Incwadzi Yekucala YaSamuweli

5 Ngesikhatsi emaFilisti atfumba Libhokisi+ laNkulunkulu weliciniso, esuka nalo e-Ebheneza aliyisa e-Ashdodi. 2 EmaFilisti atsatsa leLibhokisi laNkulunkulu weliciniso alingenisa endlini* yaDagoni futsi alibeka eceleni kwakhe.+ 3 Ngesikhatsi bantfu base-Ashdodi bavuka ekuseni kakhulu ngelilanga lelilandzelako, bakhandza Dagoni awe phansi ngebuso embikweLibhokisi laJehova.+ Ngako bamvusa bambuyisela endzaweni labekakuyo.+ 4 Batsi nabavuka ekuseni kakhulu ngelilanga lelilandzelako, bakhandza Dagoni awe phansi ngebuso embikweLibhokisi laJehova. Inhloko yakhe kanye netandla takhe bekujutjiwe futsi kuwele ngasemnyango walendlu. Kwakusele nje kuphela umtimba wakhe lofana newenhlanti.* 5 Kungako kuze kube ngulamuhla baphristi baDagoni nabo bonkhe bantfu labangena endlini yaDagoni lese-Ashdodi banganyatseli emnyango.

6 Sandla saJehova sabajezisa bantfu base-Ashdodi futsi wabahlasela ngekushaya i-Ashdodi netindzawo letiseceleni kwayo ngematfumba.*+ 7 Ngesikhatsi bantfu base-Ashdodi babona loku lobekwenteka, batsi: “Ningalivumeli leLibhokisi laNkulunkulu wema-Israyeli lichubeke lihlala natsi ngobe sandla sakhe sisijezise kabuhlungu tsine kanye nankulunkulu wetfu Dagoni.” 8 Babese babita bonkhe baholi bemaFilisti futsi babahlanganisa ndzawonye, bababuta batsi: “Sitakwenta njani ngaleLibhokisi laNkulunkulu wema-Israyeli?” Bona babaphendvula batsi: “Tsatsani leLibhokisi laNkulunkulu wema-Israyeli niliyise eGathi.”+ Ngako balisusa leLibhokisi baliyisa lapho.

9 Nasebalitsetse lapho, sandla saJehova samelana nalelidolobha sabangela kutsi kube nekwesaba lokukhulu. Washaya bantfu bakulelidolobha, kusukela kulomncane kuya kulomdzala, futsi bamilwa ngematfumba.+ 10 Ngako bamikisa leLibhokisi laNkulunkulu weliciniso e-Ekroni,+ kodvwa ngekushesha nje nalifika e-Ekroni, bantfu bakhona bacala kukhala batsi: “Baletse leLibhokisi laNkulunkulu wema-Israyeli lapha kitsi kuze babulale tsine nebantfu bakitsi!”+ 11 Babese babita bonkhe baholi bemaFilisti futsi babahlanganisa ndzawonye, batsi: “Susani leLibhokisi laNkulunkulu wema-Israyeli; libuyiseleni endzaweni yalo kuze tsine nebantfu bakitsi singabulawa.” Bonkhe bantfu kulelidolobha besebesaba kufa. Sandla saNkulunkulu weliciniso besibajezise kabuhlungu.+ 12 Bantfu lebebangakafi bebashaywe ngematfumba. Lelidolobha lakhalela lusito futsi kukhala kwalo kwenyukela emazulwini.