse kanye naJesu batawufa futsi bavuselwe ekuphileni kwasezulwini.​—Matewu 24:31; 1 KubaseKhorinte 15:50-53; 1 KubaseThesalonika 4:15-17.

• I-Amagedoni. Lemphi “yelilanga lelikhulu laNkulunkulu Somandla” iphindze ibitwe ngekutsi ‘lilanga laJehova.’ (Sembulo 16:14, 16; Isaya 13:9; 2 Phetro 3:12) Bonkhe labo Jesu latabatfola kutsi babantfu lababi, batawubhujiswa. (Zefaniya 1:18; 2 KubaseThesalonika 1:6-10) Loku kutawufaka ekhatsi nekubhujiswa kwabo bonkhe bohulumende bebantfu, liBhayibheli lelitsi bamelelwa silwane sesiganga.​—Sembulo 19:19-21.

Loko lokutawukwenteka ngemuva kwekuhlupheka lokukhulu

• Kuvalelwa kwaSathane nemademoni. Ingilosi lenkhulu itawujikijela Sathane kanye nemademoni ‘emgodzini longenamkhawulo,’ lokusho kutsi angeke basakhona kudukisa bantfu. (Sembulo 20:1-3) Sathane nakakulomgodzi longenamkhawulo kutawufana nekutsi uvalelwe ejele, angeke akhone kudukisa bantfu.​—Sembulo 20:7.

• Kucala kweminyaka leyinkhulungwane. UMbuso waNkulunkulu utawucala kubusa kweminyaka leyinkhulungwane, lokutawuletsela bantfu tibusiso letinyenti. (Sembulo 5:9, 10; 20:4, 6) “Sicumbi lesikhulu” lesingeke sibalwe, salabo ‘labaphume ekuhluphekeni lokukhulu,’ sitakubona kucala kwebusa kweminyaka leyinkhulungwane emhlabeni.​—Sembulo 7:9, 14; Tihlabelelo 37:9-11.