BANTFU LABASHA BAYABUTA
Kungani Kufanele Ngiye Emihlanganweni LebaseHholweni LeMbuso?
Kabili ngeliviki, BoFakazi BaJehova bahlangana etindzaweni tabo tekukhontela letibitwa ngekutsi, ngemaHholwa EMbuso. Yini leyenteka eHholweni leMbuso, futsi yini longayizuza ngekuya khona?
Yini leyentekako eHholweni leMbuso?
LiHholwa leMbuso liyindzawo yekufundza kutsi loko lokuseBhayibhelini singakusebentisa njani ekuphileni kwetfu. Imihlangano lebanjelwa lapho ingakusita kutsi:
ufundze liciniso ngaNkulunkulu.
ucondze kutsi tintfo letenteka esikhatsini setfu tisho kutsini.
ube ngumuntfu lokahle.
utfole bangani labakahle.
Bewati yini? Indzawo yekuhlangana yaBoFakazi BaJehova ibitwa ngekutsi Lihholwa LeMbuso ngobe kulapho khona kukhulunywa kakhulu ngeMbuso waNkulunkulu.—Matewu 6:9, 10; 24:14; Lukha 4:43.
Kungani kufanele uye kulemihlangano?
Kwatiswa lotakutfola khona kutakusita. Timiso teliBhayibheli lokukhulunywa ngato emihlanganweni yaBoFakazi BaJehova titakusita ‘utfole kuhlapkanipha.’ (Taga 4:5) Loku kusho kutsi liBhayibheli lingakusita wente tincumo letikahle ekuphileni. Lingaphindze likusite uphendvule imibuto lebalulekile ekuphileni, lefaka ekhatsi letsi:
Letihloko letilandzelako tinguletinye letimbalwa lokucocwa ngato emihlanganweni yangetimphelasontfo:
Kungani Kufanele Ucondziswe LiBhayibheli?
Ungalitfolaphi Lusito Ngetikhatsi Tekucindzeteleka?
Loko UMbuso WaNkulunkulu Losentela Kona Nyalo.
“Lomunye lebengifundza naye esikolweni weta kulomunye walemihlangano. Wahlala nemndeni wakitsi futsi sambukisa tincwadzi. Ngemuva kwemhlangano, wangitjela kutsi tamjabulisa kakhulu timphendvulo tebazalwane encenyeni yemibuto netiphendvulo. Waphindze watsi esontfweni lakhe bete tincwadzi tekufundza njengatsi.”—Brenda.
Bewati yini? Kungenwa mahhala eHholweni leMbuso, futsi akuhanjiswa lipulete lemnikelo.
Bantfu lotawubatfola kulemihlangano batakukhutsata. LiBhayibheli litsi lesinye sizatfu lesenta emaKhristu ahlangane ndzawonye kutsi ‘akhutsatane.’ (KumaHebheru 10:24, 25) Kuyajabulisa kuba ngumngani webantfu labatsandza Nkulunkulu kanye nalabanye bantfu, kunekutsi batitsandze bona, ikakhulukati njengobe siphila eveni lapho bantfu batitsandza bona.
“Ngemuva kwelilanga lelidze, ngingativa ngidziniwe futsi ngingakajabuli, kodvwa bantfu lengihlangana nabo eHholweni leMbuso bangenta ngitive ngincono. Nasengibuyela ekhaya ngemuva kwemihlangano, ngitiva ngijabulile futsi ngilungele lilanga lelilandzelako.”—Elisa.
Bewati yini? Kunemabandla aBoFakazi BaJehova langetulu kwa-120 000 emhlabeni wonkhe, lahlangana etindzaweni letingetulu kwa-60 000. Ngenca yekwandza kwebantfu lababakhona kulemihlangano, ngekwesilinganiso, kwakhiwa emaHholwa eMbuso langaba ngu-1 500 umnyaka ngamunye.a
a Kuze utfole indzawo lakubanjelwa khona imihlangano, yani encenyeni letsi “Imihlangano Yelibandla yaBoFakazi BaJehova” uchafate likhasi lelitsi “Tfola Indzawo Lesendvutane Nawe”