BANTFU LABASHA BAYABUTA
Kungani Kufanele Ngithantaze?
Ngekusho kwelucwaningo, bantfu labasha labangu-80 percent eMelika bayathantaza, kodvwa bayihhafu labathantaza onkhe malanga. Siyaciniseka kutsi labanye batibuta kutsi: ‘Umthantazo umane uyindlela yekutenta utive uncono yini nobe kukhona lokunye losita ngako?’
Uyini umthantazo?
Umthantazo uyindlela yekuchumana nemdali wato tonkhe tintfo. Cabanga kutsi loko kusho kutsini! Jehova uphakeme kunabo bonkhe bantfu ngato tonkhe tindlela, kodvwa nobe kunjalo “akekho khashane kuloyo naloyo kutsi.” (Imisebenti 17:27) Ecinisweni, liBhayibheli linanasi simemo lesijabulisako: “Sondzelani kuNkulunkulu, Naye utawusondzela kini.”—Jakobe 4:8.
Ungasondzela njani kuNkulunkulu?
Indlela yekucala kutsi uthantaze—leyo yindlela wena lokhuluma ngayo naNkulunkulu.
Lenye indlela kutsi utadishe liBhayibheli—leyo yindlela Nkulunkulu “lakhuluma” ngayo nawe.
Kucocisana lokunjalo—kuthantaza kanye nekutadisha liBhayibheli—kutakusita ube nebuhlobo lobucinile naNkulunkulu.
“Kukhuluma naJehova—Kukhuluma naLosetikwako Konkhe—kulilungelo lelikhulu bantfu labangaba nalo.”—Jeremy.
“Kutjela Jehova indlela lengitiva ngayo mbambambamba kungenta ngitive ngisondzelene naye.”—Miranda.
Nkulunkulu uyayilalela yini imithantazo?
Ngisho nobe ukholelwa kuNkulunkulu—futsi uthantaza kuye—kungaba lukhuni kukholwa kutsi uyilalela mbamba imithantazo yakho. Nobe kunjalo, liBhayibheli libita Jehova ngekutsi “ungumuvi wemithantazo.” (Tihlabelelo 65:2) Likumema kutsi “uphonse konkhe kukhatsateka kwakho kuye.” Leni? “Ngobe uyakukhatsalela.”—1 Phetro 5:7.
Longacabanga ngako: Uyasakha yini sikhatsi sekukhuluma nebangani bakho njalo? Ungenta lokufanako nangaNkulunkulu. Khuluma naye njalo ngemthantazo, futsi umbite ngeligama lakhe lelitsi, Jehova. (Tihlabelelo 86:5-7; 88:9) Ecinisweni, liBhayibheli likumema kutsi “uhlale uthantaza.”—1 KubaseThesalonika 5:17.
“Umthantazo uyincociswano lephakatsi kwami naBabe wami losezulwini, lapho ngimtjela khona konkhe lokusehlitiyweni yami.”—Moises.
“Ngikhuluma naJehova ngalokusuka ehlitiyweni, njengobe ngingakhuluma namake wami nobe umngani wami lomkhulu.”—Karen.
Yini lengingayithantazela
liBhayibheli litsi: “Kuko konkhe, ticelo tenu atatiwe nguNkulunkulu ngekuthantaza ngekuncusa nangekubonga.”—KubaseFiliphi 4:6.
Ingabe loko kusho kutsi ungathantaza yini ngetinkinga takho? Yebo! Ecinisweni, liBhayibheli litsi: “Lahlela umtfwalo wakho kuJehova, futsi yena utakusita.”—Tihlabelelo 55:22.
Kuliciniso, nawuthantaza kuNkulunkulu, akukafanele ukhulume ngetinkinga takho nje kuphela. Wesifazane losemusha ligama lakhe lokungu-Chantelle utsi “Bekungeke kube bungani lobuhle nangabe bengingahlalela kucela Jehova kutsi angisite nje kuphela, ngicabanga kutsi kubonga kufanele kute kucala, neluhla lwetintfo lengibonga ngato kufanele lube ludze.”
Longacabanga ngako: Ngutiphi tintfo letenteke ekuphileni kwakho lobonga ngato? Ungacabanga yini ngetintfo letintsatfu longatibonga kuJehova lamuhla?
“Ngisho tintfo letincanae njengekujabulela imbali lenhle, kungakwenta ufune kuthantaza ubonge Jehova ngayo.”—Anita.
“Cabangisisa ngentfo lekujabulisako lesendalweni nobe livesi leliseBhayibhelini lelikutsintsa inhlitiyo, bese ubonga Jehova ngako.”—Brian.