Bobani Labaya Ezulwini?
Lokushiwo liBhayibheli
Nkulunkulu ukhetse linani lelitsite lemaKhristu letsembekile kutsi livuselwe kuyophila ezulwini. (1 Phetro 1:3, 4) Laba labakhetsiwe kufanele bachubeke banekukholwa lokucinile futsi batiphatse kahle kuze bangalahlekelwa ngulelilungelo labo lekuyophila ezulwini.—Kubase-Efesu 5:5; KubaseFiliphi 3:12-14.
Yini laba labaya ezulwini labayoyenta lapho?
Bayokhonta njengemakhosi nebaphristi iminyaka lengu-1 000, bakanye naJesu. (Sembulo 5:9, 10; 20:6) Batokwakha “emazulu lamasha,” nobe hulumende wasezulwini lotobusa ‘umhlaba lomusha’ nobe bantfu labasemhlabeni. Lababusi basezulwini batawubuyisela injongo yaNkulunkulu yasekucaleni ngebantfu.—Isaya 65:17; 2 Phetro 3:13.
Bangakhi labatawuvuselwa ezulwini?
LiBhayibheli litsi bantfu labangu-144 000 batawuvusela kuyophila ezulwini. (Sembulo 7:4) Embonweni lokuSembulo 14:1-3, umphostoli Johane wabona “liWundlu lime eNtsabeni iSiyoni, likanye nalabangu-144 000.” Kulombono, “liWundlu” limelela Jesu lovusiwe. (Johane 1:29; 1 Phetro 1:19) ‘INtsaba iSiyoni’ imelela sikhundla lesiphakeme saJesu kanye nalabangu-144 000 lababusa kanye naye ezulwini.—Tihlabelelo 2:6; KumaHebheru 12:22.
Labo ‘lababitiwe, futsi labakhetfwe’ kutsi babuse kanye naJesu eMbusweni, babitwa ngekutsi ‘ngumhlambi lomncane.’ (Sembulo 17:14; Lukha 12:32) Loku kukhombisa kutsi laba balinani lelincane kakhulu nalicatsaniswa netimvu taJesu setitonkhe.—Johane 10:16.
Lokungasilo liciniso ngalaba labaya ezulwini
Lokungasilo liciniso: Bonkhe bantfu labalungile batokuya ezulwini.
Liciniso: Nkulunkulu wetsembisa bantfu labalungile kuphila lokuphakadze emhlabeni.—Tihlabelelo 37:11, 29, 34
Jesu watsi: “Kute umuntfu lowake wenyukela ezulwini.” (Johane 3:13) Ngaleyo ndlela waveta kutsi bantfu labalungile labafa ngaphambi kwekutsi atalwe labanjenga Abhrahama, Mosi, Jobe, na Davide, abayanga ezulwini. (Imisebenti 2:29, 34) Kunaloko, banelitsemba lekuvuswa baphile emhlabeni.—Jobe 14:13-15.
Kuvuswa kwalaba labatophila ezulwini kubitwa ngekutsi “kuvuswa kwekucala.” (Sembulo 20:6) Loku kukhombisa kutsi kutoba khona lokunye kuvuswa kwebantfu futsi kutawuba lapha emhlabeni.
LiBhayibheli lifundzisa kutsi nasekubusa uMbuso waNkulunkulu, “kufa ngeke kusaba khona.” (Sembulo 21:3, 4) Kufanele kube lesetsembiso sitawufezeka lapha emhlabeni ngobe kute kufa ezulwini.
Lokungasilo liciniso: Umuntfu uyatikhetsela kutsi utawuphila ezulwini noma emhlabeni.
Liciniso: NguNkulunkulu loncumako kutsi ngumuphi umKhristu lowetsembekile lotawutfola “umvuzo welubito lwasezulwini,” lokulitsemba lekuphila ezulwini. (KubaseFiliphi 3:14) Kukhetfwa kwemuntfu kutsi ayophila ezulwini akuyi ngesifiso sakhe nobe kutimisela kwakhe.—Matewu 20:20-23.
Lokungasilo liciniso: Litsemba lekuphila phakadze emhlabeni liniketwa labo lokungabafaneli kuya ezulwini.
Liciniso: Nkulunkulu ubita labo labatawutfola kuphila lokuphakadze emhlabeni ngekutsi ‘bantfu bami,’ ‘ngulengibakhetsile,’ nangekutsi ‘ngulababusiswe nguJehova.’ (Isaya 65:21-23) Batawugcwalisa injongo yaNkulunkulu yasekucaleni ngebantfu, lokukuphila phakadze emhlabeni lolipharadisi.—Genesisi 1:28; Tihlabelelo 115:16; Isaya 45:18.
Lokungasilo liciniso: Linani lelingu-144 000 lokukhulunywa ngalo kuSembulo lingumfanekiso, hhayi linani sibili lebantfu.
Liciniso: Nanobe Sembulo sinenitinombolo letingumfanekiso, letinye tato tingokocobo. Sibonelo nje, Sembulo sikhuluma ‘ngemabito langu-12 ebaphostoli beliWundlu labangu-12.’ (Sembulo 21:14) Cabanga ngebufakazi lobuveta kutsi linani lelingu-144 000 kufanele litsatfwe njengalelingokocobo.
Sembulo 7:4 sitsi “labo lebebabekwe luphawu [nobe labatawuphila ezulwini], bebangu-144 000.” Ngekusho kwalelivesi kunelicembu lesibili lelivetwako: “sicumbi lesikhulu sebantfu lokute muntfu lowakhona kusibala.” Laba ‘besicumbi lesikhulu’ nabo basindziswa nguNkulunkulu. (Sembulo 7:9, 10) Kube lelinani lelingu-144 000 belingekwemfanekiso futsi lisho sicumbi lesingeke sibalwe, lokucatsanisa lamacembu lamabili bekungeke kusebente.a
Ngetulu kwaloko, laba labangu-144 000 bachazwa ngekutsi “batsengwa kubantfu baba titselo tekucala.” (Sembulo 14:4) Emavi latsi “titselo tekucala” asho lokuncane lokukhetsiwe kuze kumelele lokutsite. Achaza labo labatawubusa sicumbi lesikhulu lesisemhlabeni bakanye naJesu.—Sembulo 5:10.
a Professor Robert L. Thomas washo naku lokulandzelako ngelinani lelingu-144 000 lokukhulunywa ngalo kuSembulo 7:4: “Lena yinombolo lengokocobo nayicatsaniswa nalena leku-7:9. Nayitsatfwa ngekutsi ingumfanekiso, kusho kutsi kute inombolo lengatsatfwa njengalengokocobo kulencwadzi.”—Revelation 1-7: An Exegetical Commentary, likhasi 474.